работна група – Kurir.mk

Формирана Работна група за прашањето за најниските пензии

Ивона Петрова — Tue, 22 Aug 2023 14:56:18 +0000

Владата на денешната седница ја разгледа и усвои Информацијата од Министерството за труд и социјална политика за формирање Работна група за разгледување предлози за прашањето за најниската пензија во Република Северна Македонија, како и пакет мерки за помош и поддршка на пензионерите и го донесе Решението за формирање на Работната група, соопшти владината прес-служба. Работна група за разгледување на предлози за прашањето за најниската пензија во Република Северна Македонија, како и пакет мерки за помош и поддршка на пензионерите е задолжена да достави до Владата соодветен и финансиски издржлив предлог за најниската пензија и предлог мерки за помош и поддршка на пензионерите.

Мицкоски: Информациите за редефинирање на Македонија доаѓаат токму од членовите на т.н. работна група надвор од официјалниот работен дел

Ивона Петрова — Fri, 26 May 2023 11:22:10 +0000

Претседателот на ВМРО-ДПМНЕ, професор д-р Христијан Мицкоски на увидот на градежните активности во Кисела Вода, од новинарите беше запрашан врз што и темели ставовите дека со уставните измени се спрема редефинирање на Македонија во бинационална држава. Мицкоски истакна дека ваквите ставови ги темели врз информациите кои ги споделуваат членовите на, така наречената, работна група за уставни измени надвор од официјалниот дел на истата, каде што преамбулата треба да биде сменета со која Македонија ќе се редефинира како држава на два народи, а другите граѓани ќе бидат етнички заедници и малцинства. „Токму на информациите кои доаѓаат од истата таа работна група, од луѓето кои што тоа го зборуваат надвор од официјалниот дел од работата на таа, така наречена, работна група, преамбулата да биде променета и да биде, практично, Македонија редефинирана како држава на два народи, етнички заедници и потоа малцинства. Во три столба ги градираат сите наши сограѓани и тоа е дојдено како информација директно од работната група“, рече Мицкоски. Но, како и да е, додаде Мицкоски, таа тема за ВМРО-ДПМНЕ е затворена, уставни измени во овој состав и под овие услови нема да има, повторувајќи го ставот дека ВМРО-ДПМНЕ поддржува промена на устав по хрватски модел, кој воедно е устав на земја членка на Европската Унија. „Често пати гледам преку оние платени експерти, дебата јавна, дека па добро, што дека во следниот состав еве ВМРО ќе победи, ќе направи влада, ќе има уставни измени. Еве повторно сега ви кажувам, во ниту еден состав под овие услови, без разлика дали ВМРО-ДПМНЕ е влада или не е влада, нема да има. Условите или ќе се сменат за да почнеме да размислуваме во таа насока, или нема да има. со овие услови, со овие околности, нема да има. Ние предложивме, цело време сме проактивни и велиме, вие го споменувавте тој модел, ние велиме тој модел е модел на земја членка на Европската Унија, ајде да го примениме“, истакна Мицкоски. Мицкоски посочи дека имаме неодговорна влада, која и по однос на ова прашање брзо смени став, која што за да остане ден повеќе, за да може да украде евро повеќе, се би направила, додавајќи дека забораваат дека доаѓа денот на одговорност и тој ден многу скоро ќе дојде.

