принуден одмор – Kurir.mk

Ангелевска: ЕЛЕМ отпушта вработени, а пред месеци вработуваше и уште вработува преку агенции за привремени вработувања

Магдалена Андонова — Fri, 24 Dec 2021 12:37:29 +0000

Власта на Заев го доведе енергетскиот сектор до колапс. Сега својата неспособност ја покриваат не со удар по одговорните туку по вработените. Дозволете да Ве информираме дека со потпис на Васко Ковачевски директорот на ЕЛЕМ, донесен е заклучок со кој се задолжуваат директорите на подружниците да достават список на работни места со број на извршители кои би биле испратени на принуден одмор и делумен прекин на работниот однос со кратење на платите во износ од 30% за период од три месеци. Овој Заклучок го потпишува на 3-ти декември, изјави денеска за медиумите, Силвана Ангелевска, пратеничка на Пратеничка група на ВМРО-ДПМНЕ. Таа истакна дека ваквата одлука доаѓа во исто време кога истиот Ковачевски, на истиот ден 3-ти декември потпишува нов заклучок со кој бара да се ангажираат лица преку Агенција за привремени вработувања кои би почнале со работа од 1-ви Јануари 2022 година. - Ова значи само едно дека власта преку Ковачевски има намера да ги казни партиски неподобните во ЕЛЕМ, а во исто време да вработува нови привремени вработени. ЕЛЕМ само пред неколку месеци вработуваше и сега уште вработува преку агенции за привремени вработувања, а во исто време безмалку отпушта вработени. Јасно е дека таквите списоци за казнување на вработени ќе бидат пополнети со лица кои немаат партиска книшка на СДСМ. Наместо Ковачевски да поднесе одговорност за својата неспособност, наместо Ковачевски да одговара за тоа што ЕЛЕМ го претвори во загубар поради неодговорното работење, тој удира по работниците. Повикуваме оваа постапка веднаш да се прекине, бидејќи во спротивно после промената на власта, ваквата политичка хајка која ја прави Ковачевски ќе биде ревидирана и за тоа Ковачевски ќе сноси одговорност, појасни пратеничката. Ангеловска додаде дека ВМРО-ДПМНЕ им стои на располагање на вработените во ЕЛЕМ кои се или ќе бидат жртва на политички и партиски притисок од страна на раководството предводено од Ковачевски, со секаква, бесплатна правна помош.

Дел од вработените во ЕСМ на принуден одмор, од компанијата велат воведуваат мерки на штедење

Ивона Петрова — Fri, 24 Dec 2021 12:26:43 +0000

АД ЕСМ воведе мерки на штедење со цел намалување на трошоците во услови на енергетска криза. Мерките се насочени во правец на намалување на непродуктивните трошоци и реализација на производниот процес со вложување што помалку материјални и човечки ресурси. -Од тие причини, во тек е постапка на утврдување на работни места кои не се неопходни за производството на електрична енергија во одреден временски период. Извршителите на утврдените работни места ќе бидат упатени на принуден одмор не подолг од три месеци, согласно согласно Законот за работни односи, со исплата на 70% од платата. Намалени или целосно запрени се и сите други трошоци, односно стопирани се спонзорствата, репрезентациите, службените патувања кои не се строго поврзани со производството на електрична енергија, сведена е на неопходниот минимум исплатата на прекувремени работни часови, додека законската дневница за патување се исплаќа во половина износ. Запрена е набавката на возила, освен возила потребни за производниот процес, додека употребата на патнички возила е целосно и строго рационализирана, се наведува во соопштението на АД ЕСМ.

ОД ДЕНЕСКА: Невакцинираните здравствени работници во Грција на принуден одмор

Ивона Петрова — Wed, 01 Sep 2021 05:17:38 +0000

Одлуката на грчката Влада за задолжителна вакцинација на сите вработени во државните и приватните болници во Грција, од денеска стапува во сила, а невакцинираните здравствени работници ќе бидат на принуден, неплатен одмор, јави дописничката на МИА од Атина. Според грчките медиуми, околу 10 до 15 илјади вработени во болниците и понатаму се невакцинирани. Во јули беше соопштено дека од 16 август вакцинацијата ќе биде задолжителна за сите вработени во центрите и институциите во Грција наменети за грижа на лица, а од 1 септември и за здравствените работници, како и за административниот персонал во болниците, здравствените центри, дијагностички центри, центрите за рехабилитација, клиниките итн, без разлика дали се приватни или јавни здравствени структури. Пораките од Владата во изминатите денови беа дека одлуките и законот ќе се применат и тоа во целост и нема да има никакво пролонгирање. Портпаролот на грчката Влада Јанис Иконому во понеделникот објасни дека „законот што предвидува суспензија за оние кои не примиле барем една доза, ќе се спроведе и законот ќе се примени во целост“ и додаде дека дури и да решат невакцинираните да се имунизираат по 1 септември, не е сигурно дека ќе се вратат на истите позиции. Против задолжителната вакцинација е грчката федерација на вработени во државните болници, кои минатата седмица одржаа масовни протести во Солун и Атина и истакнаа дека не се против вакцината, туку едноставнo не се согласуваат имунизацијата да биде задолжителна. Најавуваат и дополнителни протести, кога првите невакцинирани здравствени работници и официјално ќе бидат испратени на принуден одмор. Паралелнo со задолжителната вакцинација, од денеска стапува во сила и одлуката за отповикување на сите редовни годишни одмори на сите вработени во болниците, брзата помош, Националната организација за јавно здравје, како и во јавните установи за примарна здравствена заштита.

