плаќање – Kurir.mk

Од јануари граѓаните можат да отворат денарска сметка за основни функции

Ристе Здравков — Sun, 05 Feb 2023 10:57:00 +0000

Разликата со платежните сметки кои сега се користат е во тоа што преку сметките со основни функции ќе може да се вршат плаќања само до висината на сопствените средства, односно нема да биде дозволено навлегување во т.н. минусно салдо. Со новиот Закон за платежни услуги и платни системи, којшто стапи на сила од јануари, граѓаните ќе можат да отворат денарска платежна сметка со основни функции која слично како и другите сметки ќе може да ја користат за плаќање комунални и разни други услуги, за купување во продавници или преку интернет, како и да внесуваат и повлекуваат готовина. Разликата со платежните сметки кои сега се користат е во тоа што преку сметките со основни функции ќе може да се вршат плаќања само до висината на сопствените средства, односно нема да биде дозволено навлегување во т.н. минусно салдо. Токму заради тоа, надоместоците што за ваквата сметка со основни функции ќе им се наплатуваат на граѓаните ќе бидат пониски, а за граѓаните кои се корисници на социјални трансфери нема да се наплатува ваков надоместок. Вицегувернерката на Народната банка Емилија Нацевска во интервјуто дадено за МИА што денеска е објавено, истакнува дека клучната разлика во однос на постојните платежни сметки е во ограничувањето на платежната сметка со основни функции да се користи за плаќања само до висината на сопствените средства и во лимитирањето на надоместоците коишто ќе ги плаќаат граѓаните за користење на платежните услуги преку оваа сметка. Токму заради ваквото ограничување, банката или штедилницата за услугите со платежната сметка со основни функции може да пресмета и да наплати вкупен месечен надоместок само до разумна висина, којшто не смее да биде повисок од 0,1 процент од подвижниот просек на просечната месечна исплатена нето-плата во земјата за претходните 12 месеци. Во согласност со објавите од страна на Државниот завод за статистика, вака пресметаниот месечен надоместок тековно би изнесувал околу 31 денар. Овој надоместок вклучува месечно одржување на сметката, неограничен број платежни трансакции за внесување или повлекување готови пари непосредно на шалтерите во работните простории на давателот, или преку неговата мрежа на банкомати, неограничен број платежни трансакции со дебитни картички и извршување минимум пет платежни трансакции со кредитен трансфер, вклучувајќи и траен налог, или со директно задолжување со кои се пренесуваат парични средства на други платежни сметки на клиенти на истиот давател на платежни услуги, појаснува вицегувернерката за МИА. Граѓаните кои сакаат да користат платежна сметка со основни функции ќе треба да ги затворат другите денарски платежни сметки што ги имаат во банката, но ќе може да користат кредитна картичка и да имаат неограничен број платежни сметки во странска валута. Доколку граѓаните сакаат да отворат платежна сметка со основни функции кај банка или штедилница кај која тековно немаат платежна (трансакциска) сметка, тогаш ќе треба да ги затворат сите платежни (трансакциски) сметки во денари кај другите банки и штедилници коишто ги отвориле во минатото. Од друга страна, кај истата банка или штедилница граѓаните ќе може да користат кредитна картичка за што ќе мора да склучат одделен договор, како и да имаат неограничен број платежни сметки во странска валута, вели Нацевска.

ЈП „Градски паркинг“: Плаќањето со СМС-порака не работи поради надградба на системот, да се плаќа со греб-картички

Ивона Петрова — Wed, 03 Aug 2022 11:17:36 +0000

ЈП „Градски паркинг“ – Скопје информира дека поради надградба на системот за зонско паркирање, денеска не е во функција наплаќањето преку СМС-порака. Тоа значи дека СМС-пораките за наплата на паркинг, од крајните корисници не можат да се процесираат до ЈП „Градски паркинг“ – Скопје. Поради ова, од ЈП „Градски паркинг“ – Скопје ги замолуваат корисниците на зонско паркирање да го користат алтернативниот начин за наплата – со купување греб-картички. Посочуваат дека се работи на што побрзо ставање во функција на надградениот систем и оти јавноста ќе биде навремено информирана штом оваа услуга стане повторно достапна за граѓаните.