Седница на Работната група за уставни измени

Ивона Петрова — Fri, 26 May 2023 05:24:42 +0000

Работната група формирана при Министерството за правда со задача за подготвување на Предлог иницијативата за потребата од измени на Уставот денеска ќе одржи седница. Како што информира Министерството за правда при формирањето на групата, откако ќе бидат подготвени измените, предлогот ќе ги помине сите работни тела во рамки на Собранието, а паралелно со работата на групата ќе се одржуваат и стручни јавни расправи на кои експерти, партии, граѓански организации и други институции ќе може да ги кажат своите ставови. Превидено е официјален предлагач на уставните измени да биде Владата. Премиерот Димитар Ковачевски вчера порача дека Работната група за уставните измени има обврска да ги подготви измените на Преамбулата на Уставот согласно преговарачката рамка, додавајќи дека тоа е обврска, која е императив и нејзина основна работа. - Се работи за промена на Преамбулата и внесување други делови од народи во неа, каде веќе има и други делови од народи, дополни Ковачевски, коментирајќи ги тврдењата на лидерот на ВМРО-ДПМНЕ, Христијан Мицкоски дека „власта со уставните измени работи на создавање бинационална држава“. Според Ковачевски, ваквите тврдења претставуваат шпекулација, замајување на јавноста, најнова лага и уште една небулоза во низата. - Тоа е уште една од низата небулози и замајување на јавноста од страна на опозицијата. Истата таа опозиција зборуваше и дека во државата ќе има не знам колку милиони мигранти, дека државата ќе се кантонизира, дека со гласањето на францускиот предлог ќе сме станеле бугаризирани и асимилирани и дека ќе сме го изгубеле македонскиот јазик, но ништо од тоа не се случи. Ова е најновата во низата лаги. Се работи за шпекулација и за зборување нешто од немајкаде. Кога сите факти ќе ве побијат, не ви останува ништо друго освен измислување нови небулози кои ќе шират хистерија и страв кај народот, а нема да направат ништо добро, истакна Ковачевски. Мицкоски во вторникот во Кавадарци изјави дека е „загрижен од информациите што ги добива“ дека Работната група не работи само на внесување на „минималното бугарско малцинство“ во Преамбулата на Уставот, туку и за целосно редефинирање на земјата како држава на два народа. Во однос, пак, на изјавата на претседателот на бугарското Собрание, Росен Жељазков, дека за Бугарија е важен условот за уставни измени за вклучување на Бугарите во македонскиот Устав, премиерот Ковачевски изјави дека не ја слушнал, но дека промената на Преамбулата и внесувањето на деловите од бугарскиот народ, „3500 наши сограѓани кои се самоопределуваат како Бугари, е дел од преговарачката рамка во која обезбедивме заштитен македонски јазик и идентитет и со која ги почнавме преговорите“. - Ова е една од обврските која нашето Собрание ќе ја направи и потоа ќе продолжиме со отворањето на поглавјата и кластерите, а земјава до 2030 година ќе стане дел од ЕУ. Тоа е целта што ќе ја оствариме сите заедно, подвлече Ковачевски.. Жељазков во интервју за БГНЕС изјави дека бугарскиот став останува непроменет дека земјава треба што поскоро да го започне и заврши преговарачкиот процес и да стане полноправна членка на ЕУ како резултат на сопствениот придонес и со исполнување на критериумите за членство, а не врз основа на политичка одлука. Тој нагласи дека за Бугарија е важен условот „поставен од Европската комисија“ за уставни измени за вклучување Бугарите во македонскиот Устав. - Ова е апсолутен предуслов за почеток на преговорите. Ова не е наше билатерално прашање, тоа е услов кој е поставен и евидентиран во условите за почеток на преговорите и го следи Европската комисија, изјави Жељазков. Тој додаде дека земјава не треба да губи време, бидејќи загубеното време ќе се претвори во скептицизам. - На Македонците им требаат брзи одлучни акти и решителни одлуки, без да ја бараат причината надвор. Многу е важно причините, намерите и успесите да бидат нивни, додаде Жељазков. Хрватскиот претседател Зоран Милановиќ вчера од Софија порача дека доколку земјава не ги спроведе уставните измени на кои се обврза, ќе дојде до точка кога е можно да биде раздвоена од Албанија во преговарачкиот процес за влез во ЕУ. - Северна Македонија има одредени услови кои доколку не ги исполни, нема да може да продолжи. Македонија го потпиша овој услов и мора да го исполни, изјави Милановиќ, кој престојува во официјална посета на Бугарија на покана на шефот на бугарската држава Румен Радев. Милановиќ и Радев на заедничката прес-конференција порачаа дека забрзувањето на евроинтегративниот процес за Западен Балкан е клучен фактор за стабилноста, безбедноста и просперитетот на регионот. Експертската работна група ја сочинуваат Маргарита Цаца Николовска - поранешен судија во Европскиот суд за човекови права во Стразбур, која е нејзин претседател, а членови се Сали Мурати - поранешен претседател на Уставен суд, Бајрам Положани - поранешен уставен судија и професор по уставно право, Бранко Наумовски - поранешен претседател на Уставен суд, Јетон Шасивари - професор на Универзитетот на ЈИЕ, Ана Чупеска - професор на Правен факултет „Јустинијан Први”, Елена Михајлова Стратилати - професор на Правен факултет „Јустинијан Први”, Беса Арифи - професор на Универзитетот на ЈИЕ, Јагода Митревска - професор на Меѓународен Славјански Универзитет и Марија Пандевска - професор на Институт за национална историја. Од Министерството за правда најавија и дека списокот на членови на Работната група ќе се дополнува во наредниот период и со други експерти кои ќе дадат придонес во подготовката на уставните измени.

