петро порошенко – Kurir.mk

Порошенко: Очекуваме покана за НАТО и сакаме безбедносни гаранции

Тале Кристо — Wed, 12 Jul 2023 15:30:26 +0000

Поранешниот претседател на Украина Петро Порошенко вели дека неговата земја „очекува покана“ за НАТО и оти сака „безбедносни гаранции“. -Очекуваме покана, а членство, се уште. Затоа што треба да работиме многу со реформи, со градење... со зајакнување на нашиот безбедносен механизам..., но во исто време сакаме безбедносни гаранции, изјави Порошенко за Скај њуз. Тој додаде дека „разбира дека сега не е реално“ за полноправно членство, но рече дека на неговата земја и треба датум кога треба да се исполнат условите. Потенцијалното членство на Украина во алијансата беше во центарот на разговорите на дводневниот самит на НАТО во Литванија.

Порошенко ја напушти Украина за политичка средба во Ротердам, иако е под истрага за предавство на земјата

Ивана Ефремовски — Mon, 30 May 2022 13:08:57 +0000

Поранешниот украински претседател Петро Порошенко, кој е под истрага за можно предавство на земјата, доби дозвола да ја напушти Украина на граничен премин со Полска за да присуствува на политички состанок, објавија денеска локалните медиуми. Порошенко е под истрага за врски со финансирањето на проруските сепаратисти во источна Украина со нелегална продажба на јаглен во периодот од 2014 до 2015 година, иако тој негира дека е виновен за било што. Украински судија во јануари го одби обвинителското барање за апсење на Порошенко поради поврзаност со случај за кој поранешниот претседател тврди дека бил организиран од неговите политички противници. Весникот „Украинска правда“, повикувајќи се на полициски извори, пренесе дека Порошенко, кој веќе во два наврати беше спречен да ја напушти земјата, отишол на состанок на Европската народна партија во Ротердам. Викторија Сјумар, адвокатка од неговата „Европска партија“, на Фејсбук потврди дека поранешниот претседател ја напуштил земјата за средба во странство. (МИА)

Порошенко: Путин ја разбира само силата

Ивона Петрова — Sun, 22 May 2022 07:13:07 +0000

Поранешниот украински претседател Петро Порошенко им порача на колегите политичари во Украина и на лидерите ширум светот да останат обединети и да не прават компромиси кога имаат работа со рускиот претседател Владимир Путин. -Путин ја разбира само силата и ќе оди онолку далеку колку што светот тоа ќе му го дозволи, рече 56-годишниот политичар во интервју за „Current Time“, медиумски проект на руски јазик што го води Радио Слободна Европа во соработка со Гласот на Америка. Тој посочи дека не може да има преседан во Европа каде што една земја може насилно да ги менува границите кои беа воспоставени по Втората светска војна. Коментарот на поранешниот претседател доаѓаат во момент кога војната во Украина се приближува до третиот месец, а сега се водат поголеми битки во источниот регион Донбас, објави Радио Слободна Европа. Порошенко вели дека останува значајната разлика меѓу Киев и Москва за каков било договорен прекин на војната и дека Западот треба да продолжи со острите мерки што ги презеде против Кремљ, кој според него е единствениот јазик што Путин го разбира. -Путин сака да ја отстрани Украина како земја од мапата на светот. Затоа, невозможно е да се зборува за ништо друго освен за прекин на огнот, повлекување на руските војници и решение за хуманитарната ситуација. Територијалниот интегритет и суверенитет на една земја не можат биде компромитиран, рече тој. Украинскиот политичар вели и дека западните лидери не треба да ги поколебуваат заканите на Путин во неговите говори и изјави за перспективата за употреба на нуклеарно или хемиско оружје во Украина. Тој смета дека тоа е празна реторика и дека рускиот лидер се плаши од последиците од употребата на овој вид оружје.

