полициски час – Kurir.mk

Во САД воведен полициски час за барателите на азил наместо притвор

Ивана Ефремовски — Fri, 04 Aug 2023 09:09:05 +0000

Американските власти воведоа полициски час за оние кои бараат азил додека чекаат првични проверки по преминувањето на границата. Полицискиот час беше воведен во мај во четири града како алтернатива на притворот, а сега е проширен во уште 13 градови, соопшти Американската служба за имиграција и царина. Се очекува да биде воведен во 40 града до крајот на септември. Полицискиот час, кој трае од 23:00 до 5:00 часот, останува на сила до исходот од проверката, односно интервјуто со службениците за азил и евентуално жалбата до судијата за имиграција. На оние кои ќе поминат обично им е дозволено да ги следат своите случаи на суд без полициски час, додека оние кои нема да успеат се соочуваат со депортација. (МИА)

Полициски час во францускиот град Калмар по избувнувањето на немирите

Тале Кристо — Thu, 29 Jun 2023 18:58:54 +0000

Во францускиот град Кламар, јужно од Париз во регионот Ил де Франс, од вечерва до 3 јули ќе биде воведен полициски час од 21 до 6 часот, соопштија локалните власти. Полицискиот час има за цел да го воспостави редот по немирите што избувнаа претходно оваа недела, откако полицијата уби тинејџер кој не го запре својот автомобил во париското предградие Нантер, објавија властите на Твитер. Ширум Франција ќе бидат распоредени 40.000 полицајци, вклучително и Париз, оваа вечер по немирите што избувнаа откако полицијата уби тинејџер кој не успеа да запре автомобил што се прошири низ целата земја, изјави претходно денеска францускиот министер за внатрешни работи Жерал Дарманен. За денеска во Нантер е планирана комеморативна прошетка за убиениот млад човек.

Овој украинскиот град најави 58-часовен полициски час од петок

Катерина Бојаџиева — Wed, 03 May 2023 10:13:35 +0000

Градот Херсон во близина на линијата на фронтот во јужна Украина од петок ќе биде под полициски час 58 часа, изјави локален официјален претставник, додека Украина се подготвува за пролетна офанзива. Украинските власти во минатото користеа долги полициски часови за да го олеснат движењето на војниците и оружјето. Шефот на регионалната воена администрација на Херсон, Олександр Прокудин, рече дека полицискиот час ќе трае од 17 часот по Гринич в петок до 03 часот по Гринич в понеделник. „Во текот на овие 58 часа е забрането движење по улиците на градот. Градот исто така ќе биде затворен за влез и излез“, објави Прокудин на Телеграм, советувајќи ги жителите да складираат храна и лекови. Прокудин рече дека жителите можат да одат на кратки прошетки во близина на нивните куќи или да посетуваат продавници, но треба да носат документи за идентификација со себе. Најавата за полициски час дојде откако официјални лица соопштија дека три лица загинале, а петмина се повредени во рускиот напад денеска врз единствениот хипермаркет во Херсон.

Полициски час во Перу по серијата насилни протести

Ивона Петрова — Wed, 11 Jan 2023 06:47:39 +0000

По насилните протести во областа Пуно во југоисточниот дел на Перу во кои загинаа најмалку 17 лица, властите воведоа полициски час. Перуанскиот премиер Алберт Отароли сооошти дека полицискиот час од 20:00 до 4:00 часот по локално време ќе биде во сила наредните три дена. Повеќе од 68 лица се повредени во градот Хулиака, местото на последниот и еден од најтешките судири меѓу полицијата и приврзаниците на поранешниот претседател, Педро Кастиљо, кој минатиот месец беше уапсен поради обид за распуштање на Конгресот. Поддржувачите на поранешниот претседател бараат новата претседателка на државата, Дина Болуарте, да поднесе оставка и да се распишат предвремени избори. Перу со години е во политички превирања, а последната криза дојде откако Кастиљо минатиот декември објави дека го распушта Конгресот и воведува вонредна состојба, но Конгресот со големо мнозинство гласаше за негово отповикување. Кастиљо моментално е во притвор и под истрага под обвинение за бунт и заговор.

