пријавување – Kurir.mk

Последен ден за пријавување на „Виз Ер Скопски маратон 2022“

Дарко Андоновски — Tue, 20 Sep 2022 07:53:41 +0000

Заинтересираните тркачи уште денеска ќе можат да се пријавуваат за 18-та скопска трка „Виз Ер Скопски маратон 2022“, што ќе се одржи на 2 октомври годинава. „Виз Ер Скопски Маратон“ е во организација на Сојузот на спортови на Скопје, во соработка со Атлетски Клуб „Работнички“ од Скопје, а под покровителство на Град Скопје, Делегацијата на ЕУ и Агенцијата за млади и спорт. Заинтересираните ќе можат да се пријавуваат на следниот линк. Организаторите на манифестацијата информираат дека оваа година стратот и целта се враќаат на својата претпознатлива локација, стартот ќе биде пред Собранието на Република Северна Македонија, додека целта ќе биде Плоштадот „Македонија“. Стартот на маратонот, полумаратонот и штафетната трка- ЕУ за спорт ќе биде во 8:00 часот, а трката на 5км ќе започне во 08:10 часот. – Подигнување на стратните пакети сите учесници ќе имаат можност да го направат тоа од 29.09.2022 (четврток) до 01.10.2022 (сабота) во Веро Центар, од 11:00 до 19:00 часот. При подигнување на пакетот тркачите ќе треба да прикажат потврден меил од пријавата или документ за идентификација. Секој учесник на Виз Ер Скопски маратон добива вредносен ваучер од 20 евра од насловниот спонзор на трката, Виз Ер кој можат да го користат до наредното издание на маратонот, посочуваат организаторите. Повеќе информации можат да се најдат на официјалната страна на маратонот, како и на Фејсбук страната.

Истекува рокот за пријавување за гласање во домашни услови за изборите во Маврово и Ростуше, Центар Жупа, и за Совет на Тетово

Ивона Петрова — Fri, 12 Aug 2022 05:33:05 +0000

Рокот за пријавување за гласање во домашни услови за болни и немоќни лица и оние кои се во изолација за изборите за градоначалници на општините Маврово и Ростуше и Центар Жупа и за членови на Советот на Општина Тетово истекува денеска. Гласањето за овие лица е на 19 август, а изборите ќе се одржат на 20 август. Тие треба да се пријават или електронски во Општинската изборна комисија или преку овластено лице. Бидејќи денот на одржување на изборите е сабота, овие лица треба да гласаат во петок на 19 август, во работен ден. – Со оглед на тоа што гласањето е во работен ден, сите членови на избирачките одбори, треба да бидат ослободени од работни обврски и општинските комисии треба да им дадат потврда која треба да ја однесат на работа, изјави потпретседателката на ДИК Дитмире Шеху. На 19 август, петок, ќе гласаат и затворениците. Изборите за градоначалник на Општина Маврово и Ростуше и градоначалник на Центар Жупа и Совет на Општина Тетово треба да се одржат на 20 август.

Пријавувањето за гласање на болни и немоќни завршува утре на полноќ, за лицата со Ковид-19 на 11 октомври

