пакет мерки – Kurir.mk

ВМРО-ДПМНЕ нуди 5 конкретни мерки за справување со енеретската и економска криза

Магдалена Андонова — Tue, 11 Oct 2022 07:47:03 +0000

ВМРО-ДПМНЕ во услови на тешка економска и енергетска криза нуди решенија кои треба да го спречат тонењето на стандардот на граѓаните и економскиот колапс. Од партијата велат дека бидејќи енергетската криза предизвикува тешка социјална и економска состојба во Македонија, ВМРО-ДПМНЕ нуди пакет мерки кои директно ќе се однесуваат на суштината на проблемите, а не како мерките на владата кои се само гол маркетиншки трик без позначаен ефект. Пакетот од 5 конкретни мерки кој го нуди ВМРО-ДПМНЕ е следниот:

1. Вишоците на произведена струја кои што ги произведува поранешно ЕЛЕМ, во текот на ноќта и викендот да бидат отстапени на стопанството по цена која што е производна за поранешна АД ЕЛЕМ. 2. Дополнително, секоја компанија која ќе плати цена на струја која е над цената на регулираниот пазар на електрична енергија, половина од разликата да ја преземе државата. 3. За граѓаните да се предвиди Викенд без ДДВ за основните прехранбени производи, за да можат да се снабдат граѓаните по пониска цена за да се заштити стандардот на граѓаните. 4. Одложување на скалестото оданочување кое го планира власта бидејќи тоа ќе удри на стандардот на граѓаните, а ќе влијае и врз финансиската ликвидност на компаниите. 5. Исто така предлагаме да се дестерилизираат на благајничките записи во Народната банка, што би значело средства на располагање на стопанството со што ќе ја помогнат ликвидноста на компаниите, а работните места ќе бидат сочувани .

- Владата треба овие предлози да ги разгледа сериозно. Нивната досегашна политика наместо да ги решава проблемите на македонските граѓани и македонската економија, само ги продлабочуваше. Заради лошите и ненавремени мерки Македонија тоне во сиромаштија. Македонија има една од највисоките стапки на инфлација која достигна 18,7%, а цените на основните прехранбени производи поскапеа од 50 до 100%. Во исто време домаќинствата и стопанството плаќаат најскапа струја споредено во земјите од регионот. Веќе почна масовно затворање на индустриски капацитети, а само за една и пол година затворени се над 12 илјади компании. Неколку илјади компании веќе имаат сериозен проблем да исплатат на време плата, што остава без сигурност илјадници други семејства, се појаснува во партиското соопштение. ВМРО-ДПМНЕ посочува дела е време власта предводена од Ковачевски да се вразуми и да прфати предлози што значат спасување на стандардот на граѓаните и македонската економија.

ВМРО-ДПМНЕ предлага пакет предлози до власта на СДСМ и ДУИ со цел да се изнајде решение за кризите во кои се наоѓа Македонија

Магдалена Андонова — Sat, 30 Apr 2022 08:19:02 +0000

ВМРО-ДПМНЕ предлага пакет предлози до власта на СДСМ и ДУИ со цел да се изнајде решение за кризите во кои се наоѓа Македонија. Тоа содржи формирање на четири тима од експерти во делот на економијата, надворешната политика, здравство и образование кои треба да помогнат про боно за изнаоѓање на решенија за проблемите кои ги тиштат граѓаните, проблеми кои во голема мера се предизвикани од неодговорните и непромислените политики на оваа власт или од нивната неспособност и аматеризам. Оттука произлегува и потребата за утврдување на датум за што поскоро предвремени избори како излез од низата кризи во кои западна Македонија, стои во соопштението на ВМРО-ДПМНЕ. Од партијата посочуват дека доколку Ковачевски не е тој кој што носи вакви одлуки во СДСМ и му е незгодно да понесе одговорност, тогаш тие се подготвени да разговараат со оние кои ги креираат политиките во СДСМ било тоа да е Заев или Шекеринска. - СДСМ треба да се издигне над ситуацијата и да ги стави интересите на граѓаните во овие тешки времиња, над тесно партиските и лични интереси на раководството кое по секоја цена сака да се задржи во своите фотелји, се додава во партиското соопштение.

