Павло Кириленко – Kurir.mk

„Нужно за да се спасат животи“: Гувернерот Кириленко повика 350.000 цивили од Доњецк да се евакуираат

Катерина Бојаџиева — Wed, 06 Jul 2022 06:51:02 +0000

Гувернерот на Доњецк, Павло Кириленко повика 350.000 цивили да се евакуираат од источниот украински регион поради претстојните руски офанзиви. Повикот следува еден ден откако рускиот претседател Владимир Путин прогласи победа во соседниот регион, Луганск. Се верува дека токму Доњецк е следната цел на Русите. Извлекувањето на 350.000 цивили е „нужно за да се спасат животи“, смета Кириленко, како и да се „овозможи украинската војска полесно да ги брани градовите од руските офанзиви“. – Судбината на целата земја ќе биде одлучена во Доњецк. Кога од регионот ќе се евакуираат цивили, војската ќе може да се сконцентрира на непријателот, истакна Кириленко. Руските сили жестоко го бомбардираа Словјанск, град во Доњецк што се смета за клучна цел на руските сили, заедно со Краматорск. Градоначалникот на Словјанск, Вадим Лика преку Фејсбук ги повика жителите на евакуација.

Кириленко: Најмалку 10 загинати во руското гранатирање фабрика на исток

Магдалена Андонова — Tue, 03 May 2022 18:17:12 +0000

Најмалку десет лица загинаа денеска, а 15 се повредени во руското гранатирање на хемиска фабрика во градот Авдеевка во источна Украина, изјави гувернерот на областа Доњецк, Павло Кириленко. - Русите точно знаеја каде да нишанат, работниците штотуку ја завршија смената и чекаа автобус на автобуската станица да ги однесе дома. Уште едно цинично злосторство на Русите кај нас, напиша Кириленко на Телеграм. Тој предупреди дека бројот на жртви може да расте. Авдеевка, град со околу 30.000 жители, се наоѓа на неколку километри од градот Доњецк, главниот град на самопрогласената Доњецка Народна Република, која е под контрола на проруските сепаратисти. Градот беше место на жестоки борби по избувнувањето на конфликтот меѓу украинските сили и проруските сепаратисти во 2014 година, но ситуацијата е релативно мирна од почетокот на руската инвазија на Украина. (МИА)

Кириленко: Загинаа пет лица, од кои две деца, во руската офанзива во источен Доњецк

Тале Кристо — Tue, 26 Apr 2022 06:38:14 +0000

Загинаа најмалку пет лица, од кои две деца, во источниот регион на Доњецк во руската офанзива, информираше денеска гувернерот Павло Кириленко. Меѓу жртвите се деветгодишно девојче и момче на возраст од 14 години, објави Кириленко на Телеграм. Покрај ова, во руските напади на украинските железници во регионот на Виницја, ранети се 18 лица, соопшти локалното Обвинителство. Русија соопшти дека со високо прецизни ракети уништила шест железнички постројки, користени за испорака на оружје на украинските сили во Донбас. Експлозија на проектил утринава предизвика пожар на железничката станица Крансе во близина на Лавов, во западниот дел на Украина, според гувернерот на регионот. Нема податоци за жртви и повредени. Претходно денеска, Украинската воена команда објави дека Русија се обидува да бомбардира украински железници, со цел да ја наруши испораката на оружје од странство. Директорот на украинските железници, Олександер Камишин истакна дека руските сили систематски ја уништуваат железничката инфраструктура.

Кириленко: Руските сили користеле касетна муниција во Краматорск

Ивана Ефремовски — Fri, 08 Apr 2022 12:50:24 +0000

Гувернерот на Доњецката област, Павло Кириленко, денеска ги обвини руските сили за употреба на касетна муниција при нападот на железничката станица во градот Краматорск, во кој загинаа најмалку 39 лица. Тој на интернет објави фотографија на која се гледаат неколку тела на земја покрај куп куфери и друг багаж, но не наведе со какви докази располага за видот на оружјето што е употребено во нападот. -Ако на почетокот гаѓаа исклучиво железнички пруги, сега тоа не се само пруги, туку се истрелуваат проектили кои содржат касетна муниција наменета за луѓе. Тоа е апсолутна потврда дека овој напад беше наменет против цивили, истакна Кириленко на онлајн брифинг. Русија демантира дека мета на нејзините напади се цивили. Руското Министерство за одбрана соопшти дека ракетите кои наводно ја погодиле станицата ги користи само украинската армија, а руските вооружени сили денеска не планирале да гаѓаат какви било цели во Краматорск. (МИА)