поврат на ддв – Kurir.mk

УЈП: Исплатата на поврат на ДДВ во февруари

Ивона Петрова — Tue, 31 Dec 2019 11:54:49 +0000

Управата за јавни приходи соопшти дека денеска се заокружува второто тримесечје од МојДДВ, мерка која се спроведува според Законот за враќање на дел од ДДВ кај физичките лица. Од почетокот на второто тримесечје кое стартуваше во октомври, заклучно со 30.12.2019 година скенирани се 28,948,878 фискални сметки, остварен е промет од 14.301.474.854 денари, вкупениот ДДВ изнесува 1.554.510.671 денари, а повратот од 15 отсто е во износ од 233.176.601 денари или 3.791.000 евра. Исплатата за второто тримесечје ќе стартува во февруари 2020 година. Притоа, од УЈП информираат дека за првото тримесечје од МојДДВ, за коешто исплатата започна во декември 2019 година, исплатен е поврат кај 144.601 граѓани кои во апликацијата МојДДВ внеле валидни трансакциски сметки, во износ од 155.244.780.00 денари. За граѓаните кои во апликацијата МојДДВ внеле погрешна трансакциска сметка и направиле корекција, информираат дека исплатата ќе се случи во понатамошниот период. Воедно, апелираат корисниците кои не внеле трансакциска сметка, тоа да го направат, по што ќе следува исплатата на повратот.

„Ветениот поврат на ДДВ заврши како фијаско“

Катерина Бојаџиева — Sat, 07 Dec 2019 10:36:30 +0000

Ветениот поврат на ДДВ заврши како фијаско. Наместо ветените 500 евра од поврат на ДДВ, граѓаните добиваат по 1.000 денари и тоа не сите, и тоа ќе го добијат помалку од 10% од потенцијалните корисници на оваа мерка на владата на СДСМ, велат од ВМРО-ДПМНЕ. -Но затоа, милиони евра завршуваат во џебовите и сметките на функционерите од власта чии фирми добиваат тендери, јавни набавки, грантови и слични повластици од народните пари, стои во партиската реакција и се додава: „Додека ја замајуваат јавноста со 1.000 денари од поврат на ДДВ и слични популистички мерки, кланот Заеви стана најбогатиот клан не само на Балканот туку и пошироко. Граѓаните јасно гледаат дека од ден во ден се потешко се живее обичниот човек, ама затоа цветаат бизнисите со марихуана, градежните, транспортните и многу други фирми кои ги поседуваат Заеви“.

Министерот Милевски несвесно откри дека Заев лаже: Во чии џебови ќе завршат минимум 50 милиони евра од поврат на ДДВ?

Ивана Ефремовски — Sat, 27 Jul 2019 13:22:17 +0000

Министерот за локална самоуправа, Горан Милевски, денес беше во Битола за да ја промовира мерката „Поврат на 15 отсто од пресметаниот ДДВ“. -Денеска заедно со градоначалничката на Битола се вклучивме во кампањата „МојДДВ“. До денеска согласно податоците што ги добив од УЈП евидентирани се над 5,5 милиони фискални сметки, остварен е прилив во Буџетот нешто повеќе од три милијарди денари, а поврат граѓаните ќе имаат над 50 милиони денари. Значи, над 800.000 евра веќе ќе се слеат на сметките на граѓаните. Тоа не е мала сума. Јас апелирам сите граѓани да се вклучат. Оној којшто смета дека не се големи средства нека ги собере и нека ги донира онаму каде што треба, рече Милевски. Министерот од Владата на Заев со оваа изјава си го поклопи премиерот и неговите тврдења. Имено, Милевски вели дека за еден месец над 800.000 евра ќе бидат слеани на сметките на граѓаните. Според оваа математика, за една година, на сметките на граѓаните ќе биде направен поврат на ДДВ во вредност од 9.600.000 евра. Тоа значи дека првата година од остварувањето на оваа мерка, која беше главна во предизборните кампањи на СДСМ, граѓаните нема да добијат ниту 10 милиони евра поврат. Да се потсетиме што ветуваше премиерот Заев: “Ќе имаме одличен систем и очекувањата се дека граѓаните ќе добијат меѓу 60 до 100 милиони евра годишно на самиот старт, а зависно од процентот на успешност, толку повеќе ќе раснат и вкупните пари што ќе одат кај граѓаните, но и во буџетот”, рече Заев во март годинава. Според простата математика, или разликата од најмалку 50 милиони евра ќе заврши на други сметки, а не кај граѓаните, или пак, ова ветување било само една од безброј лаги на премиерот Зоран Заев. Милевски несвесно го обезличи Заев. Помпезните ветувања издишуваат. Министерот ја откри математиката која премиерот напумпано им ја сервираше на граѓаните. Бидејќи се претставници на една иста Влада, би било добро да направат заедничка анализа, па да ја информираат јавноста во чии џебови ќе заврши разликата од ветеното и вистината, односно сумата меѓу десет и педесет до сто милиони евра од поврат на ДДВ?

