претседателски избори – Kurir.mk

Мајк Пенс се повлекува од претседателската кампања за изборите во 2024 година

Ивона Петрова — Sat, 28 Oct 2023 19:43:33 +0000

Поранешниот потпретседател на Соединетите aмерикански држави, Мајк Пенс денеска објави дека ќе се повлече од трката за претседател во 2024 година. Тој ја објави информацијата во Лас Вегас, Невада, за време на годишниот самит на Републиканската еврејска коалиција. Теоријата на Пенс за кандидатурата беше едноставна - тој се раздели со тогашниот претседател Доналд Трамп на 6 јануари 2021 година и повторно се фокусираше на клучните конзервативни принципи кои ја основаа модерната Републиканска партија со Роналд Реган, неговиот политички модел, пишува CNN. -Дојдов овде да кажам дека ми стана јасно дека ова не е мое време. Затоа, по долго размислување, решив да ја прекинам кампањата за претседател, рече Пенс на сцената на конвенцијата во Лас Вегас. Пенс не успеа да добие поддршка меѓу голем број републикански кандидати, од кои најголем останува поранешниот претседател Доналд Трамп.

СДСМ е за одвоени избори, но отворена е за разговор – За ВМРО-ДПМНЕ прифатливи се двојни избори на 8 мај

Ивона Петрова — Wed, 18 Oct 2023 05:35:00 +0000

Останува отворено прашањето дали претседателските и парламентарните избори ќе се одржат одвоено или парламентарните избори ќе бидат истовремено со вториот круг на претседателските избори. Владејачката СДСМ смета дека двата изборни циклуса треба да бидат одвоени, но отворена е за разговор околу термините, додека за опозициската ВМРО-ДПМНЕ прифатливо е истовремено одржување на изборите, а како можен термин го предлагаат 8 мај. Од Собранието, пак, се уште нема информација кога би се одржала средба на работните групи кои би разговарале за изборните термини и останатите активности поврзани со изборите. Потпретседателот на СДСМ и вицепремиер за европски прашања Фатмир Битиќи вчера во телевизиско гостување рече дека претседателските и парламентарните избори треба да бидат одвоени, но дека за доброто на земјата може да се разговара за термините. Сите партии што се отворени, како што рече, може да се обединат или во заеднички листи или во заеднички дух за подобра, европска иднина на државата. -Во минатото докажавме дека имаме широк коалициски капацитет и со различни партии. И последните парламентарни избори во 2020 година беа во таков дух. Сега го нарекуваме европски фронт. Сите партии што се отворени можат да се обединат или во заеднички листи или во заеднички дух за подобра, европска иднина на државата, истакна Битиќи. Лидерот на ВМРО-ДПМНЕ Христијан Мицкоски вчера изјави дека за нив 8 мај е прифатлив како можен термин за одржување на парламентарните избори и на вториот круг од претседателските избори, потсетувајќи дека и во минатото имало таква пракса. -Така беше на последните избори 15 јули 2020 година. Затоа велиме дека 8 мај е повторно можен термин кога би се случил вториот круг претседателски заедно со парламентарните. Би имало 72 часа за рокови за жалби, за одлуки и да се фати рокот од 12 мај да може новиот претседател да биде веќе инаугуриран, изјави Мицкоски, одговарајќи на новинарски прашања при вчерашната посета на Гевгелија. Повика на консензус од сите политички фактори за датумот и времето на одржување на изборите. - Уставот е јасен, дека мандатот на актуелниот пратенички состав важи до изборот на нов, но не повеќе од четири години. Имајќи предвид дека 4 август 2020 година е формиран Парламентот и од тогаш почнува да важи мандатот на актуелниот пратенички состав, значи дека ние на 3 август мора да имаме нов пратенички состав, рече Мицкоски. Според потпретседателот на ДУИ и актуелен министер за надворешни работи Бујар Османи, датумот за одржување на претседателските и парламентарните избори ќе биде производ на дијалогот меѓу политичките партии, на кој треба да се гледа во контекст на уставната реформа, а не од аспект на партиските интереси. - ДУИ е најмалку загрижена во однос на термините како можност да се помогне позицијата на партијата бидејќи во кое било време нашата позиција е добра. Мислам дека тоа треба да го гледаме во контекст на уставната реформа отколку во контекст на тоа како политичките партии ќе имаат интерес за кој било датум, рече Османи. И од албанскиот опозициски блок се согласни што поскоро да се формираат работните групи и да се организираат изборите. Ги поздравуваат иницијативите за организирање на фер и коректни избори. -Ние сме подготвени уште утре да се почне постапката на иницирање и организирање на изборите. Учествуваме на тие работни групи и како политички субјект бараме што поскоро да се организираат избори, рече Фари Исени од Демократското движење. Претходно, и претседателот на Алијансата за Албанците, Арбен Таравари предложи претседателските и парламентарните избори да се одржат на ист датум.

