папа Франциск – Kurir.mk

Папата Франциск бара мир во Израел и Газа: Браќа и сестри, престанете

Катерина Бојаџиева — Sun, 29 Oct 2023 14:32:14 +0000

Папата Франциск денеска повика на прекин на огнот во војната меѓу Израел и Хамас и го повтори апелот за ослободување на заложниците кои ги држеше палестинската милитантна група во Газа. Никој да не се откаже од можноста да го запре оружјето, рече Папата на плоштадот Свети Петар. -Престанете со огнот, рече тој, мислејќи на неодамнешниот телевизиски апел на отец Ибрахим Фалтас, еден од претставниците на Ватикан во Светата земја. Ние велиме „прекин на огнот, примирје. Браќа и сестри, престанете! Војната е секогаш пораз, секогаш, рече Франциск. Зборувајќи за „тешката ситуација во Палестина и Израел“ и особено, како што кажа, во Газа, „нека има простор за гарантирање на хуманитарна помош, а заложниците веднаш да бидат ослободени“. Илјадници очајни жители на Газа упаднаа во магацините и дистрибутивните центри на Агенцијата за бегалци на Обединетите нации за да грабнат брашно и „основните предмети за преживување“, соопшти денека организацијата.

Бајден и папата Франциск телефонски разговараа за ситуацијата во Израел и Газа

Тале Кристо — Sun, 22 Oct 2023 20:28:21 +0000

Американскиот претседател Џо Бајден денеска разговараше со папата Франциск за тековниот конфликт на Блискиот Исток меѓу Израел и палестинската исламистичка група Хамас, се вели во соопштението на Белата куќа. „Двајцата разговараа за неопходноста да се спречи ескалација во регионот и да се работи за постигнување траен мир на Блискиот Исток“, соопшти Белата куќа. Претходно, Ватикан соопшти дека разговорот, кој траел околу 20 минути, „се фокусирал на конфликтните ситуации во светот и потребата да се најдат начини за мир“. Белата куќа соопшти дека Бајден телефонски разговарал за ова прашање и со израелскиот премиер Бенјамин Нетанјаху.

Папа Франциск до верниците: Заземете ја страната на мирот во судирот меѓу Хамас и Израел

Ивана Ефремовски — Wed, 18 Oct 2023 15:35:01 +0000

Папата Франциск денеска изрази жалење за „очајната“ ситуација во Појасот Газа, повикувајќи ги верниците да заземат само една страна во конфликтот меѓу Израел и Хамас - „страната на мирот“. За време на неговата аудиенција на плоштадот Свети Петар, папата директно не ја спомена експлозијата во болницата Ал Ахли во Газа, за која Палестинците ја обвинија израелската армија (ИДФ), додека ИДФ тврди дека експлозијата била резултат на неуспешна ракета лансирана од палестинскиот исламски Џихад. Папата повика да се направат сите можни напори за да се избегне хуманитарна катастрофа, пренесуваат британските медиуми. Папата најави и дека на 27 октомври во базиликата Свети Петар ќе ја предводи пригодната миса и молитвата за мир. (МИА)

Папата Франциск апелира да се избегне хуманитарна катастрофа во Појасот Газа

Катерина Бојаџиева — Wed, 18 Oct 2023 08:48:47 +0000

Папата Франциск апелира да се направат сите напори за да се избегне хуманитарна катастрофа во Појасот Газа и изрази загриженост поради ризикот од проширување на конфликтот помеѓу Израел и Хамас. - Жртвите се зголемуваат, а ситуацијата во Газа е очајна. Ве молиме направете сè што е можно за да избегнете хуманитарна катастрофа, истакна поглаварот на Римокатоличката црква. Тој експлицитно не ја спомна синоќешната експлозија што ја урна болницата во Газа, при што загинаа стотици луѓе. - Можното проширување на конфликтот е загрижувачко, додека во светот веќе се отворени толку многу фронтови. Нека замолкне оружјето, нека се слушне крикот за мир на сиромашните, на луѓето, на децата. Војната не решава никакви проблеми, таа само шири смрт и уништување. Ја зголемува омразата, ја умножува одмаздата. Војната ја брише иднината, истакна папата Франциск. Тој говорејќи пред илјадници луѓе на плоштадот Свети Петар во Ватикан додаде: „Ги повикувам верниците да заземат само една страна во овој конфликт - онаа на мирот“.

Папа Франциск: Фактот што толку многу луѓе немаат храна е срам за човештвото

Ивана Ефремовски — Mon, 16 Oct 2023 13:56:48 +0000

Фактот што толку многу луѓе во светот немаат храна е срам за човештвото, рече папата Франциско на Светскиот ден на храната што се одбележува денеска, пренесе италијанската новинска агенција АНСА. -Фактот што толку многу луѓе немаат пристап до храна, вода и други основни потреби е навреда на нивното од Бога дадено достоинство, навреда што треба да го срами целото човештво и да ја мобилизира глобалната заедница на #Светскиот ден на храната (#WirldFoodDay), изјави папата на социјалната мрежа Х. (МИА)

Папата Франциск го повика Хамас да ги ослободи сите затвореници и изрази загриженост за блокадата на Газа

Катерина Бојаџиева — Wed, 11 Oct 2023 11:43:00 +0000

Папата Франциск денеска ја повика исламистичката група Хамас да ги ослободи сите затвореници земени за време на нападот врз Израел викендот, истовремено изразувајќи сериозна загриженост за „целосната блокада“ што еврејската држава ја воведе на Појасот Газа. „Се молам за оние семејства чие празнување се претвори во ден на тага и барам заробениците веднаш да бидат ослободени“, рече Папата за време на својата неделна аудиенција. Во врска со реакцијата на Израел на нападот на Хамас, Папата рече: „Право на оние кои беа нападнати е да се бранат, но јас сум многу вознемирен од целосната блокада во која живеат Палестинците во Газа, каде што има и многу невини жртви“. „Тероризмот и екстремизмот не помагаат да се реши конфликтот меѓу Израелците и Палестинците, туку водат само до омраза и суровост. На Блискиот Исток не му е потребна војна“, додаде папата Франциск.

