покачување – Kurir.mk

Платите во јавниот сектор во септември ќе се зголемат за 10 отсто

Ивона Петрова — Mon, 10 Jul 2023 15:14:19 +0000

Синдикатите и Владата денеска постигнаа договор за зголемувањето на платите и за методологијата за раст на платите во јавниот сектор. Платите во јавниот сектор од 1 септември ќе бидат зголемени за 10 отсто, а вработените ќе добијат 10.000 К-15. Министерката за труд и социјална политика Јованка Тренчевска изјави дека е постигнат договор за потпишување на општиот колективен договор и за сите оние спорни прашања кои со месеци се разговараат со претствниците на синдикатите. -Договоривме дека новата методологија за прсметка на плати за вработените во јавниот сектор ќе започне од март 2025 година. Со септемвриската плата во 2023 ќе биде покачувањето од проценти на платите во јавниот сектор, К-15 до крајот на декември 2023 година во висина од 10.000 денари, а во општиот колективен договор ќе стои одредба за исплатата на К-15 од 2024 година да биде најмалку 30 проценти од висината на просечната плата во изминатата година, објави во изјавата за медиумите по средбата Тренчевска.

Усвоено покачување на платите во јавните здравствени установи, почнувајќи со исплатата за плата за март

Ивона Петрова — Wed, 10 May 2023 14:45:23 +0000

Владата ја разгледа и усвои Информацијата за давање овластување на министерот за здравство, за потпишување Анекс за изменување и дополнување на Колективниот договор за здравствената дејност, како и на директорите, односно в.д. директорите на јавните здравствени установи, за потпишување анекси за изменување и дополнување на поединечните колективни договори. -Владата го овласти министерот за здравство да го потпише Анексот за изменување и дополнување на Колективниот договор за здравствената дејност на Република Северна Македонија, со којшто се врши зголемување на платите на вработените во јавните установи во здравството, почнувајќи со исплатата за плата за месец март 2023 година. Министерот за здравство ќе го потпише Анексот со репрезентативниот Самостоен синдикат за здравство, фармација и социјална заштита на Република Северна Македонија, со што се овозможува зголемување на платите на вработените во јавните установи во здравството. Според образложението од Министерството за здравство, покачувањата од 3.000 денари, 2.500 денари или 2.000 денари се однесуваат на сите вработени во јавните здравствени установи. Владата на Република Македонија ги овласти и директорите, односно в.д. директорите на јавните здравствени установи, да ги потпишат поединечните колективни договори, со коишто се врши зголемување на платите на вработените во јавните установи во здравството, почнувајќи со исплатата за плата за месец март 2023 година, се вели во владиното соопштение.

Кој е најдобриот начин да добиете покачување на плата?