Вело Марковски ќе се кандидира за претседател на државатa

Ивона Петрова — Tue, 17 Oct 2023 10:56:52 +0000

Проф. д-р Вело Марковски ќе се кандидира за претседател на државата. Преку соопштение тој денеска испрати покана за медиумите за настан на кој ќе ги објави намерите за поднесувањето на кандидатура на претстојните претседателски избори. На настанот, кој е закажан за в четврток, ќе биде промовирана и неговата интернет страна.

Кенеди Помладиот најави дека ќе биде независен кандидат на претседателските избори во САД

Катерина Бојаџиева — Mon, 09 Oct 2023 18:36:32 +0000

Роберт Кенеди Помладиот денеска соопшти дека ќе се кандидира како независен кандидат на претседателските избори во САД. Кенеди досега беше кандидат за претседателска номинација на Демократската партија во која е и актуелниот претседател Џо Бајден. „Тука сум да објавам независна кандидатура за претседател на САД“, рече Кенеди на митинг во Филаделфија.

Мицкоски: Да се одржи лидерска средба на која ќе се разговара за датумот за претседателските и парламентарните избори

Тале Кристо — Thu, 05 Oct 2023 12:18:53 +0000

Дали сакал Ковачевски или не сакал избори ќе има. До сега во овие повеќе од 3 децении не се случило да нема лидерска средба на која ќе се договорат термини за тие избори, не се случило да нема лидерска средба на која ќе се договорат термини за тие избори, не се случило да нема разговори во кој ќе се дефинира изборниот законик затоа што таму има препораки од ОБСЕ и ОДИХР технички кои треба да бидат имплементирани негдека околу 12 на број. Не се случило на 6 месеци пред избори да биде упатена покана до мониторинг мисијата на ОБСЕ и ОДИХР, треба да се дефинира дата за техничка Влада. Ова се работи кои сакал Ковачевски или не сакал ќе се случат за неколку месеци од сега, истакна претседателот на ВМРО-ДПМНЕ Христијан Мицкоски при денешната посета на Општина Кисела Вода во рамки на кампањата „Важно е! Од тебе зависат промените!“. Тој изјави дека треба да се разговара на таа тема, а ако мисли дека не треба да се разговара, во ред одговорноста е негова но треба да разбере дека таа одговорност и сега кога е премиер и од кога ќе биде жестоко поразен на изборите ќе треба да ја носи со себе. -Тој нека одлучи еве јас јавно уште еднашка велам, треба да седнеме и да разговараме за рокови и за дати за да можеме да организираме два процеса кои се многу важни за Македонија, претседателските и парламентарните избори и да ги согледаме сите можни предизвици кои се поврзани со овие процеси. Стојам на располагање на оваа тема кога сака тој да седнам и да разговарам, за се останато можеби не е добар соговорник Ковачевски бидејќи после поразот на парламентарните избори не е сигурна неговата иднина во рамките на партијата СДСМ, рече Мицкоски. Тој додаде дека треба да се разговара за иднината на државата бидејќи ни претстојат два суштински и комплексни процеси. -Логично е да има двојни избори за да се намали трошокот затоа што еден изборен процес е помеѓу 7 и 10 милиони евра кои ќе бидат потрошени и сега би било малку несмасно и некоректно од наша страна во услови на криза, во услови кога половина од населението гладува и едвај врзува крај со крај од први до први ние да зборуваме за одвоени изборни процеси уште повеќе што можеме да влеземе во политичка и уставна криза ако претседателските избори не бидат успешни и тогаш навистина влегуваме во еден озбилен проблем имајќи предвид дека 2025-та година е повторно изборна година имаме локални избори. Нашата намера е само да помогнеме во процесот и само државнички да се однесуваме и цениме дека можеби најдобро за државата е да има заеднички избори, вториот круг претседателски да бидат заедно со парламентарни избори. Ние сме подготвени на било кој концепт, секако тие ќе бидат поразени, дециден е Мицкоски.