Од денеска стартува проектот на Заев за поврат на ДДВ: „Со новата мерка граѓаните нема да можат ниту превозот да си го платат“ (АНАЛИЗА)

Дарко Андоновски — Mon, 01 Jul 2019 08:58:21 +0000

Од денеска стартува владиниот проект „Мој ДДВ“, со кој се предвидува поврат на ДДВ од 15 проценти. Преку оваа мерка, според најавите на власта, на крајот на годината во семејниот буџет влегува уште еден доход плус, а државата враќа 50 милиони евра назад кај граѓаните. За да добијат поврат на парите, граѓаните со телефонска апликација ќе треба да ги скенираат баркодовите на фискалните сметки кои ги добиваат при купување или користење на некоја услуга. Сепак од ВМРО-ДПМНЕ велат дека ова е уште една манипулација од страна на владата предводена од Зоран Заев. Како што велат „Со новата мерка за поврат на ДДВ граѓаните нема да можат ни месечниот превоз да си го платат“ -Со мерката за поврат на ДДВ со која власта толку се фали, наместо ветените 30.000 денари, граѓаните максимално можат да добијат 1.872 денари во годината или само 156 денари месечно. Oваа ниска сума ја потврдуваат трошоците во потрошувачката кошничка на едно четиричлено семејство кое за да го помине месецот потребни му се 33.000 денари. Поголемиот дел на трошоци кои им се неопходни на граѓаните не се со даночна стапка од 18%, туку се со 3, 5 или 6%, па така повратот на овие трошоци е уште помал. Според потрошувачката кошничка граѓаните трошат 42% од буџетот на исхрана, но од тоа може да земат само 104 денари месечно затоа што данокот е 5%, додека пак 31% од трошоците им одат за комунални трошоци кои не се даночат па така со 73% потрошен семеен буџет може да се земе поврат од само 104 денари. Со парите потрошени за хигиена, јавен превоз, лекови, облека и културни активности граѓаните можат да добијат уште приближно 52 денари. Така да стигнат до мизерни 156 денари на месечно ниво кои ништо не им значат за да ги покријат зголемените трошоци за живот кои драстично пораснаа изминативе две години, се вели во партиското соопштение. Од опозициската партија истакнуваат дека Зоран Заев и СДСМ ветуваа дека со повратот на ДДВ граѓаните во годината ќе може да исплатат кредит, да реновираат соба или да си платат годишен одмор. Но со овие средства кои реално би ги добило едно четиричлено семејство нема да може да си го плати ниту превозот, а камо ли да си дозволи да оди на годишен одмор. Граѓаните кои се одважија да го кажат својот став пред камерата на ПресингТВ велат дека не гледаат многу фајде од најавената мерка за поврат на 15 отсто од платеното ДДВ. Велат повратот ќе биде тежок, па дури и смешен за оние кои земаат просечна плата. „Мал процент од луѓето во Македонија би го добиле тој поврат и тоа најбогатите. Сите оние кои прават мали суми мислам дека повратот на ДДВ-то би бил смешен“, изјави еден од анкетираните.

