Очекуваjте прилив на вашите сметки – Почна исплатата на МојДДВ

Тале Кристо — Thu, 20 Aug 2020 07:05:27 +0000

Започна исплатата на повратот на ДДВ на граѓаните за месеците април, мај и јуни, односно второто тримесечје од 2020. Досега на сметките на над 140 илјади граѓани се легнати над 167 милиони денари или 2,7 милиони евра. Министерката за финансии Нина Ангеловска преку својот фејсбук профил најави дека исплатата продолжува и деновиве, како што ќе се доставуваат налозите до Трезорот на Министерство за финансии, се додека не се исплатат сите средства на трансакциските сметки на граѓаните за второто тримесечје од 2020. – Поврат: 5,44 милиони евра; граѓани кои скенирале сметки заклучно јуни: 304.637 граѓани или околу 25.000 повеќе во однос на претходното тримесечје; скенирани сметки: 41,7 милиони сметки; аправен промет: 21,4 милијарди денари, наведува Ангеловска. Министерката ги оценува како одлични резултатите на МојДДВ за јули и посочува дека се скенирани 21,5 милиони сметки или за 80 отсто повеќе во однос на просекот од сите останати месеци. Потсетува и дека со МОЈДДВ граѓаните добиваат трикратна корист: помагаат во сузбивањето на сивата економија, добиваат поврат на ДДВ и добиваат можност за бројни парични награди преку #МојаНаграда.

Почна 61-часовниот викенд карантин во државата

Тале Кристо — Fri, 10 Apr 2020 14:10:59 +0000

Во 16 часот денеска почна забраната за движење на населението, и согласно одлуката на Владата ќе трае до понеделник до 5 часот. Со ова, почнува 61-часовен карантин за сите граѓани на територија на целата држава. Забраната не важи за полицијата, армијата, здравствените работници, противпожарните територијални единици и земјоделските лица. Дежурните аптеки ќе работат непречено, а продавниците, маркетите и рестораните ќе примаат нарачки и ќе вршат достава на своите производи. Маркетите кои немаат соодветна дозвола за работа за време на полицискиот час, ќе бидат санкционирани. Како што информира денеска директорот на Државниот пазарен инспекторат Стојко Пауновски, Државниот пазарен инспекторат за време на полицискиот час ќе врши проверка на дежурните маркети дали ги имаат овие дозволи. – Освен маркети кои се определени од Кризниот штаб во градовите, другите немаат право да работат и доколку бидат затечени дека работат ќе бидат санкционирани. За сите угостителски објекти на кои е направен записник и се затворени од страна на Државниот пазарен инспекторат, најпрво се доставуваат платни налози за глоба, па доколку не се платат во определениот рок, тогаш се упатуваат на суд, нагласи Пауновски. Доставата на неопходните продукти на граѓаните ќе ја вршат лицата волонтери до самите домови на граѓаните. Полицискиот час, како што информира министерот за здравство, Венко Филипче, ќе важи и за време на претстојните верски празници. – Знам дека е тешко и доаѓаат и верски празници, но ова е период во кој мора сите со почитување на мерките да инвестираме во сопственото, но и во колективното јавно здравје. И за време на верските празници кои се пред нас, ќе важи целосна рестрикција во движењето, изјави Филипче. Државата е во фаза кога воведените мерки се најстроги. Сепак, животот повторно ќе се врати во нормала кога за тоа ќе се создадат услови. Како што појасни министерот Филипче, се прават планови за оваа насока. – Се подготвуваме за периодот за целосно враќање во нормала тогаш кога ќе бидат исполнети условите за тоа. Но, нема да може така лесно целокупниот работен процес и животот да се врати во нормала со истиот интензитет имајќи го предвид искуството на некои други земји, како и предвидувањата дека секогаш постои ризик за втор пик на дијагностицирани пациенти, рече Филипче. Вели дека ова се сериозни мерки за рестрикција, меѓутоа крајната цел е да се заштити здравјето на граѓаните и верувам дека сите се свесни за сериозноста на ситуацијата и дека секој гледано низ призма на својот професионален и личен капацитет треба да се заложи максимално до сите до коишто допира – граѓани или групи граѓани. Според него, мерките мора да се почитуваат и сите граѓани треба да се придржуваат до нив. Министерството за внатрешни работи, пак, како што најави дополнителната министерка Славјанка Петровска е целосно подготвено да одговори на задачите за време на продолжениот викенд полициски час.

почна – Kurir.mk

Очекуваjте прилив на вашите сметки – Почна исплатата на МојДДВ

Почна 61-часовниот викенд карантин во државата