проширување – Kurir.mk

Австрискиот министер за внатрешни работи повтори дека е против проширување на Шенген зоната

Тале Кристо — Mon, 23 Oct 2023 14:25:42 +0000

Во едночасовното интервју на јавната австриска телевизија (ОРФ), австрискиот министер за внатрешни работи Герхард Карнер уште еднаш го искажа својот цврст став против проширувањето на Шенген зоната. - Неделава ме прашаа дали Шенген е мртов, реков - не е мртов, Шенген воопшто не функционира. Што сакам да кажам: никогаш не сме имале толку гранични контроли откако постои овој слободен простор како сега: Австрија кон Унгарија, Словенија, Словачка и Чешка, зошто? Затоа што Германија ги контролира границите со Австрија, Полска и Чешка, Чешка - со Словачка, Словенија - со Хрватска и мислам дека е длабоко погрешно во таква ситуација да се разговара за отстранување на контролите на друго место, во момент кога има толку многу внатрешни гранични контроли како никогаш досега на овој простор, изјави Карнер, пренесува БТА. На новинарскиот аргумент за мислењето на многумина дека овој проблем може да се реши на паневропско ниво и дека Бугарија и Романија во целост ги исполниле условите за влез во Шенген, како и дека ставот за наметнување вето е остро критикуван од Европскиот парламент, од претседателот на Европската комисија и претседателот на Австрија, Карнер рече: Како министер за внатрешни работи, моја работа е да ја издржам оваа критика. Јас сум одговорен за безбедноста во оваа земја, факт е и дека ја видов оградата долж границата меѓу Бугарија и Турција. Бев со сојузниот канцелар на самото место и јасно е дека има уште многу работа да се заврши. Разговаравме (во текот на интервјуто) за прашањето за ефективен пакт за бегалците и миграцијата, но за таа цел неопходен услов е да има ефикасна заштита долж надворешната граница и додека таа не биде ефективна, нема поента, поточно не можам да размислувам за намалување на заштитата на границите.

Руте: Не е прашањето кога, туку дали кандидатите за членство ќе бидат подготвени за прием

Тале Кристо — Sat, 07 Oct 2023 08:43:23 +0000

Проширување на ЕУ до 2030 година ќе биде можно доколку земјите кандидати за членство бидат подготвени за членство до тој датум, смета холандскиот премиер Марк Руте. - Не се согласувам многу со тој датум. Прашањето не е кога земјите ќе бидат подготвени. Прашањето е дали земјите ќе бидат подготвени, изјави Руте, коментирајќи ја целта за проширување на ЕУ во 2030 година, што ја постави претседателот на Европскиот совет, Шарл Мишел. Според Руте, проширувањето е макотрпен процес, кој бара кандидатите за членство во ЕУ да се усогласат со законодавството на Унијата за да можат да пристапат во блокот. - Не треба да има апсолутно никакви исклучоци кога станува збор за исполнување на условите на ЕУ за зачленување, додаде Руте. Холандскиот премиер смета дека од аспект на проширувањето важно е и прашањето дали ЕУ е целосно подготвена да прифати нови членки. - ЕУ веќе има 27 земји членки и ако се приклучат уште земји, тогаш донесувањето одлуки и секакви други работи ќе стане уште покомплицирано, оцени Руте. Прашањето за реформи на ЕУ пред следното проширување веќе извесен период е меѓу главните теми во Унијата, особено во врска со процедурите за носење одлуки, буџетот на блокот, санкционирањето за прекршувањата на принципите на владеење на правото, како и идејата за „постепена интеграција“ на кандидатите за членство уште пред нивниот прием. Како што јави дописникот на МИА од Брисел, изјавата на Руте доаѓа во време на кампања за предвремените парламентарни избори во Холандија, закажани за во ноември. Според последните анкети на јавното мислење, засега се води тесна битка за победа меѓу левоцентристикиот блок на Лабуристичката партија (ПВДА) и Зелената левица (ГЛ), предводен од поранешниот еврокомесар Франс Тимерманс, либералната Народна партија за слобода и демократија (ВВД) на Руте и новоформираната популистичка демохристијанска партија Нов социјален договор (НСЦ) на Питер Омцихт. Иако и блокот ПБДА-ГЛ и ВВД во нивните изборни програми се на став дека треба да се почитуваат критериумите за членство при приемот на ЕУ, коалицијата на Тимерманс важи за понаклонета кон приемот на нови членки, залагајќи се за „охрабрување, наградување и активна поддршка на вистинските реформи“. Од друга страна, партијата на Руте строго се држи до ставот дека „земјите кандидатки за членството во ЕУ и ќе бидат оценувани според постигнатите резултати“. НСЦ се уште ја нема објавено својата изборна програма, но се очекува меѓу трите водечки политички сили нејзините ставови да бидат најрестриктивни по однос на проширувањето.