Порошенко: „Итно ни треба зона за забранети летови“

Ристе Здравков — Sat, 05 Mar 2022 16:40:50 +0000

Во меѓувреме, овозможен е и коридорот за евакуација од главниот град на Украина, кој поминува низ урнатините на уништениот мост за да го спречи влезот на руските воени сили во Киев. Илјадници цивили, главно жени, постари и деца, беа евакуирани од областите Буча и Ирпин северозападно од Киев со помош на украинските војници и милиции. Меѓу нив во униформа беше и поранешниот украински претседател Петро Порошенко, кој го повика светот да го запре теророт на Путин врз украинските цивили. (Изјава) „Целиот слободен свет е против манијакот и лудак Путин. Гледате дека Путин напаѓа деца, Путин напаѓа постари лица, Путин напаѓа жени, бидејќи нема владеење на правото. Тој е воен злосторник и треба да биде во Меѓународниот кривичен суд во Хаг и во затвор за одговорност за убиство на Украинци. Имаме потреба да се воведе зона за забранети летови за да го заштитиме цивилното население. Ни треба итно, ни треба сега, едноставно, не дозволувајте Путин да го уништи целиот свет“, рече Петро Порошенко, поранешен претседател на Украина.

Порошенко: Не плашете се од Путин и не верувајте му!

Ристе Здравков — Fri, 04 Mar 2022 11:01:58 +0000

Поранешниот украински претседател Петро Порошенко се појави на Би-Би-Си. Тој остро го осуди рускиот напад и особено го нападна нивниот претседател Владимир Путин. „Не го губиме Мариупол, не го губиме Харков, не го губиме Киев. Путин може да го изгаси светлото, но не може да ја убие украинската душа. Тој нема успех во овој напад. Сакам да и се заблагодарам на британската влада, пријателот Борис Џонсон и целата британска солидарност со Украина. Вие бевте меѓу првите кои воведоа санкции кон Русија и сите ние мора да продолжиме со санкциите“, рече Порошенко. Тој порача дека на Путин не треба да му се верува. „Бев во преговори со Путин пред неколку години. Ве молам, не му верувајте на Путин бидејќи тој никогаш не се држи до неговите зборови. Не плашете се од Путин. Учете од Украина, ние не се плашиме од Путин, го запираме. Стоиме со оружјето во наши раце и не му дозволуваме да оди понатаму. Ќе го победиме, иако без вода и без храна“, изјави Порошенко за Би-Би-Си. Порошенко пред една недела се појави на улиците на Киев со калашников во раката.

ВИДЕО: Поранешниот украински претседател, Петро Порошенко, зеде Калашников во рака и излезе на улиците на Киев

Дарко Андоновски — Sat, 26 Feb 2022 09:09:34 +0000

Поранешниот украински претседател, Петро Порошенко, се јави за „Си-Ен-ЕН“ од улиците на Киев додека во главниот град на Украина се водат борби со руската војска. На прашањето на новинарите со што се вооружени тој и групата со која се наоѓа и што планираат да направат кога ќе дојдат Русите, Порошенко одговара: Тоа е едноставно. Еве, ова е краток Калшников, имаме околу 300 припадници на територијалната одбрана, имаме два митралеза и, воглавно, тоа е тоа. Немаме тешка артилерија, немаме тенкови… Овој процес (вооружувањето) го почнавме пред само неколку дена.

Former Ukrainian president Petro @poroshenko shows @JohnBerman the arms his group is carrying, including a short Kalashnikov and two machine guns, noting they don't have a tank or anything more since they just started this patrol a few days ago pic.twitter.com/03hUysku89
— Nora Neus (@noraneus) February 25, 2022

Има долга колона луѓе кои сакаат да се приклучат во баталјонот, но немаме доволно оружје. Се јавуваат обични луѓе, кои никогаш не биле во војска. Тоа навистина добро покажува колку луѓето го мразат Путин и колку се противат на руската агресија. Тоа е сосема јасно – изјави Порошенко. Инаку, Порошенко е под истрага за сомневања дека во текот на неговиот мандат тргувал со проруските бунтовници на истокот на земјата. Тој ги отфрла тие обвинувања, а неговата партија го обвинува акруелниот претседател, Володимир Зеленски, дека на тој начин се обидува да ја замолчи опозицијата. Порошенко беше на функцијата од 2014 до 2019 година, кога на изборите загуби од Зеленски.