Владата со пакет од 26 мерки

Катерина Бојаџиева — Wed, 09 Mar 2022 13:40:47 +0000

Владата денеска донесе пакет од 26 мерки и препораки за ублажување на последиците од економската криза и руско-украинскиот конфликт. Мерките се наменети за граѓаните и за компаниите со цел да се сочува животниот стандард на граѓани и ликвидноста на компаниите. Мерките се поделени во две категории. Во првата група се мерки за заштита на животниот стандард на граѓаните и компаниите, а во втората група – мерки за финансиска поддршка на компаниите преку Развојната банка. Дел од мерките се намалување на повластената стапка на ДДВ за основните прехранбени производи на нула проценти и тоа ќе важи за лебот, шеќерот, брашно тип 400, зејтин, трајно млеко, свежо месо, ориз и јајца. Се замрзнуваат и маржите за основните прехранбени производи. Предвидени се и ваучери во вредност од илјада денари за купување на основните прехрабени производи за ранливите категории… – Предизвиците пред нас се огромни. во услови на постпандемија се соочуваме со најголемата економска криза која Европа и светот ја паметат во поново време. На глобално ниво растот на трошоците на храната и на енергенсите како резултат на воената агресија на Русија на Украина го чувствуваме и ние денес и сега. Дисбалансот на цените на основните продукти и енергенси не засега и нас. Ова ќе биде тешка година но со добри мерки и политики ќе ја премостиме, порача премиеро Димитар Ковачевски на прес-конференцијата во Владата.

Битиќи: Не се размислува за седми пакет економска помош за стопанството и граѓаните

Ивона Петрова — Tue, 31 Aug 2021 09:51:22 +0000

Во овој момент не се размислува за седми пакет економски мерки за помош на стопанството и граѓаните за справување со последиците од корона кризата, порача денеска вицепремиерот за економски прашања Фатмир Битиќи. -Разговори ќе имаме. Секојдневно разговарам со стопанските комори и ако навистина тоа е нужно ќе направиме одредена мерка зашто не знаеме колку ова привремено лимитирање на движење на граѓаните ќе влијае. За жал сме и во предизборен период и секоја мерка може да се протолкува различно и затоа нема да кажам дали ќе има или нема да има мерка. Само потврдувам дека се разговара и ако е вистински потребно заедно ќе ја донесеме, рече Битиќи во одговор на прашање при денешното означување на почетокот на тендерската постапка за изградба на клучка на крстосницата меѓу булеварот „Словенија“ и „Качанички пат“. Тој посочи дека здравјето на граѓаните е пред сè. -Ако треба да се прави компромис помеѓу економска мерка за угостители и здравјето на граѓаните, здравјето на граѓаните е пред се, потенцира Битиќи. Порача дека и претходно докажале дека секој загубен денар во секој сектор ќе се врати кога тоа ќе биде потребно. -Затоа ќе седнеме и ќе разговараме. Сметам дека во овој момент сите треба да сме подготвени нешто да оставиме наспроти борбата што не чека против енормното зголемување на бројот на заразени од коронавирусот и секојдневната борба за живот која е многу поважна од се друго, рече Битиќи. Порача дека и досега угостителскиот и туристичкиот сектор е помаган. Во изминатите пакети, како што кажа, овој сектор е потпомогнат со повеќе од 14 отсто од вкупната помош која е дадена во стопанството, наспроти нивниот придонес во БДП кој е многу помал.

Сојуз на стопански комори: Пакет мерки за помош очекуваат секторите кои се на раб на опстанок поради пандемијата

