Педро Санчез – Kurir.mk

Педро Санчез доби мандат од шпанскиот крал да формира влада

Ивона Петрова — Tue, 03 Oct 2023 13:09:02 +0000

Шпанскиот крал Фелипе Шести му даде мандат на вршителот на должноста премиер Педро Санчез да формира нова влада, откако неговиот ривал Алберто Нунес Феихо не успеа да обезбеди мнозинство во Парламентот. Социјалистите на Санчез освоија помалку гласови од конзервативците на Феихо на парламентарните избори на 23 јули, но Санчез тврди дека може да собере доволно гласови во Парламентот за неговата кандидатура. За да се формира нова влада, Санчез ќе треба да се договори со претставниците на каталонските сепаратистички партии. Доколку ниту еден кандидат за мандатот не обезбеди мнозинство до 27 ноември, ќе бидат распишани нови избори. Според Еуроактив, Санчез се приближува до „моментот на вистината“, бидејќи наскоро ќе треба да објасни дали е подготвен да се сретне со сепаратистите кои бараат амнестија за сите уапсени по демонстрациите за независност на Каталонија. Некои медиуми објавија дека социјалистите се подготвени на таа отстапка, за да ги убедат сепаратистичките партии да ги поддржат. Од друга страна, Феихо и лидерот на десничарската партија Вокс, Сантијаго Абаскал, веќе предупредија дека нивните поддржувачи ќе организираат масовни демонстрации доколку владата го усвои законот за амнестија.

Санчез одби да поддржи двегодишната влада на ПП

Тале Кристо — Wed, 30 Aug 2023 14:05:44 +0000

Вршителот на должноста премиер на Шпанија, Педро Санчез, ја отфрли понудата на конзервативниот лидер Алберто Нунес Фејхо да поддржи двегодишен мандат за неговата Народна партија (ПП). Партијата на Фејхо освои најмногу места, но не успеа да обезбеди мнозинство на националните избори минатиот месец, а тој се обидува да добие поддршка во Долниот дом на Парламентот за претстојното гласање на 27 септември. Претходно на денешниот состанок Фејхо му понуди на социјалистот Санчез да го поддржи во замена за политички пакт. За жал, она што го добив, колку што разбрав, е не, изјави Фејхо на новинарите по средбата. Портпаролот на Шпанска социјалистичка работничка партија (ПСОЕ) истакна дека ПСОЕ нема да ја поддржи кандидатурата на Фејхо за премиер. Претходно овој месец, Санчез рече дека има намера да се кандидира и за премиер. Минатата недела шпанскиот крал Фелипе му го врачи мандатот на Фејхо да формира влада. Тој мора да обезбеди апсолутно мнозинство од најмалку 176 гласови во 350-члениот Парламент на првото гласање или просто мнозинство на второто гласање во рок од два дена од првото гласање. Екстремно десничарската партија Вокс и двете регионални партии најавија дека ќе го поддржат Фејхо, со што се обезбедени 172 гласа, но тој сепак треба да убеди голем број регионални групи да го поддржат или да гласаат „воздржани“ на второто гласање за да може да се формира влада. На 17 август социјалистите на Санчез успеаја да соберат 178 гласови со поддршка на левичарските и регионалните партии и нивниот кандидат беше избран за претседател на Парламентот.

Педро Санчез на чело на привремената Влада на Шпанија

Катерина Бојаџиева — Tue, 25 Jul 2023 12:19:11 +0000

Шпанскиот премиер Педро Санчез од денеска ја предводи привремената Влада до изборот на новата влада, откако ниту една партија не освои мнозинство на парламентарните избори во неделата. Кралот Фелипе Шести издаде декрет според кој, Санчез останува на чело на привремената Влада која ќе се занимава со тековните работи „додека новиот шеф на владата не ја преземе функцијата“. Ниту една партија не освои мнозинство во Парламентот за да владее сама. Преговорите за коалиции почнаа, но атмосферата за можни нови избори веќе почнува да преовладува. Конзервативната опозициска Народна партија освои 136 од 360 места во Парламентот, а за апсолутно мнозинство се потребни 176 места. Лидерот на таа партија, Алберто Нуњез Феихо, вчера почна разговори со неколку партии за формирање влада, но неговите напори се чини дека се осудени на неуспех, бидејќи екстремно десничарската Вокс е непопуларна за другите партии. Баскиските националисти му порачаа на лидерот на Народната партија дека не сакаат да разговараат со него. На изборите Социјалистичката партија на премиерот Санчез освои 122 пратенички места, а радикалната левица Сумар освои 31 место. Тие две партии обединети и со поддршка на баскиската и каталонската партија би можеле да имаат мнозинство во Парламентот.