Колку ќе добијат домаќинствата од повратот на ДДВ?

Од анализата правена од страна на Finance Think, само најбогатите домаќинства кои годишно трошат 1, 2 милиони денари или околку 20 илјади евра ќе можат да си повратат една просечна плата со мерката Поврат на ДДВ. Најсиромашните домаќинства ќе вратат само 738 денари, покажа анализата на Фајнанс тинк. Како што најавија на прес-конференцијата претседателот на владата Зоран Заев, министерот за финансии Драган Тевтовски и директорката на УЈП, Сања Лукаревска, годишниот поврат на ДДВ кај сите домаќинства ќе изнесува 49.5 милиони евра. Семејство чија потрошувачка кошничка месечно изнесува 32.670 денари ќе може да очекува поврат на ДДВ од 172 евра за една година. Повратот на ДДВ ќе биде тешко за оние кои земаат просечна плата и уште потешко за оние кои земаат минимална плата. Поврат на ДДВ Најбогати домаќинства 450 евра Просечно домаќинство 172 евра Најсиромашни домаќинства 12 евра Според последните податоци за декември лани, социјалната потрошувачка кошничка која се мери со просечната исплатена нето плата, изнесувала 32.670 денари. Пресметано на годишно ниво тоа значи дека четиричлено работничко семејство, кое нема автомобил, за исхрана и пијалоци, домување, хигиена, превоз, облека и обувки, култура, одржување на здравје годишно троши по 392.040 денари (6.370 евра). Тоа семејство, преку сметките на државата ѝ плаќа ДДВ во износ од 1.146 евра. Според тоа, може да очекува поврат на ДДВ од 172 евра за една година. Социјалната потрошувачка кошничка можат да ја покријат само семејствата со две просечни нето плати или со една просечна и една минимална плата. Семејствата со две минимални плати не се во можност без да се откажат од нешто да преживеат и со синдикалната потрошувачка кошничка. Според тоа, тие и најмалку ќе добијат од колачот што се вика поврат на ДДВ. Просечна нето плата во земјава земаат околу 17 отсто од вработените, додека 75 отсто од нив земаат плати под државниот просек. Пресметка од даночниот советник Павле Гацов Даночниот советник Павле Гацов на својот Фејсбук профил даде пример како да пресметате колку треба да имате набавки за да ви се врати максимално дозволениот износ на ДДВ од 28.000 денари годишно. Пресметка за ДДВ со 18%: 28.800 х 100 : 15 = 192.000 192.000 х 100 : 18 = 1.066.667 денари набавки за 1 година. Проверка: 1.066.667 х 18% ДДВ = 192.000 192.000 х 15% = 28.800 ДДВ за враќање Пресметка за ДДВ со 5%: 28.800 х 100 : 15 = 192.000 192.000 х 100 : 5 = 3.840.000 денари набавки за 1 година. Проверка: 3.840.000 х 5% ДДВ = 192.000 192.000 х 15% = 28.800 ДДВ за враќање Со оглед дека граѓаните ќе набавуваат добра и со 5% ДДВ и со 18% ДДВ, произлегува дека годишните набавки за да се постигне максимално дозволениот годишен поврат на ДДВ (28.800 денари) треба да се движи меѓу 1.066.667 и 3.840.000 Опцијата за максимално искористување на повратот е речиси невозможна поради предвидените лимити. Пресметка на повратот од извршени набавки: Вкупна набавка 20.000 денари – од тоа 15.000 со 18% ДДВ = 2.288 (15.000 : 1,18 = 12.712 х 18%) – 5.000 со 5% ДДВ = 238 (5.000 : 1,05 = 4.762 х 5%) Вкупно ДДВ = 2.288 + 238 = 2.526 денари Поврат 15% ДДВ = 379 денари

Максимален поврат на ДДВ ќе имаат само семејствата кои трошат над 3000 евра месечно