Ивона Петрова — Fri, 08 Oct 2021 08:37:58 +0000

Првиот круг на Локалните избори 2021 ќе се одржи на 17 октомври. Финишираат активностите за изборите како на Државната изборна комисија така и на учесниците на изборите. Први своето право на глас на овие избори ќе го искористат лицата што ќе се пријават да гласаат како болни и немоќни, болни од Ковид-19 или во самоизолација, затворениците, лицата во притвор, во стaрските домови и внатрешно-раселените лица. Тие гласаат ден претходно, на 16 октомври, а за нив за утврдување на идентитетот и проверката дали веќе гласале нема да се врши со уреди за биометриска идентификација, туку за нив ќе користи спреј и УВ ламба. Пријавувањето до општинските изборни комисии за гласање на болните и немоќните завршува утре (9 октомври на полноќ), додека рокот за лицата со Ковид -19 или во самоизолација е до 11 октомври на полноќ. Во однос на лицата со Ковид-19 и во самоизолација, предвидено е Општинската изборна комисија по службена должност да собере податоци од Државниот санитарен и здравствен инспекторат за лица кои се пријавени за гласање согласно со член 111-б став (1) од Изборниот законик. ДСЗИ е должен во рок од 24 часа од добиеното барање да ги достави до ОИК податоците за лицата пријавени за гласање. Гласањето на лицата со Ковид-19 или во самоизолација го спроведува посебен избирачки одбор составен од здравствени работници. Избирачите кои на денот на гласањето се наоѓаат на издржување мерка куќен притвор, а кои сакаат да гласат, преку овластен полномошник ќе ја известат ОИК најдоцна три дена пред денот определен за гласање (13 октомври на полноќ). Избирачите кои на денот на гласањето се згрижени во посебни установи за вонсемејна грижа гласаат во установата каде што се згрижени, еден ден пред денот определен за одржување на изборите, по претходна пријава до одговорното лице на установата каде се згрижени. Ова гласање го спроведува избирачкиот одбор на чија територија се наоѓа установи за вонсемејна грижа, на 16 октомври.

Денеска започнува пријавувањето за 17. Виз Ер Скопски Маратон 2021

Магдалена Андонова — Tue, 29 Jun 2021 08:12:04 +0000

Виз Ер Скопски Маратон 2021 ќе се одржи на 2 и 3 октомври, а почнувајќи од денеска од 10 часот официјално започнува пријавувањето на учесниците, кое ќе биде отворено до 15 септември 2021 година, односно до пополнување на предвидениот број на учесници. Сабота, 2 октомври, оваа година ќе биде резервирана за трката на пет километри, со старт од 17 часот, а во недела, на 3 октомври, од 8 часот наутро ќе се трчаат маратонот, полумаратонот и штафетниот маратон – ЕУ за спорт. Од организацијата информираат дека сите тркачи кои поради пандемијата, своите пријави за маратон и полумаратон од 2020 година ги префрлиле за 2021 година, преку електронска пошта ќе добијат код за регистрација, за да може да ја искористат бесплатната котизација за настанот оваа година. – Доколку некој биде спречен повторно да не учествува и оваа година, ова право ќе може да го искористи за маратонот во 2022 година. Оние учесници кои биле пријавени за трката на пет километри во 2020 година, која беше одложена, автоматски ќе се префрлат за оваа година со истиот стартен број кој го добиле, се наведува во соопштението. Пријавувањето за Виз Ер Скопскиот Маратон 2021 може да се направи на официјалната веб страна www.skopskimaraton.com.mk, каде може да се најдат и сите други информации за настанот. Организаторите на маратонот, Сојузот на спортови на Скопје, во соработка со Атлетски Клуб „Работнички“ од Скопје ги повикуваат сите љубители на спортот и трчањето, да ја искористат можноста и да се пријават на овој спортски настан. Трката ќе биде организирана според безбедносните протоколи и препораки утврдени од Владата и Комисијата за заразни болести, со цел заштита на учесниците и организаторите. (МИА)

Андоновска:Системот за вакцинирање со сериозен недостаток, доколку граѓаните се пријават повеќе пати за вакцинација, системот го регистрира последното пријавување