Европска комисија: Плаќањето за гас во рубљи ги прекршува санкциите на ЕУ

Магдалена Андонова — Thu, 14 Apr 2022 14:42:52 +0000

Со плаќањето на рускиот гас во рубљи, некои земји-членки на ЕУ би го прекршиле европскиот режим на санкции против Москва, се вели во интерната нота на Европската комисија што ја пренесува Хина. Во документот, кој е технички и прелиминарен и се заснова на неофицијален превод на рускиот претседателски декрет од 31 март, се вели дека законот додава неколку нови слоеви на обврски на купувачите на гас од ЕУ и практично го одзема финализирањето на купувањето од нивните раце. – Овој механизам ќе доведе до прекршување на постоечките европски рестриктивни мерки воведени против Русија, нејзината влада, централната банка и соработниците, како и на општата забрана за заобиколување на европските рестриктивни мерки, се вели во нотата. Рускиот претседател Владимир Путин на крајот на март издаде декрет со кој се бара од европските функционери да отворат најмалку две посебни сметки во Гаспромбанк – едната за евра и долари, а другата за рубљи. Сите плаќања за гас мора да одат преку таа банка. Според шемата, ЕУ ќе продолжи да плаќа на Гаспромбанк во договорената валута, евра или долари, но работата ќе биде завршена само кога руската банка ќе ја претвори валутата во рубљи во договор со централната банка и ќе ги уплати на другата сметка, се вели во документот на ЕК. – Резултатот е дека исплатата при уплатата на конечната сметка се довршува во валута што не е наведена во договорот, се вели во белешката. (МИА)

ЈП Водовод и Канализација склучи договор со физички и правни лица за исплата на заостанати сметки на рати и без камата

Магдалена Андонова — Thu, 17 Mar 2022 13:32:15 +0000

Голем интерес на граѓаните за акцијата на ЈП Водовод и канализација – Скопје, за исплата на заостанати сметки, на рати без камата. - Во текот на оваа акција се склучија 554 договори со физички лица, во износ од 39.130.952 денари и 30 договори со правни лица во износ од 3.244.238 денари. Акцијата за наплата на долговите на рати без камата за физички и правни лица беше со определен временски рок од 01.02.2022 до 15.03.2022 година. Во овој период корисниците кои имаа заостанат долг, имаа можност да го сервисираат истиот, без пресметка на камата за задоцнето плаќање. Во согласност со одлуката на Управниот одбор, претпријатието излезе во пресрет на барањата на корисниците и во таа насока, физичките лица имаа можност за склучување на договори до најмногу 48 рати, а правните субјекти до 24 рати, во зависност од висината на долгот, информираат од ЈП Водовод и Канализација. Од претпријатието додаваат дека од оваа мерка се изземени органите на државната и локалната власт, како и другите државни органи и институции кои вршат дејности од јавен интерес, агенции, фондови, јавни установи и јавни претпријатија, основани од државата, општините и Град Скопје.

ЈСП: Времен прекин на услугата за плаќање билет со мобилен телефон

Тале Кристо — Mon, 10 Jan 2022 17:41:23 +0000

Утре, од 22 часот, нема да функционира опцијата за плаќање билет во јавен превоз со мобилен телефон (валидација преку бројот 185). Прекинот на оваа услуга, ќе биде од времен карактер, поради надградба на системот за електронска наплата. Од среда (12.01.2022 год), опцијата за плаќање со мобилен телефон ќе биде достапна, информираат од ЈСП.