Ѓукановиќ: Уверен сум дека ќе победам на изборите, без оглед на излезноста

Дарко Андоновски — Thu, 30 Mar 2023 06:53:53 +0000

Претседателскиот кандидат на Демократската партија на социјалистите, Мило Ѓукановиќ синоќа изјави дека е уверен оти ќе победи во вториот круг од изборите на 2 април, без оглед на тоа колкава ќе биде излезноста и оцени дека Србија и Русија продолжуваат да се мешаат во изборните процеси и внатрешните политички состојби во Црна Гора. Гостувајќи на РТЦГ, Ѓукановиќ рече дека пред изборите било јасно дека победникот ќе се одлучува во вториот круг. Тој порача дека Црна Гора в недела не избира меѓу двајца кандидати, туку пат кон иднината и додаде дека гласот за него е глас за континуитет. Потенцира дека неговиот противкандидат Јаков Милатовиќ ја персонифицира политиката на „Отворен Балкан“ и потсети дека за таа иницијатива секогаш зборувал „како за предворје на српскиот свет“. На прашањето дали и тој изјавата на шефот на хрватската дипломатија Гордан Грлиќ Радман дека Хрватите во Црна Гора треба да гласаат за него, ја сфаќа како мешање во внатрешните работи на Црна Гора, Ѓукановиќ рече дека тоа не го смета за мешање, бидејќи постапувањето на Србија и Русија не може да се стави на исто ниво со изјавата на хрватскиот министер.