Бун: Можно е проширување и пред 2030, но прво ЕУ треба да се реформира

Тале Кристо — Tue, 29 Aug 2023 18:54:19 +0000

Следното проширување на ЕУ е можно и пред 2030 година, но претходно Унијата треба да се реформира, истакна француската државна секретарка за Европа, Лоренс Бун на панел дискусија одржана во рамки Бледскиот стратешки форум. Оваа порака на Бун следува по вчерашната изјава во Блед на претседателот на Европскиот совет Шарл Мишел дека ЕУ треба да биде подготвена за ново проширување во 2030 година, како и по изјавата на претседател на Франција Емануел Макрон на годишниот состанок со француските амбасадори, дека ЕУ треба да размисли за „Европа со повеќе брзини“ за да се справи со проширувањето. Според Бун, оваа изјава на Макрон не значи затворени врати за земјите кандидатки. - Ние сме сега 27 земји, а можеби ќе бидеме и повеќе од 35, со надеж тоа да се случи што побргу. Знам дека Шарл Мишел рече до 2030 година, но може да биде и порано. Но, она што ни треба е да се реформираме себеси, како и земјите кандидати. Можеби не го правевме тоа многу добро во минатото, можеби треба да сме повеќе инволвирани, да помагаме повеќе, да бидеме подинамични во процесот на проширување за да избегнеме замореност и да ги направиме придобивките од идното членство во ЕУ поопипливи за земјите кандидати. Тоа се нашите задачи, истакна Бун.

ЕК ја поништи одлуката на претседателот на Европскиот совет, Шарл Мишел за проширување на Европската унија во 2030

Тале Кристо — Tue, 29 Aug 2023 18:23:02 +0000

Извршната власт на Европската Унија инсистира на тоа да нема посебен временски рок за прифаќање на нови земји-членки за влез во унијата. Првите две институции во Брисел повторно се судрија, бидејќи извршната власт на ЕУ се повлече од забелешките на претседателот на Европскиот совет дека блокот треба да биде подготвен да ги прифати новите членки во 2030 година .”Не сме фокусирани на датум, туку се фокусиравме на многу тесна соработка со земјите-кандидатки за да се подготвиме за пристап во Европската унија”, рече заменик-портпаролката на Комисијата, Дејна Спинант, на дневниот брифинг за печатот. Таа додаде дека Шарл Мишел не се консултирал со претседателката на Комисијата Урсула фон дер Лејен за содржината на неговиот говор за проширувањето на унијата, на самитот во Блед, Словенија. Најновото несогласување што излезе во јавноста помеѓу Фон Дер Лејен и Мишел кои исто така ги нарекуваат „Чудната двојка на Европа” доаѓа откако се отвори темата за проширувањето на ЕУ со голема брзина се пренесе во Брисел, Исто така францускиот претседател Емануел Макрон предложи реформи со повеќе брзина на ЕУ во врска со пристапувањето на земјите-кандидатки. Некои балкански земји со години чекаат да влезат во ЕУ; според законската рамка, тие мора да исполнат голем број барања пред ова да стане можно. Според Спинант проширувањето е процес заснован на заслуги и на земјите-кандидатки треба да им биде дозволено да се приклучат само откако ќе ги исполнат критериумите за влез на ЕУ.