Магдалена Андонова — Fri, 11 Jun 2021 13:07:21 +0000

Луѓе, ако сте веќе еднаш пријавени на vakcinacija.mk не се пријавувајте повторно,затоа што според кажувањата на одговорно лице за електронско пријавивање, се евидентира само датата на вашата последна регистрација на сајтот! Ова е моето денешно искуство 👇 На барање на повеќе граѓани кои се над 60год и покажале интерес за вакцинација, пријавувајќи се на vakcinacija.mk, се јавив во Министерство за здравство да добијам одговор зошто овие луѓе сеуште немаат добиено термин за вакцинирање, а многу помлади кои не спаѓаат во приоритетни категории, веќе го имаат сторено тоа. Од таму ме препратија да се обратам на бројот 0215444 како компетентни лица кои можат да ми одговорат. После повеќе обиди успеав да ги добијам. Јас се преставив и ги поставив моите прашања. Госпоѓата која ми се јави беше многу љубезна и културна, но одговорот воопшто не ми се допадна. Најпрво ми рече дека се направил пресек до 30.04.2021 и оние кој се пријавиле до таа дата добиваат термин за вакцинација. Јас и реков дека има луѓе кои се над 60год и не само што се имаат пријавено до 30.04, туку тоа го прават секој втори,трети ден со цел дека ќе добијат термин. Е тука го слушнав она што не ми се допадна. Госпогата ми одговори дека не требало да се пријавуваат повеќе пати бидејќи системот го регистрира само последното пријавивање. Ова би значело дека многумина кои се пријавиле на vakcinacija.mk пред 30.04, а потоа повторно се пријавувале, регистрирана е последната дата. И реков дека ова е сериозен недостаток на системот и ако е така како што таа ми тврди, тогаш граѓаните треба да се известени за ова, а тие како министерство да сторат нешто за проблемот да биде надминат. Фејсбук статус на Марија Андоновска

Над 43 илјади граѓани се пријавиле за вакцинирање против Ковид-19 преку онлајн апликацијата

Дарко Андоновски — Sun, 14 Feb 2021 14:13:28 +0000

Вкупно 43.335 граѓани досега се пријавиле за вакцинирање против Ковид-19 преку веб-страницата „Vakcinacija.mk“. Преку матичните лекари пријавени се 13.511 лица, информираа за МИА од Министерството за здравство. Веб страницата беше пуштена во функција во средата, а на неа може да се пријави секој граѓанин со тоа што системот ќе биде тој кој ќе генерира кои граѓани ќе бидат приоритетни. Освен на овој начин, пријавувањето за вакцинирање може да се врши и преку матичните лекари преку системот „Мој термин“. Надлежните институции утврдија како ќе се одвива процесот на вакцинација. Во првата група се здравствените работници и лицата над 70 години. Во државава денеска пристигна и првата пратка вакцини против Ковид-19. Станува збор за вакцини на компанијата „Фајзер“ кои се донација од Србија. Првите 4.680 од предвидените 8.000 вакцини на „Фајзер“ денеска на граничниот премин Табановце на премиерот Зоран Заев му ги предаде српскиот претседател Александар Вучиќ. Кон средина на месецов се очекуваат и 200 илјади вакцини од кинеската компанија „Синофарм“. Во земјава треба да пристигнат и дополнителни дози од „Фајзер“ кои се обезбедени од директните преговори со компанијата, како и дози преку Ковакс системот.

Од денеска во Македонија стартува пријавувањето за вакцинирање против корона вирус

