Прокопис Павлопулос – Kurir.mk

Новоизбраната грчка претседателка денеска ќе положи свечена заклетва

Ивона Петрова — Fri, 13 Mar 2020 06:19:23 +0000

Новоизбраната претседателка на Грција, Екатерини Сакеларопулу, во 11 часот по локално време, во грчкиот Парламент ќе положи свечена заклетва, а веднаш потоа, во претседателската палата и официјално ќе ја преземе функцијата од Прокопис Павлопулос, јави дописничката на МИА од Атина. Мерките и превенцијата од коронавирусот во Грција, донесе промени во предвидените манифестации за примо – предавањето на функцијата. Па така, на свечената заклетва во Парламентот, наместо 1000, колку што беше првично планирано, ќе бидат поканети само 100 лица, а Сакеларопулу го одложи приемот за честитки, закажан за утре. За Прокопис Павлопулос вчерашната церемонија на палењето на олимпискиот оган во античка Олимпија беше негов последен јавен настап во функција претседател на Грција. Екатерини Сакеларопулу на 22 јануари 2020, на гласањето во Парламентот, со широко мнозинство, со поддршка од три партии, со 261 глас, 61 повеќе од потребните 200, беше избрана за прв жена претседател на Грција. Позитивно гласаа пратениците од Нова демократија, СИРИЗА и Движење на промена, а „присутни“ гласаа 33 пратеници од МЕРА25, Комунистичката партија на Грција и Грчко решение. Соопштувањето на резултатите од Претседателот на Парламентот беше проследено со аплауз од присутните пратеници. Сакеларопулу е осми претседател на Грција.

Грчкиот претседател пренесен во болница

Катерина Бојаџиева — Fri, 24 Jan 2020 12:29:23 +0000

Претседателот на Грција Прокопис Павлопулос денеска бил пренесен во Центарот за кардиохирургија „Оназис“ во Атина, поради висока температура предизвикана од вирус, за да му се направат дополнителни испитувања, објавија грчките медиуми. Од кабинетот на Павлопулос, рано утрово преку соопштение ги известија новинарите и медиумите дека „поради вирус на претседателот на државата Прокопис Павлопулос, денешните средби во претседателската палата нема да се одржат“, јави дописничката на МИА од Атина.

Павлопулос: Демографската криза во Грција е национален проблем

Ивона Петрова — Thu, 12 Dec 2019 09:29:04 +0000

Демографскиот проблем на Грција, потенцирам дека буквално, претставува национален проблем, истакна грчкиот претседател Прокопис Павлопулос, говорејќи на конференција на „Економист“ на тема „Демографската криза во Грција“, јави дописничката на МИА од Атина. Павлопулос истакна дека Грција, за жал се наоѓа на врвот од демографскиот проблем пред сѐ поради ниската стапка на наталитет, но и поради миграцијата на младите Грци во западните земји, а се осврна и на проценките дека до 2050 населението на земјата може да се намали на 10, па дури и на 8,3 милиони. – Индикативно е дека индексот за фертилитет по 1981 година забележува континуирано опаѓање. А на веќе постоечката ниска стапка на наталитет, во годините по длабоката економска криза, се додаваа и миграцијата на стотици илјади млади Грци, особено во земјите од западниот свет, за пронаоѓање на поповолни услови за живот и за личен развој. Немилосрдните бројки покажуваат дека меѓу 2011 и 2015 година населението на Грција се намалило од 11,2 на 10,8 милиони. Исто така, очевидно лошите прогнози за нашите демографски разврски доведуваат до проценка дека до 2050 година, вкупното население на Грција дополнително ќе се намали и ќе стигне на 10, па дури и на 8,3 милиони, нагласи Павлопулос. Претседателот на Грција истакна дека проблемот треба да се реши во соработка со останатите членки на Европската унија што се соочуваат со истата реалност, но и дека земјата потребно е да создаде своја национална демографска политика.

Павлопулос: Грција ќе ја блокира Македонија во ЕУ, ако тие не ги избришат сите иредентистички траги

Предраг Кукиќ — Fri, 22 Mar 2019 15:45:25 +0000

Грција ја поддржува европската перспектива на Македонија, но потребна е целосно почитување на меѓународното право и правилна имплементација на Договорот од Преспа, во спротивно ќе биде блокирана нејзиниот европски пат, вели грчкиот претседател Прокопис Павлопулос во честитката до Грците од дијаспората по повод националниот празник 25 март, јави МИА од Атина. Во писмената честитка, Павлопулос освен за важноста на празникот, ги споменува и т.н. грчки национални прашања, односите на Грција со Турција, Албанија, Македонија, како и кипарското прашање. -Што се однесува на РСМ, ние ја поддржуваме нејзината европска перспектива. Но, предуслов за оваа перспектива, од нејзина страна е целосно и искрено почитување на европското законодавство, со тоа и меѓународното право во целост, а пред сè Договорот од Преспа, што мора да се толкува и да се имплементира, според неговата содржина и духот, на начин што не остава ниту трага од иредентизам. Според тоа, секоја спротивна тактика, се подразбира, дека ќе го блокира европскиот интегративен напредок на Македонија, пишува Павлопулос во честитката. Грчкиот претседател вели дека „Грција е фактор на мир и безбедност на Балканот и во поширокиот регион на Југоисточниот Медитеран и целосно и практично ги почитува европското и меѓународното право” и се стреми кон пријателство и соработка со сите соседи.

