Парни ваљак – Kurir.mk

Хус откри што ќе биде со Парни Ваљак по смртта Аки

Магдалена Андонова — Sat, 29 Jan 2022 09:29:40 +0000

Во Загреб, поточно во Малата сала на Ватрослав Лисински, се одржа комеморација по повод смртта на фронтменот на Парни Ваљак, Аки Рахимовски. На комеморацијата присуствуваше и Хусеин Хасанефендиќ Хус, долгогодишниот соработник и пријател на Аки. - Беше нормален, топол човек, со сите доблести и маани. Со бесконечна душа и бесконечно срце, но со тотален недостаток на самоконтрола и свесност дека мора да се пази. Нема машина што оди вечно, ако не е подмачкана, не знам... Едноставно не можеше да го направи тоа. До даска, секој пат до даска - изјави Хус за Индекс.хр. Запрашан дали некој би го заменил Аки, бидејќи Парни Ваљак планира турнеја оваа година, Хус одговори: - Ние како бенд ќе опстанеме како формација, но сигурно нема да го смениме Аки. Можеби во одреден момент ќе свириме концерти со некој пејач кој ќе гостува или нешто слично. Аки е незаменлив. Можеби ќе има ново поглавје, не знам, не размислувам за тоа... Верувај ми, ќе умреме ако не продолжиме да свириме. Мора да свириме. Тоа не ни треба за да живееме, живееме за да свириме. Сега можеме да застанеме и ок, ќе се снајдат помладите момци, егзистенцијално сме осигурени и без Парни Ваљак... На Ваљак не му требавме за да заработиме, требаше да свириме - рече Хус и додаде: - Мислам дека дефинитивно ќе одржиме трибјут концерт, тоа мораме да го направиме поради Аки. Што ќе се случи понатаму, не знам ... - рече Хус.

„Парни ваљак“ за новогодишната ноќ во Скопје

Предраг Кукиќ — Fri, 14 Dec 2018 13:49:56 +0000

Аки Рахимовски и „Парни ваљак“, неколку македонски пејачи, диџеј и група од Косово ќе ги забавуваат скопјани за новогодишната ноќ. Новогодишната програма ќе почне во 21 часот на Градскиот плоштад „Македонија“ и ќе трае до еден часот по полноќ. Ова на денешната прес-конференција го соопштија скопскиот градоначалник Петре Шилегов и главниот извршен директор на Македонски телеком, Никола Љушев. Градоначалникот Шилегов изјави дека никогаш не би го пропуштил настапот на „Парни ваљак“ и оти ќе присуствува на новогодишната прослава заедно со скопјани.

„Парни ваљак“ бара замена за Аки

Ивона Петрова — Sat, 05 May 2018 13:22:12 +0000

„Парни ваљак“ бара привремена замена за својот легендарен пејач Аки Рахимовски, кој заздравува од мозочен удар. Тие не откриваат или навестуваат кој би можел да го замени Аки на претстојните концерти, но тоа ќе биде првпат од основањето во 1975 година, групата да има друг пејач. -Аки во нареден период нема да настапува. Тоа е само од претпазливост. Добро напредува, но не сакаме да го оптоваруваме, кажа менаџерот на групата, Дино Бахтијаревиќ. Бендот ќе го има првиот настап без 62-годишниот Аки на 17 мај. Тој е еден од основачите на групата и беше вокал на сите 18 студиски албуми. Во почетокот на минатиот месец, тој претрпи полесен мозочен удар и иако заздравува, сè уште постои можност да оди на операција. Во меѓувреме, го смени начинот на исхрана и ги откажа кафето и цигарите. -Татко ми сè уште се лекува и одмора. Нема да биде подготвен за настапи уште некое време, но сите се надеваме дека ќе се врати на сцена, изјави неговиот син Кристијан. Аки додаде дека е оптимист по тоа прашање. -Верувам дека сè ќе биде во ред. Се чувствувам добро и се надевам дека наскоро ќе им се придружам на колегите од бендот, изјави Рахимовски.

Аки Рахимовски доживеал мозочен удар, еве каква е неговата состојба

Ивона Петрова — Tue, 10 Apr 2018 07:44:09 +0000

Фронтменот на групата „Парни ваљак“, Аки Рахимовски доживеал полесен мозочен удар. Како што се наведува во соопштението на официјалните страни на групата на Фејсбук и Инстаграм, пејачот се чувствувал подобро. Бендот, меѓутоа, ги откажал сите концерти на неодредено. -Аки имаше полесен мозочен удар и иако сега се чувствува подобро, потребно е некое време да намали со обврските и да се посвети на заздравувањето. Сериозно ја сфаќаме нашата работа и не би сакале да ве разочараме, вас кои се радувавте на претстојните концерти, но здравјето на Аки сега е на прво место, се наведува во пораката. Весникот 24сата наведува дека Рахимовски по излегувањето од болница им рекол дека е добро. -Не е ништо страшно, рекол пејачот. Неговиот колега од бендон Хус потврдил дека Рахимовски не е во животозагрозувачка состојба.