осветлување – Kurir.mk

Поставено осветлување на мостот на локалниот пат Кадино-Миладиновци

Тале Кристо — Wed, 25 Oct 2023 10:18:50 +0000

Продолжува реализација на проектот „Илинден-Светла Општина”, кој опфаќа проширување и модернизација на уличното осветлување. Во изминатиот период поставена е нова линија за улично осветлување во делот кај мостот на локалниот пат Кадино-Миладиновци во должина од 500 метри. Поставени се метални столбови со лед светилки, соодветни сообраќајни знаци, метална заштитна ограда од двете страни на мостот, поставена е флуросцентна патна сигнализација долж целиот потег, како и флуросцентна лента по должината на мостот. Општина Илинден со ова ја зголемува безбедноста во сообраќајот, на критичните точки кои претставуваа опасност за учесниците во сообраќајот. Овој дел од Општината во минатото претставуваше опасна точка за возачите, пришто токму таму се имаат случено многу сообраќајни незгоди. Затоа Општина Илинден упатува апел до сите учесници во сообраќајот на поголемо вниманите, почитување на сообраќајната сигнализација како и ограничувањето на брзината на возење. Општина Илинден и ЈКП „Илинден” и во наредниот период ќе продолжат со поставувањето на нови линии во сите населени места, со цел посветла Општина Илинден и поголема безбедност.

Град Скопје нема да го гаси уличното осветлување како дел од мерките за штедење

Ивона Петрова — Tue, 23 Aug 2022 09:28:19 +0000

Град Скопје нема под ниту едни услови да го изгаси јавното осветлување на улиците и булеварите кои се во надлежност на Градот. Ова на денешната прес-конференција го истакна градоначалничката Данела Арсовска. -Првенствено од причина што сметаме дека треба да има јавниот интерес приоритет, а особено безбедноста и сигурноста на скопјани. Ние ќе напавиме се што е возможно што се однесува до мерките ки можеме ние да ги преземеме, меѓутоа не врз грбот на граѓаните и не врз тоа што би им била загрозена сигурноста и безбедноста при движењето на градските улици и булеварите. Булеварите и улиците кои се под надлежност на Град Скопје нема да се исклучуваат од јавното осветлување, нагласи Арсовска. Нагласи дека Град Скопје од почетокот на најавување на енергетската криза пристапи кон намалување на интензитетот на јавното осветлување на улиците и булеварите кои се во надлежност на Градот. Градоначалничката во однос на останатите мерки кои ќе ги преземат истакна дека ќе се приспособат системите на осветлување на одредени временски интервали и тоа е вклучување на јавното осветлување согласно соодветната потреба во деноноќието. -Се пристапува и кон етапна замена на користење на лед светилки, се даваат насоки кон јавните установи и претпријатија за ограничување на сето она кое се смета за осветлување кое не е приоритет во делот на јавниот интерес, како што е осветлувањето на јавните згради и фасади и рекламните светла. Издадени се насоки за рационална употреба на уредите кои се во секое од јавните претпријатија. Сите непродуктивни трошоци ги сведуваме на нула, објасни Арсовска. Како дел од непродуктивните трошоци ги наведе прекинувањето на праксата на купување на луксузни стоки, трошење средства на угостителски услуги...

