парламентарни партии – Kurir.mk

Ковачевски на средба со лидерите на парламентарните партии

Ивона Петрова — Mon, 07 Nov 2022 06:46:19 +0000

Премиерот и претседател на СДСМ, Димитар Ковачевски денеска во Собранието ќе одржи средба со лидерите на парламентарните политички партии, на која треба да се разговара за европскиот пат на земјава, како и за одлуките што во иднина треба да се носат со широк политички и општествен консензус. – Средбата која ја свикува претседателот на Владата, се организира со цел да се отвори дискусија за европската иднина на Република Северна Македонија, но и за одлуките кои во наредниот период треба да се носат во Собранието со широк политички и општествен консензус. Поканата до претседателите на парламентарните политички партии ќе биде испратена во текот на утрешниот ден, соопшти Владата во најавата за свикување на средбата на 2 ноември. Премиерот Ковачевски во саботата по увидот на градежните работи на делницата од патот Фариш – Прилеп изјави дека лидерската средба ја свикал со цел сите политички партии кои се застапени во Парламентот заедно да разговараат за европската иднина на државата и за сите одлуки коишто треба да бидат доносени во еден широк, општествен и политички консензус. – Убеден сум дека ќе дадат поддршка во носењето на брзи и квалитетни одлуки во Собранието. Дел од разговорите, нормално ќе биде скрининг процесот којшто се одвива после првата меѓувладина конференција помеѓу нашата дражва и ЕУ, објаснувачкиот скрининг и подготовките за билатералниот скрининг, потоа сите оние клучни аспекти коишто се однесуваат на интегрирањето на државата во ЕУ, а тоа е, пред се, владеењето на правото, борбата против криминалот и корупцијата и економските аспекти на нашата соработка со ЕУ, рече Ковачевски. Тој нагласи дека приклучувањето кон ЕУ не е само прашање на интеграција, не е само политичко прашање, туку веќе станува и економско прашање и сите граѓани можат да видат дека во справувањето со економската криза нашата дражва не е оставена сама, потенцирајќи дека она што го кажа претседателката на Европската комисија, Урсула фон дер Лакен, но и пораките упатени од Самиот на земјите од Западен Балкан одржан минатата недела во Берлин, покажуваат дека регионот и нашата држава се дел од активностите на Унијата. Лидерот на ВМРО-ДПМНЕ, Христијан Мицкоски во саботата потврди дека ќе присуствува на средбата, најавувајќи дека на неа ќе ги презентира партиските ставови, кои е подготвен да ги браниме секаде во светот. – Ќе дојдам на лидерската средба, ќе кажам јасно и гласно дека најреалната причина за која една лидерска средба би имала содржина се разговор за реалните проблеми на народот кој е гладен, а чиј излез се предвремени парламентарни избори, рече Мицкоски во обраќањето на партискиот настан насловен „Саем на промените што носат иднина!” по повод една година отчет за сработеното на градоначалниците од редовите на ВМРО-ДПМНЕ. Тој додаде дека во однос на промените на Уставот, тоа прашање е затворена тема за ВМРО-ДПМНЕ, затоа што, како што рече, уставни измени „нема да има под овие околности и без гаранции за нашата европска иднина заштитени од идни условувања од Бугарија”. – Без јасни гаранции за европска иднина на Македонија каде што нема Бугарија да има можности да го кочи тој процес, без такви јасни гаранции за македонскиот идентитет, македонскиот јазик, уставни измени нема да има. Тоа треба секој да го знае, рече Мицкоски. Потпретседателот на Демократската унија за интеграција (ДУИ), Арбер