Тале Кристо — Mon, 26 Apr 2021 13:32:18 +0000

Четиринаесет месеци туристичко-угостителскиот сектор се бори со предизвици кои ги создава кризата предизвикана од пандемија и недоволната и ненавремената поддршка. Затоа претпријатијата тешко се справуваат и се повеќе се губат работни места и престануваат со работа деловните субјекти поради немање деловна активност. Најголем број од претпријатијата од овие сектори користејќи ја својата способноста и ангажирајќи ги сите расположливи ресурси, досега наоѓаа начин да преживеат, но веќе сите алтернативи се исцрпени. Затоа потенцираме дека без вистинска и континуирана поддршка нема спас за овој сектор. Со протестите пред Министерството за финансии и денеска пред Владата, угостителите од рестораните, кафулињата, ноќните клубови, рестораните за свадби, вработените во туристичките агенции и игротеките, танцовите и балетски студија, туристичките водичи, сметководителите, кои заедно застапуваат околу 40.000 луѓе побараа да се исполнат барањата за поддршка кои се веќе доставени до Владата. Веруваме дека средствата кои се предвидени во шестиот пакет на економски мерки можат да помогнат и да ги ублажат штетите со кои се соочува туристичко-угостителскиот сектор, ако се имплементираат на соодветен начин. Имајќи во предвид дека постапките и процедурите за нивна имплементација се уште не се познати, бараме пред имплементацијата да се земат во предвид и нашите барања, бидејќи тие произлегуваат од реалните потреби на најпогодените сектори, велат од Сојузот на стопански комори на Македонија. Во наредните денови ќе дадеме простор надлежните органи и институции да постапат согласно нашите барања, а по Велигденските празници ќе излеземе со нов план за активностите, доколку нема никакви промени во ставовите. Туристички агенции подобрување на состојбата во која моментално се наоѓаат гледаат во обезбедување на неповратна финансиска помош за секоја лиценцирана агенција, ваучерите кои ќе се доделуваат од мерката „Дома си е дома“, задолжително да се користат преку туристичките агенции, кои ќе можат во аранжманите да ги вклучат сите учесници од секторот туризам и рокот на ваучерите кои се издадени од туристичките агенции според Одлуката на Влада за нереализираните патувања во 2020 година, да се продолжи до 31.12.2022 година. Од нивните три барања првата е делумно усвоена, при што сеуште не се познати условите и методологијата за распределба да се знае дали мерката ќе има било каков ефект. Угостителските објекти бараат еднократна финансиска помош за сите регистрирани угостителските објекти, поделени во 3 категории врз основа на големината на бројот на вработени во 2020 година, еднократна финансиска помош за регистрираните угостителски објекти на кои повеќе од една година им е забранета примарната дејност со уредба на Влада, и кои со месеци немаат никаква помош и утврдување на мораториум или репрограмирање со грејс период на кредитите од комерцијалните банки и кредитите од Развојна банка, се додека не се создадат услови за работа. Една мерка е делумно усвоена под поинакви критериуми со процент од процент на приходите од 2019 и 2020 година, но без да се информира јавноста јасно за методологијата и кои се критериумите кои секое претпријатие ќе треба да го исполни за да аплицира, повторно е нејасно дали и какви ефекти ќе има за помош. Сметководителите испорачаа барање за директна финансиски помош, нов Закон за вршење сметководствени работи и системско пролонгирање на роковите за годишни сметки и даночни пријави. Во комуникација со институциите во деновите додека трае протестот е добиен позитивен одговор за барањето поврзано со Законот за вршење на сметководствени работи како и за системско одложување на роковите за годишни сметки и даночни пријави. Делумно е прифаќањето на барањата а за останатите се очекува одговор од институциите. Неповратна финансиска помош е потребна и за преживување на игротеките, туристичките водичи, танцовите и балетски студија. Поддршката што до сега доделена, не е доволна со оглед на рестрикциите во стопанството и принудните забрани за работа, затоа сред пандемија треба да се помогне на секој кому тоа му е тоа потребно. Поради неможноста за работа, нарушената ликвидност и доспеаните обврски, за многу претпријатија доведено е во прашање нивното опстојувањето, но и егзистенцијата на цели семејства кои работат во овие сектори. Остануваме отворени и достапни за надлежните институции за сите потребно консултации и во таа насока бараме средба со министрите во влада кои ги водат економските ресори, Фатмир Битиќи, Фатмир Бесими и Крешник Бектеши, на која ќе разговараме околу доставените барања и имплементацијата за мерките од последниот пакет, велат од комората.