Од денеска повторно може да се плаќаат сметки во Пошта

Ивона Петрова — Mon, 01 Mar 2021 06:21:01 +0000

Граѓаните од денеска повторно ќе можат да плаќаат во готово преку шалтерите на Пошта. Системот од страна на Халкбанк е имплементиран и почнува да функционира платниот промет, согласно договорот потпишан со националната Пошта. Халкбанк АД Скопје, беше избрана за банка преку која ќе се одвива платниот промет на Пошта, откако претходно беше во прекин поради пропаѓање на Еуростандард банка. Платниот промет во првата недела ќе биде достапен во подружниците Скопје 1 и Скопје 2, подружниците во Тетово, Гостивар, Кичево, Охрид, Битола, Прилеп, Кавадарци, Велес, Гевгелија, Струмица, Штип, Кочани и Куманово. Во текот на март услугата ќе биде достапна во сите останати единици на Пошта, информираа од Халкбанк АД Скопје. Плаќањето во готово преку шалтерите на Пошта, ќе биде со поволни провизии, односно 35 денари за плаќање на сметки и други режиски трошоци, додека висината на провизиите за уплати кон буџетски установи е во зависност од износот кој се уплаќа. -Со оглед на широката мрежа на експозитури и тоа во места во кои граѓаните немаа друга можност за вршење на трансакции од платниот промет, од Пошта очекуваат дека претпријатието во многу скоро време ќе се врати на првобитната позиција која ја имаше до пред неколку месеци – каде се одвиваше 25 проценти од вкупниот платен промет во државата, наведоа во соопштение од Халкбанк. Според најавите, во скоро време коминтентите на Халкбанк на шалтерите на Пошта ќе можат да вршат и директни плаќања од своите сметки, а ќе бидат овозможени и други банкарски, дополнителни услуги. Над 870 вработени во Пошта целосно или делумно извршуваат работни обврски поврзани со обезбедувањето на наведените услуги, а како што беше објавено на потпишувањето на договорот, од остварениот заеднички приход 71 отсто ќе биде за државната пошта, а 29 отсто за Халк Банка. Платниот промет преку Пошта на РСМ беше прекинат по прогласувањето стечај на Еуростандард банка, која претходно имаше договор за таа намена.

ДОНЕСЕН ЗАКОН КОЈ ГО ПРОМЕНУВА ИНТЕРНЕТОТ: За содржината ќе треба да се плати!

Магдалена Андонова — Sun, 28 Feb 2021 20:01:40 +0000

Австралискиот парламент усвои закон, кој ги обврзува големите компании, вклучувајќи ги Гугл и Фејсбук, да им плаќаат на медиумите за пренесување на нивната медиумска содржина. Австралиската влада изјави дека овој закон „гарантира дека медиумските куќи добиваат фер компензација за содржината што ја произведуваат, што ќе придонесе за заживување на новинарството од јавен интерес во Австралија“. Законот отвора пат за двата технолошки гиганти да инвестираат десетици милиони долари во договори за трансфер на медиуми. Ова може да се покаже како модел за решавање на конфликтите помеѓу технолошките гиганти и регулаторните тела низ целиот свет за изедначување на односите помеѓу традиционалните медиуми, кои се наоѓаат во големи финансиски тешкотии, и големите технолошки компании, кои доминираат на Интернет и заземаат огромен дел од приходите од рекламирање . Гугл сега ќе плаќа за содржините на вестите што се појавуваат на својот нов производ, наречен Google News Showcase, а Facebook треба да плати за оние што се појавуваат на неговиот производ News, кој треба да се појави во Австралија подоцна во 2021 година. Фејсбук и австралиската влада се во расправија околу ова прашање. Фејсбук најпрво, како одговор на законот, блокираше објавување линкови до написи за информации од локални или меѓународни медиуми, но потоа се откажа од тој пристап и постигна договор со австралиските власти. Компанијата на Марк Цукерберг, која е сопственик на апликацииТЕ Instagram и WhatsApp, објави дека ќе инвестира „најмалку милијарда долари“ во содржини на вести во следните три години. Овие нови средства, како што е најавено на блогот на шефот за односи со јавност на таа социјална мрежа, ќе бидат додадени на 600 милиони долари вложени во медиумите од 2018 година. Гугл веќе се согласи да плати „значителни суми“ за содржината на медиумската група на Руперт Мардок, Њуз Корп, која се залагаше за нов австралиски закон, но не се согласи да плати за целата содржина, што ја покажува во Австралија. Компанијата сè уште не се согласила со државните органи за тоа како да се надмине овој проблем. Без оглед на сè што се случило досега, Гугл верува дека овој закон може да го „скрши Интернетот“ и да се прошири и во други земји, што ќе биде огромен удар за тоа како сега се перцепира Интернетот - дека е бесплатен за сите. Исто така, Марк Цукерберг предупредува на последиците од сè што може да донесе плаќањето за вести, а компанијата го демонстрираше тоа кога ги блокираше сите новости од Австралија на својата социјална мрежа Фејсбук, бидејќи не сакаше да плати за нив, па страдаа корисниците, кои тие не можеа ниту да ги споделат, ниту да ги прочитаат на Фејсбук. Фактот што Фејсбук и Гугл сега плаќаат за објавување на одредени медиумски вести на нивните платформи за корисниците, може да значи плаќање во иднина, исто така на посебен и нов начин или идна навика да бараат вести, т.е. прочитајте на друго место.