Адеми во изјава за МИА нагласи дека претставници на партијата ќе присуствуваат на лидерската средба иницирана од премиерот Ковачевски. – Со оглед на важноста на моментот низ кој поминуваме, како општество и како држава, сметам дека е правилно да се одржи ваква средба, бидејќи ситуацијата е сериозна и заслужува сериозен одговор и одговорност од сите политички партии, а особено уште повеќе кога имаме предвид дека за европската агенда, уставните измени за кои се потребни двотретинско на пратеници импонира неопходно седнување на една маса, соработка и заедничко одлучување на парламентарните политички партии, рече Адеми. За иницијативата на „Беса” за средба на политичките партии на Албанците на кои би се разговарало за уставни измени во однос на употребата на албанскиот јазик, Адеми посочи дека со нив немаат никакви разлики за клучните прашања и се во постојана комуникација. – Сите сме на иста линија, нема разлика и ќе бидеме во комуникација, како што и до сега сме биле во комуникација. Јасно ни е што треба да направиме како албанска политичка партија. За нас, тоа е исклучително важно – без алтернатива за нашата европска ориентација и европската агенда. Но, она што е потребно и неопходно во овој момент е постигнување на широк политички, општествен и меѓуетнички консензус, кој сигурно би резултирал со двотретинско мнозинство од гласовите. Затоа, само преку инклузивен процес, кој има за цел да се постигне потребното квалификувано мнозинство за уставните измени, мислам дека е правилно да има ваков настан, ваква организација, со која ќе покажеме сериозност и политичка одговорност, рече Адеми. Од Алтернативата за МИА посочија дека немаат никаква дилема дали треба да дадат поддршка на предлогот за бришење на формулацијата „20 проценти” за употребата на албанскиот јазик и затоа нема потреба од некоја посебна средба. – Неалбанските партии се веќе подготвени за ова прашање и ова веќе не е тема која наметнува некаква посебна средба на албанските политички партии. Доколку има други околности и други теми, таквите покани ќе бидат разгледани, велат од партијата во однос на иницијативата на Беса за средба на партиите на Албанците од земјава. И од Алијансата за Албанците во изјава за МИА потврдија дека ќе учествуваат на лидерската средба иницирана од премиерот, додавајќи, исто така, дека се во постојана комуникација со сите политички партии на Албанците. Од друга страна, претседателот на партијата Левица, Димитар Апасиев информира дека нема да учествува на лидерската средба. – Со нас не можат да се договараат. Ние сме тврд орев, рече Апасиев. Се уште не е познато ниту дали на лидерската средба ќе учествува претседателот на Движењето Беса, Биљал Касами. За денеска во 11 часот Касами свика прес-конференција на која се очекува да ја соопшти конечната одлука околу учеството на средбата. Идејата за одржување на средба на партиите на Албанците на која би се разговарало за измени на Амандманот 5 со кој би се сменила формулацијата „јазикот кој го зборуваат 20 проценти од граѓаните” со „албански јазик”, ја најави потпретседателот на Движењето Беса, Арјанит Хоџа на прес-конференција на 2 ноември. Тој информира дека Беса ќе испрати покана до сите партии на Албанците за заедничка средба. Хоџа потоа во телевизиско гостување изјави дека некои од партиите побарале да ги консултираат партиските органи пред да го изнесат нивниот став за идејата на Беса, а од некои партии немаат одговор, туку само потврда дека им стигнала поканата за средба. МИА

