органска храна – Kurir.mk

Еко Партнерс го одбележа европскиот ден на органска храна под мотото „Дојди, види, вкуси“

Super Admin — Mon, 25 Sep 2023 10:11:18 +0000

Здружението на граѓани за екологија, туризам, органско производство и истражувачка дејност „Еко Партнерс“, по четврти пат, ја организираше манифестацијата „Ден на органско производство и форум за еко туризам преку регионални практики“. Во паркот Ѓорче Петров изложуваа повеќе од 40 производители на органска храна, вина и крафт пиво. Жителите на населбата, но и сите Скопјани, уживаа во звуците на музичкиот вокал Агни Авшар и бендот Brainfreezers. Здружението „Еко Партнерс“, со оваа манифестација го одбележа Европскиот ден на органска храна во рамки на кампањата „Дојди, види, вкуси“. Манифестацијата е поддржана од Министерството за земјоделство, шумарство и водостопанство. „Продолжуваме да ја спроведуваме визијата на Еко Партнерс, градење јак локален и регионален развој кој ќе овозможи заштита на животната средина и работи за зајакнување, вмрежување на локалните и регионалните капацитети на микро и семејните бизниси, на полето од органското производство, екотуризмот, агри туризмот, екологијата, создавајки услови за нови зелени работни места и оддржливост на дестинациите. Благодарни сме за поддршката на Министерството за земјоделство, шумарство и водостопанство и Општина Ѓорче Петров, но и на сите овогодинешни изложувачи - производители на органска храна, вина и крафт пиво. Натанот е одлична можност на едно место да се споделат искуства, изложат органските производи и испрезентираат практиките во руралниот туризам, вмрежат органските производители на едно место и приближат регионалните практики и ќе овозможат продолжување на растотот на ова производство и еко туризмот со дополнителен финансиски импакт и зајакнат локалниот економски развој“, истакна Дејан Арсов, како претставник на Здружението „Еко Партнерс“. За овие четири години на манифестацијата имаше повеќе од 10.000 посетители, со што интензивно се работи на полето на промоција на руралниот туризам кој последниве години е во подем. „Нашата земја со својата местоположба, клима и гостопримливост, се наметнува како една од земјите со најголем потенцијал за ено-гастро туризмот како клучен сегмент од туристичката понуда“, велат од „Еко Партнерс“. Ивица Стевковски од винарија Кувин го изрази своето задоволство и на овој начин го доближивме виното до нашите купувачи. „И секако, би учествувале на настани за промоција на органската храна, вино и пиво“. Манифестацијата „Ден на органско производство и форум за еко туризам преку регионални практики“ ја поддржа и Агенцијата за односи со јавност Чептер 4.

Од најголем асортиман на органска храна, до сегмент за нега и убавина – што сè можете да пронајдете во dm дрогериите?

Super Admin — Tue, 21 Sep 2021 10:45:27 +0000

Потрошувачите може да ги пронајдат своите омилени производи од dm, дури во 20 дрогерии во нашата земја.

Идентичен квалитет на производите во сите земји

Покрај тоа што располагаат со широка палета на производи во секој поединечен асортиман, dm е е еден од најголемите понудувачи на приватни трговски марки на пазарот во нашата земја, со речиси 4.000 производи. Добропознатите dm брендови: Balea, alverde, dmBio, babylove, Denkmit и други, гарантираат идентичен квалитет во сите 13 земји во кои компанијата работи. Оваа година, компанијата ги одбележи јубилеите на најпрепознатливите линии на приватни трговски марки. Брендот Denkmit кој ги освојува домаќинствата во нашата земја од 2012 година, кога компанијата dm drogerie markt пристигна во нашата земја, го прослави 30. роденден, додека познатата марка Balea која пружа комплетна нега од глава до пети, прослави 35 години постоење.

За органска храна и додатоци во исхрана за целото семејство

Приватната марка dmBio е уште еден заштитен знак на компанијата и претставува бренд со најширок асортиман на органска храна на нашиот пазар, кој на купувачите им е достапен по пристапни цени во сите dm дрогерии во земјата. Со речиси 400 производи од органско потекло, dmBio ви овозможува секој оброк да го збогатите со хранливи состојки – органски житарки, намази, јаткасти плодови, грицки, различни тестенини, зачини, сосови, масла или јадења за брза подготовка. Покрај тоа, на полиците во dm дрогериите се наоѓа богат избор на протеинска програма и производи за зајакнување на имунитетот кои на вашиот организам ќе му пружат идеален баланс и енергија.