Граѓаните ги менуваат навиките за плаќање, почесто користат платежни картички

Ивона Петрова — Thu, 10 Dec 2020 06:26:19 +0000

Плаќањата со платежни картички во трговијата во третиот квартал бележат раст. Зголемени се плаќањата преку интернет и плаќањата на местата на продажба. Пад има кај кредитните трансфери. Народната банка бележи висок годишен раст од 175 проценти на бројот на плаќања со платежни картички преку интернет кој е речиси петкратно повисок од годишниот раст во истиот квартал минатата година. Според платежната статистика што ја објави Народната банка, остварен е и годишен раст од 36,8 проценти на плаќањата на физичките места на продажба којшто е значително повисок од годишниот раст во истиот квартал лани (22,3 проценти). Овие податоци укажуваат дека граѓаните почнуваат да ги користат придобивките на електронското банкарство и да ги менуваат навиките за плаќање, односно почесто да користат платежни картички при купување. За извршување на плаќањата, граѓаните најчесто ги користеле мобилните апликации. Бројот на плаќања извршени со мобилен телефон пораснал на значителни 84,2 проценти на годишна основа што е повеќе во споредба со третиот квартал минатата година кога овој процент изнесувал 49,3. Покрај ова, продолжува и трендот на употреба на компјутерите при плаќање од страна на граѓаните. Поточно, кај овие плаќања, во третиот квартал забележан е висок годишен раст од 20,1 процент што е четирипати повеќе во однос на истиот период лани. Од друга страна условите што ги наметна пандемијата на Ковид-19 имаат негативно влијание кај плаќањата со користење на инструментот кредитни трансфери каде е забележан годишен пад од 4,4 проценти кај бројот и од 4,9 проценти кај вредноста на трансакциите. Народната банка бележи и годишен пад од 34,4 проценти кај бројот на кредитни трансфери на хартија наспроти годишниот раст во третиот квартал лани кога изнесувал 8,5 проценти. – Менувањето на навиките на граѓаните во услови на ограничено движење заради пандемијата придонесе за впечатлив годишен раст на нивните плаќања со платежни картички преку интернет во земјата од 141 проценти, како и на кредитните трансфери иницирани по електронски пат од 28 проценти во текот на сите три квартали од 2020, велат од Народната банка.

Мнозинството граѓани сакаат безбедност при плаќање на интернет, 40 отсто не знаат да идентификуваат безбедна страна за плаќање