Претседателски избори во Црна Гора: Влегување во ерата по Ѓукановиќ

Тале Кристо — Wed, 29 Mar 2023 06:30:56 +0000

Меѓународниот институт за блискоисточни и балкански студии ИФИМЕС од Љубљана, Словенија, редовно ги анализира настаните на Блискиот Исток, на Балканот и низ целиот свет. ИФИМЕС ја анализира ситуацијата во Црна Гора пред вториот круг од претседателските избори, кои ќе се одржат на 2 април 2023 година. Од анализата „Црна Гора - Претседателски избори 2023: Влегување во ерата по Ѓукановиќ“, ги објавуваме најважните и најинтересните делови. На 2 април 2023 година во Црна Гора ќе се одржи вториот круг од изборите за претседател на државата. Во првиот круг кој се одржа на 19 март 2023 година, најмногу гласови освоија Мило Ѓукановиќ 119.673 гласови (35,37%) и Јаков Милатовиќ 97.858 (28,92%). Излезноста беше 64,06% (341551). Мандатот на претседателот трае пет години. Мило Ѓукановиќ (61), кандидат на Демократската партија на социјалистите (ДПС), по професија економист. Тој е во конкуренција за трет мандат за претседател на Црна Гора, а пет пати беше и премиер на Црна Гора. Тој е претседател на Демократската партија на социјалистите. Јаков Милатовиќ (36), кандидат на Движењето „Европа сега“, по професија економист, поранешен министер за економски развој. Тој влезе во политиката по изборите во 2020 година, кои беа пресвртница за Црна Гора. Тој е заменик претседател на новооснованото движење „Европа сега“. Милатовиќ е проевропски и прозападен, и токму тоа му донесе гласови. Претседателските избори претставуваат конечен крај на долгиот период на власт на Демократската партија на социјалистите (ДПС), која по изборниот пораз во 2020 година загуби и на локалните избори. Поразот на Ѓукановиќ би значел конечен пад на ДПС, која имаше апсолутна власт во Црна Гора од воведувањето на повеќепартискиот систем, односно од 1990 до 2020 година. Претседателот на државата во Црна Гора нема поголеми овластувања. Но, вториот круг ќе биде важен и за судбината на Ѓукановиќ и за парламентарните избори кои ќе се одржат на 11 јуни 2023 година, иако постои можност за нивно одложување. Продолжување на демократските промени Мило Ѓукановиќ дојде на власт во 1989 година преку т.н Антибирократска револуција на крилата на српскиот национализам, предводени од Слободан Милошевиќ. Ѓукановиќ стана еден од најдоверливите и најблиските соработници на Слободан Милошевиќ. Тој воспостави силни врски со Русија, што резултираше со приватизација на државниот имот, бидејќи руските сопственици станаа газди на околу 30 отсто од црногорската економија. Ѓукановиќ е активен учесник во воените настани на територијата на поранешна Југославија, иако се уште не е гонет за таа улога. За време на војната во Босна и Херцеговина, тој му обезбеди логистичка поддршка на Радован Караџиќ и неговиот проект за создавање на Република Српска. Црна Гора под малигното влијание на Ѓукановиќ Вториот круг од изборната кампања се одвива во измислувањето непријатели од страна на Мило Ѓукановиќ за наводната закана за државноста на Црна Гора од т.н. големосрпскиот проект, Српската православна црква (СПЦ) и Русија. Всушност, најштетно за Црна Гора е малигното влијание на Ѓукановиќ. Жарко Пуховски вели: „Всушност, не треба да заборавиме дека во меѓувреме, она што се случи е дека Црна Гора (на чело со Ѓукановиќ) почна да се однесува како Австрија по Втората светска војна, па затоа се прогласи за прва жртва на Милошевиќ, бидејќи Австрија се прогласи за прва жртва на Хитлер, а не за соучесник во војната, како што и во двата случаја беа Австрија и Црна Гора“. Таквата политика Ѓукановиќ и денес им ја „продава“ на Бошњаците и Албанците, не само во Црна Гора. Доскорешниот претседателот на Албанија Илир Мета за т.н. големосрпски и големоалбански проекти, изјави: „Голема Србија пропадна, а Голема Албанија не е можна“. Аналитичарите сметаат дека треба да се разоткрие режимот на Мило Ѓукановиќ, бидејќи Црна Гора е полноправна членка на НАТО, што значи дека за неа важат највисоките демократски стандарди, кои треба да ги наследи и промовира, а од кои се уште е доста далеку. Конструкциите на Ѓукановиќ се неверојатни, дека Србија сака и може да ја нападне земјата, која е членка на најголемиот и најсилниот воен сојуз во светот, НАТО. Исто така, сè уште не е забележано дека Русија нападнала некоја земја членка на НАТО од нејзиното основање во 1949 година, така што измислувањето непријатели е константа на Мило Ѓукановиќ. Избори Црна Гора Бошњаците и Албанците жртви на Ѓукановиќ Околу 20% од населението (Бошњаци и Албанци) на Црна Гора се „заложници“ на режимот на Ѓукановиќ веќе неколку децении, кој преку неколку поединци Бошњаци и Албанци и неколкумина од нивните семејства, кои уживаат во привилегиите на режимот, создаваат лажна слика за интеграцијата на овие две етнички заедници, со што се залажува домашната и меѓународната јавност за наводната меѓуетничка хармонија во Црна Гора. Дури и Бошњаците, како жртви на режимот на Ѓукановиќ, застрашени од закани беа принудени да гласаат за својот злосторник. Тоа се однесува на извршените воени злосторства и геноцидот