Николовска: Утре на дневен ред е усвојување на деловникот на работната група за уставни измени

Ивона Петрова — Thu, 18 May 2023 09:44:57 +0000

Претседателката на Работната група за уставни измени Маргарита Цаца Николовска изјави дека утре на дневен ред е усвојувањето на деловникот за работа на работната група која треба да го подготви текстот за иницијативата за измени на Уставот на државата. - Утре, на дневен ред ни е усвојување на деловникот којшто е многу важен за работата на оваа комисија, којашто е многубројна и со таква многубројна комисија не може да очекувате за еден, два дена многу работи да се завршат. Одиме постепено, рече Николовска. Таа посочи дека никој нема поставено рокови по однос на нивната работа. - Откога ќе почнеме да работиме на суштината на проблемот, откога ќе почнеме да ги разгледуваме можностите за Нацрт-предлогот за иницијатива за промена на Уставот, тогаш ќе можеме малку повеќе да зборуваме и за рокови. Меѓутоа, можам да ве уверам дека сите ние сакаме колку е возможно побрзо да се заврши суштинската расправа. И во таа насока откога ќе почнеме и да работиме на суштинската расправа ќе добивате информации и транспарентноста ќе биде застапена без каков било проблем, рече Николовска.

Работната група за уставни измени се очекува в среда или четврток да почне со работа

Ивона Петрова — Sun, 23 Apr 2023 19:01:28 +0000

Работната група за уставни измени се очекува в среда или во четврток да ја одржи првата седница, потврдија за МИА од Министерството за правда. Експертската работна група, како што информираа од Министерството за правда ќе ја сочинуваат Сали Мурати - поранешен претседател на Уставен суд, Маргарита Цаца Николовска - поранешен судија во Европскиот суд за човекови права во Стразбур, Бајрам Положани - поранешен уставен судија и професор по уставно право, Бранко Наумовски - поранешен претседател на Уставен суд, Јетон Шасивари - професор на Универзитетот на ЈИЕ, Ана Чупеска - професор на Правен факултет „Јустинијан Први”, Елена Михајлова Стратилати - професор на Правен факултет „Јустинијан Први”, Беса Арифи - професор на Универзитетот на ЈИЕ, Јагода Митревска - професор на Меѓународен Славјански Универзитет и Марија Пандевска - професор на Институт за национална историја. Партиите за членови во Работната група за уставни измени ги предложија Цветанка Иванова од СДСМ, Арбр Адеми од ДУИ, Ремзи Мехмеди од Алијанса на Албанците, Соња Мираковска од НСДП, Нано Ружин од ЛДП, Христа Најданов од ДОМ, Темелко Ристески од Партијата на пензионери, Раметула Куќи од ДПА, Еран Куртиш од Партијата за движење на Турците и Бејџан Илјас од Демократската партија на Турците. Од институциите предложени се Александар Спасов од Кабинетот на претседателот на Република Северна Македонија, Драган Тилев од Секретаријатот за европски прашања и Шпенд Садики од Министерството за надворешни работи. Списокот на Работната група ќе се дополнува во наредниот период и со други членови кои ќе дадат свој придонес во подготовката на уставните измени. Ова работно тело е формирано од Министерството за правда кое е задолжено од Владата да ја подготви предлог иницијативата за потребата од уставни измени. Владата е предлагач на уставните измени. Откако ќе се подготват измените, предлогот ќе ги помине сите работни тела во рамките на Собранието. Паралелно ќе се одржуваат и стручни јавни расправи на кои експерти, партии, граѓански организации и други институции ќе може да ги кажат своите ставови. Претседателот на ВМРО-ДПМНЕ, Христијан Мицкоски денеска изјави дека темата за уставни измени за ВМРО-ДПМНЕ е затворена. -Откако вистински експерти не прифатија да членуваат во работната група која ќе ги пишува амандманите, Ковачевски собрал луѓе кои ниту се експерти, ниту имаат искуство од областа, но затоа имаат сомнителни политички конекции, велат од ВМРО-ДПМНЕ. Од СДСМ го повикаа Мицкоски да престане да омаловажува професори и да понесе морална одговорност оти не учествува во ниту една државна одлука. - Заложникот Мицкоски не учествуваше во ниту една државна одлука, седи на страна и работи против ЕУ. Промашените пропаганди на ВМРО-ДПМНЕ и Левица се на штета на македонското општество и европскиот пат на земјата и СДСМ ќе ги разобличува секој ден, велат од СДСМ. За отварање на Уставот неопходно е во Парламентот да гласаат најмалку 80 пратеници.

