осигурителни компании – Kurir.mk

Осигурителните компании во САД престанаа да даваат полиси за имотно осигурување од природни катастрофи поради климатските промени

Тале Кристо — Mon, 04 Sep 2023 17:37:16 +0000

Американските осигурителни компании сѐ повеќе се откажуваат од понуди за имотно осигурување во регионите погодени од екстремни природни катастрофи како урагани, тајфуни или пожари, а тие кои даваат такви полиси наплаќаат по астрономски цени, јави денеска Вашингтон пост. Најмалку пет големи осигурителни компании од САД специјализирани за осигурување на имот - Allstate, American Family, Nationwide, Erie Insurance Group и Berkshire Hathaway се обратиле до регулаторите дека екстремните временски настани предизвикани од климатските промени ги спречуваат да доделуваат покритие во некои региони. Ако доделуваат, ја исклучуваат штетата предизвикана од разни временски непогоди или пак ги зголемуваат месечните исплати. Весникот пишува дека осигурителите нема да признаваат штети од урагани, ветришта или град во полисите доделени за објекти на крајбрежјето или во шумските подрачја, региони подложни на урагани и пожари, според анкета изведена од Националното здружение на осигурителни комесари, група на државни службеници кои ги регулираат ратите и осигурителните формулари и политики. Провајдерите за осигурување на имот обични нудат годишни договори. По ударот на ураганот Идалија на западниот брег на Флорида, што остави огромна материјална штета, многу сопственици на домови се пожалија за двојно или тројно зголемени годишни премиуми, јави викендов телевизијата Фокс њуз. - Осигурувањето за домовите во некои делови на Флорида порасна од околу 30,000 долари годишно за дом колку што се плаќаше пред Идалија, на над 100,000 долари сега, изјави агент за недвижности од Флорида. Во Флорида викендов во инспекција на местата погодени од Идалија беше американскиот претседател Џо Бајден кој вети помош за обнова на разурнатите делови од полуостровот.

Француското Здружение на потрошувачи бара од осигурителните компании да им вратат на граѓаните околу две милијарди евра

Тале Кристо — Mon, 27 Apr 2020 12:17:16 +0000

Здружението на потрошувачи „УФЦ-Ке шуазир“, бара од осигурителните компании да им ги вратат на своите автомобилски осигуреници уплатите бидејќи се намалени сообраќајните несреќи поради мерките на ограничување на движење поради новиот коронавирус, јави дописникот на МИА. Здужението наведува дека од почетокот на рестриктивните мерки на 17 март, бројот на телесните повреди во патниот сообраќај е намален за 91 отсто. Намалувањето на повредите доведе до заштеда од 1,4 до 2,3 милијарди евра. Ако сообраќајот стане нормален во јуни, тоа ќе претставува заштеда од 1,8 милијарди евра. Наспроти буџетската криза со која се соочени домаќинствата поради ограничувачките мерки, здружението „УФЦ-Ке шуазир“ побара од Министерството за економија и финансии да им наметне на автомобилските осигурителни компании да им ги вратат на осигурениците заштедите, со што ќе биде зајакнат буџетот на домаќинствата. Здружението бара намалување на уплатите за 50 евра за автомобил и 29 евра за мотоцикл. Ова намалување е легитимно, бидејќи законот за осигурување предвидува дека осигуреникот може да добие намалување на уплатата во случај на намалување на ризиците за времетраењето на договорот. Здружението, исто така им советува на осигурениците да им се обратат на своите компании со писмено барање за намалување на нивната котизација. Во меѓувреме, три осигурителни компании веќе најавија дека ќе им вратат дел од уплатите на своите осигуреници, поради намалениот ризик.

Осигурителните компании ќе исплатат над 10 милијарди долари поради пожарите во Калифорнија

Ивона Петрова — Thu, 29 Nov 2018 09:18:32 +0000

Штетата од неодамнешните шумски пожари во Калифорнија, осигурителните компании ќе ги чини повеќе од 10 милијарди долари, процени германската фирма за реосигурување „Минхен Ре“, која исто така финансиски ќе биде погодена од огнената стихија. Кабинети на независни експерти проценија дека штетата која ќе треба да ја покријат осигурителните компании ќе изнесува меѓу 10 и 15 милијарди долари, изјави Јоаким Венинг, директор на тој германски гигант во областа на осигурувањето. Венинг посочи дека американската фирма РМС на 19 ноември ја проценила штетата во Калифорнија на 10 до 13 милијарди долари. „Минхен Ре“, чија основна задача е поддршка на осигурителните компании при ризик, би требало да им исплати неколку стотина милиони евра поради пожарите, но не планира тоа да биде повеќе од половина милијарди евра, истакна Венинг. Целта на таа германска компанија е да стекне нето бенефит од 2,1 до 2,5 милијарди евра оваа година. МИА