Санчез вети 55 милиони евра помош за Украина

Тале Кристо — Sat, 01 Jul 2023 17:31:20 +0000

Шпанскиот премиер Педро Санчез вети 55 милиони евра (60,1 милиони долари) нова помош за Украина за време на неговата денешна посета на Киев, јави ДПА. -Средствата се наменети за финансирање на малите и средни претпријатија во Украина, рече Санчез за време на неговото обраќање во украинскиот Парламент. Тој додаде дека ЕУ ќе и помага на Украина „се додека е потребно“ и „без разлика на цената што треба да се плати“. -Европа е отворена за оние кои се стремат кон тоа, рече тој, поддржувајќи ги аспирациите на Киев за членство во ЕУ. Говорот во Парламентот не беше пренесуван во живо од безбедносни причини.

Санчез во Киев: ЕУ е решена да и помогне на Украина во борбата против руската агресија

Тале Кристо — Sat, 01 Jul 2023 15:17:52 +0000

Шпанскиот премиер Педро Санчез, кој е во посета на Киев, денеска изјави дека Европската унија е решена да и помогне на Укарина во борбата против руската агресија. Санчез одржа говор во украинскиот парламент каде рече дека ЕУ ќе биде со Украина онолку долго колку што е потребно, пренесе Бета. - Тука сум да ја изразам цврстата решеност на ЕУ и Европа против нелегалната и неоправдана руска агресија врз Украина. Ова е агресорска војна. Агресорот и жртвата не може да се третираат подеднакво, а игнорирањето на правилата не треба да се наградува на кој било начин. Затоа го поддржуваме мировниот план на Зеленски, истакна шпанскиот премиер, чија земја од денеска е нов претседавач со ЕУ. Осврнувајќи се на можноста за мировни преговори, Санчез кажа дека „само Украина може да ги одреди условите и времето за тоа“. Санчез во Киев ќе има средба со украинскиот претседател Володимир Зеленски по што ќе одржат заедничка прес конференција.

По неуспехот на вчерашните избори, шпанскиот премиер Санчез најави предвремени парламентарни избори во јули

Ивана Ефремовски — Mon, 29 May 2023 12:14:43 +0000

Премиерот на Шпанија, Педро Санчез по резултатите од вчерашните регионални и локални избори најави дека ќе го распушти парламентот и на 23 јули во земјата ќе се одржат предвремени општи избори. - Одлуката ја донесов гледајќи ги резултатите од вчерашните избори, ѝ рече Санчез на нацијата во телевизиско обраќање. Санчез соопшти дека го информирал шефот на државата, кралот Фелипе Шести, за неговата одлука, која дојде по одлучувачката победа на конзервативците над левицата на вчерашното гласање. Шпанската социјалистичка работничка партија (ПСОЕ) на Санчез и нејзиниот помал сојузник Подемос загубија на вчерашните регионални избори, додека ривалската конзервативна Народна партија и екстремно десничарската партија Вокс поминаа подобро. „Иако вчерашните избори имаа локални и регионални димензии, значењето на гласањето пренесува порака што оди подалеку од тоа. Затоа, и како премиер и како генерален секретар на ПСОЕ, јас лично ги претпоставувам резултатите. Шпанските владејачки социјалисти беа поразени од опозициската Народна партија на вчерашните локални избори. Опозициската ПП освои апсолутно мнозинство во два од 12-те региони каде што се одржаа изборите, а со Вокс може да оформи мнозинство во уште шест региони. Пред изборите, владејачките социјалисти управуваа сами или во десетчлена коалиција. По пребројани 99,89 отсто од гласовите, десноцентристичката опозициска Народна партија (ПП) има 31,51 отсто од гласовите, а владејачките социјалисти (ПСОЕ) 28,11 отсто. Трета партија е екстремно десничарската Вокс со 7,19 отсто од гласовите. Така, ПП доби речиси два милиони гласови повеќе отколку на изборите во 2019 година, додека социјалистите изгубија 400.000 гласови, а поддршката на Вокс низ целата земја се удвои, според податоците објавени од весникот Ел Паис. Подемос, екстремно левиот коалициски партнер на социјалистите, постигна послаб резултат од претходните избори, па позицијата на Санчез е дополнително ослабена. Конзервативната Народна партија (ПП) мора да се здружи со екстремно десничарскиот Вокс за да владее во повеќе региони. Избори се одржаа во 12 региони од вкупно 17. (МИА)

Санчез преживеа гласање недоверба во шпанскиот Парламент

Ивана Ефремовски — Wed, 22 Mar 2023 15:02:52 +0000

Долниот дом на шпанскиот Парламент денеска со големо мнозинство го отфрли предлогот за гласање недоверба на левичарската влада на премиерот Педро Санчез, поднесен од крајнодесничарската популчистичка партија Вокс, јави ДПА.

