попишувачи – Kurir.mk

Здравковски: Лажната опозиција од Левица промовира бојкот за попис, а они се пишале за реонски попишувачи

Магдалена Андонова — Tue, 14 Sep 2021 12:43:02 +0000

Игор Здравковски од ВМРО-ДПМНЕ, на својот Фејсбук профил напиша дека Левица промовирала бојкот на пописот, а всушност сопругата и братот на кандидат за советник од Левица се пишале за реонски попишувачи.

Лажнава опозиција од Левица промовира бојкот со паролата #НеОтварамВрата, арно ама не само шо не отварале, они да ти се молеле да им отворат... Сопругата на кандидатот за градоначалник под реден број 32, братот на кандидат за советник во горните места на листата за Велес под реден број 52, а претпоставувам и други членови се пишале за реонски попишувачи на #ПОПИС2021... Џабе глумите мачиња, сработете си го договореното и ќутете си, стои во Фејсбук објавата

Досега попишани 136.773 лица, 41.478 домаќинства и 59.953 станови

Ивона Петрова — Tue, 07 Sep 2021 11:03:07 +0000

Вкупно 136.773 лица, 41.478 домаќинства и 59.953 станови се попишани во првите два дена од пописот, информираат денеска од Државниот завод за статистика. Можноста за самопопишување на лица во странство, до денеска во во 07:30 часот, ја искористиле – 191.890 лица. Пописот на населението, домаќинствата и становите во Македонија, кој официјално започна завчера ќе трае до 30 септември.

