портпарол – Kurir.mk

Поранешниот портпарол на Путин именуван за генерален директор на ТАСС

Тале Кристо — Wed, 05 Jul 2023 12:26:30 +0000

Поранешниот портпарол на Владимир Путин во предизборната кампања е именуван за генерален директор на руската државна новинска агенција ТАСС. Во соопштението се наведува дека Кремљ го назначил Андреј Кондрашов за генерален директор на ТАСС. Претходниот генерален директор Сергеј Михаилов денеска ја напушти функцијата. Според едни информации Михаилов добил отказ, додека според други дека доброволно дал оставка. Михајлов беше директор на ТАСС од 2012 година. Кремљ ја зајакна контролата врз медиумите од почетокот на војната во Украина, а голем број независни весници мораа да бидат затворени, а нивните новинари да бидат етикетирани како „странски агенти“.

Прајс: Русија е управувана од една личност

Тале Кристо — Wed, 14 Sep 2022 12:48:13 +0000

Портпаролот на Стејт департментот, Нед Прајс синоќа изјавија дека Русија е управувана од една личност и неколку нејзини послушници кои дејствуваат издвоено од јавното мнение во земјата, и дека не се дозволува транспарентна дискусија во јавноста за неуспесите на Москва во нејзината војна во Украина. – За жал, тоа е систем со кој фактички управува една личност. Индивидуа која не е опкружена со демократски избрани помошници туку со луѓе кои поставиле заштита од јавното мислење и таа заштита се однесува и на луѓето од најтесниот круг во Кремљ, истакна Прајс. Според него, САД се сведоци на тоа дека руската Влада прави огромни напори да ги ограничи и регресира противниците на војната. – Во првите денови од војната десетици илјади луѓе беа задржани во мирни протести, на демонстрации во десетици руски градови. Потоа видовме како новинари, заштитници на граѓанското општество и други активисти се апсат за така нареченото злосторство да се каже вистината. Дали кога тоа го опишуваат како војна или е тоа критика за претседателот Путин или критика за Кремљ.

Портпаролот на Пентагон, Џон Кирби, преминува на повисока должност во Белата куќа

Магдалена Андонова — Sat, 21 May 2022 08:14:04 +0000

Портпаролот на Пентагон, Џон Кирби, во иднина ќе ги координира стратешките комуникации во Националниот совет за безбедност на Белата куќа, јавија британските меидуми, повикувајќи се на канцеларијата на американскиот претседател. „Во тоа својство, Кирби ќе ги координира меѓуресорските напори за појаснување на американската политика и ќе биде важен владин глас за прашањата во оваа област, вклучително и одржување прес-конференции во Белата куќа“, се наведува во соопштението. Кирби, кој стана заштитно лице на брифинзите во американското Министерство за одбрана, особено за време на руската инвазија на Украина, претходно работеше во Стејт департментот. (МИА)

Руските војници се повлекуваат од Киев и подготвуваат за нова офанзива на исток, вели портпаролот на Зеленски

Магдалена Андонова — Sun, 03 Apr 2022 13:14:37 +0000

Портпаролот на украинскиот претседател Володимир Зеленски, Сергеј Никифоров, денеска повтори дека руските војници го напуштиле регионот на Киев и рече дека Москва ги повлекува своите сили во Белорусија, како и дека се подготвува за нова офанзива во источна Украина. - Тие се повлекуваат од север и ги концентрираат своите напори да нападнат на исток, да ја опколат нашата војска во Донбас, изјави портпаролот Никифоров за Би-Би-Си. Претходно Никифоров изјави дека властите во Украина пронашле нешто што „изгледа на воени злосторства“, вклучително и тела на цивили и масовни гробници, по повлекувањето на Русите од областа каде што се воделе борбите. Тој за Би-Би-Си изјави дека сцените откриени на делумно окупираните територии, како што е градот Буча, се „навистина тешки да се опишат“. (МИА)

Ангела Меркел во тага – почина личноста која беше до неа секој работен ден (ФОТО)

Дарко Андоновски — Thu, 17 Feb 2022 09:38:25 +0000

Портпаролката на владата на поранешната канцеларка Ангела Меркел, Мартина Фиц, почина по тешко боледување, соопшти германската влада. Фиц на 29 октомври последен пат седна до Меркел, на последната прес-конференција на поранешната канцеларка. Портпаролот на германската влада Стивен Хебестрајт изјави дека Фиц починалa по кратко, тешко боледување. Според „Т-Онлајн“, Фиц ималa рак. Пред да се приклучи на информативната служба на германската влада, Фиц работелa за неколку германски медиуми, вклучувајќи ја и групата Аксел Спрингер. Таа се приклучи на тимот на владини портпароли во април 2018 година како заменик на главниот портпарол на Меркел, Стефан Сајберт.

