онлајн – Kurir.mk

Акција против криминални групи во онлајн инвестициска измама во Германија, Србија, Кипар и Бугарија

Ивона Петрова — Fri, 13 Jan 2023 07:35:41 +0000

Полициски и судски власти од Германија, Србија, Кипар и од Бугарија, поддржани од Европол и Евроџаст, презеле акција против организирани криминални групи вклучени во онлајн инвестициска измама. Таа криминална мрежа, која се состои од голем број различни криминални актери кои работат преку центри за повици, ги намамувала жртвите да инвестираат големи суми пари во лажни шеми за криптовалути. Европол формираше Оперативна работна група за поддршка на прекуграничната истрага. Според Европол, досега има 15 апсења, 14 во Србија и едно во Германија; Испрашани се 261 лице, од кои некои чекаат кривично гонење (42 во Бугарија, 2 во Кипар, 3 во Германија и 214 во Србија); Пребарани 22 локации (пет во Бугарија, две во Кипар, 15 во Србија). Заплените вклучуваат три хардверски паричници со околу милион американски долари во криптовалути и околу 50.000 евра во готовина, три возила, електронска опрема и резервни копии на податоци, документи. Осомничените користеле реклами на социјалните мрежи за да ги намамат жртвите на веб-страници тајно управувани од криминалци, кои нуделе навидум исклучителни можности за инвестирање во криптовалути. Жртвите, главно од Германија, прво инвестирале ниски, трицифрени суми. Лажните покачувања на цените што доведуваат до наводно профитабилен профит за инвеститорите потоа ги убедуваат да вршат трансфери на повисоки износи. Во моментов се проценува дека финансиската штета на германските жртви е над два милиони евра, додека жртви имаат и други земји како Швајцарија, Австралија и Канада. Истрагата сугерира дека бројот на непријавени случаи најверојатно ќе биде многу поголем. Тоа би значело дека нелегалните добивки што ги создаваат криминалните групи, со најмалку четири кол-центри во источна Европа, може да изнесуваат стотици милиони евра. Европол ја поддржува таа истрага од јуни 2022 година по првичното барање од Германија.

Во 2022 година Грците први во Европа по онлајн купување од странство

Ристе Здравков — Fri, 06 Jan 2023 11:30:29 +0000

Грците се на прво место во Европа по купувања од меѓународни онлајн продавници во 2022 година, се наведува со европското истражување на „ПејПал е PayPal e-комерс индекс 2022“ (PayPal e-Commerce Index). Во 2022 година, 87 отсто од грчките потрошувачи купувале од меѓународни онлајн продавници, а како главните причини за тоа ги навеле: најдобра цена, поширок опсег на достапни артикли, можност за откривање нови интересни производи. На второ место се Ирците, кои 83 проценти од нив купувале во меѓународни онлајн продавници, Германците се трети (82 отсто), а граѓаните на Израел се четврти со 79 проценти по меѓународните купувања преку интернет. Во исто време, 28 отсто од прометот на грчките електронски продавници доаѓа од странство. Просечниот број на Европејци кои купуваат од онлајн продавници во странство во 2022 година е 74 проценти.

Дури 72 отсто од Македонците читаат вести онлајн

Магдалена Андонова — Wed, 24 Aug 2022 11:42:39 +0000

Седумдесет и два отсто од корисниците на интернет во Северна Македонија читаат вести онлајн, покажува истражувањето на Евростат. Од земјите во регионот, повеќе од македонските граѓани, вести на интернет читаат Грците (90 отсто), Црногорците (80) и Србите (77), а помалку Албанците (58 отсто). Во ЕУ, девет од десет луѓе на возраст меѓу 16 и 74 години, користеле интернет минатата година, а најмногу за читање вести. Меѓу земјите членки на ЕУ, најмногу корисници на интернет кои читаат онлјан вести се регистрирани во Финска (93 отсто), Литванија и Чешка (92 отсто) и Хрватска и Грција (90 отсто). Најмалку читатели на вести на интернет има во Романија (59 проценти), Германија (62 проценти), Франција (63 проценти), Италија (64 проценти) и Белгија (67 проценти). Во споредба со 2016 година, употребата на интернет за читање онлајн вести се зголемила повеќе кај жените, отколку кај мажите, но генерално, според Евростат мажите го користеле интернетот за читање вести почесто од жените, 74 отсто во споредба со 71 отсто. Читањето на „онлајн сајтови за вести“ е најпопуларно кај возрасната група од 25 до 54 години (75 отсто). Процентот на корисници на интернет најмногу се зголемил во руралните средини (од 65 отсто во 2016 година на 69 отсто во 2021). Според степенот на образование, пак, онлајн вести најмногу читаат луѓето со високо образование – 85 отсто, додека кај граѓаните со пониско ниво на образование тој процент изнесува 57.

