прилепски театар – Kurir.mk

Прилепскиот театар вечерва ќе ја изведе „Глембаеви“ во Загреб

Ивана Ефремовски — Tue, 04 Jul 2023 13:05:08 +0000

Театарот „Војдан Чернодрински“ со претставата „Глембаеви“ во режија на Бранко Брезовец, гостува во Загреб на фестивалот посветен на Мирослав Крлежа. Загребската публика има можност вечерва од 21:оо чaсот во сатиричниот театар Керемпух, да ужива во изведбата на „Глембаеви“ која е критика на нововековната тајкунска чудовишност. Композитор е Никола Мицевски, сценографијата е на Ивана Кнез, а сценографијата на Сузана Брезовец. Со фестивалот „Мирослав Крлежа“ кој трае до 7 јули, годинава се одбележуваат 130 години од неговото раѓање. -Фестивалот нуди богата и разновидна програма и е културен настан на загребачкото културно лето и место за средба на Крлежа со уметниците и публиката. Токму затоа и учеството на нашиот театар на овој фестивал е од големо значење, велат од прилепскиот театар.

Прилепскиот театар премиерно ќе ја изведе „Мистерија Буфо“, последната претстава од годинашната програма

Ивана Ефремовски — Tue, 15 Nov 2022 14:22:47 +0000

Прилепскиот народен театар „Војдан Чернодрински“ утревечер од 19,30 часот на матичната сцена на Театарот ќе ја иведе последната премиера од годинашнава програма, „Мистерија Буфо“ според Дарио Фо во режија на Андреј Цветановски кому ова му е прва професионална соработка со прилепскиот ансамбл. Претставата е според приказни на Фо од средновековието и во фокусот на поголемиот дел од сцените е обичниот човек кој се буни и ја критикува состојбата во која се наоѓа, слично и во средновековието и денес. Според режисерот Андреј Ц ветановски театарската игра е радосна и хомогена. -Овој театар за мене има фамилијарна вредност. Татко ми повеќепати работеше со прилепскиот ансамбал. Тој дух на неговата работа беше присутен во процесот на работа на претставата. Посебно е задоволството на работата со ансамблот кој игра до крај и докрај ѝ се радува на театарската игра. А тоа е многу битно, според мене, за создавање добра претстава. Претставата е вруток и мешавина на многу емоции и низ неколку приказни кои ги напишал Дарио Фо според мистериите како жанр на средновековниот театар, направивме радосна претстава. На таа радост во играта се темели претставата. Се надевам дека ова е почеток на едно прекрасно пријателство, вели реќисерот Андреј Цветановски. Актерката Наташа Ачански вели дека се чувствувал и духот на режисерот Владо Цветановски. – Моето чувство е што нѐ врати малку назад, кога работевме со Владо Цветановски и многу ми е драго зашто режисерот Андреј носи дел од енергијата на владо. Таква радост во театарската игра одамна не сум почувствувала. Постојано бевме во процесот, од утро до вечер со енергија и симбиоза. Актерот Илија Вочески го нагласува искуството на ансамблот во колетивната игра. -Прилепскиот театар е познат по колективните претстави. Поврзани сме сите како ансамбл и полесно беше да се „прочитаме“ на сцената. Сепак овој процес беше различен зашто сите мораа исто „да дишат“ без разлика дали се во прв или втор план. Тоа бара максимална концентрација. Првпат имам улога на шут (дворски) и беше огромен предизвик. Во претставата е изразен став како обичниот човек е претставен во театарските трупи од средниот век, смета Волчески. Томе Темелкоски, автор на музиката ја нагласува улогата на актерите во создавањето на музичката подлошка во претставата, а актерот Димитар Ѓорѓиевски го споделува чувството на заедничкото создавање. – Музиката се раѓаше со секоја сцена. Како се обликуваше сцената, така беше и музиката и сето стана хомогено. Голема е поддршката од актерите, вели Темелкоски. -И улогите и музиката сите заедно ги градевме. Си помагавме. Сето тоа создае една хомогена театрска група и се надевам со многу успешен театарски производ, изјави Ѓорѓиевски. Во претставата „Мистерија Буфо“ сценографијата е на Сергеј Светозарев, костимите се на Марта Дојчиновска, а драматург и задолжена за преводот е Лидија Митоска Ѓорѓиевска. (МИА)