Објавен составот на експертската работна група за уставни измени

Ивона Петрова — Wed, 19 Apr 2023 14:29:23 +0000

Министерството за правда попладнево ги објави имињата на експертите кои ќе учествуваат во работната група за уставни измени. Експертската работна група ќе ја сочинуваат Сали Мурати - поранешен претседател на Уставен суд, Маргарита Цаца Николовска - поранешен судија во Европскиот суд за човекови права во Стразбур, Бајрам Положани - поранешен уставен судија и професор по уставно право, Бранко Наумовски - поранешен претседател на Уставен суд, Јетон Шасивари - професор на Универзитетот на ЈИЕ, Ана Чупеска - професор на Правен факултет „Јустинијан Први”, Елена Михајлова Стратилати - професор на Правен факултет „Јустинијан Први”, Беса Арифи - професор на Универзитетот на ЈИЕ, Јагода Митревска - професор на Меѓународен Славјански Универзитет и Марија Пандевска - професор на Институт за национална историја. Списокот на работната група ќе се дополнува во наредниот период и со други членови кои ќе дадат свој придонес во подготовката на уставните измени. - Ова работно тело е формирано од Министерството за правда кое е задолжено од Владата да ја подготви предлог иницијативата за потребата од уставни измени. Владата е предлагач на уставните измени. Откако ќе се подготват измените, предлогот ќе ги помине сите работни тела во рамките на Собранието. Паралелно ќе се одржуваат и стручни јавни расправи на кои експерти, партии, граѓански организации и други институции ќе може да ги кажат своите ставови, наваедуваат од Министерството за правда.

СЕП до понеделник ќе го дефинира претставникот во работната група за уставни измени, Маричиќ ги повика сите партии да учествуваат

Ивона Петрова — Fri, 07 Apr 2023 09:36:32 +0000

Најдоцна до понеделник ќе биде дефинирано и соопштено името на претставникот од Секретаријатот за европски прашања (СЕП) кој ќе биде вклучен во работната група за уставни измени, изјави вицепремиерот за европски прашања Бојан Маричиќ. Одговарајќи на новинарски прашања, Маричиќ рече дека СЕП активно ќе учествува во таа работна група и ќе номинира лице што ќе биде претставник од Секретаријатот и со допис до понеделник ќе го информира Министерството за правда. -Секако, ќе биде лице со искуство и кое долго работи на тие прашања и што ќе може да даде соодветен придонес во работната група. Се уште не е дефинирано, но најдоцна до понеделник ќе го соопштиме и на јавноста, рече Маричиќ на заедничка прес-конференција со министерката за евроинтеграции на Србија, Тања Мишчевиќ. Нагласи дека се работи за многу важна работна група и се надева дека и сите политички партии ќе номинираат свој претставник. Ги повика да учествуваат во разговорот за процесот на уставни измени затоа што прашањето, како што рече, „порано или подоцна ќе дојде во Собранието и политичките партии ќе треба да се изјаснат“. Наместо ставови да се изнесуваат секој ден на прес-конференции, изјави и со партиски препукувања, таа работна група, рече Маричиќ, е вистинското место за дискусија, за размена на идеи, давање предлози и за дефинирање на Преамбулата и двете точки што треба да се променат во Уставот. -Од таа работна група да извадиме еден предлог кој потоа ќе најде свој простор за дискусија и во општеството и во Собранието. Многу е попрактично и поодговорно за државата да учествуваат сите политички партии, и јас ги охрабрувам да не се плашат и да учествуваат. Бидејќи јавно ги изнесоа ставовите, тие ставови да ги соочиме во работната група и да видиме дали можеме да дојдеме до едно заедничко решение, најдобро решение, и да изградиме македонски модел за вградување на овие три заедници или колку и да бидат, што се заинтересирани да влезат во Преамбулата на Уставот, и да го овозможиме тоа. Сметам дека на тој начин ќе се демистификува процесот повеќе отколку ако го задржиме на ниво на дневни изјави и политички препукувања. Ние ја поставуваме масата за разговор и ги каниме сите да седнат на таа маса и да разговараме, истакна вицепремиерот за европски прашања.