Муцунски: Министерстовото за финансии не прифати ни еден од суштинските амандмани кои нашата пратеничка група ги поднесе

Магдалена Андонова — Wed, 14 Apr 2021 11:13:34 +0000

Сакам да ве информирам дека само што заврши комисиската расправа на Комисијата за финансирање и буџет поврзана со последниот односно петтиот пакет економски мерки. Очекувам за дваесетина минути да заврши и дополнителната седница на комисијата поврзана со директна помош која ќе пристигне кај оние ранливи категории на граѓани, изјави денеска за медиумите, Тимчо Муцунски, пратеник од ВМРО-ДПМНЕ. - Пратеничката група на ВМРО-ДПМНЕ имаше неколку суштински амандмани кои што беа поднесени. Нашиот предлог беше покрај помошта која што е предвидена во рамките на овие закони за февруари и март, уште овој момент законите да предвидат директна помош и за април и за мај, предложивме средствата директно да бидат префрлени на сметките на граѓаните односно средствата поврзани со плата, пред се поради одредените недоследности и злоупотреби кои што се случуваат во системот, а исто така предложивме средствата кои што ќе бидат помош за граѓаните и компаниите да бидат неповратна помош, истакна тој. Муцунски посочи дека ниту еден од овие суштински амандмани не бил прифатен од страна на Министерството за финансии и од страна на парламентарното мнозинство. - Дополнително сакам да ве информирам дека согласно нашите информации се создадени услови за уште денес да се одржи пленарна седница на Собранието на која што конечно ќе заврши законодавната постапка околу овој пакет на економска поддршка на граѓаните и компаниите. Помошта, иако сметаме дека е недоволна, иако сметаме дека треба да биде на различен начин димензионирана како што кажавме во самите амандмани, сепак е форма на помош и нашата улога како пратеничка група е да што побрзо стигне до граѓаните. Секој дополнителен ден кој што чекаме значи изгубени работни места, значи неисплатени плати за нашите сограѓани, значи затворање на уште компании, рече тој. Апелираме до владеачкото мнозинство, ова се закони кои што Владата ги пушти во Собранието на 16 февруари, потоа месец дена седеа во фиоките на парламентарното мнозинство бидејќи не се закажуваше седница на Собранието по однос на овие закони. Дополнително сите сме свесни за амандманската блокада која што постоеше од Алијанса на Албанците и Алтернатива но веќе нема пречка овие закони да бидат донесени уште денес, во текот на денешниот ден за веќе утре законите да бидат објавени во Службен весник, што значи час поскоро сите да работиме да бидат донесени овие закони. Пратеничката група на ВМРО-ДПМНЕ е во Собранието, ние сме подготвени уште денес на пленарна седница да дадеме поддршка за овој недоволен но сепак потребен сет економски мерки, додаде Муцунски.

Јосифовски за Курир: Мерките не го дадоа бараниот и очекуван ефект на помош за угостителската индустрија