Прилепскиот театар „Војдан Чернодрински“ одбележува 72 години постоење

Ивона Петрова — Fri, 18 Feb 2022 07:03:17 +0000

Со претставата „Кир Јања" од Јован Стерија Поповиќ, во режија на Аце Михајловски, на денешен ден во 1950 година, точно пред 72 години, прилепскиот народен театар „Војдан Чернодрински" го означи постоењето како значајна институција во македонската театарска уметност. Во досегашното опстојување, прилепскиот театар прикажал над 360 премиери, одиграни се преку 7.000 претстави кои ги гледале повеќе од 1,6 милиони луѓе. Годишнината театарот „Војдан Чернодрински" ќе ја одбележи со изведбата на претставата „Да, инспекторе, Претстава со грешки" во режија на Синиша Ефтимов, вечер од 19:30 часот на матичната сцена на театарот. Претставата „Да, инспекторе, Претстава со грешки" е последната премиера во Прилепскиот театар работена по мотиви на текст од Хенри Џонатан Хенри, во која, како и во секоја претстава, сите грешки актерите се обидуваат сѐ поуспешно да ги прикријат без публиката да забележи, ама во оваа претстава сѐ што можете и не можете да замислите се одвива погрешно. Симболиката на дејството во претставата како да отсликува еден голем растеж на значајна театарска институција во земјава која дала бројни имиња, доајени на македонската театарска уметност. Уште од рпвата претстава „Кир Јања" во далечната 1950 година, бројните генерации актери, „вооружени" со елан, самопожртвување и творечки занес го покренаа „плугот да ја ораат театарската ледина", уверени дека ангажманот ќе даде плод. Така и би. Низ годините се ределе премиерите, се нижеле успесите и падовите на Театарот, а колективот се збогатувал со искуство во секојдневната практика. Денеска е ансамбл со врвни актерски имиња. Во досегашните 72 години постоење на Прилепскиот театар најгледани и најиграни претстави се: „Солунски патрдии" од Миле Попоски, во режија на Коле Ангеловски и „Од кол на кол", исто во режија на Коле Ангеловски, претставите имаат преку сто изведби. Голем успех театарот низ годините има постигнато и со претставите „Силјан Штркот" „Туѓо сакаме, свое не даваме", „Колобан", „Молам за секс", „Спиро Црне" „Арсениј", „Полковникот птица", „Опера за три гроша", „Змејовата невеста" и други претстави. Сепак, претставата „Тапани во ноќта" од Бертолд Брехт, во режија на Мартин Кочовски, го воздигна театарот и беше бренд не само на македонскиот, туку и на балканскиот театар. Со „Тапаните во ноќта" театарот освои три награди на фестивалот МЕСС во Сараево и беше победник на 44-то издание на МТФ „Војдан Чернодрински". Претставата „Кавкаскиот круг со креда" во режија на Мартин Кочовски во 2011 година беше прогласена за најдобра претстава на фестивалот „Екс Понто" („Ех Понто") во Љубљана, Словенија. Прилепскиот театар е првиот кој во десетгодишен период на МТФ „Војдан Чернодрински" има освоено најмногу награди за најдобра претстава во целина. Прилепскиот народен театар „Војдан Чернодрински" во земјава го има приматот на театарска куќа во која има праизведби на текстови од македонски драмски автори. Тука првпат се поставени текстовите на Коле Чашуле, Томе Арсовски, Благоја Ристески – Платнар, на Трајче Крстески, на Петар Петрески. При јубилејот на театарот во тек е дигитализација на фотографии, информации, статии за претставите до периодот на 2000-та година за да се зачуваат зошто се големо културно богатство. Ансамблот на Прилепскиот народен театар „Војдан Чернодрински" неуморно работи на унапредувањата на театарската уметност, а голема радост е да помине пандемијата и публиката целосно да се врати во салите и со полн капацитет да ги следи претставите.

Прилепскиот театар со онлајн претстава за Меѓународниот ден на театарот

Ивона Петрова — Fri, 26 Mar 2021 11:11:21 +0000

Со претставата „Пиреј“ во режија на Љупчо Ѓоргиевски што ќе биде прикажана онлајн вечер, од 19 часот, прилепскиот театар „Војдан Чернодрински“ ќе го одбележи Меѓународниот ден на театарот – 27 Март. Поради пандемијата, театарот не може да прикаже претстава на сцена, па затоа љубителите на театарската уметност ќе може да ја погледнат преку интернет, односно од 19 часот преку нивниот youtube – канал и на ФБ страницата: NUCK Markocepenkov. В недела, пак, од 12:00 часот најмладите ќе може да погледнат претстава за деца. Годинава, за Меѓународниот ден на театарот светската порака ја испрати актерката Хелен Мирен, а македонската, актерката Сузан Акбелге. Акбелге зборувајќи за креативноста и кризата со пандемијата, меѓудругоито порачува дека кризите секогаш се шанса за преобразба, но сѐ уште не се знае каква ќе биде, но одговорноста останува. Акбелге поканува „да сонуваме со очи ширум отворени, да ја разбудиме креативноста преку која постоиме“. Завршува со зборовите на Горан Стефаноски: Ќе зборуваме или ќе работиме?

