пјонгчанг – Kurir.mk

ИОК со финансиска помош за поплавените во Пјонгчанг

Дарко Андоновски — Tue, 05 Jun 2018 08:59:15 +0000

Интернационалниот олимписки комитет (ИОК) ќе донира 150 илјади долари за јужнокорејскиот град Пјонгчанг, каде што во 2018 година се одржаа Зимските олимписки игри. Според официјалната веб-страница на ИОК, донесена е одлука финансиски да се помогне градот кој во почетокот на јуни доживеа силен поплава. Помошта за Пјонгчанг ја потврди и претседателот на ИОК, Томас Бах. Поради силните бури во градот, недалеку од седиштето на Олимписките игри во 2018 година, беа погодени повеќе од 50 куќи, а околу 150 луѓе останаа без своите домови.

Истрага во Пјонгчанг – продавале кучешко месо покрај салите каде се одржуваат ЗОИ

Ивона Петрова — Sun, 18 Feb 2018 10:15:27 +0000

Организациониот комитет на Олимписките игри во Пјонгчанг истражува сигнали за ширење на кучешко месо покрај спортските капацитети. Сон Пек Ју објасни дека во провинцијата Канвондо, каде што се одржуваат игрите, има околу 200 кучешки фарми кои изработуваат и продаваат деликатеси. -Дознавме од медиумите дека покрај спортските објекти се продава кучешко месо. Ги проверуваме информациите, но до моментов немаме потврда дека тоа реално се случува. Во денешно време се повеќе Корејци одгледуваат кучиња за домашни миленици и традицијата да се јаде нивното месо постепено умира, објаснува Сон Пек Ју. Секоја година околу 2 милиони кучиња од месо се убиени во Република Кореја.

Почнуваат Зимските Олимписки игри во Пјонгчанг, еве неколку факти и бројки

Ивона Петрова — Fri, 09 Feb 2018 08:37:16 +0000

Јужнокорејскиот град Пјонгчанг од денеска до 25 февруари ќе биде домаќин на 23. Зимски олимписки игри. Пјонгчанг има околу 43.000 жители и се наоѓа 126 километри источно од Сеул. Просечната максимална температура на воздухот во Пјонгчанг за време на ЗОИ се очекува да изнесува 1,6 степен, а просечната минимална минус 8,3 степени. Маскота на овие игри е бел тигар со име Сохоранг, кој е поврзан со корејската митологија и култура. Официјалниот слоган е „Поврзани со страст“. Буџетот за Олимпијадата е 2,5 милијарди долари. Предвидени се 1,1 милион билети, а цените се движат од 18 до 1.340 долари. Организаторите во почетокот изразија загриженост поради слабата продажба на билетите, која во голема мера се должеше на политичките и воените тензии на Корејскиот Полуостров. Меѓутоа, досега се продадени околу 80 проценти од билетите, а преку 70 отсто од Корејците веруваат дека Игрите ќе бидат успешни. Северна и Јужна Кореја на Игрите ќе се појават заедно под специјално унифицирано знаме за време на церемонијата за отворање. Исто така, тие ќе се натпреваруваат со заеднички тим во женски хокеј. Целиот женски севернокорејски навивачки тим познат како „Армија на убавици“ ќе ги поддржува спортистите од двете земји. На Олимпијадата пријавени за настап се 2.925 спортисти и повеќе од 3.500 официјални лица од 93 земји. Најмногуброен тим ќе има САД со 242 олимпијци, втора е Канада со 226, а трета, воедно и најмногубројна европска држава, е Швајцарија со 169 олимпијци. Од поранешните југословенски републики најброен тим има Словенија 71, втора е Хрватска со 19, Србија и Босна и Херцеговина ќе имаат по четворица претставници, Македонија и Црна Гора по тројца, а дебитантот Косово ќе има еден олимпиец. Македонија ќе има тројца претставници: Антонио Ристевски, Ставре Јада и Викторија Тодоровска. Меѓународниот олимписки комитет го зголеми бројот на дисциплини на 16. Нови дисциплини се воведени во алпското скијање, карлинг, брзо лизгање и бордање. Во програмата за алпско скијање воведено е екипно натпреварување, во карлингот натпреварување на мешовити екипи, во брзото лизгање нова дисциплина ќе биде масовниот старт, а во борадњето се воведени акробатски скокови. Во однос на последната Олимпијада исфрлен е паралелниот слалом. На официјалните делегации и службените лица на Игрите ќе им помагаат околу 17 илјади волонтери. Медалите се дизајнирани од јужнокорејскиот уметник Ли Сук Во. Има рекорден број златни медали 102, а направени се вкупно 259 комплети медали. На овие Игри ќе бидат поделени најтешките медали во историјата на олимписките игри - златниот медал тежи 585 грама, сребрениот 580 г., а бронзениот медал 494 грама. Во досегашната историја на ЗОИ најуспешна е Норвешка со вкупно освоени 332 медали (118 златни 113 сребрени и 101 бронзен). Првата зимска Олимпијада се одржа 1924 година во Шамони, Франција. Меѓународниот олимписки комитет веќе одлучи домаќин на следните ЗОИ во 2022 година да биде кинеската престолнина Пекинг.

ЗОИ 2018: Студот предизвикува големи проблеми

Ивона Петрова — Tue, 06 Feb 2018 10:36:16 +0000

Пјонгчанг е окован во студ и мраз на три дена до почетокот на Зимските олимписки игри. Организаторите се соочуваат со големи проблеми за одржување на терените на температури од 20 степени под нулата кои се регистрирани последнава недела. Се очекува најголеми проблеми да имаат биатлонците при пукањето, додека натпреварите во крос-кантри може да бидат откажани, ако температурата падне под минус 22 степени Целзиусови. - ФИС има правила, според кои на температура под минус 22 степени натпреварувања по крос-кантри скијање може да не се одржат, ако директорот на трката и лекарот така проценат. За оваа одлука е важно и каква ќе биде влажноста на воздухот. Ако таа е ниска, тогаш трка може да има и на минус 30 степени. Тука, сепак, влажноста е доста висока, изјави Џанфранко Каспер, претседателот на Светската скијачка организација. Сепак, метеоролозите најавуваат подобрување на времето во Пјонгчанг следните денови и температури околу нулата. Зимските олимписки игри ќе се одржат од 9 до 25 февруари.

Северна Кореја најави учество на Игрите во Јужна Кореја

Дарко Андоновски — Mon, 01 Jan 2018 13:23:17 +0000

- Ако Северна Кореја донеси формална одлука за учество, тоа ќе биде во насока на вистински олимписки дух, велат организаторите. Севернокорејскиот лидер Ким Јонг-ун, во новогодишното обраќање до нацијата кажа дека земјата е подготвена да го испрати својот тим во Република Кореја. - Ние сме подготвени да ги преземеме сите неопходни чекори за учество на Олимпијадата, вклучувајќи го и испраќањето тим и сме подготвени на преговори со домаќинот, изјави Ким. Народна демократска република Кореја го пропушти крајниот рок за поднесување понуда за ЗОИ 2018, но технички има време да го стори тоа до средината на јануари. Преговорите ќе се фокусираат на безбедноста на севернокорејските спортисти.