Ивона Петрова — Fri, 09 Apr 2021 08:40:55 +0000

Досегашните мерки за помош и поддршка на економијата во справувањето со последиците од пандемијата Ковид-19 како што самите укажуваат помогнаа за одржување на домашната економија, но реално не го дадоа бараниот и очекуван ефект на помош за угостителската индустрија како индустрија која е најпогодена и најмногу настрада во оваа глобална здравствена криза, вели за Курир претседателот на Независната угостителска комора, НУК, Здравко Јосифовски. Посочува дека нивните континуирани настојувања за изготвување на посебни неселективни сет мерки наменети исклучиво за угостителската индустрија со кои реално ќе се помогне и финансиски поддржат угостителите не вродија реултати и разбирање кај Владата. -Факт е и дека Владата мора да размислува ваквиот модел на мерки да биде променет доколку сака и има желба реално и вистински да им помогне на угостителите и угостителската индустрија. Можеби прифаќањето на моделот на директна неповратна финансиска помош за рестарт на угостителската индустрија кои некои земји од соседството веќе го применија е повеќе сериозен и прифатлив за целокупната угостителска индустрија со кој на некој начин може реално и директно да се интервенира кај угостителите во покривање на трошоците, загубите и штетите што ги имаа за време на време на пандемијата со Ковид-19, смета Јосифовски. Според него новата владина мерка со која се забранува работата на угостителските објекти е во ред, но истата не само што е задоцнета, туку е и прекратка и повторно селективна.Вели, Ако Владата смета дека како резултат на забраната во моментов ќе се надмине проблемот со зголемениот број заболени тогаш и препорачуваат да донесе одлука со која мерката ќе трае месец - два наместо 2 недели за кој период Комисијата за заразни болести ќе има време и можности да изготви нови унифицирани препораки и протоколи на работа за целокупната угостителска индустрија со што по завршувањето на истата летниот период ќе можат да работат сите угостители од постојните угостителски сектори. -Факт е дека со секоја забрана, ограничување на работно време за работа на угостителски објекти, несоодветни протоколи за работа се нанесува од ден во ден непоправлива штета и огромна финансиска загуба на угостителите и угостителската индустрија. Дел од нашите колеги не ги издржаа овие услови на “не”работење и беа приморани пермаментно - трајно да ги затворат своите локали. Останатите се веќе толку задолжени со обврски кон добавувачи, по основ на кредити или по основ на плати што не ја гледаат светлата иднина во скоро време. За разлика од минатите мерки кога не само што препорачувавме угостителите да вложат напори да на секој начин ги задржат во што поголем број своите вработени, овој пат се донесени до работ на опстанокот многумина наместо рационализација ќе се одлучат договорно со вработените да ги раскинат работните односи. Причината не е само што ветените мерки за субвенции од претходните пакети доцнат со месеци, многу поголем проблем претставува што угостителите веќе немаат можности и начини да се задолжуваат за да на некој начин ги премостат или одложат финансиските проблеми во кои се наоѓаат, со што можат да се доведат до многу полоша работа од договорно отпуштање е задржување на вработените ,а неможноста на неисплаќање на плати и создавање на непотребни проблеми, посочува претседателот на НУК. По однос на најавите од министерот за економија за грантови за угостителите, чиј модел е направен, а ќе следи дополнителна консултација со секторот, Јосифовски истакнува дека се затекнати и не се консултирани. -Ние како комора на ваква средба или средби ниту сме учествувале ниту сме биле консултирани на било кој начин за реални предлози и потреби на угостителите и угостителската индустрија.Вистината е и таа дека до овој момент не сме контактирани ниту за најавените дополнителни средби за консултации со нашиот сектор, посочува Јосифовски за Курир.

Пренџов: Државата ни е во лоша финансиска состојба, мнозинството не го става на гласање петтиот пакет мерки за помош на граѓаните

Ивана Ефремовски — Tue, 16 Mar 2021 18:55:09 +0000

Пратеникот Љупчо Пренџов во своето гостување на телевизија Телма посочи дека опозицијата секогаш ќе ги поддржува мерките и законите кои се носат за доброто на граѓаните. Во оваа насока, како неосновани ги отфрли обвинувањата дека опозицијата кочи било што, образложувајќи што се случува со петтиот пакет мерки за помош кој го вети Владата. Посочи дека овој пакет мерки е најавен во декември, а дури на крајот на февруари влегува во Собрание. Но, бидејќи владејачкото мнозинство е на стаклени нозе, тие не можат да си соберат потребен број на пратеници. -На седница на 3-ти март СДСМ конечно имаше мнозинство, но точката за петтиот пакет мерки помош за граѓаните воопшто не беше ставена на дневен ред. Тоа според мене, се должи на фактот што државата ни е во лоша финансиска состојба. Имаме буџет во лоша финансиска кондиција и затоа не се носи петтиот пакет мерки, истакна Пренџов. Тој посочи дека опозицијата сакала да гласа и барала да гласа за секоја помош која им следува на граѓаните, но за точките на дневен ред одлучува мнозинството со претседателот, а не опозицијата.

Славески: 5тиот пакет мерки е за замајување на јавноста и нема да ја подобри економијата, до сега власта требаше да набави 2.000.000 дози вакцини