во Сребреница, со кои се поврзува Мило Ѓукановиќ, во улога на тогашен претседател на Владата на Црна Гора, кој учествуваше во работата на Врховниот совет за одбрана на Сојузна Република Југославија, за што сведочат бројни пишани документи. Оправдано е да се постави прашањето дали Бошњаците заборавиле или молчат за тоа дека Мило Ѓукановиќ бил најблискиот соработник на Слободан Милошевиќ и дека тој остана единствениот висок функционер од воениот период кој се уште не е гонат, иако воените злосторства не застаруваат. Аналитичарите сметаат дека бошњачките и албанските партии, доколку сакаат да ја „исперат“ дамката од себе, дека биле соработници и столбови на режимот, се на своевиден демократски и морален тест, имаат шанса да направат демократски пресврт и да се насочат кон иднината елиминирајќи секаква понатамошна соработка и поддршка за Ѓукановиќ и ДПС. Од 1991 година, Ѓукановиќ разви посебни односи со раководството на Република Српска. Во времето на меѓународните санкции против Сојузна Република Југославија, главните воени снабдувачи на Радован Караџиќ и Ратко Младиќ беа Ѓукановиќ и неговиот брат, помагајќи ја воената машина на воените злосторници, што резултираше со геноцид во Сребреница. Од изјавите на Мило Ѓукановиќ е јасно дека за него Бошњаците и Албанците се само „резервоар на гласови“ и ништо повеќе. Затоа е важно припадниците на малцинските заедници да не подлегнуваат на силниот притисок на Ѓукановиќ, бидејќи мора да ја градат својата иднина со другите сограѓани без Ѓукановиќ, кој ја завршува својата политичка кариера. Пресвртот на Бошњаците и Албанците нема да биде лесно да се направи, бидејќи поединци од нивните партии се вмешани во криминал и корупција, а некои дури и во воените настани во Босна и Херцеговина и Хрватска заедно со Ѓукановиќ. Криминалот и корупцијата на Ѓукановиќ се поголеми од „Голема Србија“. Најзначајна поддршка на режимот на Мило Ѓукановиќ му дава Република Хрватска. Црна Гора и Хрватска најдоа спонзори во Кина, но и во Руската Федерација. Овие две земји се обидуваат да ги претстават и оправдаат своите нетранспарентни односи со Кина, но и со Руската Федерација како „добри деловни потези“. Со пенкало во рака до демократијата Претседателските избори се одржуваат во време на распишување на предвремените парламентарни избори кои треба да се одржат на 11 јуни 2023 година и посетата на премиерот на Црна Гора, Дритан Абазовиќ на САД. Претседателските избори се последна можност да се замени последната функција која не е сменета во земјата од 1989 година – функцијата претседател. Се смета дека транзицијата е завршена кога носителите на функциите физички и демократски ќе бидат сменети од сите клучни позиции. Затоа, претстојните избори симболично ќе значат крај на транзицијата во Црна Гора. Аналитичарите сметаат дека на претстојните претседателски избори е важно граѓаните на Црна Гора, обединети во сите свои разлики, без страв и странски влијанија, демократски да се спротивстават на деценискиот режим на Мило Ѓукановиќ со пенкало во рака и да го урнат тој режим, и конечно Црна Гора по 34 години по демократски пат да го порази Ѓукановиќ. Иако Мило Ѓукановиќ дојде на власт преку улица, тој ќе биде соборен од власт на демократски начин. При заминувањето од власт, покрај гласовите на припадниците на малцинските заедници и дијаспората, важна улога ќе имаат и младите гласачи, кои треба да бираат меѓу минатото и иднината. Високиот одѕив е важен за легитимитетот на идниот претседател. Гласовите за Јаков Милатовиќ се поддршка на избирачите за членство во ЕУ, а неговата победа е поттик дека ЕУ треба брзо да ја прими Црна Гора во членство. Приказните за српското и руското влијание за човек кој цел живот студирал и работел на западната хемисфера се неосновани. Ако Милатовиќ може да се означи дека наводно претпочита некоја просрпска опција, тогаш и тоа е негов квалитет, кој може да биде во функција Црна Гора, да ги смири сегашните антагонизми во црногорското општество и да го постигне толку потребниот внатрешен консензус за иднината на земјата. Милатовиќ може да биде прифатлив за мнозинството Црна Гора. Според матрицата на Мило Ѓукановиќ, сите што се негови политички противници работат за Србите, односно за Србија. Милатовиќ треба да биде свесен за фактот дека тој ќе биде одговорен за евентуално скршнување од патот кон НАТО и ЕУ, што на крајот може да предизвика внатрешни конфликти во Црна Гора. Милатовиќ е личност која би можела да балансира меѓу двете опции во Црна Гора, т.е. меѓу „Запад“ и „Исток“ во корист на напредокот и светлата иднина на таа земја. Важно е што во регионот започнаа позитивни процеси кои полека, но сигурно ги елиминираат носителите на криминалот и корупцијата, како Никола Груевски (ВМРО-ДПМНЕ), Хашим Тачи (ПДК), Бојко Борисов (ГЕРБ) и на ред Мило Ѓукановиќ. дојдоа (ДПС) и Еди Рама (ПС). Аналитичарите сметаат дека заминувањето на Ѓукановиќ ќе го отвори патот за побрз пристап на Црна Гора кон членство во ЕУ. Во моментов европскиот пат е запрен и блокиран токму поради Ѓукановиќ, а од 2 април во Црна Гора започнува ерата по Ѓукановиќ. (ИФИМЕС)

