покачување на плата – Kurir.mk

Британец кој бил на боледување 15 години ја тужел компанијата затоа што не му ја зголемила платата во тој период

Ивона Петрова — Sun, 29 Oct 2023 20:02:20 +0000

Иан Клифорд, 50-годишен ИТ вработен во технолошкиот гигант IBM ја тужел компанијата затоа што не му ја зголемила годишната плата од 62.000 евра во периодот од 15 години колку што бил на боледување. Клифорд тврделдека бил жртва на дискриминација поради инвалидитет бидејќи неговата плата не била покачена во 15-те години кога бил без работа. Тој смета дека „не е алчно да се сака зголемување на платата“. ИТ експертот добивал повеќе од 62.000 евра годишно според здравствениот план на IBM и гарантирано ќе зема плата до 65-годишна возраст. Сепак, Клифорд тврдел дека тоа „не е доволно дарежливо“, бидејќи неговата плата ќе „овене“ со текот на времето поради инфлацијата. 50-годишникот зел боледување поради ментално здравје во 2008 година, а во 2012 година му била дијагностицирана леукемија во четврта фаза. Сепак, минатата година тој ја тужел компанијата за дискриминација на инвалидитет бидејќи IBM не му ја зголемила платата од 2013 година. Но, трибуналот за вработување во Ридинг, Беркшир, го отфрли неговото барање, при што судијата му кажал на Клифорд дека му била дадена „многу значајна придобивка“ и „поволен третман“. Зборувајќи за првпат по пресудата, Клифорд рече дека сака да се погрижи неговиот син да биде згрижен и дека шансата тој да живее до 65 години е „малку веројатна“.

КСС бара пратениците да ги усвојат амандманите за линеарно покачување на платите на вработените во јавниот сектор

Магдалена Андонова — Fri, 01 Jul 2022 12:28:46 +0000

Конфедерацијата на слободни синдикати на Македонија уште еднаш се обрати до сите пратеници и членови на Комисијата за финансирање и буџет на денешната седница да се охрабрат и да ги усвојат амандманите на синдикатите и оној за линеарно покачување на платите на вработените во јавниот сектор како и амандманот на КСС за парична помош на сите вработени во приватниот сектор. - Ги повикуваме да ја согледаат состојбата во која што се наоѓа работникот во моментот неможејќи да ги сервисира своите основни животни трошоци кои поради двоцифрената инфлација, драстично поскапените нафтени деривати и од денес големото поскапување на електричната енергија нивните плати се обезвреднија. Иако премиерот Димитар Ковачевски на седницата за пратенички прашања експлицитно одби да се прифтат амандманите на синдикатите, а од друга страна при носењето на минимална плата и нашето барање низ годините за усогласување на платите ветуваше дека пари ќе има за работниците, па затоа тргајќи од суштинската потреба на работникот што поспремно да ја пречека тешката зима што следи ги повикуваме сите пратеници во комисијата денес да размислат и одлучат со чиста совест и рационално да му помогнат на осиромашениот работник, стои во соопштението на КСС. Од таму додаваат дека оној пратеник кој ќе гласа за отфрлање на овие амандмани КСС ќе го прогласи за непријател на работниците и ќе бидат запаметен во историјата како човек кој не се грижи и ги урнисува работничките права.

Стојаноски до Ковачевски: Македонскиот работник врзува едвај крај со крај, дали власта ќе го прифати барањето на ССМ за линеарно покачување на платите?

Магдалена Андонова — Wed, 29 Jun 2022 15:38:33 +0000

Бојан Стојаноски, пратеник од редовите на ВМРО-ДПМНЕ на денешната собраниска седница за поставување пратенички прашања упати пратеничко прашање до Претседателот на Владата Димитар Ковачевски за тоа Дали ќе биде прифатен предлогот на ССМ за линеарно покачување на плата и линеарно зголемување од 2,806 денари, бидејќи во моментов е навистина тешко да се сврзе крај со крај за македонскиот работник. Стојаноски рече дека овие прашања се директно произлезени од синдикатите и се нивна желба. ССМ и КСС како најголеми синдикални организации во државата се обратија до сите политички партии во Парламентот и до сите координатори со испратени писмени барања со барање за изнаоѓање на пратеничка група со која таа тие нивни барања ќе ги преточи во амандман за тие да бидат расправани и усвоени. „Имаме секојдневни штрајкови од различни синдикални организации, можеме да просведочиме дека во моментов е навистина тешко да се сврзе крај со крај за македонскиот работник затоа што имаме историски највисока инфлација, сиромаштијата галопирачки расте, цената на горивата никогаш не била повисока, цената на храната исто така не била никогаш повисока и не престанува да расте а цената на енергенсите галопирачки исто така се вивнува во облаците и не престанува да расте таа цена“, потенцираше Стојаноски. Стојаноски посочи дека власта не се прави ништо за да се сопре и така разгорената инфлација која се случува во моментов Стојаноски заклучи дека потрошувачката кошничка секојдневно се зголемува, платите во Република Македонија ја губат трката со зголемените цени. Додека пак трите главни контибутори за една обична нормална живеачка, горивата, храната и цената на струјата не престануваат да растат. Затоа сосема е логично барањето на работниците за повисоки плати.

