Психијатриска Болница Бардовци – Kurir.mk

Нов кластер во здравство: Коронавирусот се шири меѓу пациенти во психијатриската болница во Бардовци

Ивана Ефремовски — Thu, 15 Oct 2020 10:13:02 +0000

Неколку штитеници на Психијатриската болница-Бардовци во Скопје се позитивни на корона вирусот, дознава Фактор. Според неофицијалните информации, кластерот од неколкумина заболени е во одделението за Геријатрија каде се сместени највозрасните пациенти. Таму утринава е испратен тим за да направи увид, со цел да се знае точниот број на заразени со Ковид-19, како и утврдување на контактите. Понатаму, како што велат изворите на Фактор, ќе се постапува според утврдените протоколи, што значи дека вработените кои веќе имале контакт со штитениците позитивни на корона вирусот ќе бидат во домашна изолација. -Заразените повозрасни штитеници ако немаат тешка форма на болеста, односно се со полесни симптоми ќе си останат изолирани од останатите во рамки на Психијатриската болница Бардовци, вели изворот на Фактор. Во последните 24 часа, во Македонија е регистриран највисок број на позитивни на ковид, 445, од кои само во Скопје беа 249. Меѓу нив е и кластерот од Психијатриската болница Бардовци.

Предложено задолжително психијатриско лекување за млад скопјанец обвинет за убиство на сопствениот татко

Дарко Андоновски — Mon, 08 Jun 2020 11:21:42 +0000

Надлежен јавен обвинител од Основното јавно обвинителство Скопје денеска до Основниот кривичен суд Скопје поднесе Предлог за изрекување мерка на безбедност – задолжително психијатриско лекување и чување во здравствена установа за лице обвинето за кривично дело – Убиство од член 123 став 2 точка 2 во врска со член 12 став 1 од Кривичниот законик. Имено, обвинетиот 24–годишник, на 12 април, во состојба на непресметливост поради привремено душевно растројство, при вршење семејно насилство, го лишил од живот сопствениот татко. Додека оштетениот седел на внатрешните скали кои воделе од приземјето кон повисокиот кат на куќата, обвинетиот се симнал по скалите од горниот кат, држејќи нож во раката и поради претходно нарушени семејни односи, на својот татко му задал пет рани во пределот на главата, вратот и раката. Оштетениот успеал да се оттргне и пеш тргнал кон Клиничкиот центар „Мајка Тереза“ кој бил во близина на неговото живеалиште за да побара лекарска помош. Но како последица на обилното крварење од раните кај него настапила шокова состојба, која довела до нарушување и конечен престанок на работата на виталните органи, па тој починал во кругот на Клиничкиот центар. Со оглед на утрврдената фактичка состојба во поглед на здравствената состојба и непресметливоста на обвинетиот, јавниот обвинител му предложи на судот да ја укине претходно определената мерка притвор, но обвинетото лице да не биде пуштено на слобода, туку до завршување на постапката против него за примена на мерките на безбедност, привремено да се смести во соодветна здравствена установа.

Пациент во Бардовци починал откако паднал по скали, неговиот брат се сомнева дека бил претепан до смрт

Катерина Бојаџиева — Wed, 26 Jun 2019 17:36:30 +0000

Пад по скали во психијатриската болница Бардовци, бил фатален за 58 годишниот Владо Ристески кој таму бил цели 20 години. Како што пренесува „Телма“, неговиот брат Слободан добил повик дека Владо е тешко повреден и со Брза помош пренесен во Градската општа болница 8ми септември, но се сомнева дека некој го турнал по скалите. Тој бил ставен на апарати за дишење, а по неколку дена на 24. април починал. Од психијатриската болница Бардовци тврдат дека Ристевски не бил нападнат, туку паднал сам по скалите и дека се превземени сите мерки. Без обдукција семејството на починатиот има основа за сомнеж па затоа смртта на Владо ја пријавиле и во полиција.

Болничар нападнат од пациент во „Бардовци“

Ивона Петрова — Tue, 25 Dec 2018 12:58:57 +0000

Во Психијатриската Болница Бардовци Б.Ш. кој бил пациент во болницата физички го нападнал болничарот С.Д.(38) од Скопје. Инцидентот се случил вчера околу 18:30 часот. Се преземаат мерки за расчистување на случајот.