Продолжува пописот, вчера проблеми со апликацијата за попишување

Ивона Петрова — Tue, 07 Sep 2021 07:06:13 +0000

Продолжува пописот, апел граѓаните масовно да се вклучат во процесот Вториот ден од пописот го одбележаа помали технички проблеми, кои според Државниот завод за статистика успешно и брзо биле надминати. Властите оценија дека пописот стартувал успешно, и апелираа граѓаните да се вклучат во процесот, да ги дадат потребните податоци, со цел државата да може да спроведува политики согласно реалната слика и во нивен интерес и во интерес на економијата и развојот на државата. Апел за вклучување во пописот дојде и од Европската комисија која ги охрабри сите во Северна Македонија да учествуваат во процесот на попишување на населението и додаде дека пописот е дел од процесот за пристапување во ЕУ. Државниот завод за статистика информира дека вчера во претпладневните часови се појавиле спорадични и локациски изолирани проблеми при процесот на попишување на населението на терен, оти тие се успешно остранети, како и дека не се должеле на паѓање на интеретот, туку најверојатно на поголемиот број сесии што се одвивале истовремено. Додека траеле техничките проблеми биле попишани речиси 10 илјади лица. -Во кратки периоди и на одредени локации апликацијата за попишување не функционираше и одреден број на попишувачи не можеа да попишуваат. Техничките тимови интензивно работеа на отстранување на проблемот и за кратко процесот продолжи непречено. Би сакале да потенцираме дека проблемот што се појави не се должи на интернет конекцијата со која се овозможува попишување, туку ова се можни и нормални проблеми кои се резултат на поголем број паралелни сесии, се вели во соопштението од ДЗС. Колку за илустрација, велат од Државниот завод за стастистика, во тие два-три часа додека траеле техничките проблеми, биле попишани речиси 10 илјади лица на целата територија на државата. Премиерот Зоран Заев рече дека после 20 години од последниот спроведен попис во земјава, благодарение на сите политички субјекти, на сите општественици, со професионалниот кадар на статистика во педесетина региони исклучително успешно стартувала оваа стстистичка операција. Тој посочи дека прашалникот содржи прашања за статистички податоци, дека дури и за време на пандемија тоа е возможно да се спроведе затоа што физичката дистанца се одржува доколку тоа е потребно. – И навистина првиот ден е исклучително охрабрување за успешен попис. Секако имаме уште 24 дена до 30 септември, но сакам да се заблагодарам на сите кои успешно стартуваа, пред, се на министерот за правда, на Заводот за статистика, но и на граѓаните и на попишувачите. Верувам дека податоците ќе бидат сериозен идникатор за уште поуспешни севкупни политики на развој на нашата земја, изјави вчера Заев. Министерот за внатрешни работи Оливер Спасовски очекува дека пописот успешно ќе се спроведе, граѓаните ќе покажат одговорност и ќе се добијат детални податоци кои ќе се користат за развој на државата. Спасовски рече дека претставници од МВР работат заедно со Државниот завод за статистика во штабот кој раководи со пописот. – Секако, дека ние како МВР работиме заедно со Државниот завод за статистика, наши претставници имаме во штабот кој раководи со пописот, за сите граѓани коишто ќе одбијат да се попишат, сигурно е дека ќе се применат мерките и ќе има пријави. Меѓутоа, јас очекувам дека како што помина вчерашниот ден во една одлична атмосфера, атмосфера на граѓанска одговорност дека и понатаму ќе продолжиме и пописот ќе заврши успешно и после 20 години ќе можеме да имаме детално податоците кои ни се потребни за развој на државата, изјави Спасовски. Министерот ги повика граѓаните да се вклучат во процесот, да се попишат сите семејства, сите објекти, за, како што нагласи тој, да се добие реална слика и за потребите и за капацитетите со кои располага државата. Според директорот на ДЗС Апостол Симовски, населението масовно го прифаќа пописот и нема одбивање, а само мал број луѓе ги одбиле попишувачите. – Мислам дека овој процес ќе биде успешно завршен на крајот и сите ќе се радуваме на крајот на септември и дека сме го завршиле овој процес после цели 20 години. Многу малку инцидентни случаи, кои што се занемаралив број и таму првично што ќе направиме е да поразговараме со овие луѓе да им објасниме што е целта на пописот и очекуваме дека нема да има проблем. Не би сакале во моментот попишувачот да го ставиме во таква ситуација, таму ќе отидат нашите државни инструктори да им објаснат малку подобро и веруваме дека нема да има проблем и во тој дел. Сега за сега се многу малку инциденти случаи и малку на број, рече Симовски. Досега, додаде тој, нема ниту информација дека било кој од домаќинствата побарал посебни протоколи и било што друго. -Она што знам дека сите наши попишувачи се обврзани и строго ги применуваат мерките кои се за заштита на населението. Ние мораме да водиме сметка за нашите граѓани и водиме сметка за себе бидејќи и ние сме луѓе. И апсолутно тука нема пардон за никого. Сите до еден мора да ги почитуваме овие мерки. Ако било кој од попишувачите имал проблеми здравствени или имал во моментот не може да биде дел од овој процес бидејќи мора да биде во изолација. Ние процесот ни тече, не може да чекаме излегување од изолација, таков проблем немаме во моментот. А во однос на бројот на попишувачи ќе го решиме брзо, тој е решен од администрацијата. Ќе треба следниве два три дена да направиме обука на овие луѓе, не може да ги пуштиме на терен без обука. Така што ќе се вклучат многу брзо во тој процес и нема да има непокриен дел, изјави Симовски. Европска комисија Европската комисија ги охрабри сите во Северна Македонија да учествуваат во процесот на попишување на населението и додаде дека пописот е дел од процесот за пристапување во ЕУ, јави дописничката на МИА од Брисел. Во коментар за МИА, портпаролката на Европската комисија, Ана Писонеро, рече дека во Брисел постои задоволство што пописот е во тек во Северна Македонија. -Ова е важна вежба. Точни податоци за бројот и карактеристиките на населението се суштински за спроведување на соодветни социјални, демографски и економски политики за добробитта на сите граѓани, изјави Писонеро за МИА. Таа истакна дека Европската Унија очекува од властите во Северна Македонија пописот да се одвива согласно стандардите и регулативите на ЕУ, како дел од пристапниот процес за ЕУ. -Сметаме на сите делови од општество позитивно да придонесат кон операцијата на попишување на инклузивен и конструктивен начин, рече Писонеро. Земјата е поделена на 50 пописни реони, а за подготовка, организација и спроведување е задолжен Државниот завод за статистика. Во организацијата и спроведувањето на Пописот учествуваат и Советот за статистика, комисиите за пописните реони, државните инструктори, реонските инструктори, реонските попишувачи и други учесници согласно одредбите од Законот за Попис на населението, домаќинствата и становите во Република Северна Македонија, 2021. На првиот ден од пописот, во неделата, вкупно биле попишани 94.975 лица, 28.594 домаќинства и 37.544 станови, информираат од Државниот завод за статистика. Можноста за самопопишување на лица во странство досега ја искористиле – 191.550 лица. Пописот на населението, домаќинствата и становите во Република Северна Македонија, кој официјално започна завчера ќе трае до 30 септември.