Претседателски избори во Чешка, фаворит е поранешниот генерал Петр Павел

Тале Кристо — Fri, 27 Jan 2023 08:27:30 +0000

Поранешниот командант на чешката армија Петр Павел, прозападен кандидат кој ја поддржува помошта за Украина, има голема предност пред поранешниот премиер Андреј Бабиш додека Чесите влегуваат во вториот круг од гласањето за нов претседател. Пензионираниот генерал Павел (61) се кандидираше како независен кандидат и има поддршка од централно-десничарската чешка влада. Чешките претседатели немаат многу секојдневни овластувања, но тие избираат премиери и гувернери на централните банки, имаат право на глас во надворешната политика, моќни креатори на мислење се и можат да влијаат на владината политика. Се проценува дека Павел има десет пати поголеми шанси да победи од милијардерот Бабиш, а водеше во најновите истражувања на јавното мислење објавени во понеделникот. Гласањето започнува денеска во 14 часот, а завршува утре во 14 часот. Резултатите се очекуваат нешто подоцна. Павел се пријавил во армијата за време на комунистичката ера кога Прага беше дел од Варшавскиот пакт предводен од Советскиот Сојуз и беше одликуван за неговото учество во мировните операции во поранешна Југославија во 1990-тите. Тој се искачи на рангот на командант на чешкиот Генералштаб и служеше како претседател на Воениот одбор на НАТО три години пред да се пензионира во 2018 година. Бабиш (68) е деловен магнат во секторот на хемикалиите, храната, земјоделството и медиумите, кој беше премиер од 2017 до 2021 година. Тој рече дека ќе понуди да посредува во мировните разговори и сугерираше дека Павел, како поранешен војник, може да ја вовлече Чешка во војна. Павел ги отфрли обвинувањата нарекувајќи ги „бесмислици“. Андреј Бабиш е поддржан од претседателот во заминување Милош Земан, кој се залагаше за поблиски врски со Кина и Русија додека Русија не ја нападна Украина.

