посета – Kurir.mk

Амбасадорката на САД во посета на Врховниот суд

Тале Кристо — Wed, 25 Oct 2023 12:28:01 +0000

Претседателката на Врховниот суд на Република Северна Македонија, Беса Адеми, оствари средба со амбасадорката на САД во Република Северна Македонија, Ангела Агелер. На средбата на која присуствуваа и судиите на Врховниот суд на Република Северна Македонија се говореше за повеќе прашања кои се однесуваат на независноста и самостојноста на судството. Во таа насока, на средбата беше истакнато дека независноста на судството е најсилната гаранција за владеењето на правото и дека интегритетот на судиите претставува клучен фактор за остварување на принципите на независното судство. Судството не смее да биде под притисок на политиката и не треба да се дозволи мешање на другите власти во донесувањето на судските одлуки кои мора да се засновани на законите. Потребно е да се почитува уставното начело на поделба на власта, а судиите да бидат ослободени од какви било влијанија. Суштинска улога за независноста на судството има и транспарентноста како еден од најважните фактори за јавната перцепција и доверба. Од големо значење е и доследната примена на европските стандарди и почитувањето на правните вредности. Амбасадорката на САД во Република Северна Македонија, Ангела Агелер, истакна дека потребно е да се даде силна поддршка на ваквите заложби за независно и транспарентно судство и дека активностите на Врховниот суд во таа насока даваат клучен придонес во реформскиот процес. ...

Генерал Ѓурчиновски во официјална посета на Вооружените сили на Србија

Тале Кристо — Fri, 06 Oct 2023 06:54:07 +0000

Началникот на Генералштабот на Армијата, генерал-потполковник Васко Ѓурчиновски по учеството на состанокот на иницијативата DECI во Република Хрватска, како дел од планираните билатерални армиски активности, денеска е во официјална посета на Вооружените сили на Србија. Генерал Ѓурчиновски во текот на денешниот ден ќе го посети Генералштабот на Војската на Србија каде ќе има средба со неговиот српски колега, генерал Милан Мојсиловиќ. Ќе се разговара за регионалните иницијативи како платформи за зајакнување и одржување на стабилноста и безбедноста на регионот како приоритетно значење, кое се постигнува со отворен дијалог и добрососедски односи. Република Северна Македонија и Србија учествуваат во регионалните иницијативи СЕДМ, Балканските медицински сили, иницијативата Б-9 на началниците на Генералштабови и Центарот за безбедносна соработка – РАКВИАК, кои се од заеднички интерес за земјите и преку кои се унапредува билатералната соработка и регионалната безбедност, соопшти ГШ на АРСМ.

Муцунски, Ѓорѓиевски и Коњановски се во посета на САД каде што учествуваат во програмата за меѓународни лидери на Владата на САД

Ристе Здравков — Mon, 11 Sep 2023 09:57:28 +0000

Потпретседателот на ВМРО-ДПМНЕ и Градоначалник на Општина Аеродром, Тимчо Муцунски, Претседателот на ЗЕЛС и Градоначалник на Општина Кисела Вода, Орце Ѓорѓиевски и Градоначалникот на Општина Битола Тони Коњановски се во повеќедневна посета на САД, соопштија од ВМРО-ДПМНЕ. -На покана на Амбасадата на САД во Македонија и Американскиот Стејт Департмент Муцунски, Ѓорѓиевски и Коњановски учествуваат во програмата за меѓународни лидери на Владата на САД. Во рамките на нивната посета тие остварија повеќе средби со високи претставници на Стејт Департмент, бизнис заедницата како и тинк-тенк организации во Вашингтон. Клучна тема во нивните разговори беше потребата од засилена борба против корупцијата во Македонија. Во следните денови тие ќе ги посетат градовите Питсбург и Феникс каде со свои соговорници од локалната власт во овие градови ќе дискутираат за создавањето на добри практики во работата на локалната самоуправа, се вели во партиското соопштение на ВМРО-ДПМНЕ.

Началникот на Генералштабот на Армијата во работна посета на САД

Тале Кристо — Mon, 05 Jun 2023 06:43:33 +0000

Началникот на Генералштабот на Армијата, генерал-потполковник Васко Ѓурчиновски, од денеска ќе престојува во повеќедневната работна посета на Соединетите Американски Држави. За време на престојот во САД, генералот Ѓурчиновски ќе го посети Пентагон, каде што ќе оствари средби со највисоки воени раководители, по што во Вермонт ќе присуствува на церемонија за одбележување на јубилејните 30 години, од воспоставување на програмата за соработка со Националната гарда на Вермонт. Исто така, ќе го посети Детроит каде се седиштата на фирмите кои се производители на оклопните возила од типот „Страјкер“ и „ЏЛТВ“ со кои согласно долгорочниот план за развој на одбранбените способности се опремува македонската армија, соопшти ГШ на Армијата.

Началникот на штабот на ВК на сојузничките сили на НАТО за Европа во посета на Република Македонија

Тале Кристо — Fri, 26 May 2023 05:43:12 +0000

Началникот на штабот на Врховната команда на сојузничките сили на НАТО за операции, адмирал Јоаким Риле, од денеска ќе престојува во дводневна посета на Армијата на Република Северна Македонија. Адмиралот Риле денеска во Министерството за одбрана и Генералштабот на Армијата ќе оствари средби со началникот на Генералштабот на Армијата, генерал-потполковник Васко Ѓурчиновски и со министерката за одбрана Славјанка Петровска. Како што информираат од Генералштабот на АРМ, главни теми на состаноците ќе бидат придонесот на земјава во операциите на НАТО, oбуката и вежбите, како и развојот на капацитетите на армискиот полигон „Криволак“ и опремувањето на Армијата. За време на престојот, адмиралот Риле ќе ја посети и Командата за операции и сквадронот за обука и тренинг на пилоти во состав на воздухопловниот ВИНГ.

