панама – Kurir.mk

Убиен фудбалски репрезентативец на Панама

Ивона Петрова — Tue, 05 Sep 2023 08:31:37 +0000

Панамскиот фудбалски репрезентативец Гилберто Ернандез почина откако во неделата беше застрелан во градот Колон, јавија синоќа локалните медиуми. Ернандез настапуваше за панамскиот прволигаш Клуб Атлетико Индепендиенте де Ла Чорера, а за националниот тим одигра два натпревари. Медиумите јавија дека вооружени напаѓачи пукале во група луѓе во која се наоѓал 26-годишниот панамски фудбалер. Ернандез им подлегнал на повредите, а седум лица се ранети. Сè уште не е познато дали Ернандез бил цел на нападот и кој бил мотивот. Полицијата соопшти дека уапсила осомничен за убиството на фудбалерот. Изминатите месеци во Колон, град со околу 40.000 жители, дојде до пораст на убиствата. Од почетокот на оваа година во градот се убиени повеќе од 50 луѓе.

Земјотрес во Панама

Ивона Петрова — Wed, 05 Apr 2023 05:53:35 +0000

Земјотрес со јачина од 6,6 степени според Рихтеровата скала е регистриран во близина на пацифичкиот брег на Панама. Локалните власти соопштија дека нема извештаи за жртви или материјална штета. Епицентарот на земјотресот бил на околу 72 километри јужно од брегот на Панама, на длабочина од 10 километри. Потресот бил почувствуван и во главниот град на Костарика, Сан Хозе. Комисијата за вонредни состојби во земјата соопшти дека нема информации за причинета штета ниту предупредување за цунами.

СЕ СТРЕСЕ ПЛОТО: Силен земјотрес ја погоди Панама

Магдалена Андонова — Thu, 20 Oct 2022 14:38:13 +0000

Силен земјотрес со јачина од 6,7 степени по Рихтеровата скала изутринава го потресе западниот дел на Панама. Раздвижувањето на земјата е почувствувано во Херера, Бокас дел Торо, Верагуас и западна Панама, објави преку Твитер панамската Национална агенција за цивилна заштита. Американскиот геолошки институт соопшти дека епицдентарот на земјотресот бил на длабочина од десет километри, на оддалеченост 62 километри од брегот на Тихиот Океан. Засега нема информации за предизвикани штети. (МИА)

Во Панама запленети рекордни 10 милиони долари од шверц на дрога

Тале Кристо — Fri, 03 Dec 2021 17:25:17 +0000

Властите на Панама објавија дека заплениле рекордни 10 милиони долари во готовина, кои криминалната група поврзана со колумбискиот картел Клан дел Голфо ги стекнала преку трговија со дрога. -Таа голема сума пари и припаѓа на расформирана криминална организација која соработува со криминалната група позната како Клан дел Голфо, соопшти Обвинителството на Панама. Главниот обвинител Хавиер Карабало изјави дека „ова е најголемата заплена на пари добиени од трговија со дрога во историјата на земјата“. Парите се пронајдени во торби во три скривалишта во куќа во градот Нуева Провиденсија, во северната провинција Колон, за време на полициска акција која довела до апсење на 57 лица. Во акцијата, во која учествувала и Американската агенција за борба против дрога (ДЕА), биле запленети и десет парчиња оружје и 38 луксузни возила. На властите им биле потребни повеќе од 12 часа да ги соберат парите и да ги пребројат со помош на машини за броење, од кои некои се расипале поради обемот на задачата. -Меѓу уапсените има и девет службеници, од кои петмина полицајци осомничени дека примиле, следеле и сокриле големи количества дрога со потекло од Колумбија, соопшти Обвинителството. Дрогата потоа била испратена во САД, по наредба на нарко групата Клан дел Голфо, кој контролира речиси една третина од производството на кокаин во Колумбија.

