поројни дождови – Kurir.mk

ВНИМАВАЈТЕ КАДЕ СЕ ДВИЖИТЕ, ДОАЃА ПОТОП ВО МАКЕДОНИЈА – УХМР со предупредување за сите почнувајќи од вечерва!

Дарко Андоновски — Thu, 19 Jan 2023 15:16:04 +0000

Во попладневните и во ноќните часови ќе има врнежи од дожд, кои на места ќе бидат поројни така што локално се очекуваат над 30 литри на метар квадратен дожд, информира Управата за хидрометеоролошки работи (УХМР). Во повеќе делови од земјата, како резултат на врнежите во изминатиот период и топењето на снегот, земјата е заситена со влага и се очекува брза реакција на помалите реки и суводилици низ земјава каде на места се можни локални излевања, со посебно внимание на југоисточните делови и Струмичкиот регион. Од УХМР посочуваат дека и кај поголемите реки се очекува зголемување на водостојот, а пред се на водотеците во западниот дел на земјата каде во сливот на релите Радика, Сатеска, Треска и горниот дел од сливот на Вардар се очекуваат значително високи водостои. Поради можноста од појава на поројни, интензивни врнежи, придружувани со засилен јужен ветер, можни се локални проблеми кај дел од градските урбани населени места каде би се појавиле ваков тип на врнежи. Од Центарот за управување со кризи (ЦУК) предупредуваат на претпазливо движење покрај реките и суводолиците во текот на денешниот и утрешниот ден.

Дваесет лица се спасени со хеликоптер од поројниот дожд во Карлово, централна Бугарија

Ивана Ефремовски — Fri, 02 Sep 2022 17:09:19 +0000

Околу 20 лица се спасени со хеликоптер „Кугар“ од најтешко погоденото село Богдан по силниот дожд во централниот дел на Бугарија во Рајна кај Карлово, јави дописникот на МИА од Софија. Нема загинати и повредени во катастрофата по обилните дождови во селата карловските села, изјави регионалниот гувернер на Пловдив Ангел Стоев, но уништени се три куќи и продавница во селото Слатина, една куќа во селото Богдан и неколку делумно уништени куќи во село Каравелово. Сто војници од бугарската армија се во областа за да им помогнат на повредените, коментира началникот на одбраната адмирал Емил Ефтимов, додавајќи оти хеликоптерот ќе ги надлетува најкритичните точки додека да падне мрак. Се очекува воениот хеликоптер да достави храна и вода до селото Богдан, кое и понатаму е отсечено. Спасувачките операции продолжуваат за евакуација на луѓето од поплавените подрачја каде повторно врне дожд. Областа ја посети и в.д. министер за регионален развој и јавни работи, Иван Шишков. Тој извести дека паднале четири мостови на реките Стријама и Татладере, кои се општински. Шишков истакна дека е испратена опрема од Агенцијата за патна инфраструктура, но веќе има посериозна опрема од бугарската армија. И во Софија во попладневните часови имаше обилни врнежи од дожд, но не е направена штета. (МИА)

Поради поројни дождови евакуирани над 11.000 Бразилци

Магдалена Андонова — Sun, 26 Dec 2021 09:11:16 +0000

Повеќе од 11.000 луѓе мораа да ги напуштат своите домови, а 4.200 мораа да бидат згрижени од властите поради поплавите во 19 општини во североисточната бразилска држава Бахиа, соопштија локалните власти. Поројните дождови во областа од почетокот на ноември веќе однесоа 17 животи, од кои последното лице почина во четвртокот, покажуваат податоците на Цивилната заштита на државата Бахиа. Вкупно околу 66 општини се во вонредна состојба поради лошите временски услови, соопштија надлежните. Бројот на евакуирани достигна 11.260, додека властите директно згрижија 4.185 лица, покажуваат податоците што ги објави Цивилната заштита. Претставници на бразилската федерална влада и на државата Бахиа започнаа операција за спасување на жители заглавени во поплавените подрачја.

Поплавени дворови и куќи во Облешево

Магдалена Андонова — Mon, 11 Jan 2021 14:46:59 +0000

Обилните врнежи од дожд и неисчистените канали повторно на виделина ги извадија проблемите на жителите на општина Чешиново-Облешево. Попавени дворовите и фарми ваква е денешната слика по неколкудневното врнење. Мештаните вината освен во природата ја бараат и во сопствената, но и во неодговорноста на надлежните. ПО втор пат малата фарма на 75годишниот Стојан Блажев од Облешево е под вода, пренесува АЛФА. „Да ги чистеа редовно каналите, немаше да дојде до поплава.Надојдената вода преку каналот ќе отидеше право во Злетовица„-вели 75 годишниот Стојан Блажев . Целосната објава може да ја погледнете на АЛФА.

УХМР: Од утре локални поројни дождови

Ивана Ефремовски — Fri, 25 Sep 2020 11:53:49 +0000

Во текот на наредните неколку дена, а особено утре, како резултат на циклонска активност, се очекуваат локални поројни врнежи од дожд, на места доста интензивни со над 30 литри на квадратен метар, во вид на невреме и проследени со засилен ветер, информира Управата за хидрометеоролошки работи (УХМР). -Ваквите процеси можат да предизвикаат појави на течење и слевање вода низ градските улици поради неможноста за одведување на водата во толку краток временски интервал. Исто така, поради очекуваниот интензивен дожд локално на некои места, можно е брзо зголемување на водостојот на помалите реки и суводолиците, покрај кои посочуваме за внимателно движење, велат од УХМР. За поголемите реки, додаваат, не постои опасност од нивно излевање.

Поројни дождови во 12 окрузи во Романија

Дарко Андоновски — Thu, 16 May 2019 14:09:46 +0000

Романската Национална метеоролошка служба издаде жолт метео аларм и предупредување за обилни врнежи од дожд во 12 окрузи, како и предупредување на зголемување на водостојот во остатокот од државата. Метеоролозите предупредуваат на обилни врнежи, бури, силен ветер и град. Во најголем дел од државата се очекува нестабилно време, кое ќе донесе поројни дождови. Стабилизирање на времето најавуваат од недела.

Поројни дождови во Кувајт ја запреа работата на државните институции

Дарко Андоновски — Tue, 06 Nov 2018 11:44:52 +0000

Сите државни институции во Кувајт денеска не работат поради поројните дождови кои синоќа го погодија емиратот. – Се прекинува работата на сите министерства и државни институции поради лошите временски услови. Ги повикуваме граѓаните да останат дома, соопшти на Твитер кувајтското Министерство за надворешни работи. Според метеоролошката служба во Кувајт, минатата ноќ во емиратот паднале 58 милилитри врнежи и брзината на ветрот достигнала 30 метри во секунда. Невремето го парализира автомобилскиот сообраќај во голем број области и поплави станбени згради, но никој не е повреден. Според државната агенција КУНА, поради лошото време денеска ќе биде затворена и кувајтската берза. Главната управа за цивилно воздухопловство соопшти дека невремето не влијаело врз воздушниот сообраќај и нема откажани или одложени летови.