погодени – Kurir.mk

Сојуз на стопански комори: Пакет мерки за помош очекуваат секторите кои се на раб на опстанок поради пандемијата

Тале Кристо — Mon, 26 Apr 2021 13:32:18 +0000

Четиринаесет месеци туристичко-угостителскиот сектор се бори со предизвици кои ги создава кризата предизвикана од пандемија и недоволната и ненавремената поддршка. Затоа претпријатијата тешко се справуваат и се повеќе се губат работни места и престануваат со работа деловните субјекти поради немање деловна активност. Најголем број од претпријатијата од овие сектори користејќи ја својата способноста и ангажирајќи ги сите расположливи ресурси, досега наоѓаа начин да преживеат, но веќе сите алтернативи се исцрпени. Затоа потенцираме дека без вистинска и континуирана поддршка нема спас за овој сектор. Со протестите пред Министерството за финансии и денеска пред Владата, угостителите од рестораните, кафулињата, ноќните клубови, рестораните за свадби, вработените во туристичките агенции и игротеките, танцовите и балетски студија, туристичките водичи, сметководителите, кои заедно застапуваат околу 40.000 луѓе побараа да се исполнат барањата за поддршка кои се веќе доставени до Владата. Веруваме дека средствата кои се предвидени во шестиот пакет на економски мерки можат да помогнат и да ги ублажат штетите со кои се соочува туристичко-угостителскиот сектор, ако се имплементираат на соодветен начин. Имајќи во предвид дека постапките и процедурите за нивна имплементација се уште не се познати, бараме пред имплементацијата да се земат во предвид и нашите барања, бидејќи тие произлегуваат од реалните потреби на најпогодените сектори, велат од Сојузот на стопански комори на Македонија. Во наредните денови ќе дадеме простор надлежните органи и институции да постапат согласно нашите барања, а по Велигденските празници ќе излеземе со нов план за активностите, доколку нема никакви промени во ставовите. Туристички агенции подобрување на состојбата во која моментално се наоѓаат гледаат во обезбедување на неповратна финансиска помош за секоја лиценцирана агенција, ваучерите кои ќе се доделуваат од мерката „Дома си е дома“, задолжително да се користат преку туристичките агенции, кои ќе можат во аранжманите да ги вклучат сите учесници од секторот туризам и рокот на ваучерите кои се издадени од туристичките агенции според Одлуката на Влада за нереализираните патувања во 2020 година, да се продолжи до 31.12.2022 година. Од нивните три барања првата е делумно усвоена, при што сеуште не се познати условите и методологијата за распределба да се знае дали мерката ќе има било каков ефект. Угостителските објекти бараат еднократна финансиска помош за сите регистрирани угостителските објекти, поделени во 3 категории врз основа на големината на бројот на вработени во 2020 година, еднократна финансиска помош за регистрираните угостителски објекти на кои повеќе од една година им е забранета примарната дејност со уредба на Влада, и кои со месеци немаат никаква помош и утврдување на мораториум или репрограмирање со грејс период на кредитите од комерцијалните банки и кредитите од Развојна банка, се додека не се создадат услови за работа. Една мерка е делумно усвоена под поинакви критериуми со процент од процент на приходите од 2019 и 2020 година, но без да се информира јавноста јасно за методологијата и кои се критериумите кои секое претпријатие ќе треба да го исполни за да аплицира, повторно е нејасно дали и какви ефекти ќе има за помош. Сметководителите испорачаа барање за директна финансиски помош, нов Закон за вршење сметководствени работи и системско пролонгирање на роковите за годишни сметки и даночни пријави. Во комуникација со институциите во деновите додека трае протестот е добиен позитивен одговор за барањето поврзано со Законот за вршење на сметководствени работи како и за системско одложување на роковите за годишни сметки и даночни пријави. Делумно е прифаќањето на барањата а за останатите се очекува одговор од институциите. Неповратна финансиска помош е потребна и за преживување на игротеките, туристичките водичи, танцовите и балетски студија. Поддршката што до сега доделена, не е доволна со оглед на рестрикциите во стопанството и принудните забрани за работа, затоа сред пандемија треба да се помогне на секој кому тоа му е тоа потребно. Поради неможноста за работа, нарушената ликвидност и доспеаните обврски, за многу претпријатија доведено е во прашање нивното опстојувањето, но и егзистенцијата на цели семејства кои работат во овие сектори. Остануваме отворени и достапни за надлежните институции за сите потребно консултации и во таа насока бараме средба со министрите во влада кои ги водат економските ресори, Фатмир Битиќи, Фатмир Бесими и Крешник Бектеши, на која ќе разговараме околу доставените барања и имплементацијата за мерките од последниот пакет, велат од комората.

Меркел: Жените се несразмерно погодени од пандемијата

Тале Кристо — Sat, 06 Mar 2021 14:07:54 +0000

Германската канцеларка Ангела Меркел денеска предупреди дека поради пандемијата со Ковид-19 постои ризик од успорување на напредокот постигнат во родовата рамноправност, бидејќи жените повеќе се грижат за децата за време на карантинот и поголема е веројатноста дека ќе извршуваат поризични работи. – Мораме да обезбедиме пандемијата да не не врати во старите родови обрасци, за кои мислевме дека ги имаме надминато, изјави Меркел во видео-попраката по повод Меѓународниот ден на жената 8 март. Таа посочи дека жените несразмерно се погодени од здравствената криза и оти недоволно се застапени на високите позиции. – Над 75 проценти од вработените во здравствениот сектор се жени, од лекарските ординации и болници до лабораториите и аптеките, но сепак само 30 отсто од нив се на раководни позиции во тие области, посочи Меркел. Таа додаде дека не е оправдано жените во голема мера „да го носат“ општеството, а во исто време да не се подеднакво вклучени во важните политички, економски и општествени одлуки.

Гутереш: Милијарда ученици погодени од затворањето на училиштата поради коронавирусот

Тале Кристо — Tue, 04 Aug 2020 06:12:36 +0000

Генералниот секретар на Обединетите нации Антонио Гутереш рече дека пандемијата на коронавирус довела до најголемо нарушување на образованието во историјата со затворените училишта во повеќе од 160 земји во средината на јули, со што се погодени повеќе од милијарда ученици. Покрај тоа, Гутереш рече дека најмалку 40 милиони деца во светот ја пропуштиле „својата критична предучилишна година“. Како последица на тоа, тој предупреди дека светот се соочува со „генерациска катастрофа што може да доведе до губење на незамислив човечки потенцијал, да поткопа децениски напредок и да ги влоши вкоренетите нееднаквости“. – Се наоѓаме во одлучувачки момент за децата и младите од овој свет, рече Гутереш во видео пораката по повод почнувањето на кампањата на ОН наречена „Да ја спасиме нашата иднина“. Тој рече дека одлуките што владите и партнерите сега ќе ги донесат ќе имаат трајно влијание врз стотици милиони млади и врз изгледите за развој на земјите во наредните децении. Гутереш истакна дека враќањето на учениците во училниците треба да биде „главен приоритет“. – Кога локалниот пренос на Ковид-19 ќе се стави под контрола, враќањето на учениците во училиштата и образовните институции што е можно посигурно мора да биде главен приоритет, рече шефот на ООН, додавајќи дека консултациите со родителите, старателите, наставниците и младите се од основно значење.