Филипче повторно ги извиси вработените во здравството, од мај нема исплата за зголемената „додаток“ плата

Ивона Петрова — Tue, 17 Aug 2021 11:32:50 +0000

Вработените во здравството повторно извисени од министерот Венко Филипче. Трет месец по ред го немаат добиено најавеното зголемувањето на платата од пет проценти, кое Филипче го најави во март, за подоцна да излезе дека ќе го добијат како додаток на плата само одреден период, дознава Курир. Исплата нема за месеците мај, јуни, јули, а веќе е поминат и повеќе од половина август. Покачувањето, односно додатокот за март вработените во здравствениот сектор го добија месеци подоцна односно исплатата беше извршена во јуни. Кратко потоа беше извршена исплатата и за месец април. Во меѓувреме одговорот на Филипче за доцнењето беше дека се работи за технички и административни проблеми. Сега е август, а вработените го чекаат ветеното покачување за месец мај. Курир денеска се обрати до Министерството барајќи одговор кога вработените во здравството ќе ја добијат исплатата за овие три месеци. До објавување на овој текст, одговор од Министерството не добивме. За потсетување, Филипче на 9 март на социјалните мрежи објави дека сите вработени во здравствениот сектор со мартовската плата ќе добијат покачување од 5 проценти.

Филипче повторно ги извиси вработените во здравството: Се уште го немаат добиено најавеното мартовско покачување на платата

Ивона Петрова — Thu, 06 May 2021 08:18:44 +0000

Вработените во здравството се уште не го добија ветеното покачување на мартовската плата од пет проценти. Иако министерот Венко Филипче најави дека до крајот на минатиот месец, април, ќе има исплата, тоа се уште не се случило. Здравствената администрација и медицинскиот персонал кои ја контактираа редакцијата на Курир велат дека се чувствуваат излажано од ветувањата на министерот за здравство Венко Филипче. Посочуваат дека покачувањето очекувале да го земат со мартовската плата како што беше најавено, но до денеска се уште имаат исти примања. Денес се обративме до Министерството за здравство од каде побаравме одговор кога на вработените во здравството ќе им биле исплатено најавеното покачување на платата, но до објавување на овој текст одговор не добивме. Курир уште минатиот месец, пред исплата на платата во здравството пишуваше дека вработените во овој сектор ќе останат без најавеното покачување од пет проценти на месечните примиња. Дополнително, како што објави Курир, покачувањето нема да го добијат на платата, туку во вид на додаток. Министерот за здравство на 14 април ги потврди пишувањата на Курир. -Имавме бројни состаноци со претставници на Синдикатот, една од причините беше да се најде начинот како да се исплати, дали да биде дел од анексот. Покачувањето доаѓа како поддршка преку кредитот на Светска Банка и не може да се пресмета во основната плата, ќе биде како бонус, односно додаток, изјави минатиот месец Филипче. Тогаш министерот нагласи дека завршени се сите процедури и до крајот на месец април вработените во здравството ќе го добијат покачувањето од пет проценти за месец март. Ветување кое не е исполнето. За потсетување, министерот за здравство на 9 март на социјалните мрежи објави дека сите вработени во здравствениот сектор со мартовската плата ќе добијат покачување од 5 проценти.

Филипче потврди: Покачувањето од 5% не може да се пресмета во основната плата

Ивона Петрова — Wed, 14 Apr 2021 09:27:43 +0000

Министерот за здравство Венко Филипче, денеска ги потврди пишувањата на Курир дека вработените во здравството нема да го добијат најавеното покачување на плата од 5 проценти, пресметано во платата. -Имавме бројни состаноци со претставници на Синдикатот, една од причините беше да се најде начинот како да се исплати, дали да биде дел од анексот. Покачувањето доаѓа како поддршка преку кредитот на Светска Банка и не може да се пресмета во основната плата, ќе биде како бонус, односно додаток, изјави денеска Филипче. Тој посочи дека завршени се сите процедури и до крајот на месецот вработените во здравството ќе го добијат покачувањето од пет проценти за месец март. Повеќе за најавата од Курир по однос на оваа тема може да прочитате подолу: Ништо од ветувањето на Филипче: Вработените во здравството нема да го добијат најавеното покачување на платата