СОБРАНИЕ: Прва средба на работните групи за заклучоците за почеток на преговори со ЕУ

Ивона Петрова — Wed, 06 Jul 2022 05:34:18 +0000

Координаторите на пратеничките групи и други претставници на парламентарните партии денеска се очекува да одржат прва средба на која ќе се разговара за заклучоците што треба да бидат разгледани и усвоени од Собранието во врска со европскиот предлог и отпочнувањето на преговори за влез во ЕУ. Двете најголеми политички партии во Собранието, владејачката СДСМ и опозициската ВМРО-ДПМНЕ вчера го потврдија договорот за одржување вакви разговори во Собранието. Во работните групи политичките партии ќе бидат застапени со по двајца преставници од ВМРО-ДПМНЕ и СДСМ, по еден од ДУИ и Алијанса и уште еден од помалите парламентарни политички партии. Координаторот на пратеничката група на ВМРО-ДПМНЕ Никола Мицевски вчера изјави дека во Собранието ќе се формираат групи меѓу политички партии кои ќе работат на предлог-забелешките што се проблематични во целиот текст. Според него, ова доаѓа по повикот на лидерот на ВМРО-ДПМНЕ Христијан Мицкоски, за да се разговара за измени што ќе го подобрат предлогот и ќе се вметнат одредени забелешки во однос на се она што е на штета на државата и националните интереси. Ваквиот формат на разговори во Собранието го потврди и премиерот Димитар Ковачевски кој на прес-конференцијата со претседателот на Европскиот совет рече дека Собранието ќе донесе одлука дали ќе ги отпочнеме преговорите со ЕУ и ќе донесе заклучоци откако Владата до пратениците ќе ги достави европскиот предлог, билатералниот протокол и уште еден документ. Претседателот на Собранието Талат Џафери на средбата со претседателот на ЕС Шарл Мишел во Собранието, на која присуствуваа и координаторите на пратеничките групи и претставници на помалите политички партии, според соопштението од неговиот Кабинет, во однос на доставувањето на документите за прифаќањето на преговарачката рамка, истакнал дека по нив соодветно ќе се пристапи штом бидат доставени до Парламентот. -Поздравувајќи ја одлуката на претседателот Мишел за посета на земјата во овие моменти со цел да се запознае со различните мислења и ставови, претседателот Џафери посочи дека актуелното раководство и во минатото носело одлуки кои долгорочно се покажале како правилни за државата и нејзината иднина и дека носи одговорност за донесување стратешки одлуки. Правејќи паралела со помирувањето на Франција и Германија како основа за формирањето на денешната Европска унија, заклучи дека единствен начин за надминување на билатералните несогласувања останува отворениот дијалог и меѓусебното разбирање. Во однос на доставувањето на документите за прифаќањето на преговарачката рамка, претседателот Џафери истакна дека по истите соодветно ќе се пристапи штом бидат доставени до Собранието, соопшти Кабинетот на Џафери. На средбата Мишел образложил дека доаѓа во име на 27 земји членки на Унијата кои стојат зад предложената рамка за лично да ги слушне аргументираните и легитимни мислења и резерви на политичките актери, нагласувајќи дека има разбирање за фрустрациите и разочараноста во последните години околу официјалното неотпочнување на преговорите. – Случувањата во поширокото европско соседство придонесоа за порешителни одлуки на европските лидери во однос на процесот на проширување и спречување на трети страни за остварување на нивните интереси кои се спротивни на интересите на Унијата, рекол претседателот на ЕС. Во однос на загриженоста околу формулациите во преговарачката рамка, Мишел појаснил дека за македонскиот јазик се упатува јасна порака од Советот на ЕУ дека истиот се почитува и сите документи во текот на процесот ќе се преведуваат на македонски јазик. Исто така, потенцираше дека добрососедските односи се дел од критериумите и оти е важно истите да бидат надминати, но дека во процесот на преговори се вклучени сите членки на ЕУ кои будно ќе го следат процесот на преговори, се наведува во соопштението. Координаторот на Пратеничката група на ВМРО-ДПМНЕ, Никола Мицевски, искажал благодарност за денешната средба во еден исклучително сензитивен период за државата, укажувајќи ја нетранспарентноста во водењето на стратешките прашања како причина за реакциите на пошироката јавност, искажувајќи резерва за предлогот со барање да се достави на увид билатералниот протокол со Република Бугарија, за да се увери јавноста дали тој е или не е дел од преговарачкиот пакет. Координаторот на Пратеничката група на СДСМ Јован