Магдалена Андонова — Thu, 08 Oct 2020 11:08:28 +0000

Граѓаните повеќе сакаат безбедност при плаќање на интернет, отколку брзина на трансакциие при плаќање. Истржување спроведено од Виза, покажува дека повеќе од половина бараат безбедност, но една третина не знаат да идентификуваат веб страница со безбедна врска за плаќање. Спроведената онлајн анкета покажала дека 60 отсто од испитаниците сакаат поголема безбедност пред брзината на трансакциите при плаќање. Половина од испитаните не биле информирани за постојните механизми на заштита и секој трет испитаник не успеал да одговори на прашањата поврзани со безбедноста на плаќањата преку интернет. Со цел подигање на свеста за безбедносните карактеристики на дигиталните плаќања, Виза започна регионална кампања наречена „Зачувај и заштити – приоритети на дигиталните плаќања“, целејќи кон едукација на корисниците за тоа како да плаќаат безбедно и преку Интернет и директно лице-во-лице користејќи дигитални инструменти за плаќање. Во соопштението наведуваат дека секој трет испитаник во истражувањето изјавил дека се чувствува посигурно кога плаќа со картичка. Сепак, 20 проценти од испитаниците избираат најпогоден метод без да ја земаат предвид неговата безбедност. Плаќањата преку мобилен со банкарска картичка која е вметната во паметниот телефон, се нешто што сѐ уште не е широко препознаено кај потрошувачите и со тоа има голем потенцијал за понатамошно усвојување. Кога станува збор за ПИН кодот, единствениот идентификациски број кој служи за заштита од неовластено користење на картичката, луѓето често го истакнуваат фактот дека ја забораваат точната комбинација, но сепак овој вид мерка на безбедност ги прави да се чувствуваат посигурни. Мнозинството од луѓето кои што учествуваа во онлајн анкетата, односно над 80 проценти, изјавиле дека нема да го дадат или да го кажат својот ПИН-код на некого друг. Над 15 проценти од испитаниците погрешно го поврзаа CVV2 трицифрениот број сместен на задниот дел на Виза картичката и се користи за потврда при плаќање преку Интернет со QR кодот во нивните одговори, што може да се искористи за плаќање преку апликации. – Довербата во Виза е сѐ. Инвестираме многу за да ја зачуваме и зајакнеме безбедноста на секоја трансакција со Виза. Преку искористување на моќта на напредната технологија и иновација, ние темелно анализираме повеќе од половина милијарда плаќања ширум светот секој ден, заштитувајќи го интегритетот на екосистемот на плаќање. Нашите достигнувања во предвидливата аналитика, токенизацијата и биометриското управување ни овозможуваат да ја одржуваме измамата на историско ниски нивоа. Тоа е уникатна комбинација на заштита што ја прави нашата платежна мрежа безбедна и беспрекорна, затоа што ние веруваме дека модерната трговија се базира првенствено на искуството за безбедно плаќање за сите, вели Владимир Ѓорѓевиќ, генерален директор на Виза за Југоисточна Европа. Резултатите од истражувањето исто така покажаа дека 40 проценти од испитаниците не знаат како да идентификуваат веб-страница со безбедна врска за плаќање.Таков е случајот со интернет адресите кои имаат буква „s“ по “http”. Протоколот https е дизајниран да издржи упади од хакери и се препорачува како посигурен за плаќања преку Интернет. Од Виза oценуваат дека „Зачувај и заштити – приоритети на дигиталните плаќања” кампањата ќе помогне да се подигне свеста на потрошувачите за основните безбедносни мерки за да се овозможи искуство со безбедно плаќање при користење решенија за дигитално плаќање. – Екосистемот за плаќање постојано се развива, а исто така и начините на кои го обезбедуваме. Новите технологии за автентификација и анти-измама ќе обезбедат безбедно, едноставно и сигурно искуство за купување, без оглед каде е корисникот и кој уред го користи за да изврши исплата. Со кампањата „Зачувај и заштити – приоритети на дигиталните плаќања”, сакаме да го насочиме вниманието на корисниците кон важноста на безбедноста, како и подобро да ги запознае со придобивките од безбедната мрежа и новите технологии, посочи Ѓорѓевиќ. (МИА)

Овие работи некогаш биле бесплатни, а сега “дебело“ ни ги наплаќаат

Ивана Ефремовски — Thu, 13 Aug 2020 18:33:02 +0000

Во последните неколку години, веројатно и поради сè поголемата криза, бесплатните работи во светот се во сè помал број. Постојат работи за кои денес плаќаме, а во минатото истите биле бесплатни. Еве само дел од нив: Авионски услуги Носење на багаж, гледање на филмови за време на летот, храна, вода и слично – сите овие работи порано најчесто биле бесплатни. За жал, денес тоа не е така, па често се наплаќа дури и чаша вода. Испорака на храна Некогаш била бесплатна, меѓутоа денес голем број на ресторани ги наплаќаат услугите за доставување на храна до вашиот дом. Обично станува збор за мала сума на пари, но сепак. Поради тоа, доколку сакате да заштедите, секогаш при порачување на храна прашајте дали доставата е бесплатна, а доколку не е, побарајте друг ресторан кој нуди бесплатна достава. Банкарски услуги На надоместоците за банкарски услуги денес им нема крај и можеме да ги набројуваме до недоглед. Поради тоа, пред да донесете одлука за отворање на сметка во одредени банки, добро информирајте се околу тоа кои услуги им се нудат бесплатно на клиентите, а кои се наплаќаат. Телевизија Да, во минатото и телевизијата била бесплатна. Иако идејата за ТВ антена можеби изгледа смешно, програмите биле бесплатни.