Павлопулос во официјална посета на Црна Гора

Ивана Ефремовски — Thu, 07 Mar 2019 08:14:48 +0000

Претседателот на Грција, Прокопис Павлопулос, по покана од неговиот колега Мило Ѓукановиќ, од денеска е во официјална, дводневна посета на Црна Гора, јави дописничката на МИА од Атина. Според официјалната програма, претпладнево грчкиот претседател, ќе биде примен од Ѓукановиќ, по што ќе следи и работен ручек, а потоа предвидени се средби со претседателот на црногорскиот Парламент. Во вечерните часови премиерот Душко Марковиќ ќе приреди работна вечера во чест на Павлопулос. Утре, грчкиот претседател ќе го посети Правниот факултет на Универзитетот на Црна Гора и ќе одржи предавање на тема „Владеењето на правото и европско обединување“. (МИА)

Павлопулос: Нема да прифатиме своеволно толкување на преспанскиот договор

Предраг Кукиќ — Wed, 19 Dec 2018 12:48:28 +0000

Грција сака да воспостави добрососедски односи со Македонија, но нема да прифати своеволно толкување на договорот за името, изјави грчкиот претседател, Прокопис Павлопулос, пренесува грчкиот весник „Катимерини“. „Ако договорот дојде до ратификација, ние нема да прифатиме своеволни, па дури и иредентистички толкувања на преспанскиот договор“, рече Павлопулос пред грчките претставници кои работат во европските институции, говорејќи во Брисел. Шефот на државата посочи дека Грција ги поздравува изгледите за пристапување на Македонија кон НАТО и ЕУ, сѐ до решавање на спорот за името. „Само кога целиот процес ќе биде завршен и утврдиме дека уставната ревизија содржи гаранции, тогаш може да има покана за прием во НАТО, како и започнување на преговорите за пристапување кон Европската Унија“, додаде грчкиот претседател.

Грчкиот претседател се налути зашто Заев излажа дека Македонците во Грција ќе имаат право да го изучуваат македонскиот јазик

Предраг Кукиќ — Tue, 04 Dec 2018 20:08:32 +0000

Денеска грчкиот претседател, Прокопис Павлопулос, за време на неговата средба со неговиот словенечки колега, Борут Пахор рече дека Грција нема да прифати своеволни толкувања на Преспанскиот договор од страна на владата во Македонија. Како што пренесува „Катимерини“, неговата реакција доаѓа по вчерашната изјава на премиерот Заев дека Македонците во Грција ќе имаат право да го изучуваат македонскиот јазик. -Ние не сме подготвени во пресрет на дефинирањето и пред неговата ратификација да прифатиме толкувања на Договорот од Преспа коишто се своеволни, бидејќи уште ништо не е завршено, изјавил Павлопулос.

Претседателот на Словенија во официјална посета на Грција

Ивона Петрова — Tue, 04 Dec 2018 07:07:03 +0000

Словенечкиот претседател Борут Пахор на покана на неговиот грчки колега Прокопис Павлопулос од денеска престојува во дводневна официјална посета на Грција, јави дописничката на МИА од Атина. Првиот ден од посетата, Пахор ќе го започне со полагање цвеќе на споменикот на Незнајниот јунак пред грчкиот Парламент, по што ќе се сретне со грчкиот претседател. Павлопулос и Пахор ќе имаат тет а тет средба, но и состанок на двете делегации, по што словенечкиот претседател ќе заминена средба со грчкиот премиер Алексис Ципрас. Двајцата претседатели вечерва одново ќе имаат можност да поразговараат, за време на свечената вечера. Павлопулос и Пахор утре ќе заминат за Пелопонез во посета на градот Нафплио каде што ќе биде откриена спомен плочата посветена Јоанис Каподистријас, чие што семејство има потекло од словенечкиот град Копер. Претседателот на Словенија ќе се сретне и со градоначалникот на Нафплио и ќе положи цвеќе пред споменикот на Каподистријас. МИА

Павлопулос: Преспанскиот Договор не признава македонска нација туку државјанство

Катерина Бојаџиева — Sat, 03 Nov 2018 16:43:10 +0000

Грчкиот претседател изразил резерви за предложените амандмани на македонскиот устав што вчера ги соопшти премиерот Зоран Заев. Прокопис Павлопулос, наводно, се спротивставил на членот 36, кој ги содржи референците за македонскит „народ и идентитет“ како и за потребата да се заштити македонскиот „народ“ што живее надвор од земјата, пишува „Катимерини“. Павлопулос инсистира на тоа дека ПЈРМ мора да даде писмена обврска дека договорот за името потпишан во јуни не ја признава македонската нација, туку државјанство.

Неформална средба Коѕијас – Павлопулос

Ивона Петрова — Wed, 17 Oct 2018 11:30:22 +0000

За прашањата и последните случувања во надворешната политика вчера во премиерската палата разговарале шефот на грчката дипломатија Никос Коѕијас и шефот на државата Прокопис Павлопулос. Тие имале средба која имала неофицијален и неформален карактер, според информациите на дописничката на МИА од Атина. Според истите информации, шефот на грчката дипломатија често го информира грчкиот претседател за темите кои што се во негова надлежност. Средбата меѓу Коѕијас и Павлопулос се одржа по владината седница, на која, како што веќе објави МИА, имало расправија меѓу шефот на грчката дипломатија Коѕијас и министерот за одбрана и коалициски партнер во грчката Влада, Панос Каменос. МИА