Џанг: Кина го повикува НАТО да се откаже од проширувањето кон исток

Тале Кристо — Thu, 03 Aug 2023 07:22:14 +0000

Кина ги повикува земјите од НАТО да го напуштат менталитетот на Студената војна и да се воздржат од експанзија кон исток, изјави кинескиот амбасадор во Руската Федерација, Џанг Ханхуи, во интервју за ТАСС. „Го повикуваме НАТО да биде во чекор со времето, да ги слуша праведните повици на земјите од азиско-пацифичкиот регион за мир и развој, да ги корегира нивните погрешни перцепции, да го напушти менталитетот на Студената војна и да се воздржи од влез во Азиско-пацифичкиот регион “, рече амбасадорот Џанг. Според него, Азиско-пацифичкиот регион е „територија на соработка и развој, а не шаховска табла за геополитички игри“. Тој нагласи дека овој регион успеал да одржи долгорочен просперитет и стабилност, како и да создаде „азиско-пацифичко чудо“ благодарение на взаемното почитување, отворената соработка, взаемната корист, заедничките придобивки“ и правилното решавање на разликите меѓу земјите од регионот. Џанг рече дека во сè потешката меѓународна ситуација, земјите од Азиско-пацифичкиот регион „ги ценат тешко стекнатите услови за мирен развој“. „Тие ја сфаќаат вистинската цел и штетните последици од проширувањето на НАТО во Азиско-пацифичкиот регион. Тие секогаш одржувале стратешка трезвеност и свесно ги одржуваа мирот и стабилноста во регионот“, рече амбасадорот Џанг. „Земјите и луѓето од регионот никогаш нема да се согласат со плановите на НАТО и другите надворешни сили да посегнат во Азиско-пацифичкиот регион, кој е платформа за мирен дијалог. Овде не се добредојдени „Азиско-пацифичка верзија на НАТО“ и „натоизација на Азиско-пацифичкиот регион“, рече кинескиот дипломат.

Џафери апелира да се одржи моментумот и динамиката на процесот на проширување на ЕУ

Тале Кристо — Fri, 30 Jun 2023 15:47:56 +0000

Претседателот на Собранието, Талат Џафери на денешното обраќање на Меѓународната конференција за одбележување на меѓународниот ден на парламентаризмот на тема: „Одбраната на европските вредности и демократските институции соочени со новите предизвици и закани за демократијата“, што се одржува во Шпанија, апелираше да се одржи моментумот и динамиката на процесот на проширување, особено во поглед на предвиденото членство на Република Северна Македонија во Европската унија до 2030 година, како реална цел, но и на останатите земји од регионот кои ќе ги исполнат критериумите за членство. - Во спротивно, ризикуваме посакуваната победа и заштитата на европските вредности кои се негуваат повеќе од 70 години на нашиот континент да бидат сериозно загрозени од трети центри на моќ, рече Џафери. Џафери рече дека земјава која има кандидатски статус за членство од 2005 година и земја која треба да ги отвори поглавјата за преговори како последна фаза од процесот на пристапување во ЕУ, вклучително и ние како Собрание, континуирано работи и покрај сите бариери во изминатите децении, на исполнување на копенхашките критериуми за унапредување на евроинтегративен пат. - Доказ за доследното почитување на европските вредности, е нашата целосна усогласеност со заедничката надворешна и безбедносна политика на ЕУ, вклучително и со рестриктивните мерки кон Рускатата Федерација. Во однос на законодавството на ЕУ кое досега го донесовме во Собранието, оценките се дека земјата има значителен степен на усогласеност и истиот треба да продолжи понатаму со отворањето на преговарачките поглавја, нагласи претседателот на Собранието.

