прв случај – Kurir.mk

Регистриран прв случај на мајмунски сипаници во Турција

Магдалена Андонова — Thu, 30 Jun 2022 09:12:07 +0000

Во Турција е потврден првиот случај на мајмунска сипаница, соопшти денеска турскиот министер за здравство Фахретин Коџа. Според него, пациентот има 37 години и има нарушен имунолошки систем. Коџа на Твитер изјави дека пациентот е во изолација, како и дека други случаи не се идентификувани. Тој потсети дека оваа болест не се пренесува по воздушен пат, туку со близок физички контакт.

ДЕТЕКТИРАН СЛУЧАЈ НА ИНФЕКЦИЈА КОМБИНИРАНА ОД ГРИП И КОРОНАВИРУС: Ова се деталите за патникот кој пристигнал во Македонија со овој вирус

Магдалена Андонова — Wed, 05 Jan 2022 13:38:13 +0000

Министерството за здравство ја информира јавноста дека од страна на ПЗУ Синлаб до Институтот за јавно здравје е доставена информација за детектиран еден случај на флурон, (комбинирана инфекција со вирусот на грип и коронавирусот) кај 26 годишен пациент од општина Зајас. Според епидемиолошката анкета, пациентот со коинфекција Ковид19/Инфлуенца А, непосредно пред 31.12.2021 година се вратил од САД и според неговите кажувања таму примил вакцина за Ковид 19, односно се ревакцинирал неколку дена пред да пристигне во РСМ. Пациентот е упатен на домашно лекување, бидејќи засега нема тешка клиничка слика.

Потврден првиот случај на сезонски грип во Србија

Магдалена Андонова — Thu, 16 Dec 2021 11:13:49 +0000

На територијата на Србија е потврден првиот случај на грип во сезоната 2021/2022, соопшти денеска Институтот за јавно здравје на Србија „Д-р Милан Јовановиќ Батут“. Во соопштението се прецизира дека Батут на 15 декември во попладневните часови добил потврда од Националната референтна лабораторија за грип и други респираторни вируси на Институтот за вирусологија, вакцини и серуми „Торлак“, за првиот случај на инфекција со вирусот на грип от типот А (Х3) во Белград, јави дописникот на МИА од Белград. Батут посочува дека, како и во повеќето претходни сезони на надзор на грипот, лабораториската потврда на вирусот во овој период од годината е очекувана. Во соопштението се потсетува дека минатата сезона 2020/2021 година немало лабораториска потврда за инфекција со вирусот на грип. Од таму посочуваат дека најефикасна мерка за спречување на инфекција со вирусот на грип е вакцинацијата, како и да вакцината против грип е најбезбедна форма на индивидуална и колективна заштита. (МИА)

Регистриран првиот случај на омикрон во Нов Зеланд: Заразениот допатувал од Германија преку Дубаи

Магдалена Андонова — Thu, 16 Dec 2021 08:45:23 +0000

Првиот случај на омикрон варијанта на коронавирус е откриен во Нов Зеланд. Како што објасни шефот на здравствената служба на таа земја, Ешли Блумфилд, станува збор за лице кое со авион пристигнало од Германија преку Дубаи и слетало во Окленд. Заразеното лице моментално се наоѓа во изолациона установа во градот Крајстчерч, пренесува Гардијан. Блумфилд рече дека сите патници од тој лет биле префрлени во Крајстчерч со домашен чартер лет, во согласност со сите вообичаени протоколи. Тие се третираат како блиски контакти на лице заразено со омикрон варијанта и се наоѓаат на истиот кат во изолационен објект.

Прв случај на омикрон во Сенегал, откриен бил кај маж кој бил вакциниран

Магдалена Андонова — Sun, 05 Dec 2021 16:56:34 +0000

Сенегал, по Нигерија и Гана, е трета западноафриканска држава каде е регистриран првиот случај на сојот Омикрон на коронавирусот. Новиот сој на Ковид-19 првпат беше пријавен во Јужна Африка кон крајот на ноември. Сојот Омикрон е откриен во петокот кај 58-годишен маж кој со авион пристигнал во Сенегал на 22 ноември. Тој во април примил вакцина на Астра Зенека, а во јуни се вакцинирал со Фајзер. Заразеното лице престојувал во хотел во главниот град на Сенегал, Дакар и учествувал на меѓународна конференција одржана во тој град. (МИА)

Потврден првиот случај на омикрон во Хрватска

Магдалена Андонова — Sat, 04 Dec 2021 11:28:51 +0000

Во Хрватска е потврден првиот случај на омикрон сојот на коронавирус, пишува 24.сата.хр. Според извештаите, примерокот бил земен во приватна клиника во Загреб. Наводно бил тестиран странски работник од Јужна Африка, кој бил на стручен состанок во Загреб. Информацијата ја потврдија од Институтот Руѓер Бошковиќ. - Лицето кое го направило тестот изразило сомнеж за можност за зараза со нова варијанта на коронаравирусот омикрон, поради контакт со лице од Јужноафриканската Република. Примерокот е испратен на понатамошна обработка. ПЦР анализата покажа одредени отстапувања во однос на другите варијанти на корона вирусот - пишува во соопштението. - Целна анализа со секвенционирање на клучните региони на геномот SARS-CoV-2 покажа присуство на мутации карактеристични за новата варијанта SARS-CoV-2 омикрон. За резултатите се информирани Хрватскиот завод за јавно здравје и Министерството за здравство, па се чека нивната официјална потврда. Исто така, имајте предвид дека потребни се 72 часа за да се добие конечниот резултат на секвенционирање. Хрватскиот завод за јавно здравје навремено ќе ја информира јавноста за конечните резултати - се додава.

