питсбург – Kurir.mk

Осомничениот за убиството во Питсбург се изјасни за невин

Ивона Петрова — Thu, 01 Nov 2018 20:51:09 +0000

Роберт Бауерс (46), осомничен за масовното убиство во синагогата во Питсбург, изминатиот викенд, кога загинаа 11 лица, денеска на суд се изјасни дека не е виновен. Тој денеска, на второто рочиште, побара судење со порота. На рочиштето рече дека го прочитал обвинението и ги разбрал сите обвиненија против него. Во судницата влезе без инвалидска количка, со превиткано рамо, бидејќи беше повреден во престрелката со полицијата. На првото рочиште беше во инвалидска количка и зборуваше малку. Обвинението против Бауерс, осомничен за најсмртоносниот напад врз Евреи во американската историја, опфаќа обвинение за злосторство од омраза кон верници, за употреба на огнено оружје и за нанесување повреди на полицајци. – Тој е обвинет по 44 точки, наместо по првичните 29, се наведува во вчера објавеното обвинението на Федералниот суд. Бауерс во саботата влезе во синагогата и почна да пука со извикување „Сите Евреи мора да умрат“. МИА

Осомничениот за нападот во синагогата во Питсбург пуштен од болница

Ивона Петрова — Mon, 29 Oct 2018 18:20:55 +0000

Мажот обвинет за нападот врз синагогата во американскиот град Питсбург, денеска беше пуштен од болница и предаден на властите, за да биде изведен пред суд под обвинение за убиство на 11 лица и ранување шест други. Роберт Грегори Бауерс, кој беше ранет во престрелка со полицијата, беше пуштен од болницата „Алегејни”, изјави портпаролката на болницата. „Федерални обвинители планираат да побараат смртна казна за 46-годишниот Бауерс, кој според властите, манифестирал омраза за време на нападот, а подоцна и изјавил на полицијата дека „само сака да убива Евреи” и дека „сите тие Евреи треба да умрат”. Нападот за време на викендот ги зголеми тензиите во САД пред изборите следната недела и се случи еден ден по апсењето на човек од Флорида, обвинет за испраќање бомби до критичарите на американскиот претседател Доналд Трамп. Масакрот во Питсбург е најсмртоносен напад врз Евреи во историјата на САД. Кампања наречена „Муслиманите се обединуваат за синагогата во Питсбург”, собра над 90.000 долари за преживеаните и семејствата на жртвите, а кампањата предводена од студент во Вашингтон, собра речиси 545.000 долари. МИА

Убиените се на возраст од 54 до 97 години, идентификувани жртвите од нападот во Питсбург

Ивана Ефремовски — Sun, 28 Oct 2018 16:41:47 +0000

Единаесетте жртви од нападот во синагогата во Питсбург, Пенсилванија, се идентификувани.

Претставници на власта соопштија дека убиените се на возраст меѓу 54 и 97 години. Меѓу нив се браќа и брачна двојка. Претходно беше соопштени дека се убиени три жени и осум мажи. Сторителот на нападот Роберт Бауерс (46) беше ранет при престрелка со полицијата. Откако е приведен изјавил пред полицијата дека Евреите извршуваат геноцид врз американскиот народ и дека сака сите Евреи да умрат. Во нападот што е случи во синагогата „Дрво на животот“ во Питсбург се повредени и над десет лица, од кои шестмина се полицајци. Како што јави МИА, вчера напаѓачот влезе во синагогата и почна да пука и да вика „Сите Евреи мора да умрат“. Во синагогата за време на нападот имаше околу сто луѓе. Американскиот јавен обвинител Џеф Сешенс најави дека Министерството за правда ќе подигне обвинение против Бауерс за злосторство од омраза и други злосторства кои би можеле да доведат до смртна казна.

Црн биланс на пукањето во синагогата: 11 мртви, шест повредени (ВИДЕО)

Ивана Ефремовски — Sun, 28 Oct 2018 08:16:07 +0000

Напаѓачот Роберт Бауерс (46), кој пукаше во синагогата во Питсбург, убил најмалку 11 лица, а шест се повредени, објавија локалните власти. Тој влезе во синагогата во Питсбург и отвори оган врз присутните, а официјалните лица изјавија дека 11 лица се убиени. Американските медиуми објавија дека повеќе од 10 лица се повредени, вклучувајќи и шест полицајци. Официјалните лица, пак, рекоа дека меѓу ранетите се четворица полицајци. „Во нападот загинаа 11 луѓе“, рече директорот за јавна безбедност на Питсбург Вендел Хајриш на прес-конференцијата и додаде дека нема деца меѓу жртвите. Хајриш додаде дека шест лица се повредени, вклучително и четворица полицајци. Властите рекоа и дека напаѓачот се предал и бил ранет во размената на оган со полицијата. Беше уапсен и идентификуван како Роберт Бауерс. Си-ен-ен објави дека додека пукал извикувал антисемитски пораки како „сите Евреи мора да умрат“. Нападот се случил во близина на синагогата „Дрво на животот“, додека верниците биле собрани на редовната служба за сабат, каде што истовремено била одржана церемонијата на давање име на бебе.