Последен ден за пријавување за реонски попишувачи

Ивона Петрова — Wed, 25 Aug 2021 05:17:04 +0000

Јавниот конкурс за ангажирање реонски попишувачи и инструктори за претстојниот Попис на населението, домаќинствата и становите трае уште денеска. Сите заинтересирани кандидати за реонски попишувачи можат да се пријават на онлајн апликацијата достапна на www.stat.gov.mk и popis2021.stat.gov.mk. Конкурсот беше отворен на 20 јули, но потоа беше продолжен до 25 август. Државниот завод за статистика, информира дека ќе биде организирано дополнително тестирање на досега пријавените кандидати, додека списоците на досега пријавените кандидати и информациите за времето и местото на тестирање се објавени во комисиите на пописните реони. Контактите со овие комисии и дополнителни информации поврзани со тестирањето се достапни на линкот: https://popis2021.stat.gov.mk/PopisniReoni.aspx Пописот на населението, домаќинствата и становите во Република Северна Македонија ќе се одржи од 5 септември до 30 септември 2021 година. Во меѓувреме продолжува електронското самопопишување на државјаните на Република Северна Македонија кои се на привремена работа или престој во странство. Самопопишувањето на македонските државјани во странство ќе трае до 30 септември, кога завршува Пописот на Пописот на населението, домаќинствата и становите.

Конкурсот за реонски попишувачи отворен до 25 август

Дарко Андоновски — Fri, 20 Aug 2021 08:10:07 +0000

Сите заинтересирани кандидати за реонски попишувачи можат да се пријават на онлајн апликацијата достапна на www.stat.gov.mk и popis2021.stat.gov.mk до 25 август. Бидејќи тестирањето на досега пријавените кандидати ќе се спроведе на 19 и 20 август, за сите пријавени кандидати во периодот од денес (18.08.2021) до 25 август, ќе биде организирано дополнително тестирање, соопшти Државниот завод за статистика. Списоците на досега пријавените кандидати и информациите за времето и местото на тестирање се објавени во комисиите на пописните реони. Контактите со овие комисии и дополнителни информации поврзани со тестирањето се достапни на линкот: https://popis2021.stat.gov.mk/PopisniReoni.aspx

Симовски за Курир: Нема доволно пријавени попишувачи, рокот за пријавување најверојатно повторно ќе биде продолжен

