основен суд тетово – Kurir.mk

Судот ќе ги објави пресудите за обвинетите за пожарот во модуларната болница во Тетово

Дарко Андоновски — Mon, 05 Jun 2023 07:01:54 +0000

Во Основниот суд во Тетово денес во 12 часот треба да биде изречена пресудата за обвинетите во судскиот процес за пожарот во модуларната болница што се случи на 8 септември 2021 година кога животите ги загубија 14 луѓе. На 29 мај беа искажани завршните зборови на Обвинителство и адвокатите на обвинетите по што судијата Јордан Велковски истакна дека заврши главната расправа и дека пресудата ќе ја соопшти на 5 јуни понеделник во 12 часот. Поранешните директори на Клиничка болница Тетово, Флорин Бесими и Артан Етеми се обвинети за кривично дело „тешки дела против општата сигурност“, додека докторот Бобан Вучевски за „непостапување според здравствени прописи за време на епидемија“. Клиничката болница како правно лице се товари за две кривични дела, прво за „предизвикување општа опасност“ и за „непостапување според здравствени прописи за време на епидемија“. Обвинетите на почетокот на судењето истакнаа дека го разбираат обвинението, но дека не чувствуваат вина. Судењето започна во декември 2022 година. И за денеска е најавена мирен протест за поддршка и барање за ослободителна пресуда за докторот Бобан Вучевски од група граѓани кои се организираат преку социјалните мрежи. На завршните зборови адвокатите на обвинетите истакнаа дека Обвинителството не ја докажало вината. Претставниците на Обвинителството, пак посочија дека со изведените докази и искажани сведочења обвинетите ги сториле кривичните дела и побара судот да ги огласи за виновни.

ВИДЕО: „Убиецот има име, правда за Бахарин“, пријателите на убиениот 16 годишник се собраа пред судот – донесена 17 годишната девојка

Ивона Петрова — Tue, 27 Dec 2022 13:25:16 +0000

Со качулка на главата и поглед кон земја, 17 годишната девојка која е осомничена за убиство на 16 годишното момче денеска од тетовско Бањиче, денеска беше донесена во Основниот суд во Тетово. Како што јавува порталот на албански јазик „Тетовасот“, девојката денеска требало да даде исказ пред судијата. Додека таа беше во судот, пред зградата се собраа другарите на момчето кое извикуваа „Убиецот има име, правда за Бахарин“. Со солзи во очите бараа правда за својот другар. Основното јавно обвинителство Тетово пред неколку дена потврди дека 17-годишна девојка е осомничена дека со умисла лишила од живот дете на возраст од 16 години. Телото на момчето беше извлечено од водите на реката Пена, по што се утврди дека е лишено од живот.

На 6 септември почнува судењето за пожарот во модуларната болница во Тетово во која изгореа 14 лица

Ивона Петрова — Mon, 22 Aug 2022 09:06:53 +0000

На интернет страница на Основен суд Тетово во календарот на судења е поставена информација дека судењето за предметот К бр 450/22, односно за модуларната болница е закажано за 6 септември 2022 година во 10 часот кај судијата Јордан Велковски. Судењето е закажано откако на 16 август предметот за модуларната болница согласно Информациски систем за автоматско управување со судски предмети (АКМИС) беше распределен кај судија. По разгледување на обвинителниот предлог судијата сега го започнува судењето. –Со предметот поврзан со модуларната болница во Тетово по поднесен обвинителен предлог од страна на ОЈО Тетово со бр. КО 531/22 со кој се обвинети Ф.Б, и А.Е за кривично дело тешки дела против општата сигурност и Б.В. за кривично дело непостапување според здравствени прописи за време на епидемија додека правно лице ЈЗУ Клиничка Болница Тетово за кривични дела предизвикување на општа опасност и непостапување според здравствени прописи за време на епидемија е распределен кај судија од Кривичниот оддел со предмет К бр. 450/22, соопштија од Судот на 16 август. Пожарот во модуларната болница се случи на 8 септември 2021 кога 14 лица ги загубија животите. По повеќемесечна истрага Основното јавно обвинителство Тетово на 27 јули 2022 до надлежниот суд поднесе Обвинителен предлог против три физички и едно правно лице.