Предраг Кукиќ — Thu, 20 Jun 2019 10:26:11 +0000

Во зависност од даночната стапка, за да го остварите максималниот годишен поврат на ДДВ од 28.800 денари ќе треба да потрошите меѓу 17.000 и 62.000 евра годишно, покажува пресметката. Доколку купувате само производи кои се даночат со стапка од 18% тогаш пресметката вели дека за да вратите 28.800 денари (колку што е предвидениот максимум) за една година, вие ќе мора да потрошите точно 17.344 евра за една година или да трошите по 1445 евра секој месец само на производите кои се даночат со стапка од 18%. Но поголемиот дел од храната и уште некои производи кои најчесто се купуваат се даночат со повластена даночна стапка од 5%. Во таков случај, кога би сакале да го направите максималниот годишен поврат на ДДВ од 28.800 денари, само од купени производи кои се даночат со стапка од 5%, тогаш вие за една година ќе треба да потрошите фантастични 62.439 евра или секој месец во продавница да оставате по повеќе од 5.200 евра. Ако претпоставивме дека во еден месец ќе купувате подеднакво производи даночени со 5% и 18% ДДВ, тогаш некоја средна потрошувачка што Ви е потребна за да го остварите максимумот поврат би се движела околу 40.000 евра на годишно ниво што значи дека секој месец би требало Вашето семејство да троши по околу 3.300 евра. Ќе направиме и пресметка на една просечна плата од 24.000 денари. Доколку целата ја потрошите на производи даночени со 18% ДДВ тогаш, вие практично ќе платите 4.320 денари за ДДВ. Од нив, во тој месец ќе имате право да вратите 648 денари. Доколку купувате производи кои се даночат со 5% (како на пример храната) тогаш вие ќе платите 1200 денари ДДВ. Од оваа сума, тој месец ќе имате право на поврат во износ од 180 денари. Се разбира, покрај потрошувачката по продавници, Вие од Вашата плата ќе морате да ги платите режиските трошоци во Вашиот дом, а платениот данок за нив не може да се поврати.

За да добиете 28.800 денари поврат на ДДВ ќе треба да потрошите 18 илјади евра

Предраг Кукиќ — Wed, 19 Jun 2019 11:20:01 +0000

50 милиони евра ќе се враќаат на населението како поврат на 15% од платениот ДДВ. Денеска Владата ја претстави мобилната апликација, преку која ќе се одвива овој процес. Од први јули стартува најавената мерка со која граѓаните ќе добиваат поврат од 15 отсто од платениот данок на додадена вредност (ДДВ). Математиката, покажува дека на секоја сметка од 1.000 денари, на која ДДВ е 18 %, повратот би бил цели 27 денари. На сметка од 10.000 – 270 денари или на потрошена цела просечна плата од 26.000, поврат би бил 702 денари. Најмногу 28.800 денари годишно ќе може да добие четиричлено домаќинство. Тоа е ограничувањето. Пресметките сепак говорат дека за да се „врати“ толкав износ, ќе треба за една година едно семејство да потроши 18.000 евра.

Поврат на ДДВ е уште еден промашен проект: Наместо скапи апликации, зошто не се намали данокот?