Ивона Петрова — Tue, 17 Aug 2021 08:30:12 +0000

Се уште нема доволен број пријавени попишувачи за претстојниот попис на населението, вели во изјава за Курир директорот на Државниот завод за статистика Апостол Симовски. Денес е последниот ден за пријавување на јавниот конкурс за ангажирање реонски попишувачи и инструктори за пописот. Конкурсот беше отворен на 20 јули и првично требаше да трае до 5 август, но беше продолжен до 12 август и потоа уште еднаш до 17 август. Симовски за Курир вели дека во некои реони одзивот е добар, но во некои не е задоволителен. Посочува дека е исполнет бројот за инструктори, но не и попишувачи. -Најверојатно денеска или утре ќе го продолжиме рокот за пријавување на попишувачи за уште една недела. Не сме задоволни од досегашниот одзив. Очекуваме во следните два дена позначаен одзив за пријавување. Ситуацијата е иста како и претходно, повторно најслаб е одзивот во скопските општини, Струмица, Ново село и реоните со албанско мнозинско население, вели Симовски за Курир. ДЗС има начин за решавање на ваквата ситуација доколку ни по овој продолжен јавен оглас, кој Симовски најавува дека најверојатно ќе биде објавен, не се пријават доволен број попишувачи. Во таков случај, извесно е дека на пријавените попишувачи, онаму каде има потреба ќе им биде доделен уште еден пописен реон. Од утре пак, започнува тестирањето на оние кои досега се пријавиле за попишувачи и инструктори. Симовски вели дека ДЗС работи и на тековните административни процедури поврзани со одржувањето на пописот. Пописот на населението, домаќинствата и становите во Македонија ќе се одржи од 5 септември до 30 септември 2021 година. Во меѓувреме продолжува електронското самопопишување на државјаните на Македонија кои се на привремена работа или престој во странство. Самопопишувањето на македонските државјани во странство ќе трае до 30 септември, кога завршува Пописот на Пописот на населението, домаќинствата и становите.

Последен ден од продолжениот рок за пријавување за реонски попишувачи и инструктори

Ивона Петрова — Tue, 17 Aug 2021 05:22:50 +0000

Јавниот конкурс за ангажирање реонски попишувачи и инструктори за претстојниот Попис на населението, домаќинствата и становите завршува денеска. Конкурсот беше отворен на 20 јули и првично требаше да трае до 5 август, но беше продолжен до 12 август и потоа уште еднаш до 17 август. Државниот завод за статистика ги повикуваат сите заинтересирани да се пријават на електронската апликација на следните линкови: www.stat.gov.mk и https://popis2021.stat.gov.mk Заинтересираните кандидати кои ќе достават електронска пријава, потребните документи ги доставуваат исклучиво во хартиена форма по пошта до Државниот завод за статистика, ул. „Даме Груев“ бр.4 во Скопје, п.фах 506, најдоцна до 19 август 2021 година или на денот на закажаното тестирање во просториите каде што ќе се спроведе тестирањето. Пописот на населението, домаќинствата и становите во Македонија ќе се одржи од 5 септември до 30 септември 2021 година. Во меѓувреме продолжува електронското самопопишување на државјаните на Република Северна Македонија кои се на привремена работа или престој во странство. Самопопишувањето на македонските државјани во странство ќе трае до 30 септември, кога завршува Пописот на Пописот на населението, домаќинствата и становите

ДЗС на 20 јули ќе објави конкурс за избор на реонски попишувачи и инструктори за претстојниот попис

Ивона Петрова — Wed, 14 Jul 2021 10:02:02 +0000

Конкурсот за избор на реонски попишувачи и инструктори за претстојниот попис на населението, домаќинствата и становите во Република Северна Македонија, 2021, ќе биде објавен на 20 јули и ќе трае до 5 август, информираа денеска од Државниот завод за статистика. Државниот завод за статистика ги интензивира организациските подготовки за претстојниот Попис 2021 кој ќе се спроведе од 5 до 30 септември. – Со цел навремено да се изберат потребните реонски попишувачи и инструктори и да се остави доволно време за нивна обука, ДЗС го објавува Конкурсот со кој ќе се бараат 5 055 реонски попишувачи и 508 реонски инструктори за 50-те пописни реони. Условите се: кандидатите да се полнолетни државјани на Република Северна Македонија, да не се вработени, да имаат завршено најмалку средно образование и да поседуваат компјутерски вештини. Пријавувањето ќе се врши преку веб-апликацијата која ќе биде поставена нa веб-страницата Popis2021.stat.gov.mk, a документите ќе се доставуваат по пошта до Државниот завод за статистика, или кандидатите ќе можат да ги донесат на денот на закажаното тестирање во комисиите на пописните реони, се вели во соопштението од ДЗС. Од ДЗС ги повикуваат сите заинтересирани кои ги исполнуваат условите, да се пријават на конкурсот и да дадат свој придонес во успешното спроведување на оваа најголема статистичка акција.

