поткуп – Kurir.mk

Притвор за вработен во шумската полиција, осомничен е за примање поткуп

Ивана Ефремовски — Tue, 31 Oct 2023 12:13:25 +0000

Основното јавно обвинителство Битола донесе наредба за спроведување истражна постапка против едно лице за кое постои основано сомнение дека сторило кривично дело „Примање поткуп“. Како што информира денеска Јавното обвинителство, осомничениот 58-годишник, вработен во Шумската полиција, директно за себе побарал 18.000 денари за да не изврши службено дејствие што би морал да го изврши, односно за да не му прави контрола на сведокот – референт за сеча и дотур во правно лице. Откако му ги побарал парите, сведокот го пријавил. Врз основа на наредба од јавен обвинител за примена на посебни истражни мерки, на сведокот му биле дадени обележани банкноти за да ја изврши исплатата. Веднаш по приемот на поткупот, парите биле пронајдени кај осомничениот и тој бил лишен од слобода. - Јавниот обвинител оцени дека постојат законските основи и до судијата на претходна постапка од Основниот суд во Битола достави предлог за определување мерка притвор за осомниченото лице. Судот го прифати предлогот и на осомничениот му определи мерка притвор во траење од 30 дена, се наведува во соопштението.

Приведен вработен во Шумска полиција во Демир Хисар поради примање поткуп

Тале Кристо — Mon, 30 Oct 2023 16:05:16 +0000

Полициски службеници од ОВР Демир Хисар во содејство со криминалистичката полиција на СВР Битола денеска (30.10.2023) на патот меѓу с.Света и с. Единаковци, на подрачје на Демир Хисар, го лишиле од слобода Д.Т.(58) од Демир Хисар, вработен во Шумска полиција во Демир Хисар, поради сомнение за сторено кривично дело по чл.357 од КЗ „примање поткуп". Д.Т. од лице од Демир Хисар побарал пари, а за возврат да не постапи односно да не санкционира незаконско работење. Откако му биле побарани пари, лицето го пријавило случајот во СВР Битола и му биле дадени крим-технички обработени пари, кои тој денеска му ги дал на Д.Т.. Веднаш откако му биле предадени парите, Д.Т. е лишен од слобода и кај него се пронајдени 18.000 денари кои потекнуваат од кривичното дело. Д.Т. е приведен во полициска станица Битола и против него ќе следува кривична пријава.

БАРАЛЕ ПОТКУП И СЕКСУАЛНИ УСЛУГИ: Вкупно осум години затвор за двајца универзитетски професори од Економскиот факултет

Тале Кристо — Thu, 07 Sep 2023 13:08:32 +0000

Основниот Кривичен суд Скопје денеска ги прогласи за виновни за примање и давање поткуп тројцата професори од Економскиот факултет при Универзитетот „Св.Кирил и Методиј“ во Скопје, во врска со предметот „Еразмус“. На Бобек Шуклев и Славе Ристевски судот им изрече вкупно осум години казна затвор, додека Драган Денковски доби условна казна затвор.

На професорот Бобек Шуклев за примање поткуп му беше изречена казна затвор од четири години и шест месеци, професорот Славе Ристевски за две кривични дела примање поткуп доби казна затвор од по две години и шест месеци, односно единствена казна затвор во траење од четири години. Професорот Драган Денковски, за три кривични дела давање поткуп Судот го осуди со алтернативна мерка условна осуда, за секое кривично дело во траење од по 10 месеци, или единствена казна затвор во траење од две години, која нема да се изврши доколку не стори ново кривично дело.

Нивната професија како професори судот ја земал предвид како отежителна околност, додека како олеснителни биле возраста, семејство и тоа што досега се неосудувани.

На професорот Бобек Шуклев како отежителна околност беше земено и тоа што навлегол во интимната сфера на една од оштетените.

Професорите добија и забрана за вршење професија во траење од пет години, а времето поминато во затвор се смета во времето во кое трае забраната.

При објавата на пресудата судијката Јанчулева Михаиловска посочи дека изнесените докази имаат доволен доказен капацитет за донесување на осудителна осуда.

Првичната пресуда за овој случај беше изречена во 2020 година, за во 2021 апелација да го врати предметот на повторно судење.

Во случајот беше товарен и професорот Стојан Дебарлиев, за кого, Кривичниот суд во 2020 година пресуди дека не е виновен за „злоупотреба на службената положба и овластување“.

Предметот беше отворен во јуни 2016 година. Процесор го водеше судијката Фанка Јанчулева Михаиловска.

Грк доби кривична пријава: Се обидел да поткупи полицајци со пет евра

Ивона Петрова — Fri, 04 Aug 2023 14:15:53 +0000

Регионалниот центар за гранични работи Југ поднесе кривична пријава против Л.В. од Република Грција, поради постоење основи на сомнение за сторено кривично дело „давање поткуп“. -На 01.08.2023 на автопат Демир Капија-Неготино, на наплатна станица Демир Капија, при контрола од страна на полициски службеници, тој во сообраќајната документација која ја дал на увид, ставил банкнота од пет евра за да не се изврши службеното дејствие, информира МВР.

Им понудил поткуп на полицајци за да го ослободат, кривична за млад велешанец

Ивана Ефремовски — Mon, 22 May 2023 14:31:42 +0000

Отсекот за економски криминал при СВР Велес поднесе кривична пријава против И.Д.(30) од Велес, поради постоење основи на сомнение за сторено кривично „давање поткуп“, казниво по член 358 од Кривичниот законик. На 13.05.2023, тој бил лишен од слобода и при движење кон Полициската станица во Велес на полициските службеници им понудил по 30.000 денари да го ослободат.