Ристе Здравков — Tue, 07 Mar 2023 12:41:41 +0000

Сите со нетрпение очекуваме покачување и сите се стремиме да заработиме што е можно повеќе. Сепак, не е тајна дека на многу луѓе им е непријатно да бараат покачување, дури и кога знаат дека го заслужуваат тоа. Ова може да биде момент кога ќе почувствуваме дека бараме услуга, а не заслуга, а ситуацијата дополнително се комплицира ако наш претпоставен е некој кој „не е познат“ по тоа што ги почитува нашите барања. Зошто се случува ова и кој е најдобриот начин да побарате покачување? Не ни требаат трикови, туку аргументирана подготовка. Пред да дојдете на состанок, треба да си ја завршите домашната задача. Односно да се подготвите добро, треба да водите монолог, односно да се запрашате - што правам на работа, каков е описот на моите обврски, колку добро си ја извршувам работата, што можам да направам за да бидам поефикасен, како да му помогнам на работодавецот да си го зголеми профитот Преговорите за плата не се спринт, туку маратон. На многумина им е непријатно да побараат зголемување на платата, но тоа може да се надмине. Проблемот е што многу луѓе имаат став на подреденост, односно не се ни свесни колку вредат и многу често одат на психотерапија со вакви проблеми, што не знаат како да се позиционираат на работа. Да бараш плата е исто така прашање за односот со авторитетите. Тоа се надминува со работа со психотерапевт, ако како деца сте имале проблем со спотиставување на авторитети како родители или наставници, сега сте возрасни и треба да поработите на вашите односи. Треба да се заземете за себе, имате право на тоа. Има уште еден проблем. Прашањето е со каков шеф си имате работа. Ако е рационален, ако сака да ве слуша, ако сака да го цени она што го имате да го кажете, тоа е одлично. Многу е тешко да се бара покачување од некој кој е нарцисоиден и мисли дека само тој работи во таа компанија. Повторуваме, важно е да се подготвите, како кога одите на интервју за работа. Важно е да објасните зошто го заслужувате покачувањето. Можеби вашиот претпоставен не знае што всушност правите, особено во големи системи. Секогаш е важно да се нагласи што добила компанијата со нашата работа. Така, вежбате, подгответе се. Секогаш има смисла да го побарате она што сметате дека го заслужувате. Кога да побарате покачување? Зависи од компанијата. Некои имаат политика на зголемување на платите за една година. Нема строго правило, но многу е важно да ги браните вашите аргументи. Кажете - затоа што работам прекувремено, затоа што имам дополнителен обем на работа, бидејќи мојот ангажман придонесува за оваа компанија. Често се случува описот на работното место да не одговара на реалните задачи на работа. Тоа може да биде и одличен аргумент. Многу работници му споменуваат на работодавецот дека добиле уште една понуда. Дали е тоа паметен потег? Повторно зависи, за некои работодавци ова делува како стимул, се плашат да не загубат вработен и ќе излезат со контрапонуда, додека за некои тоа може само да ги изнервира и да им биде дополнителен аргумент да не ви ја зголемат платата. Треба да изберете добар момент. Кога ќе видите дека некој под стрес, вниманието му е расеано, бидете трпеливи.

ВМРО-ДПМНЕ: Со новото покачување на струјата, дуото Ковачевски ќе печали, а 500.000 народ ќе живее со 150 денари на ден

Тале Кристо — Thu, 25 Aug 2022 06:55:06 +0000

СДСМ и Ковачевски преку Васко Ковачевски, директор на ЕЛЕМ најавија ново покачување на цените на струјата од декември. И СДСМ знаат дека кризата која не чека поради нивниот криминал и неработа не може да ја избегнат, па ја најавуваат уште од сега, велат во партиското соопштение од ВМРО-ДПМНЕ. Откако е Ковачевски премиер цената на струјата се покачи два пати. Последните покачувања се во дијапазон од 18% па до повеќе од 100%. Сметките за струја на фирмите само во месец август пак се и до 4 пати повисоки од досегашните. И токму енормно високата цена на електричната енергија е една од главните причини што од Централниот регистар за само 8 месеци во 2022 година се избришани над 5.500 правни субјекти. Македонија е под енергетски и економски колапс, а единствени виновници за таквата состојба се СДСМ и владата на Ковачевски, кои во време на криза заработуваат на грбот на народот. Најкриминалниот директор во владата предводена од СДСМ, Васко Ковачевски, кој како директор на РЕК Битола не презема ништо за обезбедување на доволни количини на јаглен и нови ископи, и го остави претпријатието на раб на оперативност. За сега како директор на ЕЛЕМ да може да увезува скап јаглен, и од истото да печали за себе, за кликата на власта на Ковачевски, а сето тоа резултира со високи сметки за струја кои ги плаќаат граѓаните. Дуото Ковачевски предизвикувајќи и продлабочувајќи ја енергетската криза се интересираат само за своите лични и партиски интереси додека 500.000 наши сограѓани преживуваат со по 150 денари на ден, стои во соопштението на патијата.

Мицкоски: Власта лаже кога зборува за струјата, покачувањето ќе биде над 18%, потребни се избори за што побргу потоа да се реструктурира ЕЛЕМ и да произведува доволно струја