Анкета: Австријците се против проширување на ЕУ

Тале Кристо — Fri, 12 May 2023 13:43:13 +0000

Резултатите од најновата анкета на Австриското друштво за европска политика (ОГфЕ) покажуваат дека Австријците, за разлика од нивните политичари, се против членството земјите од Западен Балкан во Европска Унија. Мислењето на австриската јавноста за членство на Северна Македонија, Србија, Црна Гора и Албанија во ЕУ не покажува големи осцилации. Дваесет и еден процент од испитаниците изјавиле дека го поддржуваат членството на Северна Македонија во ЕУ, а против се 47 отсто. Поддршката за членството на Албанија во Унијата изнесува 22 проценти, а 51 отсто од Австријците се против. Австријците не гледаат благонаклоно ниту кон членството на Косово во ЕУ, за се изјасниле 16 проценти од испитаниците, додека поддршката за Босна и Херцеговина изнесува 29 отсто. Анкетата покажува дека Србија има 24 проценти поддршка, а Црна Гора еден отсто помалку. Резултатите покажуваат дека најмала поддршка има Турција, за нејзино членство во ЕУ се изјасниле само осум проценти. ОГфЕ од 2010 година спроведува истражување на јавното мислење за пристапот на Западен Балкан и Турција, а сега во истражувањето се вклучени Украина, Молдавија и Грузија. Анкетата покажува дека за Украина 24 отсто, за Молдавија 22 проценти, а за Грузија 17 отсто. Во анкетата беше поставено и прашањето за проширување на Шенген зоната со Романија и Бугарија. Само 38 отсто од анкетираните би ја прифатиле Бугарија во Шенген зоната, а 36 отсто би ја прифатиле Романија. - Официјална Австрија одамна се гледа себеси како убеден поддржувач на проширувањето на ЕУ, особено кога станува збор за влезот на државите од Западен Балкан. Сепак, населението традиционално има поинакво мислење за ова прашање. Јавното мислење е поделено по ова прашање и тоа е одраз на политичкиот дискурс. Консолидацијата на Унијата и решавањето на акутните проблеми во јавноста има јасна предност во однос на понатамошното, поголемо проширување на ЕУ, истакна генералниот секретар на ОГфЕ. Пол Шмит. Анкетата е спроведена од 11 до 13 април при што се испитани 1.000 граѓани на возраст од 16 до 80 години.

Европарламентот денеска ќе расправа по прашањето за проширување на Шенген-зоната

Тале Кристо — Wed, 05 Oct 2022 06:38:43 +0000

Европскиот парламент на денешната седница ќе расправа за пристапување на Бугарија и Романија во Шенген-зоната, при што се очекува европратениците да побараат проширување на областа на слободно движење за да ги вклучи сите земји-членки на ЕУ што сакаат да бидат вклучени во неа. Освен Бугарија и Романија, во моментов надвор од Шенген се и Хрватска, Кипар и Ирска. Тоа не се први дебати во Европскиот парламент на кои се упатува повик Бугарија и Романија да се вклучат во областа на слободното движење. Апел имаше и во резолуциите усвоени во 2018 и 2020 година, како и во минатогодишниот извештај за функционирањето на Шенген-зоната. Европската комисија, исто така, во повеќе наврати апелираше за влез на Бугарија и Романија во зоната. За тоа да се случи е неопходна едногласна согласност во Советот на ЕУ. Прашањето не беше приоритет на француското претседателство во Унијата што заврши на крајот на јуни, а администрацијата на претседателот Емануел Макрон беше на мислење дека пред приемот нови членки треба да се спроведат реформи во Шенген-зоната. Холандија и натаму се спротивставува на приемот нови членки.