Ивана Ефремовски — Sat, 04 May 2019 11:22:32 +0000

Изминува трета година откако се ветуваше проект кој што ќе донесе 13-та плата во семејствата, соочени со лоши изборни резултати, властите се сетија на проектот „поврат на ДДВ“. Самиот проект е замислен така што граѓаните би плаќале ДДВ, потоа ќе ја пријавуваат фискалната сметка, а државата би им вратиле 15 проценти од оданоченото. Звучи комплицирано и покрај тоа што е јасно дека повеќе пари ќе добиваат тие што повеќе трошат, односно повеќе имаат, тука дополнително се вметнува и скапа апликација за паметен телефон. И сето тоа власта смета дека ќе ја намали сивата економија, ќе стимулира фискализација, а граѓаните ќе потрчаат за 15-те проценти поврат од платеното ДДВ. Но сето тоа има многу недостатоци. Тоа што веднаш паѓа во очи е дека законот е насочен кон оние кои трошат повеќе, односно имаат големи приходи и не се борат ден за ден очекувајќи ги 500-те евра просечна плата ветена во изборната кампања. Всушност оние и кои тргуваат кај трговци кои не издаваат фискални сметки нема ниту да помислат да бараат фискални, затоа што токму тие трговци даваат попусти кои изнесуваат многу повеќе од 15 проценти од ДДВ. Уште повеќе, овој систем предвидува категорија на граѓани кои поседуваат поскапи паметни телефони, со апликации, во која што секако се исклучуваат социјално ранливите категории и огромниот капацитет на внимателни потрошувачи, а тоа се пензионерите. Секако на ова треба да се погледне и од другата страна, онаа која се залага за ваков систем. Станува збор за скап софтвер кој ќе може истовремнено, секојдневно, без временски ограничувања да опслужи над над милиони граѓани- потрошувачи во државата. Тоа подразбира скап софтвер и поддршка, како и оптоварување на даночната администрација со уште еден економски нелогичен проект. Вториот аспект од оваа страна е и прашањето кој тоа (ќе) ја изработува и администрира со оваа програма, дали тоа ќе биде државна компанија или некоја од компаниите блиски до власта? Оттука и главното прашање од граѓаните, и секако од економстите, зошто наместо скап и некорисен проект кој што исклучува голема група на потрошувачи, проект кој отвора многу сомнителни прашања за исплатливоста во борбата со сивата економија, едноставно не се намали висината на ДДВ за тие 15%, односно зошто ДДВ не се нивелира на 16 процентни поени?

Анализата на Фајнанс Тинк покажува дека со мерката на Заев за повраток на ДДВ сиромашните ќе вратат само 12 евра годишно

Предраг Кукиќ — Mon, 18 Mar 2019 19:49:31 +0000

Според анализата направена од страна на Институтот за економски истражувања Фајнанс Тинк, најбогатите ќе имаат најголем ќар од мерката повраток на ДДВ од 15 проценти, односно оние кои што годишно трошат по 20.000 евра ќе успеат да вратат нешто помалку од просечната плата, односно 22.238 денари или околу 400 евра, додека пак, најсиромашните ќе добијат назад само 738 денари годишно. Според пресметката на Институтот средната класа во државата преку повратот на ДДВ ќе добие меѓу 50 и 100 евра годишно. Од Министерството за финансии велат дека сите детали ќе ги објават по изборите, но уверуваат дека се подготвени за спроведување на мерката. Премиерот Заев во време на опозиција ветуваше дека мерката ќе се однесува на сите граѓани на Република Македонија, додека пак од собраниска говорница изјави дека мерката ќе се однесува само за примателите на социјалната помош, односно иако беше ветено дека истата ќе биде донесена веднаш по 11 декември кога СДСМ ќе победи на предвремените парламентарни избори во 2016 година, Заев подоцна се предомисле и на истата собраниска седница одговарајќи на пратеничко прашање рече дека мерката ќе профункционира дури во 2020 година односно после 4 години од неговиот мандат, што кај граѓаните се појавува дополнително сомневање дали воопшто и тогаш ќе се случи. Иако оваа мерка беше најавува како една од најважните мерки која требаше да биде донесена веднаш после 11 декември, како што ветуваше Заев и СДСМ се уште не е реализирана со што ова е уште една изговорена лага од страна на премиерот на Владата на Република Македонија, Зоран Заев.

Поврат на ДДВ: Само најбогатите домаќинства ќе можат да вратат една просечна плата

Ивана Ефремовски — Mon, 18 Mar 2019 09:28:18 +0000

Фајнанс тинк објави инфографик во врска со најавената мерка за годишен поврат на ДДВ по домаќинство. Според анализираните податоци, само најбогатите домаќинства кои годишно трошат по 1,2 милиони денари, ќе можат да вратат една просечна плата со новонајавената мерка. Најсиромашните домаќинства ќе вратат само 738 денари. Извор: АКАДЕМИК