Во опозициската партија знаеле дека нивниот предлог нема да помине, но нивниот лидер Сантијаго Абаскал одлучил да се оди на гласање и со тоа го продлабочи јазот во третата по големина партија во парламентот, по Социјалистичката работничка партија на премиерот Педро Санчез и конзервативната Народна партија.

Вокс побара изјаснување за недоверба на владата поради обвинувањата дека таа застанала на страната на каталонските и баскиските сепаратисти кои ја поддржале нејзината политика во парламентот во замена за отстапки, „за погрешните и конфискаторски“ економски и фискални политики.

Дводневната дебата пред гласањето му овозможи на премиерот Санчез директно да и се обрати на опозицијата и да ги истакне достигнувањата на неговата коалициска влада, на почетокот на кампањата за регионалните избори што треба да се одржат во мај и општите избори во декември.

-Единствената цел на овој деструктивен предлог е да се вратиме 50 години наназад. Не постои кандидат да води влада или програма, туку само партија која промовира неред и се обидува да ги поткопа демократските вредности, рече премиерот Санчез за време на дебатата.

Главната опозициска Народна партија, која на претходното гласање недоверба, исто така, побарано од Вокс во 2020 година, гласаше против, овојпат се воздржа од гласање, наведуваат британските медиуми, што го налути Санчез, кој ја обвини партијата дека суштински се усогласува со крајната десница. (МИА)

Шпанскиот премиер Педро Санчез во посета на Киев

Ивана Ефремовски — Thu, 23 Feb 2023 09:01:00 +0000

Шпанскиот премиер Педро Санчез денеска пристигна во Киев за да ја изрази својата поддршка за Украина, ден пред првата годишнина од почетокот на руската инвазија на Украина. „Се вратив во Киев, една година по почетокот на војната. Ќе бидеме со Украина и нејзиниот народ додека мирот не се врати во Европа“, напиша тој во пораката на Твитер. Според информациите од шпанската влада, Санчез во Киев бил пречекан од украинскиот заменик министер за надворешни работи, украинскиот амбасадор во Шпанија и шпанскиот амбасадор во Украина. Во текот на денот тој ќе има средба со украинскиот претседател Володимир Зеленски. Денешната посета на Санчез на Киев е негова втора посета на главниот град на Украина од почетокот на војната. Американскиот претседател Џо Бајден ненајавено дојде во Киев во понеделникот, а италијанската премиерка Џорџа Мелони го посети во вторникот. Во пресрет на посетата на Санчез, шпанската влада вчера објави дека на Украина ќе и даде шест тенкови „Леопард 2А4“. (МИА)

Шпанските десничари побараа оставка на премиерот Санчез

Дарко Андоновски — Mon, 23 Jan 2023 15:07:24 +0000

Демонстрантите кои учествуваа на десничарските „анти-Санчез“ протести во Мадрид во саботата побараа неодложна оставка од шпанскиот премиер Педро Санчез чија Влада, според нив, е закана за демократијата и е „најлошата“ во поновата историја на Шпанија, објави „Еурактив“. На главниот плоштад во Мадрид се собраа антивладини демонстранти, според некои информации околу 500 илјади, додека податоците на полицијата се различни со тврдење дека имало триесеттина илјади луѓе. Под слоганот „За Шпанија, демократијата и Уставот“, демонстрантите, насобраните луѓе завиткани во национални знамиња го осудија „политичкото талкање на земјата“. Демонстрации „Анти Санчез“ организираа поединечни општествени организации, како и 60 поддржувачи на десницата. Тие беа поддржани од некои партии, како што се централно-десничарската партија Популарно, крајнодесничарската партија „Вокс“ и центристичката либерална партија „Граѓани“. За време на демонстрациите се слушаа „Санчез, оставка, предавник“, како и други антивладини пароли.

Пресретнато писмо бомба адресирано до шпанскиот премиер

Ивана Ефремовски — Thu, 01 Dec 2022 11:47:36 +0000

Шпанската полиција пресретнала коверт со пиротехнички материјал адресиран до премиерот Педро Санчез во палатата Монклоа во Мадрид, јави денеска шпанскиот весник „Ел Паис“. Шпанското Министерство за внатрешни работи соопшти дека станува збор за коверт сличен на оние што вчера и денеска беа откриени во Министерството за одбрана, украинската Амбасада, Сарагоса и воздухопловната база Торехон. Писмо-бомба пристигнала во воздухопловната база Торехон рано утринава и истрагата е во тек. Експлозивна направа во Сарагоса била откриена синоќа во фабрика за оружје која произведува фрлачи на гранати што Шпанија ги испратила во Украина. Полицијата извршила контролирана експлозија на пакетот. (МИА)