Магдалена Андонова — Thu, 30 Jun 2022 13:19:12 +0000

Претседателот на ВМРО-ДПМНЕ Христијан Мицкоски, при денешната посета во општина Гази Баба одговараше на новинарско прашање кое се однесуваше на вчерашното негово тврдење дека струјата ќе постапи за над 18%, а за кое власта велеше дека е лажно и рече дека од власта која толку пати го лажела својот народ, не очекува да ја кажат вистината после илјада кажани лаги. - Се обидуваат да го амортизираат незадоволството помеѓу граѓаните со што ќе кажат процент кој не е реален. Тоа ќе мора да се компензира со трансфери на пари од буџетот до поранешно ЕЛЕМ, денешно ЕСМ, затоа што ЕСМ не е подготвено да ги произведе сите количини на струја која ги бара ЕВМ Хоум за да ги испорача до граѓаните и индустријата, што значи дека ќе мора да увезува скапа струја и таа скапа струја ќе чини помеѓу 150 и 200 милиони евра според некои проценки на годишно ниво. Имајте предвид дека кон крајот на оваа година повторно таму некаде на 30-31 декември ќе имаме уште една ревизија на цената на електричната енергија, така да од први јануари ќе биде можеби уште еден шок ако овие останат до тогаш. Затоа се потребни предвремени избори за да може ЕЛЕМ да се реструктуира за да го може да го произведе тоа што им е потребно на граѓаните и да немаме дополнително покачување на цената на струјата – рече Мицкоски. Мицкоски додаде дека ова што го кажуваат од 7,5% е голема лага, тоа ќе се случува во оние преодни месеци како април и мај и можеби и септември и октомври а зимата и летото поскапувањето ќе биде од 20 до 50% во зависност од тоа каква изолација имаат нашите домови. - Тука веќе немојте да зборувате за екологија затоа што граѓаните ќе горат сѐ за да можат да ги затоплат домовите во текот на зимата. Ова ќе биде исклучително тешка зима со исклучително загаден воздух во сите градови на Македонија. Имајте го ова во предвид уште од сега го најавувам за да не биде дека не сме го кажале. И второ, преку трансферот од буџетот од 150 до 200 милиони евра, тоа се пари на граѓаните кои што ова расипништво и лоповлук на владата ќе ги плаќаат преку своите даноци така што, треба да дојде крајот на овие криминалци во политиката а лекот за тоа нормално се предвремените парламентарни избори, тоа што го бара ВМРО-ДПМНЕ, да дојдат луѓе кои што знаат како треба да се работи за да не трпи стандардот на граѓаните – додаде Мицкоски.

За наставниците пари НЕМА, ама за нови автомобили, златен прбор за јадење и луксузирање ИМА

Ристе Здравков — Mon, 18 Apr 2022 15:15:03 +0000

Во светот наставниот кадар е светост, само во Македонија маргинализиран. Една стара изрека вели, „Ако сакаш да уништиш една нација уништи им го образованието“, па така оваа изрека македонските власти по се изгледа сериозно ја сфатиле. Вчера владата излезе со понуда за покачување на платите на наставниците за 10 проценти или околу 2500 денари по човек, апропо барањето на СОНК од 18,4 проценти. Откако оваа понуда беше експресно одбиена, веднаш почнаа да работат владините ПР-служби, па следеа серија напади и обвинувања. Владата во текот вчерашниот ден испрати серија напади кон просветните работници поради одбивањето на понудата од 10 проценти, а сумата од 2500 денари ја претставија како покачувањето да е 25.000 денари, да не беше трагично ќе беше смешно. Како да не беше доволна само владата, денеска и од СДСМ излегоа со напад кон СОНК, портали и аналитичари блиски до СДСМ, и сето ова наликува на оркестрирана работа... Истите тие кој во моментов ги напаѓаат наставниците кои само си ги бараат правата имаат дете кое треба да посетува настава кај тој ист наставник/професор кој е безмислосно нападнат, но ситуацијата до некаде е и очигледна. Доколку се исполнат барањата на СОНК, и платите бидат покачени за 18 проценти, нема да има пари за нови автомобили, бидејќи знаете, имаме министри и директори кои сметаат дека возило старо две години не е соодветно за нив, па истото мора да биде променето за ново. За само три години беа потрошени 8,1 милион евра за нови автомобили, беше купен прибор за јадење вреден 40.000 евра, кабинетите на функционерите се опремени од најлуксузните салони, секојдневните ручеци, патувања, луксузирање... За споредба, минатата година Македонија беше зафатена од големи пожари. Големи површини од нашата држава беа зафатени од пламени јазли, а иако ги имаме, Ер-тракторите не беа во функција поради немањето на финансиски средства за нивно сервисирање кое чинеше 406.504 евра, а исто така минатата година, македонската влада набави возила во вредност од 3.609.000 евра. Но дали е ова сè... НЕ е!!! Според анализата која ја направивме, до почетокот на кризата во периодот 2018-2020 година биле набавени 392 возила за 8,1 милион евра. Но, овие податоци компаративно може да посведочат и за тоа како се вреднуваат „приоритетите“ при набавките. Додека за набавка на возила од март 2020 досега се потрошиле 3 милиони и 609 илјади евра, Македонија ги дочека ланските пожари без сервисирани три „ер-трактори“ што за споредба чини 25 милиони денари (406.504 евра). Од друга страна, од пожарите е предизвикана штета од околу 31 милиони евра, при што само за пошумување на уништените површини ќе требаат барем две години, а за да зазеленат опустошените простори најмалку 20, односно 50 години за шумите да се вратат во состојбата како пред пожарите. Кога приоритетите не се во фокусот на набавките, штетата станува многукратна. „Само за мебел минатата година за неколку месеци Владата потрошила околу 300.000 евра. Носат мерки против набавка на мебел, а всушност веќе набавиле“, изјави тогаш портпаролот на ВМРО-ДПМНЕ, Димче Арсовски. Од ВМРО-ДПМНЕ обвинуваа дека иако од МВР изминатиов период знаеле дека ќе има економска криза, набавиле мебел во вредност од 250.000 евра (15.400.000 денари), Секретаријатот за европски прашања набавил мебел и услуги за перење автомобили во вредност од 700.000 денари, МНР потрошило над 20.000 евра (1.370.000 денари) само за мебел, а Министерството за земјоделство - услуги за перење на автомобили во висина од 470.000 денари. Па така доколку ја земеме штетата од минатата година за време на пожарите, таа е сума која владата ќе мора да ја одвои годишно за покачувањето на наставниците. Сервисирање на ер-тракторите чини 406.504 евра, материјалната штета е 31.000.000 евра, возила се набавуваат на речиси секој две години, а платите на наставниците на секој десет. ПС: Пари за наставниците мора да најдете, а за автомобили, златни прибори и луксузирање сами заработете си па трошете! Ристе Здравков