Д-р Беќаровски: Тие што се плашат од зараза, наставата да ја следат онлајн

Тале Кристо — Mon, 31 Jan 2022 20:40:58 +0000

Докторот Нико Беќаровски од Клиниката за Токсикологија има неколку предлози околу тоа како утре треба да почне и да се одвива второто полугодие од учебната година. Според него, утре сите ученици кои сакаат да посетуваат настава во живо да се вратат во училишните клупи, а останатите (позитивните и тие кои се плашат од зараза) истата да ја следат онлајн, а да присуствуваат физички при тестирање и оценување. -За сите наставници и ученици со симптоми да биде обезбедено тестирање секој понеделник, а сите позитивни наставници кои ќе бидат со општа добра здравствена состојба, да им се дозволи држење на наставата од домовите, без да им се одзема процентот за боледување, кој и не е така мал. После тоа сметам училниците треба да се проветруваат 5 минути по секој завршен час, а никако во текот на самиот час, предлага Беќаровски. Докторот смета дека треба пред почеток на наставата, за време на големиот одмор и по часовите задолжителна дезинфекција на сите простории. -Одлуката за носење маски на секое дете до 5 одделение да ја донесат неговите родители, со писмена изјава, додава Беќаровски. Владата минатата недела одлучи второто полугодие во основните и средните училишта да почне утре со физичко присуство на учениците, при што зачестија барањата за почеток на второто полугодие со онлајн настава.

СДСМ на онлајн конгрес ќе бира заменик-претседател и членови на Централниот и Надзорниот одбор

Тале Кристо — Sun, 16 May 2021 07:07:24 +0000

Социјалдемократскиот сојуз денеска на онлајн конгрес треба да избере заменик-претседател на партијата, членови на Централниот одбор и членови на Надзорниот одбор. По конгресот следуваат состаноците на кои ќе се бираат потпретседателите на партијата, генералниот секретар, организациски секретар, секретар за меѓународна соработка, Извршниот одбор на партијата, односно управното раководство. Во моментов, заменик-претседател на Социјалдемократскиот сојуз е Радмила Шекеринска, генерален секретар на СДСМ е Љупчо Николовски, а потпретседатели Мила Царовска, Оливер Спасовски, Коста Петров и Мухамед Зеќири. Вчера, премиерот и лидер на СДСМ Зоран Заев не сакаше да говори за тоа кој би се нашол во новото раководство. Партијата, рече тој, е отворена за нови луѓе, а во новиот конгрес влегуваме со нови политики. Министерката за одбрана Радмила Шекеринска која досега ја извршуваше функцијата заменик-претседател на партијата вчера уште еднаш повтори дека не треба да биде дел од раководната структура на СДСМ во следниот период и тоа, како што истакна, се однесува на сите функции. Таа потврди дека останува во СДСМ. Како што рече, не е од оние луѓе кои веруваат во вредности и припаѓаат на некоја партија само како фунционери. -Верувам во работа и сработено, а не во функции. Не мислам дека треба да помогнеме на државата само ако носиме значка на функционер, партиски или државен, рече Шекеринска. Вчера на новинарски прашања поврзани со конгресот одговараше и министерот за здравство Венко Филипче кој истакна дека со лидерот на СДСМ, Зоран Заев досега не разговарал за негово евентуално назначување на местото на Радмила Шекеринска – потпретседател на партијата. Филипче верува дека Заев повторно ќе го направи најдобриот тим и дека ќе продолжи да ги спроведува, како што рече, успешните политики. -Не сум разговарал на таа тема со претседателот Заев. Преокупирани сме со менаџирање на овој процес, на кризата и вакцинацијата. Верувам дека ќе го направи најдобриот тим исто како што беше и до сега и дека ќе продолжи успешно да работи на полето на имплементирањето на сите успешни политики исто како и досега, истакна Филипче. На 21 март годинава Зоран Заев со 59.240 гласа „за“, 865 „против“ и со 277 неважечки ливчиња беше избран за претседател на СДСМ на првите непосредни внатрепартиски избори.