Проширувањето на ЕУ дел од дебатата за укинување на едногласноста при одлучувањето

Тале Кристо — Tue, 20 Sep 2022 19:23:48 +0000

Чешкото претседателство со ЕУ ја отвори темата за укинување на едногласно одлучување во одредени области од надворешната политика, при што проширувањето на Унијата иако не е висок приоритет, сепак е дел од дебатите, јави дописничката на МИА од Брисел. Министерот за европски работи на Чешка, Микулаш Бек, на прес-конференцијата денеска по Советот за општи работи на ЕУ, призна дека не е преголем оптимист дека до крајот на чешкото претседавање ќе се постигне успех за овој предлог да се премине од едногласност на квалификувано мнозинство во надворешната и безбедносната политика во Советот на ЕУ, но рече и дека не се откажува. Прага од земјите членки побара да ги дадат своите размислувања, кои делови од надворешната и безбедносната политика прифатливо би поминале под гласање со квалификувано мнозинство. Главната цел на оваа расправа е да се надминат блокадите на земји како Унгарија во санкциите против Русија, но министерот Бек потсети и на говорот на германскиот канцелар Олаф Шолц, кој неодамна посочи дека е време и одлуките за проширување да бидат ослободени од едногласното одлучување. Некои од поранешните силни противници (на квалификуваното мнозинство) се и силни поддржувачи на проширувањето, го слушнавме говорот на канцеларот Шолц, рече тој споменувајќи ја поврзаноста со проширувањето и потребата да се промени начинот на одлучување. За министерот Бек најпродуктивно во овој момент е да се добие генерална и широка слика од сите земји членки, каде се тие подготвени да попуштат за едногласното одлучување и истакна дека во овој дел важни елементи се теми како транснационални листи за ЕУ изборите, проширувањето и влезот на Украина во заедничкиот пазар на ЕУ, итн. -Не сум преголем оптимист, но не е сѐ изгубено. Има важни теми на маса, изјави Бек, повикувајќи уште еднаш да се има големата геополитичка слика на ум. На прашање на МИА дали станало збор и конкретно за укинување на едногласноста во областа на проширувањето, чешкиот министер одговори дека „проширувањето не беше официјална главна тема“. -Но, некако беше присутно во дискусијата за процесот на одлучување, повеќе земји членки го споменаа како релевантен контекст во дебатата и чешкото претседателство е многу посветено на процесот на проширување, многу е важно да биде присутен контекстот во дебатата за институционални промени, изјави Бек на прес-конференцијата попладнево.

Ѓукановиќ: Забавениот процес на проширување на ЕУ создава деликатна и кревка ситуација на Западен Балкан

Тале Кристо — Thu, 10 Feb 2022 10:10:44 +0000

Забавената политика на проширување на ЕУ со земјите од Западен Балкан и влошувањето на односите меѓу Исток и Запад се двата фактори што, според претседателот на Црна Гора Мило Ѓукановиќ, создаваат кревка и деликатна ситуација во однос на политичката и безбедносната стабилност во регионот, јави дописничката на МИА од Атина. Црногорскиот претседател во интервјуто за грчката новинска агенција АНА-МПА, говори за ЕУ перспективата, но и за ситуацијата на Западен Балкан, велејќи дека во последните неколку години регионот се соочува со „сè поамбициозно присуство на трети страни, кои настапуваат со политички платформи, спротивни со вредностите и политичките платформи на Европската Унија“. -Многу е деликатна ситуацијата кога е во прашање политичката и безбедносната стабилност на Западен Балкан. Мислам дека сите забележуваме дека таа стабилност денес е покревка во споредба со пред само неколку години. Тоа е последица на две околности: Прво, многу забавената речиси запрена политика на проширувањето на Европската Унија што се однесува на иднината на земјите од Западен Балкан. Втората околност е радикалното влошување на односите меѓу Исток и Запад на глобално ниво. Ова влошување јасно се гледа на Западен Балкан и Балканот во целина, како пожелен терен за влез на различни глобални политички интереси, објасни Ѓукановиќ и додаде дека целта на овие трети страни е „да се запре евроатлантскиот тек на Западен Балкан“. Во интервјуто потенцираше дека Грција има голема одговорност бидејќи многу добро го знае регионот, ги разбира предизвиците, а истовремено е членка на НАТО и ЕУ, па така, може да одигра важна улога и да ја убеди Унијата колку е важно проширувањето. За кризата во Украина, Ѓукановиќ изразува надеж дека сепак ќе е надвладее логиката и вели дека постои ризик оваа криза да има влијание и на Балканот.