Чесите избираат нов претседател

Ивона Петрова — Fri, 13 Jan 2023 06:37:13 +0000

Повеќе од осум милиони чешки гласачи попладнево и утре ќе излезат на гласање за да одлучат на третите директни избори кој ќе застане на чело на државата. Меѓу осумте кандидати нема личности од калибарот на првите тројца претседатели: Вацлав Хавел, Вацлав Клаус и во последните два мандата Милош Земан. Иако има осум кандидати, само тројца фаворити за шеф на државата имаат реални шанси да ги освојат гласовите на Чесите. Магнат од агро и хемиска индустрија, имигрант од Словачка, петти најбогат во Чешка, поранешен популистички премиер близок до унгарскиот премиер Виктор Орбан, Андреј Бабиш; поранешен началник на Генералштабот и втор човек на НАТО како шеф на Воениот комитет на НАТО, пензионираниот генерал Петр Павел; и поранешната ректорка на Универзитетот Мендел во Брно, економистката Дануша Нерудова. Фаворити според анкетите се Бабиш и Павел, додека Нерудова заостанува зад нив. Сите тројца се залагаа за помош на Украина да се одбрани од Русија, додека Бабиш рече дека ќе свика мировен самит во Прага за конечно да се реши конфликтот. Предизборните анкети предвидуваат речиси сигурна победа во вториот круг, со 57 отсто од гласовите, на генералот Павел, независен кандидат чија кампања е спонзорирана главно од бизнисмени блиски до десниот центар и граѓанското општество. За разлика од странските аналитичари, чешките коментатори и политиколози главно не се претерано убедени дека шансите на Бабиш значително ќе се зајакнат со фактот што пет дена пред изборите, Градскиот суд во Прага го ослободи од обвинението за манипулација со субвенциите на Европската унија. Противниците на Бабиш и на претседателот во заминување Земан бараа нов шеф на државата преку оглас на Jobs.cz каде бараат „морален модел и менаџер на среќата на целото општество кој ќе стави крај на ерата на ароганцијата и презир кон луѓето“, а во замена нудат замок Храдчани во Прага, летниот замок Лани, патувања во странство и постојано медиумско внимание. За овие избори, според проценките на аналитичарите, ќе одлучуваат неопределени гласачи, кои ги има невообичаено многу: од петтина до третина од гласачкото тело според различни анкети. Исходот од првиот круг од изборите ќе биде познат в сабота навечер, а веројатно вториот круг ќе биде за 14 дена.

„САКАМ ДА БИДЕ НЕКОЈ РАЗУМЕН“: Маск откри кој републиканец би го поддржал на изборите во 2024 година, а тоа не е Трамп

Магдалена Андонова — Sat, 26 Nov 2022 10:54:24 +0000

Американскиот милијардер Илон Маск денеска изјави дека ќе го поддржи републиканскиот гувернер на Флорида Рон ДеСантис на претседателските избори во 2024 година, доколку сака да се кандидира.

Would you support Ron DeSantis in 2024, Elon?
— Proud Elephant 🇺🇸🦅 (@ProudElephantUS) November 26, 2022

- Мојата желба за претседателските избори во 2024 година е кандидатот да биде некој разумен и центрист во исто време. Се надевав дека тоа би можело да биде некој од администрацијата на Бајден, но досега бев разочаран, напиша Маск на Твитер. Претходно овој месец, ДеСантис го победи демократот Чарли Крист со повеќе од 20 отсто во трката за гувернер на Флорида да остане прв човек на државата, додека Ројтерс проценува дека тој станал ѕвезда во подем меѓу републиканците. Политичките експерти го оценија ДеСантис, кој се сметаше за потенцијален предизвикувач на Доналд Трамп во партијата, кога станува збор за кандидатурата на Републиканската партија за претседателските избори во 2024 година.