ВИДЕО: Прилепскиот театар одбележа 69 години постоење во полоши услови отколку во 1950 година, кога за прв пат се кренала завесата

Дарко Андоновски — Tue, 19 Feb 2019 08:58:05 +0000

Прилепскиот театар вчера одбележа 69 години од своето постоење, за жал во услови на објектот кои се далеку полоши од времето кога во 1950 година за прв пат се подигнала завесата. И покрај тоа што актерите пред неколку недели гласно проворија за катастрофалната ситуација, мувлата, глувците, промојата, течењето на вода и смрдеата, државата продолжува да биде глува. И годинава нема ниту денар за реновирање за обејктот. „Не е до староста на објектот или немањето на финансиски средства туку најмногу до неодржувањето. Во Лондон има театри од 1520 година, се одржувани и функционираат како што треба“, истакна Димитар Ѓорѓиевски, актер. „Сите беа согласни дека условите се лоши ама никој не подигна некоја инициијатива за евентуално подобрување на настаните“, рече Ангела Наумоска, актер. Всушност театарот не ни постои веќе 14 години, немаме статус на театар, туку на обична драмска секција во рамките на домот за култура. „Ние славиме 69 години, а нашата институција е затворена, што е најтажно. А сведоци сме дека во државава се отвораат нови театри. А што правиме со старите ќе ги затвораме“, додаде Михајло Миленкоски, актер. Актерите велат дека повеќе не веруваат во празните ветувања кои со години ги даваат политичарите пред секои избори, дека Прилеп ќе добие нов тетар. „Не верувам дека за скоро време ќе се подобрат условите, нииту тоа дека јас ќе дочекам нов театар“, вели Марјан Чакмакоски, актер. За 10 години прилепскиот театар има освоено 5 греми награди на фестивалот „Војдан Чернодрински“ и уште многу на меѓународна сцена. Се смета за еден од најдобрите на Македонија. Актерите на шега велат дека во колку полоши услови работат, толку се подобри. „Приоритетите се секако екипата, екипата е најголемата инспитација за работа, тоа така ќе продолжи и во иднина“, рече Кирил Петрески, режисер. Вечер 69 годишнината се одбележува со претставата „Пиреј“. Можеби несакана симболика која укажува на тоа дека театарската уметност во Прилеп е како пирејот, и покрај се не може да се уништи, туку станува се подобра и подобра.

Тони Михајловски: Културата ни се распаѓа, како и сè останато

Ивана Ефремовски — Mon, 04 Feb 2019 08:37:06 +0000

Приказната за пропаѓањето на Прилепскиот театар викендов ја разбранува јавноста. Глувци шетаат на сите страни, умираат скриени по кошињата, кога врне често пати тече вода во голем дел од просториите, последен пат пред 4 дена. А водата доаѓа во допир и со електричната инсталација. Таваните се урнати, ѕидовите испукани, прашина, нем и мувла на сите страни. Ова се катастрофалните услови во кои работат актерите во прилепскиот театар, кој што е изграден пред повеќе од 60 години, рекоа актерите во прилогот кој беше емитуван во текот на викендот. Актерот Тони Михајловски реагираше на оваа тема и на својот фејсбук профил напиша: „Градот во кој се одржува најголемиот и најзначајниот театарски фестивал во Република Македонија, нема театар. Има, но подобро да го нема, ваков како што го има. Колегите работат во услови под сите стандарди. Слична беше ситуацијата со МНТ во старата зграда која ја наследи Театар Комедија. Шуга, влага, мувла, промаја и зараза од глувци и мачки. Битолскиот театар е всушност во зградата на Дом на Култура. Театар нема. Кумановскиот е сведен на ниво на драмска секција. Една македонска и една албанска. Условите се слични како во прилепскиот. Драмски театар се крпи за да не падне. Театар за Деца и Младинци не е театарска зграда туку импровизација со минијатурна сцена и 4 столба во партерот. Струмица исто така нема театарска зграда. Новата зграда на МНТ се распаѓа заради неспособност за одржување на високите стандарди кои се поставија во технологијата која ја поседува, а следна слична е во Виена. Културата ни се распаѓа. Како и се останато“-напиша тој.