Археолошкиот локалитет „Баргала“ ќе се осветли на есен

Дарко Андоновски — Wed, 27 Jul 2022 11:32:26 +0000

Археолошкиот локалитет „Баргала“ конечно ќе биде осветлен. Директорот на НУ Завод и музеј – Штип Митко Штерјов вели дека реалзиацијата на проектот ќе се случи на есен. Средствата се обезбедени преку Центарот за развој на Источно-планскиот регион, Министерството за локална самоуправа и Бирото за рамномерен регионален развој. Штерјов појаснува дека минатата година конкуриле со два проекти, првиот е за реконструкција на штипската Саат кула, а вториот и осветлување на локалитетот „Баргала“. – По неколку процеси за вреднување на проектите, на крајот остана да се реализира само проектот за осветлување на „Баргала“, а проектот за реставрација и конзервација на Саат кулата не помина. Можеби, е до финансиските средства, не ја знаеме причината. Меѓутоа, ние сме задоволни кога ќе помине барем еден проект. Сепак, сите проекти заслужуваат и во понатамошниот период се надеваме дека ќе дојде ред и за овој, вели Штерјов. Очекува активностите на „Баргала“ да почнат во септември, со цел поголема безбедност на овој значаен локалитет во источниот регион. -Тоа е процес којшто треба да се одвива, се надевам дека од есен ќе почне да се реализира, бидејќи така се и проектните програми со Источно-планскиот регион и со Општина Карбинци. Се надеваме дека во септември или октомври ќе почне со реализација овој проект. Ние, како Завод и Музеј имаме неколку проекти коишто ги конкуриравме и понатаму ќе ги конкурираме, што заедно со општините, така и на меѓународни проекти, проекти од Министерството. Тоа е реставрација и конзервација на „Св. Илија“, односно „усамедин Пашина џамија, а и оној што сите сакаме да се реализира е за конзервација на тврдината Исар, додава Штерјов. Штипската саат кула со помош на волонтери беше ставена во функција во 2018 година, кога и повторно се слушна отчукувањето на саатот од кулата. Инаку, според пишаните документи, овој споменик на културата е изграден од турски бег во 1650 година.

Албанија во темнина: Сушата и зголемените цени на струјата го исклучија јавното осветлување

Магдалена Андонова — Mon, 21 Mar 2022 17:30:51 +0000

Албанија им нареди на сите градови да ги исклучат светилките во јавните институции доколку е потребно и да го исклучат уличното осветлување поради енергетската криза предизвикана од сушата и наглото поскапување на струјата. Поради недостиг на вода, државното претпријатие за електрична енергија КЕШ во неделата запре 11 од 13 турбини во хидроцентралите и беше принудена најголемиот дел од побарувачката на струја да ја задоволи со увоз, пренесува Индекс. Хидроцентралите со месеци се борат со оскудни врнежи, а и онака тешката ситуација ескалира минатата година во криза кога цената на струјата се зголеми за четири пати, не само во Албанија, туку и во другите европски земји. Руската инвазија на Украина додаде масло на огнот, а владата најави дека цените би можеле да пораснат и до 1.000 евра за мегават-час. - Во следните два дена нема да има дожд и работите само се влошуваат, затоа мораме да се потпреме на увозот - изјави во неделата министерката за енергетика Белинда Балуку.

Целосно обновено осветлувањето на паркингот под Транспортен центар

Магдалена Андонова — Mon, 21 Feb 2022 12:24:24 +0000

Екипи на Град Скопје викендов целосно го обновија осветлувањето на паркингот под Транспортен центар во делот кај поштата, како и осветлувањето на сервисната улица на тој потег. На овој простор, старите и расипани светилки се заменети со 30 нови светилки, од кои 22 на паркингот, а 8 на сервисната улица. - На овој потег осветлувањето не функционираше подолго време, за што имаше и реакции од голем број граѓани. Град Скопје постапува по барањата на граѓаните, а со новото осветлување се зголемува безбедноста на пешаците во овој дел од градот, информираат од град Скопје.

ВМРО-ДПМНЕ: ОЈО да отвори постапка за набавката за осветлување на Борче Георгиевски и оштетување на буџетот на општина Гази Баба

Тале Кристо — Mon, 24 Jan 2022 07:54:44 +0000

ОЈО да отвори постапка за набавката за осветлување на Борче Георгиевски и оштетување на буџетот на општина Гази Баба, бараат од ВМРО-ДПМНЕ. За само 103 дена Борче Георгиевски од СДСМ како градоначалник на Гази Баба потрошил 11 милиони денари за поставување на нови линии за осветлување, и истовремено додека уште не завршил овој период доделил уште еден тендер од 1.7 милион евра за замена за актуелните светилки со лед, при што исплатил 20% аванс. Георгиевски потрошил 2 милиони евра пари на граѓаните на Гази Баба за нецела година за осветлување. Ја повикуваме општината и градоначалникот Бобан Стефковски да ги ревидира постапките, а институциите да отворат постапка - Дали фактичката состојба на терен соодветствува со таа во надзорот, општината и пријавената од фирмата изведувач. Дали се работи за реални потреби и работи или било потребно само да се исплатат аванси пред избори?, стои во партиското соопштение на ВМРО-ДПМНЕ.

