пеколни температури – Kurir.mk

Рекордни температури и денес се очекуваат во Западна Европа

Ивона Петрова — Tue, 19 Jul 2022 06:49:31 +0000

Западна Европа денеска се соочува со уште потопол бран, а во Франција и Велика Британија се издадени предупредувања за екстремно топло време додека северна Шпанија регистрира температура од 43 степени. Во исто време шумски пожари беснеат во Франција, Португалија, Шпанија и Грција, а дел од жителите се евакуирани. Денеска се очекува да биде најтоплиот ден во Велика Британија, а експертите велат дека делови од Франција се соочуваат со „топлотна апокалипса“. Во неколку делови од Франција забележани се рекорди температури, а за Нант забележани се 42 степени, соопшти националната метеоролошка служба. Шумските пожари во последните денови приморале над 30.000 луѓе да ги напуштат своите домови, а поставени се засолништа за итни случаи за евакуираното население. Се предвидува температурите малку да опаднат, но тоа нема да донесе олеснување додека траат сувите услови и променливите ветрови. Во Шпанија и Португалија над 1.000 смртни случаи се препишани на високите температури изминативе денови. Во Португалија во четвртокот температурите достигнаа 47 степени, што е рекорд за јули.

СЛЕДУВААТ ПЕКОЛНИ ТЕМПЕРАТУРИ: Овие препораки МОРА да ги почитувате за да се заштите

Ивана Ефремовски — Tue, 03 Aug 2021 10:15:38 +0000

Според најавата од Управата за хидрометеоролошки работи, информираме дека во текот на следните два дена (од 4-5.08.2021 година - среда до четврток), целата територија на државата ќе биде зафатена со температури од портокалова (алертна) фаза. Согласно Акцискиот план за превенирање на последиците од топлотните бранови врз здравјето на населението, потребно е да се почитуваат општите мерки за заштита на здравјето, како што се: -Ослободување од работните обврски на најранливите групи на населението, вклучувајќи ги бремените жени и лицата на возраст над 60 години. -Во установите за згрижување на децата (градинки) да не се практикуваат физички активности и да не се изнесуваат децата на отворено во периодот од 11 до 17 часот. -Единиците на локалната самоуправа, Црвениот крст на РСМ и Центрите за социјални работи во регионите зафатени со топлотниот бран да имаат поактивен пристап и да пружат помош на осамени, стари и изнемоштени лица и бездомници. -Со оглед на фактот дека одредени ризични производни и технолошки процеси може да претставуваат дополнителен ризик по здравјето на изложените работници, се потсетуваат работодавците на обврската за почитување на законските прописи од оваа област. Министерството за здравство потсетува дека населението во целиот летен период потребно е да ги почитува следните општи мерки за заштита на здравјето: -Во текот на екстремно топли денови да се остане повеќе во затворени простории (пред се климатизирани), а при неопходен престој на отворен простор во овој период, да се најде можност за почести одмори под сенка. -Да се носи светла и лесна облека, а при директна изложеност на сонце да се носат заштитни очила и капа и да се користи крема со висок заштитен фактор. -Да се внесува помало количество храна, претежно овошје и зеленчук, а помалку масна храна. -Да се внесуваат големи количества течности, најдобро обична вода за пиење, а да се избегнуваат алкохолните пијалаци. -При влегување во возило, потребно е тоа одреден период да се проветри. -На хронично болните лица се препорачува редовно да ја земаат препишаната терапија, во консултација со матичните лекари. Поради високите температури и зголемената можност за појава на труења со храна и цревни заразни заболувања, се препорачува задолжително миење на земјоделско-градинарски производи (свеж зеленчук и овошје) пред нивна употреба, термичка подготовка на храната и нејзино консумирање веднаш по подготовката. Комисијата за следење на ефектите од високите температури при Министерството за здравство во континуитет ја следи состојбата и по потреба ќе предлага мерки и активности за минимизирање на евентуални штетни ефекти од високите температури.

Европа се подготвува за пеколен викенд: Температурите повторно ќе соборуваат рекорди, еве што не очекува во Македонија

Дарко Андоновски — Fri, 07 Aug 2020 10:23:52 +0000

Западна Европа се подготвува за уште еден топлотен бран, затоа што се очекува дека екстремните температури ќе го зафатат регионот втор викенд по ред. Англија денес ќе се приближи кон својот најтопол ден во годината, а рекордот поставен минатата година беше 38,7 степени Целзиусови, пренесува американски „СиЕнЕн“. Метеоролозите веќе издадоа предупредување за топлотниот бран затоа што се предвидува дека во текот на овој викенд температурите ќе надминат 37 степени Целзиусови. Се очекува дека овојпат таквите услови ќе се задржат најмалку седум дена во Лондон и некои околни области. „Иако овој топлотен бран може да донесе високи температури како минатата седмица, но траењето ќе биде многу подолго. Минатонеделниот бран навистина траеше еден или два дена, но овој ќе трае најмалку пет дена во поголем регион. Градови како Париз веројатно ќе надминат 36 степени Целзиусови секој ден, од понеделник до петок“, изјави метеорологот Тејлор Вард за „СиЕнЕн“. За француската престолнина предвидува дека температурите и идната седмица ќе останат над 32 степени Целзиусови. Белгија во одредени области регистрираше температури за 14 степени Целзиусови поголеми од просекот, а се искачуваат и до 32 степени Целзиусови. Во Брисел во текот на викендот се очекуваат температури од 34-35 степени Целзиусови. И Амстердам и другите делови на Холандија исто така би можеле да очекуваат високи температури. Променливото време во нашата земја ќе се задржи до недела. Синоптичарите најавуваат пороен дожд, и грмежи и локално невреме со засилен ветер и изолирана појава на град. Веќе од понеделник се очекува стабилизирање на времето со пораст на дневните температури.

Температурата достигна и до 50 степени: По пеколното време нова катастрофа во Австралија- ова никој не го очекуваше (ФОТО)

Дарко Андоновски — Mon, 04 Feb 2019 08:53:31 +0000

После големите жештини, делови на Австралија ги погодија катастрофални поплави. Во североисточниот дел на земјата повеќе од 20.000 луѓе се приморани да се евакуираат поради закани од поплави. Поради зголемиот водостој на реките, на патиштата се појавиле крокодили и змии, јавија локалните медиуми, а метеоролозите најавуваат уште дождови во наредните денови. Градот Таунсвил во Квинсленд е речиси целосно поплавен. Жителите се без струја, а многумина биле приморани да се качуваат на крововите на куќите за да се спасат од поплавите. Во текот на денешниот ден се очекуваат уште обилни врнежи.