Магдалена Андонова — Wed, 17 Feb 2021 11:45:33 +0000

Вчера Владата на Република Македонија го промовираше т.н. петти пакет антикризни мерки. Предложени се 29 мерки. Веднаш да спомнам дека од лично искуство знам дека што е поголем бројот на мерките, толку е помала нивната ефикасност.Сепак, сметаме дека во моментов е потребна уште една мерка, триесетта на број но прва по важност, а тоа е сузбивање на пандемијата КОВИД 19 во што е можен покус рок во нашата земја! Во таа насока Владата требаше да се обврзе дека до крајот на јули оваа година ќе обезбеди вакцини за најмалку милион граѓани на Република Македонија, односно најмалку два милиони дози од истите. Без ова, попусто се трошат скапо позајмени пари од надвор, што ќе се враќаат со уште повисоки каматни стапки во иднина, изјави на денешна прес конференција, Трајко Славески член на ИК на ВМРО-ДПМНЕ. Наместо ова, за да се сврти вниманието на јавноста од катастрофата што ни се случува со над 3.000 починати наши сограѓани заклучно со вчерашниот ден, повторно се наметнаа прашања околу етничкото пребројување и обележување! Ова мора да престане. Пописот мора да се одложи за во наредната 2022 година! Како одговор на економската криза предизвикана од пандемијата на КОВИД-19, Владата на РМ во текот на 2020 година усвои четири пакета мерки за поддршка на економијата. Вкупниот обем на мерките изнесуваше околу 3,5% од БДП, што е трета најмала вредност во Европа. Од тоа, мерките со буџетски импликации изнесуваа 2% од БДП, додека мерките без директни буџетски импликации 1,5%од БДП, посочи тој. Славески тврди дека и покрај превземените мерки, состојбите на пазарот на трудот во Република Македонија значително се влошија за време на пандемијата. Тој вели деа во вториот и третиот квартал заедно, бројот на вработени лица (според Анкетата за работна сила, што ја спроведува Државен завод за статистика) е намален за 25.545, односно за 3,1% од вкупниот број вработени. - Влошувањето кај пазарот на труд во Република Македонија е поизразено отколку во другите европски земји. Од земјите за кои има расположливи податоци за вториот и третиот квартал на 2020 година, само две имаат поголем пад на вработеноста отколку нашата земја. Во 2020 година, регистрирани се дури 54.000 нови невработени. Падот на Бруто домашниот производ во Вториот квартал од 2020 година е поразителен, иако нашата земја не спаѓа во групата земји во кои туризмот игра значајна улога во создавањето на БДП, како што се медитеранските земји, Хрватска и Грција на пример. Имено од 38 економии за колку што постојат податоци, 9 имаат повисок пад на БДП од РМ во вториот квартал на 2020 година, а 28 земји помал. Сега Владата конечно, по неколку месеци доцнење, го предлага петтиот пакет мерки со околу 90 милиони евра предвидени за директна буџетска поддршка на стопанството и на граѓаните. И овој пат, како и при промоцијата на претходните неколку пакет мерки, дел од мерките само се препишуваат од еден во друг пакет, без соодветна реализација, што укажува на нискиот капацитет на Владата за оценка на последиците од кризата и слабо таргетирање на мерките. Да потсетиме дека претходните четири пакети мерки требаше да тежат 1,2 милијарди евра, или 11% од БДП, но сепак реализацијата потфрли до тој степен што истите достигнуваат скромни 3,5% од БДП. Со еден збор, нема причина да не веруваме дека и овој пат со обемот на средства за поддршка на економијата, планирани и реализирани, ќе се најдеме на дното во Европа, вели Славески. - Подеталната анализа на некои мерки упатува на следниве заклучоци: Мерката број 1 за директна поддршка на претпријатијата за исплата на плати повторно како услов поставува пад на приходите од минимум 30%. Голем дел од претпријатијата во Република Македонија се приспособија на ново настанатата ситуација. Ваквиот критериум можеби беше валиден во мај 2020 година но, сега би требало да се спушти на 15% пад на приходите во соодветниот период. Втората мерка за бескаматни кредити преку Развојната банка е за целна група која во изминатата година настрада најмногу. Им се забранува да користат субвенција на плата ако користат кредит од Развојната банка. На дел од овие дејности им се забрани да работат, како што се рестораните за свадби, а сега им ги покриваат делумно само трошоците. Што со останатите трошоци кои ги плаќаат (електрична енергија, вода комуналии и слично? Потребно е јасно прецизирање на ова. Во зависност од вкупниот поголем обем на работа