Силен земјотрес со јачина од 6,9 степени ја погоди Панама

Ивона Петрова — Thu, 22 Jul 2021 05:37:07 +0000

Земјотрес со интензитет од 6,9 степени според Рихтерова скала го погоди вчера северниот брег на Панама, во близина на границата со Костарика, соопшти Европскиот медитерански сеизмолошки центар (ЕМСЦ). Засега нема информации за евентуални жртви и причинета материјална штета, ниту предупредување за опасност од цунами. Епицентарот на земјотресот се наоѓал 321 километар југоисточно од главниот град на Костарика, Сан Хозе, на длабочина од два километра. Според мерењата на американскиот геолошки институт, земјотресот бил со интензитет од 6,8 степени според Рихтеровата скала. – Го почувствувавме земјотресот речиси низ целата земја, но нема штети на јавната инфраструктура или повредени лица, изјави Александар Солис, шеф на Комисијата за итни случаи на Костарика. – Нашиот тим продолжува да ги следи областите погодени од земјотресот. Досега не е пријавена штета, напиша шефот на панамската цивилна заштита на Твитер. По првиот потрес следеше уште еден силен земјотрес со јачина од 6,3 степени, објави ЕМСЦ.

Панама ја одобри вакцината на Фајзер и БионТек

Тале Кристо — Wed, 16 Dec 2020 09:53:52 +0000

Панамските власти одобрија итна употреба на вакцината на Фајзер и БионТек и првите количини во оваа четиримилионска централноамериканска земја треба да стигнат во првиот квартал од следната година, соопшти денеска панамскиот заменик министер за здравство Ивет Барио. Истата вакцина вчера помина атест и во соседна Костарика, која на тој начин се приклучи на неколку земји, вклучувајќи ги САД и Велика Британија, кои одобрија употреба на вакцината против Ковид-19 на Фајзер и БионТек.

Седум млади лица убиени на плажа во Панама

Тале Кристо — Sun, 19 Jul 2020 14:52:18 +0000

Панамските власти саопштија дека во езерото оддалечено 80 километри од главниот град се пронајдени тела на седум млади лица, а според истрагата, станува збор за убиство. „Телата на четири девојки и тројца момчиња на возраст меѓу 17 и 22 години се пронајдени во саботата“, рече обвинителот Адолфо Пинеда и додаде дека некои кои успеале да го избегнат нападот и помагаат на полицијата во нивната истрага. Според Ројтерс, телата на жртвите покажале видливи повреди предизвикани од огнено оружје, но точните причини за смртта не се утврдени. Не се познати мотивите за нападот. Локалните медиуми објавија дека семејствата на жртвите го пријавиле исчезнувањето на нивните најблиски во петокот.Првичните информации се дека младите оделе на пливање на езерото Гатун, вештачко езеро што е дел од Панамскиот канал.

Ковид-19: Панама ги ограничува движењето според пол

Дарко Андоновски — Tue, 31 Mar 2020 12:41:41 +0000

Поради коронавирусот, Панама го ограничи движењето според пол. Од среда, мажите и жените ќе смеат да ги напуштат своите домови на два часа, еден по друг и тоа во различни днеови. Досега карантинот не се спроведуваше врз основа на пол, но според одлуката која утре стапува во сила, мажите ќе можат да одат во аптека или продавница во вторник, четврток и сабота, а жените во понеделник, среда и петок. Во недела нема да може никој да излегува од дома. Во таа земја сега има 1075 инфицирани, од кои 43 се на интензивна нега. Досега од Ковид-19 починаа 27 луѓе.

Коронавирусот регистриран и во Панама

Ивона Петрова — Tue, 10 Mar 2020 07:41:18 +0000

Во Панама е потврден првиот случај на новиот коронавирус, соопшти претседателот на земјата Лорентино Кортисо. – Можеме да го потврдиме првиот случај на Ковид-19 во нашата земја. Ги зајакнуваме хигиенските мерки и ги повикуваме сите граѓани да ги следат препораките на Министерството за здравство, напиша Кортисо на Твитер. Новиот коронавирус е откриен кај 40-годишна жена, но нејзината националност не е објавена. Неименуваната жена допатувала од Шпанија, а по доаѓањето во Панама побарала лекарска помош откако поради висока температура и кашлање, соопшти Министерството.

Во Панама запленети пет тони кокаин

Ивона Петрова — Thu, 20 Feb 2020 06:58:52 +0000

Полицијата во Панама заплени пет тони кокаин шверцуван во полуподморница и уапси четворица Колумбијци, соопштија денеска властите во Панама. Службата за поморско воздухопловство не прецизираше кон која дестинација шверцерите ја пренесувале дрогата. Панама минатата година забележа рекордна заплена од вкупно 91 тон дрога од кои – 77,9 тони кокаин и 12,9 тони марихуана.