Кралот Чарлс Трети од утре во посета на Германија

Дарко Андоновски — Wed, 29 Mar 2023 07:53:40 +0000

Со највисоки почести и силни безбедносни мерки Берлин утре ќе го пречека кралот Чарлс Трети и неговата сопруга Камила, што ќе биде нивна прва посета во странство откако кралот го презема престолот. Кралската двојка требаше да ја посети Франција пред Германија, но посетата е откажана поради немирите поврзани со протестите против пензиските реформи во земјата. Монархот и кралицата сопруга треба да слетаат на аеродромот во Берлин во раните попладневни часови. Кралската двојка во Берлин ќе престојува два дена, од каде в петок ќе се упатат кон Хамбург, последната станица од нивната посета.

Поради најавените протести одложена посетата на британскиот крал Чарлс на Франција

Дарко Андоновски — Fri, 24 Mar 2023 12:16:51 +0000

Посетата на британскиот крал Чарлс на Франција е одложена откако француските синдикати повикаа на штрајкови и протести за време на неговиот престој, соопшти денеска Елисејска палата. Кралот Чарлс в недела требаше да ја оствари својата прва државна посета на Франција како монарх. Предвидено беше посетата да трае три дена. Со оглед на вчерашната најава за национални протести против реформите на пензискиот систем, кои треба да се организираат во вторник, посетата на кралот Чарлс, закажана од 26 до 29 март, ќе биде одложена, се наведува во соопштението на Елисејска палата.

Дваесетина градочалници во посета на Тетово за соработка во развој на туризмот

Тале Кристо — Wed, 22 Mar 2023 11:55:44 +0000

Претставници на 17 општини од Косово и Србија денеска беа во посета на Општина Тетово и разгледување на градот, а со цел развивање на соработка во областа на туризмот. Градоначалници, заменици градоначалници и административци разговараа со Биљал Касами, градоначалникот на Тетово кој рече дека нема некоја формална организација на општините туку на туристички развој. -Соработката меѓу нашите држави во регионот веќе постои, а ние како градоначалници претставници на народот може да придонесеме да се засили соработката помеѓу нашите држави. Имаме заеднички проекти со некои општини, оваа посета е во духот на разгледување на можностите за идна соработа, во интерес на граѓаните, на нашите општини. Како што рече амбасадорот, соработка во рамките на некои области кои ги имаме поконкретно во делот на туризмот. Значи тоа што веќе нашите држави и влади соработуваат преку заеднички состаноци, а ние сакаме тоа да го имплементираме на терен во конкретна соработка меѓу општините, истакна Биљал Касами. Беше организирана посета на повеќето тетовски знаменитости како Шарена џамија и Арабати Баба Теќе.

Си Џинпинг ја започнува посетата на Москва

Ивона Петрова — Mon, 20 Mar 2023 07:16:21 +0000

Кинескиот претседател Си Џинпинг денеска ја започнува посетата на Русија, што е негова прва посета на странска земја откако беше избран по третпат за претседател на Кина, а исто така прва посета на Русија од почетокот на руско-украинскиот конфликт во февруари 2022 година. Посетата ќе ги постави основите за развој на кинеско-руските односи во следните пет години и ќе го продлабочи меѓусебното разбирање на Москва и Пекинг за важни меѓународни и регионални прашања, пренесува РИА Новости. Си Џинпинг од денеска до 22 март ќе биде во посета на Москва на покана на рускиот претседател Владимир Путин, а лидерите ќе разговараат за прашања за натамошен развој на соработката меѓу двете земји, соопштија Москва и Пекинг. Си и Путин ќе разговараат за кинеско-руското сеопфатно стратешко партнерство, ќе разменат мислења за важни меѓународни и регионални работи и ќе ја промовираат соработката меѓу двете земји, соопшти претходно кинеското Министерство за надворешни работи. Портпаролот на кинеското МНР, Ванг Венбин, во петокот изјави дека посетата на Си на Москва дополнително ќе ја продлабочи меѓусебната доверба и разбирање на двете земји, нагласувајќи дека тоа ќе биде и патување насочено кон зајакнување на мирот. Волстрит журнал, повикувајќи се на свои извори, објави дека по посетата на Москва, Си Џинпинг би можел да одржи онлајн средба со претседателот на Украина, Володимир Зеленски. Кина постојано нагласува дека Пекинг „игра конструктивна улога“ во решавањето на украинската криза. На 24 февруари кинеското Министерство за надворешни работи објави документ од 12 точки за политичко решение на украинската криза.

Зеленски поканет да ја посети ЕУ следната година за да разговара за поголема поддршка за воените напори

Тале Кристо — Thu, 22 Dec 2022 13:40:55 +0000

На 3 февруари следната година ќе се одржи Самит меѓу ЕУ и Украина, на кој ќе присуствуваат и украинскиот претседател Володимир Зеленски, претседателот на ЕУ Шарл Мишел и претседателката на Европската комисија Урсула фон дер Лајен, потврди денеска портпаролот на Советот на ЕУ. – Можам да потврдам дека Самитот ЕУ-Украина ќе се одржи на 3 февруари и има отворена покана до претседателот Зеленски да го посети Брисел, рече Баренд Лејтс, портпарол на Шарл Мишел. Тој прецизираше дека „Самитот нема да биде меѓу 27-те лидери на ЕУ, туку со претседателот на Советот на ЕУ и претседателката на Европската комисија“. Засега не се знае дали Самитот ќе се одржи во Брисел или во некоја друг град во Унијата. Официјални лица велат дека темата на самитот најверојатно ќе биде како ЕУ може да продолжи да ја поддржува Украина во војната против Русија.