Николоски, Милошоски и Ѓорчев го следеа онлајн 69-от молитвен појадок во Вашингтон

Тале Кристо — Tue, 09 Feb 2021 12:26:35 +0000

Пратениците Александар Николоски и Антонио Милошоски, како и меѓународниот секретар на ВМРО-ДПМНЕ, Владимир Ѓорчев го следеа онлајн 69-от молитвен појадок во Вашингтон. Оваа година за прв пат молитвениот појадок се одржа виртуелно, преку онлајн обраќања поради ковид пандемијата. Главни говорници беа претседателот на САД Џо Бајден и спикерот на Конгресот Ненси Пелоси. Во своето обраќање претседателот Бајден нагласи дека овој традиционален настан ги собира и обединува луѓето од различни земји, култури, партии и убедувања. Претседателот Бајден повика на дух на обединување и надминување на разликите. Претседателката на Конгресот на САД Ненси Пелоси особено се задржа на ковид кризата, која изминатава година ги зафати САД и светот. Пелоси нагласи дека треба да сеќаваме на бројните жртви, како и да им се помогне на тие кои што сеупте страдаат од ковид кризата. Воедно, за време на Молитвениот појадок имаше поголем број на обраќања на сенатори и конгресмени од редовите на Демократите и Републиканците. За време на онлајн собирот на учесниците од Европа свои обраќања имаа Милошоски и Ѓорчев, нагласувајќи дека се работи за одличен настан кој што ги обединува и зближува луѓето.

АСОМ: Владата итно да ја продолжи уредбата за он-лајн спортско обложување – државата ризикува да изгуби стотици милиони денари во буџетот