ФОТО: Целосно осветлена трим патеката во Кисела Вода

Ивона Петрова — Wed, 05 Jan 2022 10:02:35 +0000

Комплетно е осветлена трим патеката во Кисела Вода. Општината постави нови дополнителни столбови на потегот од општина Центар, кон делот кој води кон новиот парк на “Есенинова”. На оваа локација, се работи за седум нови петметарски столбови со лед светилки. Дополнителни единаесет нови светлосни столбови се поставени и во продолжението кое води кон внатрешноста на Кисела Вода. -Со подобрувањето на електричната дистрибутивна мрежна инфраструктура, оваа пешачка патека лоцирана покрај железничката пруга, покрај тоа што редовно се чисти, сега може да се користи и во вечерните часови. Ова е од големо значење за жителите на Кисела Вода, но и на Аеродром и Центар, бидејќи е локација која редовно се користи за одмор и рекреација, информираат од Општината. Воедно, Општина Кисела Вода реадовно реагира на сите пристигнати пријави од граѓаните поврзани со прегорени светилки и постапува по барањата за дополнително улично осветлување, со што се подобрува и ликот, но и безбедноста во овој дел од градот.

Ново осветлување во трговскиот центар во населбата Лисиче (ФОТО)

Ивана Ефремовски — Thu, 06 Jun 2019 09:15:29 +0000

Трговскиот центар во населбата Лисиче доби целосно ново осветлување. Старите и дотраени светилки се заменети со нови 108 лед-рефлектори и светилки, кои се и енергетски поефикасни. За новото осветлување се издвоени 2 милиона и 200 илјади денари од општинскиот буџет. -Општина Аеродром ќе продолжи и во иднина да се грижи за подобрување на условите за живот на своите жители, велат од општината.

Во прекин осветлувањето на магистралниот пат Битола-Меџитлија

Дарко Андоновски — Fri, 15 Mar 2019 09:24:39 +0000

Секторот за односи со јавност на Општина Битола информира дека изминативе два дена во прекин е јавното осветлување на магистралниот пат што води кон границата со Република Грција. Прекинот е на сообраќајната делница од Битола до населеното место Кравари. – Прекинот на јавното осветлување е предизвикан при изведување на градежни работи за дислокација на енергетски кабли што се наоѓаат во заштитниот појас на трасата на железничката пруга, во непосредна близина на царинскиот терминал. Од ЕВН добивме информација, нагласуваат од Општината, дека прекинат е доводниот кабел за уличното осветлување на делницата од магистралниот пат Битола – Кравари, а дводневниот дефект ќе биде отстранет во текот на денешниот ден, посочуваат во соопштението од тамошната локална самоуправа.

За јавно осветлување во Битола ќе се потрошат над 62 милиони денари

Ивана Ефремовски — Fri, 04 Jan 2019 09:47:36 +0000

Советот на општина Битола ја утврди програмата за користење и одржување на јавното осветлување на подрачјето на општина Битола за 2019 година за чија реализација според финансискиот план ќе бидат вложени над 62 милиони денари. Средствата кои локалната самоуправа ги обезбедува согласно Законот за комунални такси за користење и одржување на јавното осветлување во сервисните и станбените улици ќе се користат за тековна потрошувачка на електрична енергија и за одржување на инсталациите за осветлување во сервисните и станбените улици на подрачјето на општината. Според програмата, со 39,6 милиони денари ќе бидат платени сметките за потрошена електрична енергија во текот на годината, над 15 милиони денари планиран е расход за поправка и одржување на уличното осветлување, а за новогодишно украсување на градот ќе бидат потрошени 472.000 денари. Од општинскиот Совет информираат дека 5 милиони денари ќе бидат инвестирани за изградба на нови капацитети во енергетиката, а со околу 750.000 денари ќе се изврши реконструкција на постоечките капацитети во енергетиката со која располага општина Битола.