Папата денеска побара да се запрат нападите во Израел

Ивона Петрова — Sun, 08 Oct 2023 14:21:42 +0000

Поглаварот на Римокатоличката црква, папата Франциско, побара денеска „да се запрат нападите“ во Израел, наведувајќи дека „тероризмот и војната не водат до никакво решение“. „Со страв и тага следам што се случува во Израел. Изразувам солидарност со семејствата на жртвите. Се молам за сите оние кои живеат во ужас и вознемиреност“, рече Папата по традиционалната неделна молитва. „Ве молам да престанете со нападите и да престанете да користите оружје...Тероризмот и војната не водат до никакво решение, туку носат само смрт и страдање на толку многу невини луѓе...Секоја војна е нов пораз“, додаде тој. „Се молиме за мир во Израел и во Палестина“, заклучи Папата, кој конкретно не ги спомна ниту Појасот Газа ниту Хамас.

Папа Франциск: Медитеранот е колевка на цивилизацијата, не треба да стане гробишта

Ивона Петрова — Wed, 27 Sep 2023 10:18:12 +0000

Папата Франциск денеска го повтори апелот да се направи се за да се спречи загубата на животи на мигрантите кои се обидуваат да го преминат Средоземното Море. Тој на овонеделната генерална аудиенција рече дека е „сон и предизвик“ за Средоземното Море да го врати својот углед на расадник на цивилизацијата и мирот. „Медитеранот е колевка на цивилизацијата и колевка на животот. Не смее да се дозволи Медитеранот да стане гробишта, ниту сцена на судири“, рече Папата. Меѓународната организација за миграции (ИОМ) соопшти дека оваа година повеќе од 2.350 луѓе загинале или исчезнале во Средоземното Море, главно преку главната медитеранска мигрантска рута меѓу Северна Африка и Италија. „Средоземното Море претставува целосна спротивност на судирот на цивилизациите, војната, шверцот со луѓе. Тоа треба да биде средство за комуникација меѓу Африка, Азија и Европа, меѓу северот и југот, истокот и западот, луѓето и културите, јазиците, филозофиите и религиите“, додаде папата Франциск

Папата Франциск по повод Светскиот ден на мигрантите: Неопходно е да се зачува човечкото достоинство, а не личната благосостојба

Дарко Андоновски — Sun, 24 Sep 2023 12:26:58 +0000

Зачувувањето на човечкото достоинство, наместо на личната благосостојба, мора да биде главен критериум за добредојде, заштита и интегрирање на мигрантите и бегалците, порача денеска папата Франциск на Светскиот ден на мигрантите и бегалците. „Ајде нека не трогне приказната за толку многу наши браќа и сестри кои се соочуваат со тешкотии, кои имаат право да емигрираат или да не емигрираат и да не се затвораме во рамнодушност, рече папата Франциск на платформата Икс (Твитер), објавија италијанските медиуми. Тој рече дека главен критериум не може да биде зачувување на личната благосостојба, туку зачувување на човечкото достоинство. Римокатоличката црква го прославува Светскиот ден на мигрантите и бегалците секоја година во последната недела од септември.

Папата Франциск: Во Европа нема вонредна состојба поради мигрантите, справувајте се со тоа хумано

Ивана Ефремовски — Sat, 23 Sep 2023 12:37:51 +0000

Папата Франциск денеска во Марсеј изјави дека Европа не се соочува со вонредна состојба поради приливот на мигранти и го повика францускиот претседател Емануел Макрон и другите европски лидери да ги отворат пристаништата за луѓето што бегаат од тешкотии и сиромаштија. Тој рече дека миграцијата не е вонредна состојба во Европа, туку долгорочно прашање и реалност со која државите мора да се справат на хуман начин. - Да дозволиме да бидеме трогнати од приказните на нашите несреќни браќа и сестри кои имаат право и да емигрираат и да не емигрираат. Соочени со страшното зло на експлоатација на човечки суштества, решението не е во одбивање, туку да се обезбеди, според можностите, доволен број легални влезови, им рече Франциск на Макрон и на другите учесници на состанокот на медитеранските бискупи во Марсеј. Десничарската влада на Италија, под притисок од приливот на мигранти од Африка, претходно се закани со порестриктивни мерки и блокада на поморските патишта во Средоземното Море. Француската влада ги засили патролите на својата јужна граница за да ги спречи мигрантите да преминат од Италија. Центристичката влада на Макрон зазеде построг став за миграцијата и безбедноста откако се соочи со критики од француските конзервативци и екстремната десница. Со изборите за Европскиот парламент закажани за следната година, Макрон се залага ЕУ да ги зајакне своите надворешни граници и да биде поефикасна во депортирањето на лицата на кои им е забранет влез. Макрон и Франциск денеска имаа и тет-а-тет средба. Ватикан нагласи дека Франциск не е во официјална посета на Франција, туку во посета на Марсеј, бидејќи не сака да оди во официјални посети на силните католички земји пред да ги посети помалите земји и областите каде што луѓето живеат потешко. И покрај тоа што пред извесно време на Лампедуза пристигнаа 7.000 мигранти за само еден ден, повеќе отколку што има жители на италијанскиот остров, Франциск рече дека оценките за вонредната состојба се само „алармистичка пропаганда“ и поттикнуваат страв кај луѓето. (МИА)