Магдалена Андонова — Mon, 21 Dec 2020 15:14:16 +0000

Асоцијацијата на спортски обложувалници на Македонија реагира до Владата дека утре, 22 декември, истекува рокот за преточување на уредбата со законска сила во трајно законско решение или евентуално друго правно решение со кое би се продолжило он-лајн обложувањето преку македонските лиценцирани спортски обложувалници. Со прекин на уредбата, велат од АСОМ, се гасат сервисите на домашните лиценцирани обложувалници, а државата ризикува да изгуби неколку стотици милиони денари на годишно ниво, средства кои, во услови на сериозна глобална економска дестабилизација заради Ковид-19 пандемијата, имаат значаен придонес во државната економија. „Бараме итно, по кратка постапка, Владата да ја имплементира уредбата во Законот за игри на среќа и забавните игри. Владата имаше 6 месеци да најде правно решение за продолжување на уредбата, но тоа не се случи. Ние апелиравме преку медиумите, но и до Владата и Мистерството за финасии со барање за средба за да ги адресираме предизвиците, но и придобивките од индустријата, но досега апсолутно немаше слух за тоа. Затоа ние уште денеска до Владата и Министерството за финансии ќе доставиме предлог текст за имплементирање на Уредбата во Законот за игри на среќа и забавните игри, кој сметаме дека треба итно да се донесе. Несфатливо е како во услови на економска нестабилност предизвикана од ковидкризата, државата не ја гледа вредноста во буџетот која ја донесе он-лајн обложувањето. Од друга страна и здравствениот аспект во смисла дека он-лајн обложувањето го намали физичкото присуство во објектите. За илустрација, од воведувањето на он-лајн обложување преку македонски лиценцирани обложувалници од мај годинава до декември од оваа услуга се слеале повеќе од 100 милиони денари во државната економија. Поконкретно од 4% посебна давачка за он-лајн околу 35 милиони денари и 65 милиони денари од данокот на личен доход.“ – истакнуваат од АСОМ. Од АСОМ укажуваат дека кај нас он-лајн обложувањето е сé уште на почеток. Играчите полека почнаа да стекнуваат навика да ја користат оваа услуга на домашните сајтови на лиценцираните спортски обложувалници. Тоа перспективно во државата би значело многу поголеми средства само од оваа услуга. Но ако сега се прекине и не се најде соодветно правно решение за продолжување на он-лајн обложувањето тоа ќе предизвика недоверба кај играчите и нивно повторно враќање кон нелегалното он-лајн обложување на странските сајтови. Играчите едноставно ќе бараат алтернатива, апелираат од АСОМ, а државата ќе нема контрола врз обложувањето. Парите за данокот, наместо во буџетот, ќе се одлеваат надвор од државата, според некои проценки станува збор за 40 до 50 милиони евра, средства кои се од значаен интерес за нашата домашна економија, одржувањето и отворањето на нови работни места и инвестиции. Дополнително, велат од АСОМ не смее да се занемари фактот дека носењето на уредбата поттикна инвестиции во софтер, хардвер, маркетинг и човечки ресурси за он-лајн обложување кај домашните лиценцирани спортски обложувалници, средства кои практично сега излегува дека се залудно вложени. Инаку, од АСОМ посочуваат дека ниту Државна Видео Лотарија на Македонија (ДВЛМ) нема право да приредува интернет игри на среќа, но изразуваат сомнеж дека ДВЛМ тоа нема да го почитува. „Немањето подзаконски акти значи дека никој не може да приредува интернет игри на среќа, па ни ДВЛМ бидејќи без овие акти никој неможе да ги добие потребните дозволи и лиценци за приредување на интернет игрите на среќа. И во периодот додека важеше Уредбата со законска сила за примена на Законот за игрите на среќа и забавните игри за време на вондредна состојба ДВЛМ работеше според постоечкиот закон и не ја применуваше Уредбата онака како што беше истата пропишана. Сето ова отвора сомневање за селективен пристап кон различни категории на приредувачи на игри на среќа и повластена положба на одредени субјекти во приредувањето на интернет игрите на среќа.“ – истакнуваат од АСОМ. Од Асоцијацијата потсетуваат дека и покрај тоа што он-лајн обложувањето, согласно член 19 од Законот за игри на среќа на странските сајтови е спротивно на законот и ваквиот начин не гарантира никаква безбедност во однос на уплатите и исплатите, играчите сепак практикуваа и сé уште практикуваат он-лајн обложување на странски сајтови. Од друга страна, он-лајн обложувањето на сајтовите на домашните обложувалници се покажа како безбедно, сигурно и едноставно. Асоцијацијата до Министерството за финансии, повикувајќи се на истиот член од Законот за игри на среќа (член 19) испрати допис, со кој побара да се информираат странските приредувачи на игри на среќа кои нелегално и без лиценца приредуваа он-лајн обложување дека е забрането учество на граѓаните на Република Северна Македонија. Согласно ова, доколку Управата за јавни приходи утврди прилив на парични средства од учество во игри на среќа кај странски нелиценцирани приредувачи на игри на среќа, тоа подлежи на високи парични казни за играчите. Со тоа велат од Асоцијацијата, укажавме и алармиравме на сите можни прекршувања на Законот, додека при ноење на уредбата, целосно ги подготвивме и адаптиравме услугите за играчите и ги прифативме условите кои ги наметна државата за овозможување на оваа услуга. „Кога се донесе уредбата, ние како Асоцијација ја поздравивме оваа уредба на Владата. Таа дојде во вистински момент, како соодветен одговор на коронакризата и навистина помогна да се зачуваат многу работни места кои директно и индиректно ги одржува нашата индустрија. Дополнително мора да се земе во предвид дека оваа индустрија има и значаен придонес во државната економија. Ние, во републичкиот и локалните буџети во 2018 година сме придонеле со околу 253 милиони, пари кои се користат директно за потребите на сите граѓани во државава. Нашата индустрија позитивно влијае и врз развојот на други стопански гранки, преку средства кои се слеваат во други дејности и придонесуваат за стопански развој во земјата. Воедно, во спортските обложувалници се вработени околу 4.500 луѓе, а целата индустрија поддржува околу 54.000 работни места.“ – истакнуваат од АСОМ и нагласуваат дека исклучително е важно да и се помогне индустријата за да се зачуваат работните места, да се обезбеди одржливост, а со тоа и финансискиот придонес кој индустијата го има во државната економија. Инаку, спортските обложувалници беа меѓу првите деловни субјекти опфатени со рестриктивните мерки на Владата против Ковид-19, на почетокот на годината. Прво, беше донесена одлука спортските обложувалници да работат со скратено работно време, но набрзо потоа, на 14 март обложувалниците беа целосно затворени до 13 мај, кога Владата донесе одлука за повторно отворање на уплатно-исплатните места на приредувачите на игри на среќа во обложувалница, со посебно утврдени протоколи за работа. И покрај кризата спортските обложувалници не отпуштија ниту еден вработен. Со повторното отворање на објектите, сите вработени во спортските обложувалници, членки на АСОМ, се вратија на своите работни места. Членките на Асоцијацијата во целост ги почитуваат сите мерки кои ги носи Владата со цел заштита на здравјето на граѓаните и работат согласно пропишаните протоколи. Уредбата со законска сила со која се овозможи он-лајн спортко обложување преку македонските лиценцирани обложувалници се донесе на 24 април со важност до 22 декември, 2020 година. Асоцијацијата на спортски обложувалници на Македонија е активен чинител во општеството и заедно со своите членки работи одговорно, создава услови за работа и кариера, придонесува во економијата и активно делува на полето на општествената одговорност за поддршка на заедницата. АСОМ е формирана 2013 година, а членки на асоцијацијата се: Моцарт, Спорт Лајф, Златна Копачка, Евротип и Марбет.