За власта не е важно што има заразени попишувачи, ВМРО-ДПМНЕ останува на зборот- пописот треба да се одложи за да се заштитат граѓаните

Катерина Бојаџиева — Fri, 26 Mar 2021 14:25:25 +0000

Власта и понатаму продолжува по секоја цена да го турка пописот. Иако бројот на заразени и починати од КОВИД-19 се од ден на ден расте, за власта тоа не е ни најмалку важно. Директорот на Државниот завод, Апостол Симовски во своето гостување во емисијата „Само вистина“ кој зборуваше за тоа како се одвива пописот посочи дека имало четворица попишувачи кои се заразени од вирусот. - Има четворица не се пет заразени инструктори за попишување, заразени од своите сопружници, но не се заразени од ДЗС, кажа Симовски во своето гостување. -Ова е уште еден доказ дека пописот доведува до загрозување на здравјето на граѓаните и најдобро е пописот да се одложи за некои подобри времиња кога ќе се надмине и ситуацијата со корона. За ова и многу пати до сега апелираше и опозицијата, а вчера тоа го потенцираше и лидерот на ВМРО-ДПМНЕ, Христијан Мицкоски. -Околу пораките ВМРО-ДПМНЕ има јасна порака, а тоа е дека пописот во ваква епидемиолошка состојба треба да се одложи и јас пишав едно отворено писмо и дадов предлог во мојот предлог ќе го повторам уште еднаш пред македонската јавност е содржано следново: пописот веднаш да се одложи бидејќи ова што станува збор за дијаспората е евиденција не е попис. Попис се знае се прави на резидентно население или население кое што изминатите 12 месеци не ја одјавило адресата од Македонија. Ова е евиденција на дијаспората што не мораше да го прават, од бројот на издадени македонски државјанства ќе го одземевме бројот на резидентно население ќе ја добиевме дијаспората, рече тој. Според Мицкоски најпотребно е прво да се имунизираат попишувачите, а како што рече тоа е процес кој ќе трае околу месец, месец и половина, а пописот да се спроведи на есен, барајќи донација на 5.000, 6.000 вакцини од меѓународната заедница бидејќи како што укажа власта е неспособна да ги набави. -ВМРО-ДПМНЕ има јасна позиција и вели пописот треба да се одложи, таму некаде на есен, втора половина на септември, ако е потребно да ги одложиме локалните избори за еден месец не менува ништо и во меѓувреме да ги имунизираме попишувачите за да може граѓаните да се чувствуваат комотни кога разговараат со нив дека не може да бидат преносители на оваа ужасна зараза која јас и моето семејство на своја кожа ја почувствувавме, рече Мицкоски.

Директорот на ДЗС потврди дека четири инструктори се заразени, дали истите обучувале стотици попишувачи?

Магдалена Андонова — Thu, 25 Mar 2021 19:40:07 +0000

По обвинувањата од страна екс пратеникот Илија Димовски дека има веќе заразено попишувачи, Апостол Симовски директорот на ДЗС вечерва во Канал 5 телевизија призна дека четворица се заразени. - Има четворица не се пет заразени инструктори за попишување, заразени од своите сопружници, но не се заразени од ДЗС, вели Симовски. Имено на почетокот во емисијата на прашањето дали има правна основа за кривично казнување, Симовски истакна дека не знае дали имало правна основа тоа ќе го толкуваат правниците, тој не бил правник, ниту сакал да толкува закони во тој дел, но истакна дека повикувањето на бојкот е непатриотски чин.