Во Минск уапсен портпаролот на „А1“

Тале Кристо — Sat, 11 Dec 2021 15:00:11 +0000

Портпаролот на телекомуникацискиот оператор „А1“ во Белорусија, Никлај Бределев е уапсен, поради што Телеком Австрија и Министерството за надворешни работи во Виена реагираа со голема загриженост. Според Телеком Австрија, кој е сопственик на „А1“ во Белорусија, нивниот тамошен портпарол е уапсен под обвинение за ширење незгодни информации за компанијата. – Покрај тоа, објавено е и понижувачко видео со лични податоци за неговиот приватен живот, соопшти концернот во Виена. Групацијата А1 Телеком Австрија жестоко го осуди мешањето во приватната сфера на своите вработени. – А1 Белорусија има строги правила и процедури за спречување на нелегални прекршувања на безбедноста на податоците и ги истражува сите сомнежи. Ќе ги искористиме сите расположливи средства преку правни и дипломатски средства за да ги поддржиме нашите вработени во таа земја и да ги заштитиме, се наведува во соопштението. Австриското Министерство за надворешни работи изрази длабока загриженост поради апсењето на портпаролот на „А1“ во Белорусија. – Ги осудуваме понижувачките постапки на белоруските власти. Основните права и правото на слобода на сите луѓе мора секогаш да бидат гарантирани, се вели во соопштението.

Бајден ќе ја именува Џен Псаки за портпарол на Белата куќа

Ивона Петрова — Mon, 30 Nov 2020 06:42:46 +0000

Новоизбраниот американски претседател Џозеф Бајден планира да ја назначи Џен Псаки за портпарол на Белата куќа во неговата нова администрација, се наведува во соопштението објавено на официјалната веб-страница на демократот. Псаки беше официјален претставник на Белата куќа и Стејт департментот во администрацијата на 44-от претседател на САД, Барак Обама. Таа сега е советник во преодниот тим на Бајден. Бајден најави дека ќе ја назначи Кејт Бедингфилд за директор за комуникации во Белата куќа. Таа беше заменик-директор на кампањата на демократот, но, исто така, и директор за комуникации во главниот штаб. Шефот за комуникации во Белата куќа ја контролира целата политика на јавна комуникација на американската администрација. – Горд сум што објавувам дека првпат клучниот тим за односи со медиумите во Белата куќа ќе се состои единствено од жени, истакна новоизбраниот претседател. Карин Жан-Пјер ќе биде првиот заменик-портпарол на Белата куќа. Идната потпретседателка на САД Камала Харис официјално ќе биде претставувана од Симон Сандерс и Ешли Етјен. Претходно, Сандерс и Жан-Пјер беа високи советници во кампањата на Бајден. Првата дама на САД, Џил Бајден ќе ги контролира односите со новинарите заедно со Елизабет Александар.

Владата именуваше нов портпарол

Ивона Петрова — Tue, 13 Oct 2020 11:09:03 +0000

На денешната седница Владата го именуваше Душко Арсовски за портпарол на Владата на Република Македонија. Покрај Арсовски, активен портпарол на Владата останува и Муамет Хоџа. Душко Арсовски е новинар со дводецениско работно искуство. Од 2012 година е уредник за надворешна политика во МРТ, уредник на централниот дневник и во еден период заменик главен уредник на Информативната програма. Претходно работел како новинар/продуцент и шеф на дописништвото на „Би-Би-Си“ на македонски во Скопје. Две години бил уредник и водител на вестите на „ТВ Алфа“ како дел од тимот којшто ја основаше телевизијата. Кариерата ја започнал во „Македонското радио“, во програмата за деца, во 1998 година. Подоцна преминал во скопската телевизија „Скај Нет“ и во „Македонската телевизија“ каде работел како новинар за надворешна политика, а подоцна и уредник на Дневникот. Дипломирал интердисциплинарни студии по новинарство на Универзитетот „Св.Кирил и Методиј“ во Скопје во 2001. Во 2017 година станува магистер на „Меѓународни односи - разрешување конфликти“ на Филозофскиот факултет при УКИМ во рамките на ТЕМПУС програмата. Во академската 2003/2004 бил на стручно доусовршување, во областа на новинарството на Државниот универзитет на Ново Мексико, САД, со стипендија од Стејт Департментот. Добитник е на наградата на Делегацијата на Европската Унија во Македонија - „Прашање на годината“ во 2005 година, за известувањето од ЕУ самитот во Брисел на кој Република Македонија доби статус земја - кандидат за членство во Унијата. Во 2006 година добил сертификат од Делегацијата на ЕУ во Македонија за „Специјални достигнувања во известување за прашања поврзани со ЕУ“. Од 2006 до 2010 година бил член на Извршниот одбор на Здружението на новинарите на Македонија. Душко Арсовски е роден во 1977 година во Куманово. Активно зборува англиски, бугарски и српски јазик и со основно познавање на грчки и на шпански јазик.