На принуден одмор 15 проценти од работниците во Велика Британија, најмногу од јуни

Магдалена Андонова — Thu, 26 Nov 2020 13:20:32 +0000

Уделот на британските работници кои се на принуден одмор скокна на највисоко ниво од крајот на јуни по воведувањето на привремените четиринеделни мерки за затворање низ Англија, поради вториот бран на епидемијата на коронавирусот, покажуваат денешните официјални бројки. Компаниите објавија дека во просек 15 проценти од вработените биле на принуден одмор меѓу 2 и 15 ноември, за разлика од девет проценти во претходниот извештај за втората половина на октомври, соопшти Националното биро за статистика (ОНС). Британската влада на 5 октомври воведе четиринеделен карантин и ги затвори рестораните, пабовите, продавниците кои не продаваат неопходни продукти и голем број други компании. Министерот за финансии Риши Сунак планираше да ја укине програмата за субвенции за зачувување на работните места кон крајот на октомври, но вториот бран на коронавирусот го принуди да ја продолжи до крајот на март. (МИА)

„Јунајтед ерлајнс“ праќа 2.850 пилоти на принуден одмор

Дарко Андоновски — Fri, 28 Aug 2020 08:54:11 +0000

Авиокомпанијата „Јунајтед ерлајнс“ соопшти дека оваа есен ќе испрати до 2.850 пилоти на принуден одмор, освен ако американската Влада не им обезбеди поголема помош на авиокомпаниите за покривање на деловните трошоци за време на падот поради пандемијата. Јунајтед ќе испрати повеќе пилоти на одмор од Делта ерлајнс, кој планира принуден одмор за 1.941 пилоти, додека „Американ ерлајнс“ најави отказ за 1.600 вработени. „Јунајтед ерлајнс“, со седиште во Чикаго, ги известил пилотите дека во следните неколку по пошта ќе испрати решенија за принуден одмор, кои ќе стапат во сила меѓу 1 октомври и 30 ноември.

Британската Влада нема да субвенционира нови работници кои се на принуден одмор поради пандемијата

Тале Кристо — Wed, 27 May 2020 06:29:59 +0000

Британската Влада нема да го зголеми бројот на работници што ги плаќа државата, кои се на принуден одмор поради пандемијата со Ковид-19, објави „Фајненшл тајмс“. Државата сега субвенционира осум милиони работници кои се на принуден одмор поради пандемијата, а британскиот министер за финансии Риши Сунак наредните денови ќе објави колку работодавачите ќе мора да придонесат за владината програма до август. Ќе се воведуваат и нови правила за работа со скратено работно време, што сега не е дозволено. За да се избегне работодавачите да пријавуваат дополнително работници за програмата за помош и да ги вратат на половина работно време, а сето тоа да го субвенционира државата, Министерството за финансии најверојатно ќе го укине понатамошното пријавување за таа програма, наведува „Фајненшл тајмс“. Сега британската Влада плаќа 80 отсто од платите, што е до 2.500 фунти месечно на речиси секој вработен во приватниот сектор, кој е на привремен одмор поради пандемијата со Ковид-19.

„Ербас“ на принуден одмор испраќа 3.000 работници

Дарко Андоновски — Sun, 19 Apr 2020 14:33:31 +0000

Компанијата „Ербас“ на принуден четиринеделен одмор ќе испрати околу 3.000 француски работници, во рамки на напорите да се избори со кризата од пандемијата од коронавирусот, а за тоа ќе користи средства од владината програма за финансиска помош, се вели во соопштението на водечкиот европски производител на авиони. Компанијата соопшти дека овие мерки ќе ги примени кај работниците во оние погони што не можат во целост да ги обезбедат здравствените услови што ги побара владата со воведувањето на вонредната состојба, на 17 март, пренесуваат британските медиуми. Компанијата прецизира дека принуден одмор ќе има за околу 3.000 работници во погоните во Тулуз, Нант и Сен-Назер. Синдикатот ЦГТ соопшти дека станува збор за 20 проценти од работната сила на „Ербас“ во Франција. Компанијата инаку вработува 130.000 луѓе ширум светот. „Ербас“, исто така, соопшти дека програмата за принудни одмори или „делумни активности“, доколку е потребно, може и да биде продолжена по завршувањето на предвидениот рок, каде како краен рок е одреден 17 мај. Пакетот мерки на француската Влада им овозможува на фирмите да воведат скратено работно време или принуден одмор за работниците, при што имаат обврска да плаќаат дел од платите на вработените, а тие пари да ги вратат од средствата за државната помош. Синдикатите го поддржаа планот на „Ербас“, за кој извори на британските медиуми наведуваат дека вработените во текот на принудниот одмор ќе примаат околу 92 проценти од полниот износ на нивната плата.