превртен чамец – Kurir.mk

Бројот на загинати при превртување на чамец кај Сирија се искачи на 60 лица

Дарко Андоновски — Fri, 23 Sep 2022 11:45:59 +0000

Најмалку 60 лица се удавија при превртувањето на чамецот со мигранти во близина на сирискиот брег. Гувернерот на сириската провинција Тартус, Абдул Халим Калил за локалните медиуми денеска изјави дека потрагата за уште тела е во тек. Чамецот што испловил од Либан се преврте пред два дена. Во текот на изминатиот месец, илјадници Либанци, Сиријци, Палестинци го напуштија Либан и преку море се упатија кон Европа. Во Либан живеат околу шест милиони луѓе, вклучувајќи и повеќе од милион сириски бегалци. Над три четвртини од населението живее во сиромаштија поради економската криза во земјата од 2019 година.

Загина дете во близина на грчки Лезбос

Катерина Бојаџиева — Mon, 02 Mar 2020 09:53:10 +0000

Во акција за спасување на бегалци и мигранти на грчката крајбрежна служба во близина на Лезбос, од морето било извлечено мртво дете, откако се превртил чамец во кој имало 48 лица, јави дописничката на МИА од Атина. Како што соопштуваат од грчката крајбрежна служба, чамецот го превртеле самите мигранти, за да се спроведе спасувачка акција, нешто што е честа тактика по препорака на криумчарите. Спасени биле 46 лица, а две деца пренесени во болница. Едното, и покрај обидите на лекарите да го вратат во живот, починало. Другото дете е хоспитализирано и е вон животна опасност. Чамецот со мигрантите и бегалците, во 8.30 часот утрово, според крајбрежната служба, пловел во придружба на турски патролен брод, на граничната линија во близина на Лезбос. -Кога влезе во грчките територијални води и се доближи брод на крајбрежната служба, патниците го превртија чамецот (станува збор за вообичаена тактика по препорака на криумчарите за да се спроведе спасувачка акција), соопштуваат од грчката крајбрежна служба.

Исчезнати две лица по судир на чамец со мигранти и брод на грчката крајбрежна служба

Дарко Андоновски — Wed, 23 Oct 2019 07:23:53 +0000

Во тек е акција за пронаоѓање и спасување на две лица, меѓу кои едно дете, откако утрово се судри чамец што пренесувал бегалци и мигранти со патролен брод на грчката крајбрежна служба во морскиот дел, источно од островот Кос, jави дописничката на МИА од Атина. Во чамецот што од турското крајбрежје се упатил кон Грција, имало 34 лица, а од грчката крајбрежна служба соопштуваат дека од спасените, седум биле пренесени во болницата на Коса, меѓу кои има и една бремена жена. Двајца се повредени, а останатите петмина превентивно биле префрлени в болница. Со три бродови на крајбрежната служба, два од Фронтекс, еден хеликоптер супер пума, приватни чамци, како и припадници на специјалната нуркачка единица продолжува спасувачката акција за пронаоѓање на маж и дете од Сирија. Според првичните информации од грчката крајбрежна служба, чамецот со бегалци и мигранти немал никаква сигнализација, а ниту едно од лицата што се превезувале не носло елек за спасување. За време на судирот, бродот на крајбрежната служба бил на редовна патрола во морскиот дел.

Исчезна 15-годишно девојче: Се преврте чамец со бегалци кај Лезбос

Катерина Бојаџиева — Wed, 13 Feb 2019 14:47:29 +0000

Гумен чамец со бегалци се преврте североисточно од грчкиот остров Лезбос, по што крајбрежната служба спасила 51 лице и трага по 15-годишно девојче, јави дописничката на МИА од Атина. Според локалните медиуми, бегалците тргнале од Турција кон Грција, а чамецот се превртил во близина на островот Лезбос.