Тале Кристо — Wed, 10 Feb 2021 06:55:08 +0000

Интернет страницата преку која граѓаните ќе можат да се пријават за вакцинација против Ковид-19, треба да профункционира од денеска. -Секој сам ќе може да се пријави, а системот ќе биде тој кој ќе генерира кои се приоритетни, информираше вчера министерот за здравство Венко Филипче. Освен по електронски пат со регистрација на интернет-страницата за вакцинација, пријавувањето за вакцини ќе се врши и преку матичните лекари преку системот „Мој термин“. Утврдено е како ќе се спроведува процесот на вакцинација против Ковид-19. Капацитетот за вакцинирање изнесува по 880 лица дневно во сите поликлиники во Здравствениот дом во Скопје и дополнителни близу 500 во пунктот во Клиничкиот центар во Скопје. Вакцинацијата ќе почне со здравствените работници и со лица над 70 години. – Засега се пријавени четири илјади работници, од коишто околу две илјади се во Скопје, останатите се во другите градови. Таму вакцинацијата ќе се спроведува во пунктови по примерот на вакцинацијата за сезонски грип, така што еве сега во првиот момент кога вакцините ќе стигнат може и практично да започне процесот на вакцинација, нагласи Филипче. Во согласност со капацитетот на здравствениот кадар, во некои поликлиники и здравствени домови ќе има по повеќе вакцинални пунктови кои ќе работат во две смени за да може да се имунизираат поголем број граѓани. – Конкретно, конкретен пример, поликлиниката „Јане Сандански“, две смени во три пункта, што значи дека 240 луѓе на ден ќе може да се вакцинираат согласно физичките параметри на просторот – влез, излез, немешање, еден одреден период од 10-15 минути коишто после вакцинација граѓаните треба да почекаат заради евентуална појава на алергиска реакција, што е вообичаена постапка при вакцинација, се прави тој распоред, додаде Филипче. Директор на Здравствен дом Скопје, Виктор Исјановски вчера посочи дека направиле план во соработка со Министерството, со Комисијата и со Комитетот за имунизација. – Како што спомна министерот, во трите поголеми поликлиники „Букурешт“, „Јане Сандански“ и „Чаир“ работното време ќе биде од 8 до 20 часот. Во останатите четири клиники ќе работат во попладневните часови со боксови, со капацитетите коишто располагаме и мислам дека 22 позиции се доволни во овој момент да опфатиме се, додаде Исјановски. До крајот на февруари во државава се очекува да пристигнат 200.000 вакцини од кинескиот производител „Синофарм“. Во март се очекуваат вакцините на „АстраЗенека“ согласно КОВАКС механизмот. Премиерот Зоран Заев завчера најави дека следната недела можно е да пристигнат и вакцини од „Фајзер“. Додека се чекаат првите вакцини против Ковид-19, во државата состојбата со коронавирусот и натаму се стабилизира. Вчера од направени 2863 тестирања, беа регистрирани 476 нови случаи. Починаа девет лица, а 407 пациенти беа регистрирани како оздравени. Вкупната бројка на ковид-дијагностицирани лица од почетокот на епидемијата изнесува 95.347, на оздравени 85.846, а на починати 2.955. Активни се 6.546 случаи, најмногу во Скопје – 3256, по што следат Охрид – 368, Кавадарци – 360, Куманово – 255, Тетово – 235, Делчево – 202. Во другите градови има под 200 активни случаи. На инфективните оддели во земјава се лекуваат 591 пациент со Ковид-19, од кои во болниците низ државата 326, а во главниот град 265. Во ковид-центрите има околу 490 празни болнички кревети. Во Скопје околу 90 слободни болнички легла. Во ГОБ „8 Септември“ има вкупно 69 болни, а на Клиниката за инфективни болести лежат 90 пациенти, додека во Институтот за белодробни заболувања кај деца Козле има 32 пациенти, на ГАК три пациентки. Голем дел од пациентите се на кислородна поддршка. Завчера лабораторијата на МАНУ утврди присуство на мутираниот сој од Велика Британија на Ковид-19 кај 45 пациенти. Надлежните од Центарот за јавно здравје предупредуваат дека наредниов период очекуваат зголемување на бројот на нови случаи на британскиот сој, бидејќи тој многу побрзо се шири, односно е позаразен во однос на претходниот. Министерството за здравство смета дека засега нема индикација дека треба да има заострување на мерките по појавата на британскиот сој кај нас, но се следи состојбата и се прават интензивни анализи на типот на вирусот. Досега во светот се заразија над 107 милиони жители, 2,3 милиони починаа, а оздравеа 79 милиони. Првите случаи на коронавирус беа регистрирани во декември 2019 година во Вухан, а епидемијата потоа се прошири во целиот свет. Истражителите на СЗО, кои од пред извесно време во Вухан, и кинеските експерти вчера соопшти дека животното од кое потекнува коронавирусот не е пронајдено и оти нема индиции дека бил присутен во кинескиот град Вухан многу порано пред да биде откриен. Преносот од животното е веројатен, но „сè уште не е идентификувано“, изјави шефот на делегацијата кинески научници, Лианг Ваниан. – Нема доволно докази за да се утврди дека САРС-КоВ-2 се проширил во Вухан пред декември 2019 година, рече Лианг. Шефот на делегацијата на СЗО, Питер Бен Ембарек, пак изјави дека пренесувањето на коронавирус од првото животно, а потоа и од второ животно како посредник пред да се прошири на луѓето, е „најверојатната“ хипотеза. -Сепак, тоа бара „поконкретно и насочено истражување“, рече тој. Ембарек исто така оцени дека хипотезата оти коронавирусот „избегал“ од лабораторија е „крајно неверојатна“. -Исклучително неверојатно е коронавирусот да почнал по инцидент во лабораторија во Кина, изјавија вчера истражители на Светската здравствена организација, кои веќе неколку дена се обидуваат да го расветлат потеклото на коронавирусот во Кина. Истражувачите веруваат дека најверојатната причина за првичното избувнување на инфекцијата од коронавирусот е „скокање на вирусот“ од животно врз човек. Ова значи дека идните истраги нема да се фокусираат на лабораториски инцидент како можна причина за појавата на инфекцијата со коронавирусот. Научниците откриле и дека коронавирусот циркулирал во региони надвор од Вухан пред првиот пријавен случај на инфекција.