Со години ветуваат нов театар, но државата го заборави: Прилепскиот театар во катастрофална состојба, вода, мувла и стаорци (ВИДЕО)

Дарко Андоновски — Sun, 03 Feb 2019 10:30:08 +0000

Глувци шетаат на сите страни, умираат скриени по кошињата, кога врне често пати тече вода во голем дел од просториите, последен пат пред 4 дена. А водата доаѓа во допир и со електричната инсталација. Таваните се урнати, ѕидовите испукани, прашина, нем и мувла на сите страни. Ова се катастрофалните услови во кои работат актерите во прилепскиот театар, кој што е изграден пред повеќе од 60 годин, објавува Сител. „Повеќе од 50% од ансамблот кој работиме тука имаме сериозни здравствени проблеми. Кој што се резултат на промаите, прашините, мувлата. Ова е како да ви кажам извор на зараза. На се личи освен на театар и театарска зграда“, истакна Даниела Иваноска, актерка во прилепскиот театар. „Најголемиот проблем исто е на сцената. Дува од сите страни, покривот горе е реновиран, покриен со некој лим, но денески кога ќе погледнете нагоре покривот личи на едно големо решето“, рече Александар Тодески, актер во прилепскиот театар. Во просторијата каде ги вежбаат текстовите се топлат на пампур направен од метално буре. Дел од инвентарот е стар скоро едeн век. Актерите велат дека жално е тоа што државата е нем сведок на оваа ситуација со децении. „И секоја година од целата држава доаѓаат министри, пратеници, разни работници во културата доаѓаат овде и незнам зошто досега и ним не им засметало кога влегуваат во оваа зграда“, вели Наташа Ачански, актерка во прилепскиот театар. До кабината за светло и тон се влегува преку тоалетот. – За да стигнете во кабината која се наоѓа позади мене и каде се регулира тонот и светлото мора да поминете по овие импровизирани и крајно небезбедни скали и да ја погледнете ова сцена која наликува како на сцена од некој хорор филм. А додека пак за прашината смрдеата и промајата која се чувствува од сите страни тоа не можеме да го доловиме со слика. Од 2004 година театарот во Прилеп не ни постои како институција тој е само дел од Центарот за култура. „Не не почитуваат како театар, најмногу од Министерството и не добиваме ист третман како и останатите театрии“, кажа Димитар Црцороски, актер во прилепскиот театар. За 10 години прилепскиот театар има освоено 5 греми награди на фестивалот „Војдан Чернодрински“ и уште многу на меѓународна сцена. Се смета за еден од најдобрите на Македонија. Конечно редно е државата да ги подобри условите во оваа зграда се до изградбата на нов тетар кој исто така се ветува со години.

Во прилепскиот театар се подготвува „Враќањето на Дороти“

Ивона Петрова — Fri, 09 Feb 2018 14:51:12 +0000

Во прилепскиот театар „Војдан Чернодрински“ во тек се подготовките на претстава за деца „Враќањето на Дороти“ (Дороти се враќа) во режија на Кирил Петрески. Ова е втор дел на популарната претстава „Волшебникот од Оз“. Според режисерот Петрески, претставата е продолжување на авантурите на Дороти во Оз, која се враќа кај своите пријатели. - Секогаш е задоволство и уживање да се работи претстава за деца, затоа што станува збор за специфична публика чија фантазија, колку и да се трудиме, нема да ја надминеме, но затоа можеме да ја разбрануваме, да ја поттикнеме. Но, е и голема обврска, зашто со овие претстави, би рекол, инвестираме 20 години во иднината и ја формираме нашата идна публика, вели Петрески. Во претставата ќе играат Марија Спиркоска – Илиеска, Ангела Наумоска, Александар Тодески, Михајло Миленкоски, Димитар Георгиевски, Јасмина Мицовска –Станкоска и Катерина Чакмакоска – Клинческа. Премиерата е наскоро, а овој проект Центарот за култура го реализира со сопствени средства. Инаку, прилепскиот театар до Министерството за култура за оваа година пријави шест претстави кои сака да ги работи: „Пиреј“ од Петре М.Андреевски во режија на Љупчо Ѓорѓиоски, „Галеб“ по текстот на Чехов во режија на Нела Витошевиќ, сатиричната комедија „Демократија“ на Јосиф Бродски во режија на Кирил Петрески, „Обнова на крпен живот“ во режија на Андреј Цветаноски, Кристина Димитрова треба да ја режира преставата „Антигона“ од Софокле како и детската престава „Пинокио“, која треба да ја режира Дарко Ковачевски. Министерството за култура кое деновиве ќе ја објави програмата, вообичаено финансира годишно три до четири претстави на театарот во Прилеп.