СКАНДАЛ ВО АРМ: Лакома припадничка барала 3.000 евра од кандидат за да влезе на работа!

Дарко Андоновски — Sat, 20 May 2023 09:53:06 +0000

Во заедничко дејствување, припадниците на Службата за воена безбедност и разузнавање при Министерство за одбрана и Министерство за внатрешни работи, во координација со Јавното обвинителство вчера привеле припадничка на Армијата на Република Северна Македонија заради вршење на кривично дело поткуп. -Вработената, служејќи се со лаги и манипулации уценувала кандидат пријавен на оглас да и даде 3.000 евра за да биде примен. Кандидатот е успешен и секако ќе беше примен, а лакомата вработена е лишена од слобода, ќе го изгуби работното место и ќе биде кривично гонета исто како и нејзините соучесници. Ова нека биде порака за сите: за криминалот нема место во Армијата!, напиша министерката за одбрана, Славјанка Петровска на својот Фејсбук профил. Таа ги охрабри сите да ги пријавуваат ваквите случаи. -Криминалот и корупцијата ќе добијат жесток и бескомпромисен одговор, напиша Петровска.

Вработен во водостопанство му побарал на сопственик на фирма три илјади евра поткуп – откако ги зел сфатил дека му се малку, па се покајал за цел живот

Дарко Андоновски — Sat, 20 May 2023 07:31:15 +0000

Јавен обвинител од Основното јавно обвинителство Скопје донесе Наредба за спроведување истражна постапка против едно лице за кое постои основано сомнение дека сторило кривично дело – Примање поткуп казниво согласно член 357 став 4 во врска со став 1 од Кривичниот законик. Осомничениот 42-годишник, со пријавено место на живеење во струмичко Ново Село, но вработен како службено лице – раководител на сектор во АД Водостопанство на РСМ во државна сопственост – Скопје, во периодот од 01.12.2022 година до 19.05.2023 година, за себе примил подарок – парични средства од поголема вредност за да изврши службено дејствие што не би смеел да го изврши. Од оштетено лице од Крива Паланка тој побарал и примил вкупно 6.000 евра во денарска противвредност со цел спротивно на пропишаната постапка да овозможи изготвување на потребната техничка документација за добивање дозвола за вадење песок, чакал и камен од бреговите и коритата на површинските водни тела за едно правно лице. Парите ги примил во два наврати. Најпрво во декември 2022 во угостителски објект во Автокоманда оштетениот му исплатил на осомничениот 3.000 евра. Потоа на 16 мај годинава осомничениот му побарал уште 3.000 евра. Оштетениот го пријавил барањето за поткуп, банкнотите биле криминалистички обработени и по примопредавањето во текот на вчерашниот ден во населба Илинден осомничениот бил лишен од слобода, а кај него биле пронајдени обележаните 30 банкноти во апоени од по 100 евра. Надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор, поради опасност од бегство на осомниченото лице, можност тој да го искористи своето службено својство за да влијае врз постапката преку заплашување, уценување или договарање со сведокот-оштетен, како и веројатност да го повтори делото за кое е осомничен.

Поднесена кривична пријава против две лица од Скопје за давање поткуп

Ристе Здравков — Wed, 29 Mar 2023 12:52:10 +0000

Денеска (29.03.2023) ОВР Кавадарци поднесе кривична пријава против Б.С.(34) и Ј.С.(60), двајцата од Скопје, поради постоење на основано сомнение дека извршиле кривично дело „давање поткуп‘‘, предвиден и казнив по член 358 став 1 од Кривичниот законик. Двете лица кривичното дело го сториле на 29.12.2022 околу 09.30 часот во Општина Кавадарци, при што на вработена во Одделението за урбанизам, дале поткуп во износ од 500 евра во апоени од по 100 евра, со цел да не изврши службено дејствие кое морала да го изврши – надзор врз градежни работи

Албанец понудил поткуп на македонски граничен премин, сега ќе одговара

Ивана Ефремовски — Tue, 28 Feb 2023 16:44:19 +0000

СВР Куманово поднесе кривична пријава против Е.Р.(38) од Република Албанија, поради постоење основи на сомнение за сторено кривично дело „давање поткуп”. На 24.02.2023 на Граничен премин Белановце, пријавениот при пасошка контрола во зелената карта ставил пари и заедно со патните исправи ги дал на полицискиот службеник.

Приведени две лица поради давање поткуп, пронајдена и дрога

Ивана Ефремовски — Sat, 25 Feb 2023 15:48:55 +0000

На 24.02.2023 во 09:20 часот на Граничниот премин Белановце, на влез во РМ, полициски службеници ги лишиле од слобода Г.Ј.(65), возач, и Е.Р.(38), совозач, двајцата од Р.Албанија, кои биле со патничко моторно возило “пежо“ со албански национални ознаки. Имено, при вршење на пасошка контрола Е.Р. дошол до кабината каде на полициски службеник му дал патни исправи и зелен картон. При проверка на документите, полицискиот службеник забележал дека во зелениот картон била ставена една банкнота од 10 евра, по што Е.Р. рекол дека тие се за него за да го пушти бидејќи бил истечен рокот на зелениот картон. Е.Р. веднаш бил лишен од слобода. При извршен преглед на моторното возило било пронајдена и марихуана и една дробилица. Поради постоење основи на сомнение за сторени кривични дела по чл.358 и чл.215 од КЗ на РМ Е.Р. и Г.Ј. се лишени од слобода. Известен бил Јавен обвинител и тие биле предадени на полициски службеници од СВР Куманово за понатамошна постапка односно за поднесување соодветна кривична пријава.