и зголемената добивка компаниите ќе имаат можност да добијат скалесто неповратен дел од 30% до 50% од самиот кредит. Кој ќе одлучува за ова и според кој основ? Ке има ли јавно објавување на тоа кои компании ќе добијат неповратен дел на кредитот, прашува тој. - Понатаму, занаетчиите треба да се помогнат со далеку поголем износ од предвидените 5.000 евра за оваа намена. Шестата мерка е за финансиската поддршка за граѓаните преку продолжување на мерката за одложување на плаќање на данок на личен доход до 30 јуни 2021 година. Вредноста на оваа мерка е 15 милиони денари, а целна група се самостојните вршители на дејност кои согласно Законот за данок на личен доход беа ослободени од плаќање на аконтации до 31 март 2021. Убедени сме дека е пологично е да се оди со намалување или даночно ослободување отколку целосно неплаќање за одреден период. Со одложувањето не се постигнува целта, туку само временски се поместува обврската. Ефект се постигнува ако обврската се намали за одреден процент, но мора да остане императивот за навремено плаќање на обврските за даноци. Мерката број 9 се однесува на скромни 5 милиони евра за гарантна шема преку МБПР. Неопходно е овој износ да се зголеми на барем 10 милиони евра. Зошто се намалува износот кога претходно беше поголем. Гарантната шема се појави во третиот четвртиот и сега во петтиот пакет на мерки. Мерка 12 која се однесува на финансиска поддршка на хотели надвор од туристичките центри кои не користеле ваучери треба да се прошири и за ресторани надвор од туристичките места, истакна Славески. - Дека Владата при предлагањето мерки не размислува системски и долгорочно, ќе илустрираме на примерот на предвидената поддршка на извозните компании (мерка бр. 13) и мерките 15, 16 и 17 кои се однесуваат на измени во царинската тарифа. Кај поддршката на извозните компании не е понудена јасна методологија. Истата не е базирана на претходна анализа во делот на адресираните проблеми со кои се соочува земјата и извозните домашни компании во делот на недоволната конкурентност и активност на странските пазари. Мерките 15 и 16 се веќе донесени и истите беа дел од 4-тиот пакет мерки. Се однесуваат на измените во царинската тарифа. Но и така како што се донесени има многу слабости, потенцира тој. Славески е дециден дека изборот на автономните мерки за бришење или намалување на царинските стапки за конкретните производи или суровини е направен селективно без претходна детална анализа и посочува дека во таа насока, потребна е детална анализа на извозниот сектор и целосно редефинирање на царинската политика (нејзино усогласување со ЕУ). - Мерката 17 за ревидирање на царинскиот тарифник требаше да биде спроведена многу порано за мерките во делот на поддршка на извозните компании денес да бидат ефикасни. Како последна 29-та мерка во владиниот предлог е поддршката за дигитална трансформација на бизнисите кои имаат ниско ниво на дигитализација со цел побрза пост КОВИД ревитализација. Се прашуваме: кој ќе дефинира што е ниско ниво на дигитализација, а што е високо за едно претпријатие? Што е дигитална трансформација на едно претпријатие? Ставот е многу општ и остава простор за субјективност. Како што може да се заклучи од овој селективен избор на коментираните мерки на предложениот 5-ти пакет мерки, можеме да видиме дека се предлагаат мерки за замајување на јавноста, што нема да придонесе за подобрување на економската ситуација во Република Македонија. Ова е само купување на време од страна на Владата, додаде тој.

ВМРО-ДПМНЕ: И петтиот пакет на мерки е неразвоен и крпи дупки

Ивана Ефремовски — Wed, 17 Feb 2021 08:05:18 +0000

И петтиот пакет на мерки на владата е неразвоен, крпи дупки и служи само за поткуп на гласачи пред избори. Вчерашните мерки на Заев не го помагаат бизнисот, и не отвораат нови работни места, дури не помагаат ни за задржување на актуелните вработени во фирмите, резултатот и до сега го гледаме над 55.000 луѓе изгубиле работа, реагираат од ВМРО-ДПМНЕ. „Мерките на Заев не го помагаат ниту граѓанинот, туку само служат за поткуп во форма на еднократна помош. Заев мерките ги претставува како милостиња, а не како обврска. И додека Заев се обидува да манипулира со граѓаните, во Британија владата обезбедила 1.000.000 лаптопи и таблети за учениците. Кај нас ни трага ни глас од помош за најмалите. Со Заев имаме само уназадување. На удар е целата економија, само фирмите на Заеви вртат милиони“ - порачуваат од партијата.