УПОЗ и СОНК до Битиќи: Доста ни е од вашиот игнорантски однос, со 5 проценти покачување на плата во време на инфлација не се живее

Магдалена Андонова — Mon, 28 Mar 2022 20:15:00 +0000

Не требаше да се доведеме во ваква ситуација сега да протестираме, ако тоа е законска одредба. Повеќе од 4 години ова го баравме од надлежните министерства, но и по низа простести не успеавме да издејствуваме. Ако се бара граѓаните да ги почитуваат законите, која е причината што владата не ги почитува законите? Има законска основа и не е проблемот од сега, порача Јаким Неделков, претседател на СОНК во вечерашното гостување во емисијата Анализа на ТВ 24. Неделков смета дека изјавите на вицепремиерот Фатмир Битиќи за тоа дека се договориле дебатата да продолжи во Економскиот социјален совет на влада, и дека е избрана одлуката за протест од страна на синдикатите и дека владата не бега од достоинствени плати, рече дека неговиот контра аргумент за тоа зошто во моментот не можат да се покачат така платите како ние што посакуваме, е практично еден добар политички говор, додавајќи дека како синдикат се соочуваат со игнорантски однос од страна на власта. Добро вака вицепремиерот што даде едно добро образложение на проблемот, односно контра аргументи за тоа зошто во моментот не можат да се покачат така платите како ние што посакуваме, е практично еден добар политички говор кој што треба јавноста да ја убеди дека навистина е така. - Инаку, ние бевме многу стрпливи, коректни, конструктивни и подготвени за социјален дијалог, наназад четири години, значи зошто беше тој игнорантски однос, од репрезентативен синдикат во јавен сектор не паркираа во нерепрезентативен синдикат, ни истекла регистрацијата за репрезентативност. Опструкции невидени за да докажеме дека сме репрезентативен синдикат како конфедерација на слободни синдикати. Сега се наоѓаме од позиција да сме синдикат од втор ред на Економски социјален совет каде што репрезентативниот синдикат Сојуз на синдикати на Македонија преговара со владата, практично целите аплаузи или негодувања на постигнатите резултати и на ова денеска што се случува тоа е меѓу социјалните партнери кои што беа директно во преговарачкиот тим, од една страна претставниците на работниците и претставниците на владата. Од тој аспект јас морам да кажам дека не е решение да се бара или превенира лекот поединечно кој како ќе најде начин, истакна Неделков. Трпе Деаноски од УПОЗ нагласи дека владата единствено покачување што го направила изминатите 5 години е 5 проценти, укажувајќи дека со ова покачување и во време на инфлација не се живее. - Владата треба да сфати дека овие вработени кои што синдикатот на УПОЗ ги претставува немаат добиено покачување на плата во последните 5 години, и најмногу што добиле покачување на плата се 5 проценти. Со покачување на 5 проценти не се живее, поготово не се живее во време на инфлација, вели Трпе Деаноски од УПОЗ.

