петти пакет мерки – Kurir.mk

Муцунски: Срамно е Собранието да не покаже капацитет да решава проблеми кои се однесуваат за граѓаните

Магдалена Андонова — Fri, 16 Apr 2021 10:55:53 +0000

Пратениците се делегирани во Собранието да работат за граѓаните и да нудат решенија, а не да прават непотребен политички спектакал и театар. Сакам примарно да ја информирам јавноста дека Претседателот на Собранието и мнозинството по секоја цена синоќа не дозволуваа да се оддржи седница за петтиот пакет економски мерки. Седницата упорно не ја отвараа, точките упорно не ги ставаа на дневен ред, изјави денеска за медиумите, Тимчо Муцунски, пратеник од редовите на ВМРО-ДПМНЕ. - Во овој момент нема побитен закон и поголем приоритет од економските мерки. Затоа е апсолутно нејасно зошто синоќа се правеше се за да не се отвори таква Седница. Слушнавме само изговори зошто не се отвара таа седница, но ниту една причина не беше поврзана со деловникот на Собранието. Синоќа не слушнавме ниту еден разумен аргумент зошто не се отвори седницата со петтиот пакет мерки. Услови за таква седница има, и време е таа седница конечно да се закаже и оддржи. Муцунски вели дека срамно е Собранието да не покаже капацитет да ги решава проблемите. - Собранието не смее да биде вакво. Собранието не смее да има ваков однос спрема граѓаните и компаниите. Собранието не смее да остане заглавено во дневната политика на штета на граѓаните и компаниите кои сеуште ја чекаат насушно потребната економска помош, рече тој. Тој посочи дека тие како пратеничка група нудат решение. - Седница за економските мерки денес во 17.00 часот; во сабота во 12.00 часот; во недела во 12.00 часот; Седница во било кој друг термин кој ќе ги задоволи желбите на Претседателот на Собранието. На таа седница ќе биде присутна Пратеничката група на ВМРО-ДПМНЕ. Мнозинството нека обезбеди само 20 пратеници, не мора повеќе, и мерките ќе се донесат. Уште еднаш повторувам дека нашата пратеничка група бараше оваа помош да биде неповратна, а истовремено уште сега да изгласаме ваква помош покрај за февруари и март, и за април и мај. Целта, меѓу другото, е повторно да не ги ставаме компаниите и граѓаните во исчекување. Време е Собранието да покаже одговорност, пратениците да си ја заслужат платат. Време е, уште денес, да се изгласа петтиот сет мерки, додаде тој.

Стопанска комора до пратениците: Донесете ги законите од петтиот пакет мерки, 130.000 вработени чекаат ваша поддршка

Магдалена Андонова — Fri, 16 Apr 2021 08:26:19 +0000

Стопанската комора на Македонија апелира до пратениците во Собранието да направат максимални напори и во текот на денот да ги донесат законите од петтиот антикризен пакет кои се во насока на поддршка на македонската економија. – Станува збор за законски решенија чие изгласување ќе овозможи поддршка за 20.000 компании и околу 130.000 вработени, како и 25.000 граѓани од ранливите категории и со тоа ќе се зголеми ликвидноста и потрошувачката, кои во овој момент се неопходни за одржување на субјектите во кондиција заради справување со кризата, се потенцира во денешното соопштение од Комората, чии членки генерираат 50,3 проценти од вкупниот приход во приватниот сектор и вработуваат 33,7 проценти од вработените во овој сектор. Комората уште еднаш ги реафимира своите ставови изкажани на почетокот на пандемијата дека оваа битка не може да се добие ако компаниите не и помогнат на државата, но и државата да им помогне нив, како единствено можно решение кое може да даде позитивен импулс во натамошните економски текови. – Во спротивно, сите досегашни напори, жртви и тешки предизвици кои досега ги надминавме, ќе паднат во вода, велат од Комората. (МИА)

Од владејачкото мнозинство молк за донесувањето на петтиот пакет на мерки, уште колку екомонијата ќе страда поради нив?

Катерина Бојаџиева — Wed, 14 Apr 2021 14:56:20 +0000

Петтиот сет на економски мерки за спас на стопанството и граѓаните во оваа ковид криза има големо значање за економијата. Се со цел да се надмине оваа криза, пратеничката група на ВМРО-ДПМНЕ вчера во Собранието ги повлече сите амандмани за Законот за државјанство за да може да се изгласа петтиот пакет на мерки за помош на граѓаните и стопанството. -Ние како пратеници на ВМРО-ДПМНЕ и Коалицијата, целосно го осудуваме инженерингот на Заев и СДСМ. Свесни за недостигот на искрена желба за брзо решение, но и за критичниот момент во којшто се наоѓаат Македонија, граѓаните и стопанството, ќе ги повлечеме сите амандмани на Законот за државјанство се со цел конечно да се изгласа петтиот пакет на мерки за помош на граѓаните и стопанството.Дури и во вакви моменти,кога над 55 илјади граѓани останаа без работа и едвај врзуваат крај со крај,кога македонската економија е на колена и илјадници компании се затворија, Заев и СДСМ без око да им трепне покажуваат огромна неодговорност и негрижа за граѓаните и стопанството, изјави координаторот на пратеничката група на ВМРО-ДПМНЕ, Никола Мицевски. Во својата изјавата координаторот Мицевски побара овој закон веднаш да се стави на комисија затоа што нема амандмани, да ја продолжат пленарната седница и да се изгласа овој закон. -Од друга страна, бидејќи Владата до предлагачот достави негативно мислење, а со недели Зоран Заев и други официјални лица на СДСМ даваат изјави за неприфаќање на текстот на законот које во процедура, ги повикуваме истиот веднаш да го стават на комисија, бидејќи нема деловнички пречки односно нема амандмани, да ја продолжат пленарнатаседница и да се гласа за овој закон, додаде Мицевски. По оваа значајна постапка на ВМРО-ДПМНЕ, од владејачкото мнозинство ни трага ни глас што понатаму со петтиот сет на мерки. Нивниот молк и непревземањето на никакви чекори за овој пакет на економски мерки само ја потврдува претходната теза дека главни виновници за кочењето и недонесувањето на овој сет на мерки се токму тие. За донесувањето на петтиот пакет на мерки апелираше и бизнис секторот. Кристина Ампева од „Гласен Текстилец“ побара пратениците веднаш да го донесат петтиот пакет на мерки, оти сиромаштијата им чука на врата на работниците, голем број од штипските конфекции ја немаат исплатено февруарската плата, а работниците останаа и без здравствено осигурување во време на пандемија. -Она што го алармиравме минатиот период благодарение на вас медиумите, еве се случува работниците се пуштени на колективен одмор, поради недонесување на петтиот сет на мерки. Текстилните комапнии во Штип и источниот регион немаат веќе работа, ги завршија последните налози. Изминатиот викенд имавме јавувања за трансформации на договорите за вработување од неопределено на определено, бидејќи работодавачите немаат сигурност за тоа дали ќе имаат работа, нарачки наредниот месец. Затоа требаше да бидат донесени мерки, за да не се случува ова и вработените да имаа некоја сигурност. За жал политичките калкулации во Собранието си продолжуваат и тоа сето е на штета на работниците, вели Ампева за МИА.