припадници на арм – Kurir.mk

Пожарникарите се приклучуваат на писмото на војниците од АРМ: Никој нема мандат да се пазари со виталните интереси на Македонија

Дарко Андоновски — Thu, 03 Dec 2020 09:10:02 +0000

По отвореното писмо на припадниците на Армијата на Македонија, денеска со отворено писмо и пожарникарите кои едногласно повикуваат дека никој нема мандат да се пазари со виталните интереси на нашата татковина. Целото интегрално писмо е во продолжение: „Ние припадниците на Територијалните противпожарни единици во Република Македонија, ја известуваме целата македонска јавност и сите дипломатски и други претставништва на странски држави и меѓународни институции во Република Македонија, за следново: Ги поддржуваме ставовите на припадниците на Армијата на Република Македонија, изнесени во нивното вчерашно известување за јавноста. Во наведеното известување, припадниците на Армијата на Република Македонија, известија дека застануваат во одбрана на македонските национални интереси а во контекст на преговорите кои нашата влада ги води со бугарските власти во однос на македонските идентитетски основи (историјата на македонскиот народ, македонскиот јазик и македонскиот етнички идентитет). Ние припадниците на Територијалните противпожарни единици , будно ги следиме овие настани и известуваме дека рамо до рамо со припадниците на Армијата на Република Македонија, ќе станеме во одбрана на нашите национални и државни интереси. Нашата политичка елита, ја известуваме дека прифаќањето на било каков компромис во однос на наведените вредности, ќе го сметаме како непријателски акт кон македонската држава. Ние ПОЖАРНИКАРИТЕ, сме мултиетнички состав,во нашите единици имаме Македонци, Албанци, Турци, Роми, Власи, Срби и други, но сметаме дека евентуалниот компромис во однос на наведените прашања ќе претставува компромис против сите нас, против сите граѓани на нашата држава, против нашата заедничка татковина Република Македонија. Уште еднаш апелираме до нашите највисоки политички претставници, ја немате нашата поддршка за пазарење со виталните вредности на нашата држава, немате таков мандат ниту од уставот на државата ниту од граѓаните на Република Македонија. Доколку посегнете кон некаков компромис во споменатата насока, Ве известуваме дека ќе се соочите со нашиот жесток одговор, кој ќе го искажеме заедно со припадниците на Армијата на Република Македонија и други институции, но и заедно со сите граѓани на нашата држава. Ние ве избравме не за да владеете со нас, туку за да не претставувате и да ги заштитите нашите а не вашите лични бизнис и партиски интереси. Нема да ви дозволиме наместо нашите да застапувате туѓи интереси, ние ве избравме ние ќе ве симнеме од позициите на власт“, велат во своето отворено писмо пожарникарите од територијалните противпожарни единици во Република Македонија. Инаку КУРИР го објави и отвореното писмо до државното раководство од припадниците на Армијата во кое тие на власта и порачуваат: „едноставно е, разберете нé! Ние не можеме да да молчиме додека Вие ја предавате и продавате Македонија! Стоп за распродажбата ВЕДНАШ!“.

Припадниците на Армијата пуштени на домашно лекување по вчерашната сообраќајка

Магдалена Андонова — Wed, 30 Sep 2020 12:03:39 +0000

Ниту еден од повредените припадници на Армијата во вчершната сообраќајна несреќа не е задржан во штипската Клиничка болница. Портпаролот на Клиничка болница-Штип, Марина Шуманска за МИА изјави дека сите повредени се испратени на домашно лекување. Според лекарите кои вчера ги прегледуваа 16 припадници на Армијата, возачите на автобусот и на комбито се со телесни повреди, вообичаени набиеници и скршеници. Портпаролот на СВР-Штип, Гордана Панајотова истакна дека сега ќе се чека да се утврдат причините за сообраќајната несреќа. Несреќата се случи вчера пред седум часот на патот Радовиш-Штип кај местото викано „Осми километар“, при судир на автобус и комбе. Припадниците на Армијата со автобусот патувале од Радовиш и Струмица, кон работните места во касарните во Штип и Скопје.

Шекеринска се фали со НАТО стандарди, а повеќе од две недели припадниците на АРМ немаат платен превоз

Ивона Петрова — Thu, 16 Aug 2018 09:43:42 +0000

Додека министерката за одбрана Радмила Шекеринска се фали со инвестиции во АРМ и НАТО стандарди, поради нејзината неодговорност, како што обвинуваат дел од војниците, повеќе од две недели припадниците на АРМ немаат платен превоз од нивното населено место до касарната во која што се распоредени. Војниците велат дека се снаоѓаат кој како знае и умее, некои одат со свои автомобили, други се групираат по четворица па го делат трошокот бидејќи редовни автобуски линии нема секогаш до нивните дестинации. Војниците кои ги контактиравме велат дека откако Шекеринска раководи со министерството работните услови се драстично влошени. На релацијата Велес - Петровец - Чојлија, платен превоз нема од 31.07.2018 односно повеќе од две недели. Додека Крушево - Кривогаштани - Прилеп и Битола - Прилеп, немаат платен превоз од 27.07.2018 односно 3 недели. Седум релации меѓу кои : Дебар - Кичево, Гостивар - Скопје, Пробиштип - Кратово - Куманово - Скопје, Неготино - Велес - Куманово, Неготино - Кавадарци - Росоман - Градско - Скопје, М.Брод - Кичево и Самоков - М.Брод - Кичево, немаат платен превоз заклучно од 03.08.2018 година, односно 2 недели. Реалциите од Виница - Кочани - Штип - Св.Николе - Петровец и Скопје - Велес, немаат превоз од 07.08.2018. Припадниците на АРМ коментираат дека како честитка за 18 август, денот на македонската армија Шекеринска на 17 август ќе укине уште четири линии за превоз на војската, како што се: Скопје - Тетово - Гостивар - Кичево, Штип - Св.Николе - Петровец, Скопје - Куманово и Скопје - Велес - Штип. Војниците кои сакаат да останат анонимни прашуваат дали можеби зад непродолжувањето на договорите се крие некоја задкулисна игра од лица блиски до министерката, кои се инволвирани во бизнис зделки со превозници. Нашите соговорници потсетуваат дека во екот на летото војската остана и без вода за пиење, како и без соодветни намирници, па наместо свеж зеленчук стражарите јадат конзервирани корнишони и постојано добиваат суви оброци. Тие велат дека или министерката не е свесна или свесно ја нарушува борбената готовност на АРМ, за што се одговара.