Сè за вашата нега и убавина

Времето на универзалните креми за нега на лице, сега е минато. Со други зборови, нашата кожа бара покомплексна нега, а фокусот е сè повеќе врз состојките и квалитетот на производите. Затоа dm дрогериите нудат голем број на нови брендови, хибридни и повеќенаменски производи, природна и органска козметика. Во dm дрогериите може да пронајдете преку 30 ексклузивни брендови меѓу кои можат да се издвојат Q&A, MBeauty, It’s skin, Baylis&Harding, Creightons, а секогаш можете и да се информирате за новостите од областа на негата на лице. Исто така, богатиот асортиман на шминки е крунисан со производи на база на природни состојки кои ќе одговорат на потребите на потрошувачите кои настојуваат на својата кожа да ѝ пружат најдобар третман.

Сè за вашето дете

Адаптирани млечни формули за секоја возраст, храна за бебиња, флашички, цуцли, производи за нега и хигиена, се само дел од асортиманот поради кој токму ова катче е чест избор на родителите. Тука е и големиот избор на различни марки и видови на пелени со најдобар квалитет, влажни марамици, бебешки пудри, платнени и пелени за пливање. Врвните производи од квалитетни марки, како што се babylove, Hipp, Becutan, Pampers, ќе ги освојат родителите и нивните малечки уште од првиот ден.

Сè за вашиот дом – асортиман со кој ќе го засакате чистењето

Брендот со долга традиција и ,,главната ѕвезда’’ за чистење од dm дрогериите, Denkmit, опфаќа производи за перење и нега на алишта и отстранување на дамки, специјални средства за чистење на домаќинството, иновативни освежувачи за простории и фрижидер, како и парфеми за алишта. Овој симбол за високоефикасни средства за перење, чистење и бришење, покрај многу поволните цени, го карактеризираат и највисоките стандарди за производство. Покрај тоа, реномираните марки кои може да ги пронајдете во dm дрогериите, како што се Cillit Bang, Frosch, Cif и многу други, ќе ви овозможат да ги засакате домашните активности, па дури и чистењето на најпроблематичните предели во вашето домаќинство. Компанијата dm drogerie markt ќе продолжи да го развива целокупниот асортиман, водена секогаш со истата цел – да одговори на потребите на потрошувачите и секојдневно дрогериите да ги прави уште подобро место за пазарување.

Истражување кое шокираше многумина: Органската храна е полоша од обичната

Ивана Ефремовски — Tue, 18 Dec 2018 16:14:51 +0000

Во последните десетина години спроведени се бројни научни студии во кои е споредувана органската храна со конвенционалната. Тие засега не успеале да претстават некои уверливи податоци, кои би покажале дека органските производи, кои честопати се два до трипати поскапи, нутриционистички се значајно подобри од конвенционалните. Една опсежна студија на оваа тема, спроведена во 2017 година, утврдила дека органската храна има помали траги на пестициди, но тоа не значи дека ги нема воопшто бидејќи и во органското земјоделство може да се користат некои пестициди. Меѓународен тим експерти од САД, Шведска, Франција и Германија, кои во нивното истражување, претставено во угледното научно списание „Нејчр“, ја откриваат проблематичната страна на органското производство. Според нивните анализи, органската храна е многу полоша за климатските промени од конвенционалната. Заклучок на студијата е дека приносите во органското производство се значајно помали по единици земјоделски површини отколку во конвенционалното, што како последици има поголемо уништување на шумите и поголеми емисии на стакленички гасови ЦО2, што е клучна причина за климатските промени. Медицинските експерти главно се согласни дека е многу важно да се води сметка за тоа изборот на храна да биде добар, односно дневно да содржи доволно овошје и зеленчук, отколку да се органски одгледувани.

Може ли консумацијата на органска храна да нè заштити од рак?