Делта плус сојот сè поблиску до Македонија: Во Хрватска регистриран првиот случај на овој вид на коронавирус

Магдалена Андонова — Fri, 05 Nov 2021 09:45:52 +0000

Во Хрватска е регистриран првиот случај на делта плус сојот на коронавирус, изјави заменик директорот на Хрватскиот завод за јавно здравје, Ивана Павиќ Шиметин. Таа изјави дека првиот случај на делта плус сојот е регистриран во Чаковец. - Знаевме дека е пред вратата. Искуството со делта и алфа сојот ќе се покаже колку е опасен. Засега се знае дека е нешто позаразен од делта сојот, истакна Шиметинова. Сојот Делта Плус беше класифициран од индиското Министерство за здравство во јуни како „варијанта на загриженост“. Оваа ознака покажува дека се чини дека е позаразен, полесно се врзува за клетките на белите дробови и е потенцијално отпорен на терапија со моноклонални антитела, што значи дека може да го пробие стекнатиот имунитет. Хрватскиот министер за здравство Вили Берош најави дека Републичкиот штаб денеска ќе донесе нов пакет мерки за сузбивање на ширењето на коронавирусот, меѓу кои ќе биде и пошироката употреба на потврдите за ковид, а нема да има нови затворања. Сертификатите за Ковид во моментов се потребни само во здравствената и социјалната заштита. Повикувајќи се на своите сознанија, порталот „Индекс“ наведува дека ќе се воведат сертификати за ковид во сите државни и јавни служби, за вработените и корисниците на нивните услуги. Тоа значи дека секој кој работи во некои државни или локални институции ќе треба да има потврда за доаѓање на работа, но и граѓаните кои доаѓаат во јавните институции да направат нешто. Во четвртокот во Хрватска имаше 6.310 нови случаи на коронавирус, најмногу од почетокот на епидемијата. Речиси секое второ лице кое било тестирано било позитивно.

Во Данска пријавен првиот случај на новиот вид на коронавирус од Јужна Африка

Магдалена Андонова — Sat, 16 Jan 2021 17:45:56 +0000

Данска го регистрираше првиот случај на позаразниот вид на коронавирус, откриен во Јужноафриканската Република, јави денеска Државниот институт за серуми. Според Институтот, станува збор за вид на вирус познат како Б.1.351 / 501Y, пренесуваат британските медиуми. Претходно данските здравствени власти денеска јавија дека во земјата се регистрирани вкупно 256 случаи на инфекција со Б117, исто така позаразен вид на коронавирус, првпат идентификуван во Велика Британија. Досега во Данска се пријавени 188.199 случаи на коронавирус, а умрени се 1.747 лица. Данска во средата ја продолжи блокадата за три недели во обид да се намали ширењето на новиот вид за кој властите стравуваат дека ќе биде доминантен до средината на февруари. (МИА)

Прв случај на зараза со коронавирус кај големи мајмуни

Тале Кристо — Tue, 12 Jan 2021 08:43:24 +0000

Повеќе горили во зоолошката градина во Сан Диего во Калифорнија се заразиле со коронавирус и покажуваат симптоми на болеста, вклучувајќи и кашлица. Тоа е прв познат случај за пренесување на овој вирус кај големите мајмуни, соопшти ЗОО. Се претпоставува дека осумте горили се заразени со Ковид-19 од асимптоматски членови на персоналот, и покрај почитувањето на строгите протоколи за биолошка безбедност согласно насоките на американскиот Центар за контрола и превенција на болести. Зоолошката градина тестирала примероци од фекалии на горилите, откако минатата среда две од животните почнале на кашлаат, се наведува во соопштението. Првичните резултати покажале присуство на вирусот само кај некои горили, но имајќи предвид дека животните живеат заедно, вработените во ЗОО претпоставуваат дека е заразена цела група од пет женки и тројца мажјаци. Три горили моментно покажуваат симптоми на болеста, вклучувајќи и кашлица, а целата група е под постојан надзор. – Освен кашлицата, горилите добро се снаоѓаат. Групата останува заедно, но е во карантин, изјави генералната директорка на Сафари паркот, Лиса Петерсон. Коронавирусот е откриен и кај голем број други видови диви животни во заробеништво, вклучувајќи неколку лавови и тигри во зоолошката градина Бронкс во Њујорк и четири лавови во зоолошката градина во Барселона во Шпанија. – Меѓутоа, горилите во Сан Диего се прв познат случај на инфекцијата потврдена кај мајмуни, изјави портпаролот на зоолошката градина Ендру Џејмс. Вирусот, исто така, се појави и кај голем број домашни кучиња и мачки. Минатиот месец, Министерството за земјоделство на САД го потврди првиот познат случај на коронавирус кај животни во дивината, а заразата е откриена кај визони.

Оваа држава денеска за прв пат потврди случај на зараза со коронавирусот !

Магдалена Андонова — Mon, 11 Jan 2021 12:25:17 +0000

Микронезија денеска го потврди првиот случај на зараза со коронавирус, изјави претседателот на државата Давид Пануело. Оваа островска држава во Пацификот досега беше една од малубројните земји кои немаа регистрирано ниту еден случај на Ковид-19 Член на екипажот на еден брод бил позитивен на тестот на коронавирус. По враќањето од бродот, кој бил на ремонт на Филипините, заразениот веднаш е ставен во карантин. Микронезија и други островски држави во Пацификот уште на самиот почеток на пандемијата веднаш се изолираа и ги затворија своите граници. (МИА)