Стоиловски: Заеви соочени со пораз, купуваат куќа на грчкиот брег, а во Бугарија ги селат фирмите

Тале Кристо — Sun, 12 Jul 2020 10:26:48 +0000

Портпаролот на ВМРО-ДПМНЕ, Наум Стоиловски денеска на прес конференција кажа дека Зоран Заев нема одговор за селењето на бизнисите на кланот Заеви во Бугарија! Заеви веќе имаат отворено најмалку пет компании во Петрич, Благоевград, на иста адреса, а две од нив се основани откако во јавноста почна да зборува за масовното рекетирање. Зоран Заев и неговите братучеди го вадат капиталот од Македонија и купуваат имоти во соседните Бугарија и Грција, истакна Стоилковски. Заев и неговиот клан соочени со изборниот пораз, но и со најавата дека секој што се занимавал со политика ќе мора да го докаже потеклото на сопствениот капитал и потеклото на капиталот на неговото семејство, го вадат капиталот на кланот Заеви надвор од Македонија! „Зоран Заев мора да одговори дали со братучедите, а соочени со изборниот пораз се подготвуваат за бегство од Македонија! Отвораат фирми во Бугарија, но и купуваат куќи и имоти во Грција! Бобан Заев, братучедот на Зоран и Вице Заеви, купил нова голема куќа на грчкиот брег“!, соопшти Стоиловски. Ова е еден фрагмент од договорот за куќа на грчкиот брег, ова е потписот на Бобан Заев кој што стои на третата страна од целиот договор! „Зоран Заев мора да каже дали позади купувањето имоти на грчките плажи и префрлањето на бизнисите во Бугарија, зад потписите на неговите братучеди, стои лично тој, Зоран Заев“? праша портпаролот на ВМРО-ДПМНЕ. Дали планира бегство од Македонија? Дали планира сокривање на својот капитал и дали планира сокривање на потеклото на тој имот, согласно најавите од ВМРО-ДПМНЕ по изборната победа? Наум Стоиловски наведе и дека : Заеви во Бугарија веќе имаат најмалку 5 компании „Ориент Груп“, „Гомасидра“, „Радиша Трејд“, а по отворањето на скандалот „Рекет“ во јавноста, Заеви ги отвораат „Медикал 420 БГ“ и „Фарма ЕУ БГ“. Двете последни со потписи на братучедите на Заеви, на иста адреса како и претходните, во Петрич, соседна Бугарија. Двете последни фирми, се јавуваат како сопственици на најмалку две фирми во Македонија, а во другите фирми се јавуваат како малцински акционери. Зоран Заев до сега не одговори ниту еднаш на прозивките дали е во состојба да го докаже потеклото на сопствениот капитал и потеклото на капиталот на неговото семејство. ВМРО-ДПМНЕ во програмата „За обнова на Македонија“ се обврзува на еден од основни носечки проекти во делот на борбата против криминалот и корупцијата, а тоа е усвојување на Закон со кој што ќе се испита потеклото на капитал на сите луѓе кои што се занимавале со јавниот живот во изминатите 30 години. „Македонија повеќе не може да издржи компромиси со криминалот и корупцијата, а СДСМ со Заев покажа дека можат само повеќе криминал, повеќе корупција, повеќе порази и повеќе срам! Исправи се Македонијо, одбери Обнова“, порача Стоиловски.

Ѓорѓиевски: Нека му каже некој на Филипче дека е министер за здравство, а не портпарол на партија а најмалку на Заев

Тале Кристо — Sat, 04 Apr 2020 09:27:17 +0000

Политиканството на Филипче на најјако. Човекот наместо да се грижи за тоа што состојбите му излегуваат од контрола, се впрегна да се докажува колку тестови има за корона. Виде шанса за политика и се впрегна во политичко докажување. Нека му каже некој дека е министер за здравство, а не портпарол на партија а најмалку на Заев, реагира членот на ИК на ВМРО-ДПМНЕ Орце Ѓорѓиевски.