Во Шри Ланка прогласена вонредна состојба и воведен полициски час

Магдалена Андонова — Wed, 13 Jul 2022 09:00:17 +0000

Вршителот на должност премиер на Шри Ланка, Ранил Викремесинг прогласи вонредна состојба, откако претседателот Готабаја Раџапакса побегна на Малдивите поради протестите поради економската криза. Вонредна состојба е прогласена во цела земја, а во западната провинција воведен е полициски час. Одлуката веднаш стапува во сила. Викремесинге претходно беше именуван за вршител на должноста претседател на државата. Раџапакса, кој ја напушти земјата го овластил Викремесинге да постапува во негово име. По неколкунеделните протести што кулминираа со упадот на демонстранти во неговата резиденција во саботата, Раџапакса изутринава со авион на военото воздухопловство побегна за Малдиви. Тој најави дека ќе поднесе оставка за да го отвори патот за „мирен трансфер на власта“ по големите протести против него поради најголемата економска криза во Шри Ланка. (МИА)

Полициски час за малолетници во центарот на Чикаго

Дарко Андоновски — Mon, 16 May 2022 07:34:43 +0000

Градските власти во Чикаго воведуваат полициски час за млади лица во централното градско подрачје, поради завчерашното убиство на 16-годишното момче. Градоначалничката Лори Лајтфут појасни дека мерката за ограничување на движење ќе важи на просторот на Милениум паркот во центарот, што е едно од омиленисте места за собирање на младите во градот. Забраната ќе биде на сила од 18 часот в четврток до в недела, период во кој лицата помлади од 18 години нема да смеат да се движат без придружба во паркот. Лајтфут ги повика сите родители и јавноста да сторат се што е неопходно за да се спречат напади како оној завчерашниот, кога во оружена престрелка беше убиен малолетник, а две лица беа ранети. За убиството е обвинет исто така малолетник, на возраст од 17 години.

Во Лавов прогласен полициски час

Дарко Андоновски — Sat, 23 Apr 2022 11:47:34 +0000

Во Лавов е прогласен полициски час по добиени нови разузнавачки информации. Регионалниот гувернер Максим Козицкиј како причина за воведувањето на полицискиот час ги наведе новите разузнавачки информации, но не прецизираше за какви информации станува збор. Полицискиот час започнува денеска и ќе трае од 23 до 5 часот наутро до понатамошно известување.

Воведен полициски час во регионот на Одеса

Тале Кристо — Fri, 08 Apr 2022 16:45:11 +0000

Во регионот на Одеса е воведен полициски час, кој почнува утре во 20 часот по локално време и ќе трае до пет часот наутро в понеделник, соопшти денеска Градскиот совет на Одеса. Според наредбата на началникот на регионалната воена управа на Одеса, Максим Марченко, во тој период ќе биде забрането луѓето да бидат на улиците и на други јавни места без посебно издадени пропусници и сертификати. Одеса е град на брегот на Црното Море во јужниот дел на Украина.

Перу го укина полицискиот час воведен поради големите протести

Ивона Петрова — Wed, 06 Apr 2022 06:36:47 +0000

Претседателот на Перу Педро Кастиљо ја укина наредбата за воведување полициски час, која беше донесена во понеделникот по големите протести и незадоволството на граѓаните изразено низ целата земја. – Морам да објавам дека ја укинуваме наредбата за полициски час. Сега го повикуваме народот на Перу да остане мирен, рече Кастиљо на седницата со перуанските конгресмени. Перу беше погоден од бран демонстрации поради наглиот раст на цените на горивото и вештачките ѓубрива, кои се забрзаа по рускиот напад врз Украина, иако владата на таа земја на Андите се обидува да го спречи поскапувањето.

Од вечерва засилен полициски час во Киев

Ивона Петрова — Mon, 21 Mar 2022 10:26:48 +0000

Градоначалникот на Киев Виталиј Кличко денеска најави „засилен полициски час“ во главниот град на Украина од 20.00 часот (по локално време) до 7 часот во среда. Градоначалникот Кличко рече дека продавниците, аптеките и бензинските пумпи нема да се отворат во вторник. Делови од градот постојано се под оган од руските сили. „Ги замолувам сите да останат дома – или во засолништа кога ќе се огласи алармот“, рече тој.