Маж си ја пријавил сопругата дека не ги почитува ковид мерките

Магдалена Андонова — Mon, 07 Dec 2020 13:19:33 +0000

Началникот на Комуналната полиција во Белград, Иван Дивац, раскажува за необичен случај кога сопруг ја пријавил сопругата за непочитување на ковид-мерките. До сега сме биле во различни ситуации. Неодамна еден човек ја пријави сопствената сопруга, жалејќи се дека нивното дете кое отсуствува од школо и се наоѓа во самоизолација, го однела во трговски центар, истакна Дивац. На гостувањето на „Прва“ тој додал дека во овој момент голем проблем претставува што полицијата на терен нема доволно луѓе, само 320 полициски службеници за цел Белград и затоа може да се случи граѓаните кои пријавуваат да почекаат и до еден час.

Заев знаел за „Рекет“ 20 дена пред да го пријави, го криел и менаџирал криминалот

Тале Кристо — Thu, 07 May 2020 15:34:02 +0000

Екс премиерот Зоран Заев го предупредил првообвинетиот во Рекет – Боки 13 дека има случај за него, ова пред судот денеска го тврдеше Бојан Јовановски. -Се тргуваше со овој случај, Катица Јанева беше уценета или ќе дадеш оставка или ќе се случи ова што се случува сега. На 3 април гостуваше Заев во телевизијата. По емисијата разговаравме во мојата канцеларија и Заев ми кажа дека и мене и Катица не следеле странски служби. Ме уплаши и изманипулира дека странски обвинител имал се за мене. Жал ми е што не се вештачи мојот мобилен да се види целата комуникација со Заев, рече на денешното рочиште Бојан Јовановски.

Заврши рокот за пријавување на македонските граѓани кои сакаат да се вратат во земјава

Ивона Петрова — Mon, 23 Mar 2020 06:29:42 +0000

Заврши рокот во кој македонските граѓани заглавени во меѓугранични простори или на аеродроми можеа да се пријават пријават во најблиското конузларно претствништво. Министерството за надворешни работи и Министерството за транспорт ќе организираат хуманитарни летови и конвои за да можат да ги вратат назад. Според информациите на Министерството за надворешни работи такви се околку 2.300 граѓани, најмногу затечени во европските земји. Сите што на ваков начин ќе пристигнат во државава ќе бидат ставени во задолжителен државен карантин од 15 дена. Граѓаните можеа да се пријават на е-меил адресите и телефоните на дипломатско-конзуларните претставништва во земјите каде што се наоѓаат или во најблиското конузларно претствништво во соседната земја или во земјата од регионот. Според министерот за надворешни работи Никола Димитров, пријавувањето на граѓаните било важно за да се има прецизна евиденција и податоци, за да може да почне организирањето на конвоите. Тој завчера најави и дека деновиве ќе биде организиран хуманитарен конвој од Црна Гора каде има околу 70 наши граѓани. И тие ако дојдат во земјава ќе бидат ставени во задолжителен карантин. Трошоците ќе бидат на товар на државата. Се контактираат и сите земји од шенген зоната – доколку некои граѓани поради актуелната состојба со коронавирусот го пробијат рокот за максимум престој од 90 дена да не сносат правни последици.