Порошенко итно хоспитализиран поради компликации поврзани со Ковид-19

Ивана Ефремовски — Sat, 03 Oct 2020 18:35:06 +0000

Петро Порошенко, поранешниот украински претседател, член на парламентот на таа земја, е хоспитализиран затоа што има воспаление на двете белодробни крила откако се зарази со коронавирус, соопшти денеска неговата сопруга Марина Порошенко. -Петро беше однесен во една од болниците во Киев. И покрај фактот дека мојот сопруг има воспаление на обете белодробни крила, тој покажува силна волја, што ја покажа во борбата против оваа болест, рече Марина Порошенко. Поранешната прва дама на Украина известува дека Порошенко се однесува во согласност со протоколот на болницата. Освен Порошенко, една од нивните ќерки, исто така има коронавирус. Порошенко и соопшти на јавноста дека се зарази со коронавирус на 29 септември, а од тогаш беше во домашна изолација. (МИА)

Украинското обвинителство се откажа од притворање на Порошенко

Дарко Андоновски — Thu, 18 Jun 2020 18:25:54 +0000

Украинското обвинителство се откажа денеска од барањето за притворање на поранешниот украински претседател Петро Порошенко во рамки на истрагата за злоупотреба на положбата во текот на неговиот мандат. Претставник на обвинителството на денешното сослушување во Киев побарал од Порошенко да се јавува на судските покани и да не ја напушта земјата. Судот закажа за 1 јули разгледување на новото барање на обвинителството, кое претходно наведе дека ќе побара притвор за поранешниот шеф на државата. Порошенко, кој моментно е опозициски пратеник, пристигна на сослушувањето, а пред судот биле собрани околу 1.000 негови приврзаници. Порошенко (54), кој се збогати во индустријата со слатки и производство на автобуси, е осомничен дека го принудил шефот на разузнавачките служби да ја злоупотреби службената должност при именувањето на еден свој помошник во 2018 година. Поранешниот шеф на украинската држава ја оцени кривичната постапка како „одмазда“.

Можно е Порошенко да оди на детектор за лаги

Дарко Андоновски — Mon, 12 Aug 2019 13:35:35 +0000

Поранешниот украински претседател Петро Порошенко можно е во текот на следното сослушување да биде испратен на детектор за лаги, соопшти шефот на државното истражно биро Роман Труба. -Петро Попрошенко денеска беше испитуван заради сомнението дека затаил данок при купувањето на телевизијата Пријамол. Не ја исклучуваме можноста во текот на следното испитување да може да биде искористен детектор за лаги, напиша Труба на Телеграм. Тој кажа дека тоа не е нешто посебно и додаде „ целиот наш персонал секоја година минува низ таков психофизиолошки тест“ пренесе Тасс. Порошенко во два случаи е испитуван во својство на сведок и се уште не постојат обвиненија против него, изјави портпаролот на Истражното биро.

Заев од комедијант, за кој мисли дека е Порошенко, прифаќа совети како Албанците да му станат лојални (ВИДЕО)

Катерина Бојаџиева — Tue, 09 Jul 2019 13:25:18 +0000

Руските комедијанти кои во лажен разговор го наместија премиерот Зоран Заев, му нудат и помош за односот со Албанците во Македонија. Заев мисли дека разговара со поранешниот претседател на Украина, Петро Порошенко, па ја прифаќа помошта која му се нуди за, како што се вели, да добие најлојални Албанци. -Јас можам да ви дадам некој совет, како би ви биле полојални. Знаете, ние имаме голем процент на кримски татари, кои не ја признаваат руската окупација и некои од најрадикалните живеат во Киев сега. Некој од руските медиуми ги нарекуваат терористи. Јас им понудив автономија во окупираната територија и сега тие се многу лојални. Дајте им нивен јазик, знаме, грб, идентитетска политика и вие ќе ги имате најлојалните Албанци. Тоа е политика, ако ги немате радикалите во вашите раце, тоа ќе биде проблем за вас, во секој случај помага, му велат тие. На ова, македонскиот премиер одговара: „Јас се согласувам, да... многу добро. Ние ќе бидеме многу благодарни“. Потоа Заев веќе ги договара следните активности. -Ве молам нека го контактира тој човек нашиот кабинет, јас ќе го очекувам да не посети доколку е возможно. Да има и состанок со мене, ако е можно, вели тој. Рускиот комедијант потврдува: „Да секако, јас ќе ви ги пратам моите луѓе“