Пол Манафорт негира дека се сретнал со Џулијан Асанж

Ивона Петрова — Wed, 28 Nov 2018 07:34:22 +0000

– Поранешниот шеф на предизборната кампања на Доналд Трамп, Пол Манафорт категорично негира дека се сретнал со основачот на Викиликс Џулијан Асанж, како што тврди британскиот весник „Гардијан“. – Приказната е сосема неточна и тоа е намерна клевета. Никогаш не сум се сретнал со Џулијан Асанж или кој било поврзан со него, рече Манафорт преку свој портпарол. – Ги разгледуваме сите правни опции против „Гардијан“ кој ја објави таа сторија, иако мои претставници го информираа дека тоа не е точно, рече Манафорт. И адвокатот на Асанж од Еквадор, Карлос Поведа, ги негираше наводите на „Гардијан“, а Викиликс на Твитер соопшти дека е „подготвен да се обложи со Гардијан и неговиот главен уредник во милион долари дека Манафорт никогаш не се сретнал со Асанж“. Британскиот весник „Гардијан“ објави дека поранешниот менаџер на кампањата на Трамп, Пол Манафорт тајно се сретнал со Асанж во Амбасадата на Еквадор во Лондон, само неколку дена или недели откако се приклучил на кампањата на Трамп. Повикувајќи се на два анонимни извори, весникот објави дека Манафорт првпат се сретнал со Асанж во Амбасадата на Еквадор во Лондон во 2013 година, една година откако Асанж таму доби азил за да избегне екстрадиција во Шведска поради обвинение за силување. „Гардијан“ наведува дека Манафорт се вратил во Амбасадата во 2015 и 2016 година. Весникот исто така тврди дека последната посета на Манафорт била во март 2016 година, но не е регистрирана во книгата на Амбасадата. Според неименуваниот извор на весникот, посетата траела околу 40 минути. Кампањата на Трамп соопшти дека го вработила Манафорт на 29 март 2016 година. МИА

Поранешниот соработник на Трамп, Пол Манафорт виновен по осум точки од обвинение

Матеја Петровски — Wed, 22 Aug 2018 05:52:49 +0000

Поранешниот шеф на изборната кампања на претседателот на САД, Доналд Трамп, Пол Манафорт прогласен е за виновен по осум точки од обвинението за даночна и банкарска измама и непријавување банкарски сметки во странство. Поротата не успеа да постигне консензус за останатите 10 точки од обвинението. Порототата го прогласи Мамафорт за виновен за две од девет обвинувања за банкарска измама, сите пет обвиненија за даночна измама и една од четири обвиненија за непријавување сметки во странство. Судијата прогласи дека судењето не е валидно за 10 точки од обвинението во поглед на кои поротата не можеше да постигне консензус. Судењето на Манафорт, долгогодишен републикански оперативец, е прво што е одржано во рамки на истрага за руското мешање во американските претседтаелски избори во 2016 година што ја води специјалниот обвинител Роберт Малер. Обвинувањата за Манафорт воглавно се однесуваат за период пред да работи во кампањата на Трамп. Обвинителите го обвинија дека од американските даночни служби скрил 16 милиони долари заработени како политички советник на проруски политичари во Украина и потоа лажел банки за да обезбеди кредит од 20 милиони долари откако му пресушил изворот на приходи од Украина. Трамп се обиде да се дистанцира од Манафорт по пресудата нагласувајќи дека сето тоа нема врска со него. – Се чувствувам многу лошо поради Пол Манафорт. Јас во тоа не сум вмешан, наведе американскиот претседател. (Миа)

пол манафорт – Kurir.mk

Пол Манафорт негира дека се сретнал со Џулијан Асанж

Поранешниот соработник на Трамп, Пол Манафорт виновен по осум точки од обвинение