Предраг Кукиќ — Fri, 26 Oct 2018 14:31:35 +0000

Невозможно е да се докаже во лабораториска средина дека прехранбен производ го намалува ризикот од рак. Следствено на тоа, научниците треба долго време да ја следат здравствената состојба на луѓето и да почекаат кај некои од нив да се развие рак, надевајќи се последователно да идентификуваат однесување кое е карактеристично за погодените од болеста. Истражувањето на научниците од Сорбона, Францускиот институт за агрономски истражувања и Францускиот институт за здравство и медицински истражувања опфатило околу 69.000 доброволци, главно жени. Хипотезата е дека консументите на биохрани голтаат помалку синтетички пестициди, додека јадат овошје, зеленчук и житарици, и на тој начин се помалку загрозени од рак, бидејќи се претпоставува дека некои пестициди се канцерогени. Учесниците пополниле прашалници за приход, физичката активност, дали пушат или не, за индекс на телесна маса и посочиле какви биохрани консумирале во последните 24 часа. Тие потоа биле поделени во четири групи во зависност од потрошувачката на органска храна. Случаите на рак биле забележани во секоја група во просек од четири и пол години. Се покажало дека за учесниците кои изјавиле дека консумираат најмногу биохрани, ризикот од рак е за 25 отсто помал отколку за волонтерите кои воопшто не внесувале слична храна. Истражувањето сепак открива значајна статистичка поврзаност исклучиво за ризикот од рак на дојка за жените во менопауза и ризикот од лимфоми, особено од „Non-Hodgkin“ лимфом. Резултатите од студијата се објавени во Journal of the American Medical Association.

Саем на органска храна во струшко

Ивона Петрова — Sun, 21 Oct 2018 10:48:29 +0000

Земјоделци, пчелари и туристички работници од руралните средини во струшко ги претставија своите производи во Вевчани на саемот за органска храна „Органско на нива, традиционално на трпеза“. Саемот е дел од проектот „Органска фарма – Рурална кохезија за зголемен потенцијал на руралниот туризам и одржлив економски рурален развој”, имплементиран од здружение Креативен центар „Рурбанкулт-Струга“ и Здружение на пчелари „Матица 2012“. Саемот, како што истакна координаторката на проектот Зора Кленкоска, го промовираше локалното органско производство на здрава храна и нејзината понуда како традиционален рурален туристички производ, односно фармерскиот туризам, кој автентично го доловува или исполнува пакетот туристички услуги во руралната средина. – Акцентот се става на стимулирање на развојот и зголемувањето на земјоделското производството на локалната здрава храна и нејзина примена во функција на руралната туристичка понуда. Настанот ја презентираше кохезијата на формите на рурални дејности, кои најчесто се одвиваат како интегрирани активности и можноста со нивното поврзување во географски подрачја да претставува потенцијално остварување на приходи, посочи Кленкоска. Крајната цел, додаде, е поврзување на чинителите на руралните средини и нивна меѓусебна соработка од заеднички интерес, интегрирано дејствување во бизнис сферата, зголемување на сопствените приходи, а со тоа зголемување и на економскиот одржлив развој на руралните заедници. За производството, доработка и преработка на органска храна говореше Горан Колев, земјоделски инжињер, експерт за органска храна со сертификат од сертификационото тело на ПРО ЦЕРТ. Настанот, каде покрја посетители од Струга и струшко имаше и гости од дебарско, охридско и кавадаречко заврши со дегустација на вкусните традиционални специјалитети од локална органска храна,подготвени од локалните угостителски мајстори. Проектот „Органска фарма – Рурална кохезија за зголемен потенцијал на руралниот туризам и одржлив економски рурален развој”, е поддржан во рамки на програмата за мали грантови на проектот „Национален рурален парламент како глас на руралното население“, спроведуван од ЦНВП, МРР на РМ и АкРРа, финансиран од Европска унија. МИА

Дегустација, едукација и забава на Фестивалот на органска храна во Градски парк

Матеја Петровски — Sun, 02 Sep 2018 10:42:28 +0000

Компири, грав, грозје, кромид, пиперки, краставици, лук, пченка, патлиџан, пелистерски и мариовски мед, козјо сирење и млеко, козметика, ракотворби, се само дел од производите што може да се дегустираат и купат на годинашниот 8. Фестивал на органска храна во Скопје. Фестивалот се одржува викендов на Школка, во Градски парк. Освен дегустација и продажба на производите, нуди и музика, дружење и едукација. Штандови имаат повеќе од 20 органски производители и изложувачи на органски производи. „Никулците како супер храна и придобивките од нив“, „Лековитите габи - потентни зајакнувачи на имунитетот“ и „Социјални претпријатија и органска нега“ се темите на трите работилници предвидени за денеска, по што следуваат други содржини од интерактивната програма и забава. Фестивалот ќе заврши попладне со јога за возрасни, а беше отворен вчера со јога за деца. Присутните имаа можност да научат нешто повеќе и за влијанието на храната кај лицата со посебни потреби. Покровител на манифестацијата е Град Скопје.