приватни болници – Kurir.mk

Панова: Предложивме сите кои не можат да бидат примени во државна, да се лечат во приватна болница по цени исто како и во државното здравство

Магдалена Андонова — Thu, 15 Apr 2021 11:30:01 +0000

Неспособноста на Филипче и Заев резултираше со над 144.000 заразени и над 4.300 починати. Голем дел од нив не можеа на време да се тестираат, немаа лекови, чекаа за во болница, а 1.700 починаа од јануари до сега, чекајќи вакцина, изјави денеска за медиумите, Ели Панова, пратеничка од редовите на ВМРО-ДПМНЕ. - Илјадници наши сограѓани мораа да се лечат во приватни болници, за што беа принудени да платат и до 15 илјади евра, некои ги даваа последните пари, некои подигаа кредити, а некои собираа донации. Власта сите ги втурна во сиромаштија. Токму затоа, ВМРО-ДПМНЕ во наредните денови ќе предложи дополнување на Законот за здравствена заштита, со кое ќе се предвиди рефундирање на разликата во цената помеѓу приватното и државното здравство на граѓаните кои се лекувале од КОВИД 19 во приватните болници, истакна таа. Панова посочи дека дополнително, ВМРО-ДПМНЕ ќе предложи сите, кои нема да можат да бидат примени во државна установа, да можат да отидат во приватна болница, каде ќе бидат лечени по цени, исти како и во државното здравство. - Државата мора да биде во служба на народот. Никој не смее да трпи и страда, затоа што власта е неспособна. Исто така, со дополнувањата на Законот за здравствена заштита, ќе предвидиме граѓаните со хронични и останати болести, кои повеќе од 60 дена се на листа на чекање за некоја операција или друга здравствена, дијагностичка и интервентна услуга во државното здравство, да можат да отидат во приватна болница, а услугата да ја платат по цена како во државното здравство. Македонија мора да биде земја која се грижи за своите граѓани, додаде пратеничката.

Филипче: Предлагаме лекувањето на ковид пациенти да се движи од 40.000 до 305.000 денари

Ивона Петрова — Tue, 13 Apr 2021 09:47:52 +0000

Министерот за здравство Венко Филипче денеска соопшти дека предлагаат со измените во Законот, дијагонстицирање и лекување на ковид пациенти да се движи од 40.000 до 305.000 денари. -Денеска на седница на Влада е Законот за здравствена заштита со чии измени предлагаме цените во приватните болници да бидат изедначени со референтните цени утврдени од Фондот за здравствено осигурување. Со измените во Законот дијагонстицирање и лекување на ковид пациенти предлагаме да се движи од 40.000 до 305.000 денари. Државата освен што има овластување да склучи договор со приватните болници преку ФЗО, може да постави и лимит за максимален износ на едно приватно лекување од Ковид 19. Регулирањето на цените е неопходно за да не се доведеме во ситуација приватните здравствени установи да останат недостапни за огромно мнозинство на граѓани во нашата земја. Ги повикувам сите пратеници во Собранието да дадат поддршка на оваа регулација на цените за здравствени услуги на ковид пацинети во приватните болници. Во време на пандемија од клучна важност е пратениците да го изгласаат оваа законско решение со кое цените за третман на пациенти во приватните болници ќе бидат финансиски издржливи за сите граѓани, напиша Филипче на Фејсбук.

Ќе се менува Законот за здравствена заштита, приватните болници ќе добијат ограничување за цените

Ивона Петрова — Mon, 12 Apr 2021 10:54:51 +0000

Министерот за здравство Венко Филипче најави измена на Законот за здравствена заштита, за што денеска се донесе одлука на ГГКШ, а предлогот на Законот веќе утре ќе се стави на седница на Влада. -Денеска на Главниот координативен Кризен штаб се дискутираа повеќе работи во однос на менаџирањето на болниците, во однос на менаџирањето на вакцинацијата и целокупниот процес и во таа смисла би сакал да соопштам уште два важни заклучоци. Прво дека се донесе одлука да се направи измена во Законот за здравствена заштита со која на приватните болници ќе се ограничи висината на наплата на финансиски средства за времетраење на кризата или вонредна состојба а што се однесува конкретно за лекување на ковид пациенти. Го слушнавме апелот на граѓаните, сепак е криза има потреба да се користи тој болнички капацитет и во таа смисла веќе утре на Владата ќе и го поднесеме предлог измена на Законот за здравствена заштита, изјави Филипче.

ВМРО-ДПМНЕ: Кој е интересот на Филипче што овозможи приватните болници да се богатат на грбот на пациентите

Магдалена Андонова — Sat, 14 Nov 2020 08:34:04 +0000

Црните рекорди на Филипче продолжуваат. Секој ден четирицифрена бројка на новозаразени со корона според статистиката на министерството за здравство. Вкупната бројка на заразени се движи кон 45 илјади, а неспособниот Филипче предвидуваше дека ќе биде две илјади. Во последното деноноќие уште 25 семејства завиени во црно, а од почетокот на пандемијата 1263 починати лица, стои во соопштението на ВМРО-ДПМНЕ. Неспособниот Филипче ги фрла граѓаните во секојдневна голгота. Нема соодветна терапија за сите, истата се добива во приватните болници, пациентите умираат на пат до болница, по ходници на клиниките. Прашуваме кој е интересот на Филипче што овозможи приватните болници да се богатат на грбот на пациентите додека државното здравство колабира, велат од партијата. Медицинските лица се целосно незаштитени. Филипче девет месеци од короната кризата ги остава без соодветна лична заштита, па така од почетокот на пандемијата 1527 медицински лица, а починаа 13. Време е за одговорност! Затоа Филипче оставка веднаш!, потенцираат ВМРО-ДПМНЕ.

Приватните болници ќе можат да хоспитализираат и да укажуваат нега и терапија на болни од Ковид-19

Дарко Андоновски — Tue, 16 Jun 2020 15:29:00 +0000

Приватните здравствени установи, во рамките на вршењето на дејноста за интензивна нега и терапија, ќе можат да укажуваат здравствени услуги и за коронавирус за пациентите примени во установата кај кои во текот на укажувањето на здравствените услуги за дијагностицирање, лекување, третман, нега и рехабилитација во установата е утврдено присуство на причинителот Sars-Cov-2 вирус за заразната болест Ковид-19. Ова се наведува во дополнението, што го направи Владата во рамки на денешната 69-та седница, на Уредбата со законска сила за примена на Законот за здравствената заштита за време на вонредна состојба, соопшти владината прес-служба.