Светската здравствена организација (СЗО) соопшти дека 875.000 авганистански деца се соочуваат со тешка акутна потхранетост.

Од 875.000 деца низ цел Авганистан годинава 125.000 имале различни компликации и се соочиле со тешка акутна потхранетост.

Повеќе од 2,3 милиона деца, исто така, се жртви на умерена акутна неухранетост, а 840.000 трудници и доилки страдаат од акутна неухранетост, се додава во соопштението, пренесено од агенцијата Анадолија.

СЗО додава во соопштението дека во различни провинции низ Авганистан неделава продолжила обуката на медицински сестри, со цел да се борат против акутната неухранетост.

Хуманитарната криза низ Авганистан ескалира и поради продлабочувањето на економската криза по доаѓањето на талибанците на власт.

Според Обединетите нации (ОН), 28 милиони лица, што одговара на две третини од населението на Авганистан, главно деца, имаат потреба од итна хуманитарна помош.

Потхранетоста, сипаниците и детската парализа се меѓу водечките проблеми и болести во земјата.  (МИА)