Резолуцијата поддржана од СДСМ, ДОМ, ЛДП и ДС, албанскиот блок воздржан

Ивона Петрова — Wed, 07 Jul 2021 07:00:55 +0000

Откако деновиве резолуцијата што ја поднесе ВМРО-ДПМНЕ беше поддржана од СДСМ, ДОМ, ЛДП и ДС, се произнесоа и партиите од албанскиот блок. ДУИ бара усогласување на текстот меѓу сите парламентарни партии, додека АА и Алтернатива очекуваат дебата во Собранието. Но, и владејачката ДУИ и опозициската коалиција Алијанса за Албанците (АА) и Алтернатива укажаа дека треба да се внимава, резолуцијата да не му наштети на евроинтеграцискиот пат на државата. За АА и Алтернатива е проблем тоа што ДУИ и СДСМ немаат заеднички став околу резолуцијата. -Има еден проблем. Имавме изјава на министерот за надворешни работи Бујар Османи дека оваа резолуција и штети на меѓународните тенденции на земјата, но исто така имавме и изјава на пратеникот од СДСМ Костадинов дека оваа резолуција е добра. Логично би било партиите на власта да имаат заеднички став, рече Халил Снопче од коалицијата АА и Алтернатива. Тој порача Владата да биде внимателна. – За нас е важно Македонија да продолжи со интегративните процеси, Владата и општеството севкупно да продолжат со залагањата за интеграција во ЕУ, тоа е главна цел. Владата да биде внимателна и во разговорите и во реформите. За нас се многу битни добрите односи во регионот, па следствено и со Бугарија, изјави Снопче. Според координаторот на пратеничката група на ДУИ Арбр Адеми, потребно е усогласување на резолуцијата меѓу сите парламентарни партии како гаранција дека текстот нема да му наштетува на чекорењето на државата кон ЕУ. Тој смета дека не треба да се прави ништо што ќе биде спротивно на ЕУ интеграцијата. -ДУИ смета дека јазичниот, историскиот и културниот идентитет не е прашање за дискусија и не е прашање за политичко договарање. Следствено, цениме дека е потребно усогласување на текстот на резолуцијата меѓу сите парламентарни партии и да се осигураме дека тоа не му наштетува на нашето чекорење кон ЕУ, рече вчера Адеми по средбата со пратеникот Антонио Милошоски од ВМРО-ДПМНЕ. Вицепремиерот за борба против корупцијата и генерален секретар на СДСМ, Љупчо Николовски од Берово порача дека неговата партија ќе даде поддршка на секоја резолуција или декларација со која се штити македонскиот јазик и идентитет. Но, Николовски потсети и дека оваа генерација по три децении зборување и ветување на евроатлантските интеграции, го направи вистинскиот чекор – земјата ја внесе во НАТО со зачуван идентитет, јазик и се што е македонско. Нашето знаме, додаде Николовски, се вее во Брисел, а премиерот седеше со своите колеги и со претседатели на една маса на која и ние имаме глас. – Станува јасно дека сите ние го штитиме и јазикот и идентитетот и се што е македонско. Не е воопшто прашање и нема воопшто потреба да се стави под прашање каква било резолуција. Ние ќе дадеме поддршка на резолуцијата. Веруваме дека сите постапки ќе завршат во Парламентот и со тоа потврдуваме дека ниту јазикот, ниту посебностите, ниту идентитетот некој ги ставил на маса или преговарал во целиот овој период. Големи светски државници пред неколку дена во Охрид пратија порака и констатираа дека нашата земја ги има исполнето сите услови за сето она што треба да го направиме и дека Европската Унија треба да го реши проблемот внатрешно за овие кочници кои ги имаме. Меѓутоа, во ниту еден случај тоа нема да биде во однос на прашањето на јазикот и идентитетот и на сето она кое е македонско и кое е потврдено, изјави Николовски. ВМРО-ДПМНЕ изрази надеж дека СДСМ ќе остане доследна на кажаното и ќе ја поддржи резолуцијата, без низ собраниски процедури да се обидува да ја кочи и опструира. Потсети и дека во неа се содржани црвените линии со кои се штити идентитетот. – ВМРО-ДПМНЕ продолжува да обединува и да ја води Македонија во насока на национално единство и просперитет. Резолуцијата која ја предложивме, а е плод на заедничките ставови на МАНУ, УКИМ и МПЦ – ОА ќе ги заштити националните црвени линии, околу кои не смее да има компромиси. Оваа Резолуција го отсликува ставот на народот. Време е Македонија да престане со лошата пазарџиска дипломатија. Време е за стабилност во надворешната политика. Време е за Македонија за сите луѓе, наведе ВМРО-ДПМНЕ во партиско соопштение. Резолуцијата е се уште во драфт верзија, а ВМРО-ДПМНЕ изминатите денови лобираше кај парламентарните партии да биде прифатена. МИА

ВМРО-ДПМНЕ: Сите парламентарни партии да ги поддржат предлог измените на Законот за средно образование, државата мора да им помогне на матурантите!

Тале Кристо — Tue, 02 Feb 2021 07:42:11 +0000

ВМРО-ДПМНЕ ги повикува сите парламентарни партии, да ги поддржат предлог измените на Законот за средно образование, кои ги доставивме до Собранието, а се со цел да им се помогне на матурантите, велат во партиското соопштение од ВМРО-ДПМНЕ. Матурантите изминатата година се соочија со големи проблеми, како неодржување на настава и скратени часови, во времетраење од 30 минути, сето тоа доведе до помал број на часови на настава и поголеми тешкотии на учениците за совладување на материјата.Со цел да им се помогне тие да продолжат со своето образование без дополнителни стресови, ние сметаме дека нивните барања да полагаат два предмети матура се оправдани, додават од партијата. Обединетото Кралство, Ирска, Франција и Белгија, веќе го применија овој модел за намалување на бројот на предмети кои матурантите ќе ги полагаат, стои во соопштението. Бараме од сите партии, особено од власта да ги поддржи овие законски измени, бидејќи за иднината на државата се работи. Време е да се стават теснопартиските интереси на страна и да се поддржат измените во Законот за средно образование, децидни се од ВМРО-ДПМНЕ.