Хрватска: Средните училишта и дел од основните преминуваат на онлајн настава

Тале Кристо — Mon, 14 Dec 2020 07:52:12 +0000

Во Хрватска, средните училишта во сите жупании и повисоките одделенија во основните училишта во четири жупании од денеска ќе ја следат наставата преку интернет. Меѓимурје, Вараждин, Загреб, Осијек-Барања, Вуковар-Срем и Пожега-Славонија веќе имаат часови според моделот Ц во средните училишта, а на нив ќе се приклучат и преостанатите жупании и градот Загреб, јавија хрватски медиуми. Кога станува збор за основните училишта, учениците од петто до осмо одделение веќе следат настава преку интернет во Вараждинска жупанија, а сега нивните врсници во Истра, Меѓимурје и Приморје-Горски Котар исто така ќе следат настава од дома.

Стојаноска: Никој не може да ме убеди дека дебата во живо во Собрание може да се замени со онлајн

Магдалена Андонова — Thu, 15 Oct 2020 18:34:34 +0000

Мислам дека има и кривична одговорност има ако се прекршат правилата предвидени за болни од корона вирус. Ако некој е позитивен оди во изолација и нема тука простор за изнаоѓање на решение за доаѓање и слично, рече Дафина Стојаноска, пратеничка и член на Извршниот комитет на ВМРО-ДПМНЕ на гостувањето на телевизија Телма во емисијата „Вин вин“. Според неа на пратениците им е даден мандат од граѓаните да одат во Собрание и да расправаат. -Тоа е и уставна категорија. Уставот вели присуство и дебатирање, одлучување во Собрание, кажа Стојаноска. Стојаноска посочи дека можеби и треба да се дизајнираат начини за работа на пратениците во одредени услови како на пример сега оваа со корона кризата. -Но, не може никој да ме убеди дека директната дебата треба да се замени, тоа е клучот на нашата работа како пратеници, посочи Стојаноска. Пратеничката Стојаноска укажа дека на координациите на пратеничката група на ВМРО-ДПМНЕ се функционира по сите протоколи со дистанца, распоред со договорено присуство и слично. -Доколку сите се задаржиме на тоа, функционирањето е возможно, вели Стојаноска.

Пратниците ќе гласаат онлајн

Магдалена Андонова — Tue, 01 Sep 2020 13:44:11 +0000

Поради коронавирусот Собранието се подготвува да работи од далечина. Ова го потврди претседателот на Собранието Талат Џафери на средбата со британската амбасадорка во Македонија Рејчел Галовеј на денешната средба. Претходно беше најавено дека се подготвува платформа која ќе овозможи пратениците да работат и да гласаат онлајн. -Соочени со предизвиците од пандемијата со ковид-19, сите заедно ќе треба консензуално да изградат деловничка основа за можност за работа на Собранието од далечина, особено за гласање од далечина, бидејќи неизвесноста со пандемијата во претстојниот есенски и зимски период е голема и ќе изискува ставање во располагање на сите капацитети за справување со овие ризици, како и донесување на времени правила за работа на Собранието во вонредна состојба, соопшти Собранието.