Сè уште имаме најевтино гориво во регионот, уверува Бислимовски

Магдалена Андонова — Mon, 07 Mar 2022 18:45:17 +0000

Првиот човек на Регулаторната комисија за енергетика, Марко Бислимовски вели дека и покрај зголемените цени Македонија и натаму има најевтини горива во регионот. - Споредбено со регионот, согласно последните достапни податоците од 6.3.2022 година (недела) во земјава Еуродизелот е со најниска цена и изнесува 1,388 евра/литар, додека во Србија изнесува 1,552 евра/литар, во Бугарија е 1,457 евра/литар во Албанија 1,616 евра/литар, во Грција 1,678 евра/литар и во Хрватска 1,497евра/литар. И Еуросупер БС 95 исто има најниска цена во земјава од 1,453 евра/литар (цена актуелна од полноќ), за разлика од Србија каде цената на Еуросупер БС 95 изнесува 1,482 евра/литар, во Албанија 1,632 евра/литар, во Грција e 1,951 евра/литар и во Хрватска 1,507 евра/литар. Само во Бугарија е пониска и изнесува 1,427 евра/литар, се вели во писмената изјава на првиот човек на Регулаторната комисија за енергетика.

Германија: Минималната саатница зголемена на 12 евра

Магдалена Андонова — Wed, 23 Feb 2022 14:16:24 +0000

Владата на Германија денес ги усвои одлуките за зголемување на минималната саатница на 12 евра од октомври, со што е исполнето клучното ветување на канцеларот Олаф Шолц од минатата предизборна кампања. Германија има минимална саатница од 2015 година а воведена е на инсистирање на Социјалдемократските странки кои во тоа време беше помал партнер во владејачката коалиција со конзервативците на Ангела Меркел. Минималната саатница на почетокот изнесувала 8.5 евра, но нејзиниот износ редовно го разлгедува комисијата која ја сочинуваат претставници на синдикатот и работодавците. - Многу граѓани во нашата земја работат многу, но заработуваат малку. Тоа мора да се промени. За мене ова е еден од најважните закони и прашање на почитување, напиша Шолц на Твитер. За одлука да стапи на сила, мора да ја потврди парламентот но коалицијата на Шолц во тоа тело има мнозинство.

Протест во Битола за растот на цената на горивата

Тале Кристо — Wed, 16 Feb 2022 15:56:56 +0000

Мирен протест со едночасовно блокирање на сообраќајот од едната страна на булеварот Први мај во Битола денес организираше „Кар клубот“, кој брои 5.000 членови вљубеници во возилата, поради постојаното покачување на цените на горивата. -Првично се решивме со мирен протест да изразиме незадоволство, а потоа сме во рпеговори со сите поголеми клубови низ Македонија да се премине ако треба и на блокирање магистрали. Ова е почеток на локално ниво, иако сме пред Општина Битола, најпогодно место е, знаеме дека локална самоуправа нема врска со Регулаторна комисија, но ете мора некаде да се почне. Знаеме дека нашиот народ е навикнат да пишува само по социјални мрежи, никој не презема ништо, седи со скрстени раце, па еве ние на почеток како Кар клуб Битола се решивме да почнеме, изјави Александар Станковиќ, претседател на Кар клуб Битола. Велат дека државата не презема ништо за покачените цени на горивата. -Првично требаше барем пред некоја недела да се замрзнат цените на горивата, бидејќи знаеме дека од цените на горивата зависат сите други цени, сите други покачувања се поради цените на горивата. Можеби треба да се намали акцизата, имаше зголeмување и поради короната. Има начини доколку државата сака да излезе во пресрет. А гледаме дека нема, вели тој. Како клуб тие учествуваат на домашни, но и меѓународни изложби на автомобили, а Станковиќ вели дека нивните активности како клуб замреле прво со короната, а потоа и со покачувањето на цените на горивата.