Насилници. „ПРОВЕРЕНО“…

Љупчо Цветановски — Tue, 06 Dec 2022 11:57:20 +0000

Министерот Пенов насила ќе ги тргал автобусите од скопските крстосници?! Може ли да го стори тоа? Може. ПРОВЕРЕНО, човекот нема скрупули. ДА/НЕ/ЛА-же извадениот од нафталин Ристо дека државата смее и има право насилно да прекине протест? Лаже, ги нема. Протестот е уредно пријавен и е уставно, демократско право. ПРОВЕРЕНО, нека ги прочита Законите. Во моментот министер за локална самоуправа изигрува портпарол на градоначалничката на Град Скопје?! Може ли Рики да биде гласноговорник на Дани? Може. ПРОВЕРЕНО, до сега во животот бил телал на цела сурија други партии, лидери и тајкуни, штитејќи туѓи ставови, па чуму не и нејзин. И запрашајте се чуму градот нема вистински портпарол и сите кои беа таму фатија усвета или се скрија по канцеларии, не е случајно... Се кршат ли во оваа држава законите? Да. ПРОВЕРЕНО и докажано, прашајте ги само Уставобранителите и патриотите од една и Заевци и Дуевци од друга. Ова е мала земја, се’ е повеќепати „ПРОВЕРЕНО“ и најчесто и емпириски докажано. Политичките корисни идиоти пак, се ПРЕПРОВЕРЕНИ... „ПРОВЕРЕНО“ беше мотото со кое пред многу години на избори излезе Ристо Пенов. Оној истиот Пенов кој е запаметен како еден од најлошите градоначалници на Скопје и чија „победа“ остана со вкус на измама и кражба на гласови. Е, сега, Ристо телалот на Данела со сила ќе прекинува протести на автопревозници на кои неговата нова штитеничка/пашторка им должи ни помалку ни повеќе туку цели ДВА МИЛИОНИ ЕВРА?! И пази, богати, уште онака портпаролски дообјаснува пустиот – па и да им ги исплати двата милиона, џабе протестираат, договорите им биле прекинати, Град Скопје (читај Данела) била во право?! Спремен гласноговорник, нема што. Башка, има искуство човечето. Истите овие автопревозници протестираа и кога тој беше градоначалник. Тоа беше последниот ваков протест. Ништо не е случајно. А случајност се нарекува она кога јасно не се гледа кој со конците ја движи марионетата по сцената. Исто како сега, нели? Туку, има еден сериозен проблем и фалинка во целата оваа заебанција и фејк-сторија за наводна департизација на Град Скопје, финта зад која се крие и на која се „шлепа“ Данела додека го „вози“ градскиот превоз и ги нервира скопјани. Башка Македонија. Не, не е проблемот што некој застана против својот создател. Веќе видена финта во делото на Мери Шели, Франкенштајн ли беше. Луѓето се менуваат, други забегуваат, некој може и да ги уцени, друг да ги купи. Се’ бива, можеби неоправдано, ама веројатно Данчето доживеала една од горенаведените „трансформации“. Поверојатно некоја од двете последни опции... Проблемот е кога вршиш „департизација“ и на местата на партијци од опозицијата која те донела на позицијата ставаш познати (не по арно) ликови од партиите на власт. Значи, Данела, тоа не е департизација, тоа е обична рокада. И не, не мора да сте Ајншајн за да сфатите дека тоа нема абер од департизација туку дека некој само сменил табор. Стара македонска навика на политичарите. Сетете се само на ЉуБчо, Љубе, Стојанче, Ѓулистана, Тодоров, Димитров и дузина други превртливи ликчиња. Македонија, чудесна земја каде опортунизмот честопати го победува патриотизмот. А, дека можат насила да сторат тоа со автобусите, можат. Тоа тотално им прилега и е дел од нивата удбашко/балистичка генетика. Сетете се само како насила без победа на избори дојдоа на власт, како насила од патриоти создадоа „терористи“ за да сменат Устав на држава, како насилнички не признаа Референдум за име, како на мускули го сменија истото, како донесоа двојазичност, како падна систем на ДИК среде избори, како насила наметаа еден Ќуран за премиер, како со две раце насила прифатија Француски предлог... Ова се докажани насилници. Со тапија. Кога ќе размислите подобро, Таче и Данче се одличен, совршен пар. Двајцата ги стокми и намести на позиција некој друг, а тие изигруваат функционери и големини. И повеќе од очебијно, многу уживаат во вниманието и „славата“. Лонче и капаче. Грешам? Ајде, времето ќе каже. А тоа пустото, никогаш не лаже...

ПРИВАТНИ АВТОПРЕВОЗНИЦИ – Kurir.mk

Насилници. „ПРОВЕРЕНО“…