Митрески, како што информира Кабинетот на Џафери, посочил дека процесот на преговори е комплексен и го образложил револтот кај граѓаните заради непочитувањето на дадените гаранции по Преспанскиот договор и за почеток на преговори со ЕУ. Граѓаните чувствуваат несигурност дали во оваа преговарачка рамка се последните барања за земјата. Тој искажа поддршка и побара помош од ЕУ во текот на процесот. Координаторот на Пратеничката група на Демократската унија за интеграција, Арбер Адеми, пак, истакна дека пријателите доаѓаат да дадат поддршка во тешки времиња. -Тој алармираше за напливот на лажни вести околу актуелниот предлог, особено за македонскиот јазик и за почетокот на преговори само за Република Албанија, апелирајќи до сите чинители да го прифатат предлогот со што ќе се стави крај на овие вести и за рационалност во донесување на вакви важни одлуки. Претставничката на Алтернатива, Сафије Садики Шаини, го поддржа актуелниот предлог, повикувајќи на државна и општествена кохезија во процесот. Координаторот на Пратеничката група на Алијанса за Албанците Илире Даути, го наведе нивниот јасен став за донесување стратешки одуки, како членството во НАТО и сега почетокот на преговори со ЕУ, давајќи поддршка на актуелниот предлог и искористување на моментумот за враќање на надежта, особено кај младата популација во земјата, се наведува во соопштението. Претставникот на Беса, Бастри Бајрами, наведе дека земјата нема друга алтернатива освен членство во Европската Унија и дека даваат јасна поддршка на актуелниот предлог, со апел за зрелост на политичките субјекти за иднината на следните генерации. -Претседателот Мишел се заблагодари за искажаните ставови, посочувајќи дека има многу појасна слика за актуелните случувања, охрабрувајќи ги политичките лидери да донесат одлуки според сопствените убедувања. Вратата на ЕУ е отворена: сега од вас зависи дали ќе влезете внатре, заклучи Мишел, информира Кабинетот на претседателот на Собранието. Премиерот Димитар Ковачевски на прес-конференцијата во Владата информираше дека откако ќе заврши консултативниот процес за европскиот предлог, билатералниот договор и уште еден документ ќе бидат испратени во Собранието и дека координаторите на пратеничките групи и претставници на други партии ќе разговараат за овие предлози. Тие, како што рече тој, треба да донесат одлука и заклучоци и ќе и дадат задолженија на Владата тоа да го споведат. -Во Собранието се застапени претставници на сите парламентарни политички партии и тие таму ќе имаат состаноци на коишто ќе учествуваат нормално претставници од нивните редови и коишто треба да расправаат по однос на заклучоците во врска со европскиот предлог којшто го имаме добиено од ЕУ. Сметам дека и претседателот Мишел беше многу јасен во својата експликација дека ние имаме предлог којшто ни овозможува веднаш започнување на преговорите со ЕУ. На Собранието е да одлучи дали ќе донесеме одлука да ги почнеме преговорите и со какви заклучоци и за тоа треба да разговараат претставниците на политичките партии, тоа се искусни членови на Парламентот и како такво да го дадат на Владата да го спроведе и да го операционализира во врска со одлуката која што Собранието ќе ја донесе, рече Ковачевски. Европскиот предлог, потенцира тој, е предлог на 27 земји – членки на ЕУ, а тука со нас на прес-конференција и гостин на државата денес е претседателот на Европскиот совет во којшто членуваат сите лидери на тие 27 – земји. -Секој граѓанин може да го види предлогот што ги вклучува и пратениците, односно членовите на Парламентот. На ресорните министри е да го објаснат тоа на граѓаните кои преку медиумите сакаат да се информираат за детали во однос на доставените документи. Граѓаните во оваа држава се претставени преку свои народни избраници, преку членови на Парламентот. Тие народни избраници согласно своите уставни надлежности ја носат одлуката, носат заклучоци и даваат задолжение на Владата која што како извршна власт треба тоа да го спроведе, повтори Ковачевски на прес-конференцијата.

Формирана е работната група за измени на Изборниот законик

Ивона Петрова — Fri, 25 Dec 2020 10:59:05 +0000

Во Изборниот законик ќе бидат вградени сите оние измени во однос на моделот на изборите за коишто ќе постигнеме консензус, изјави на денешната прес-конференција министерот за правда Бојан Маричиќ, одговарајќи на новинарско прашање дали во измените ќе се најде и една изборна единица. Тој посочи дека е формирана работната група за Изборниот законик и дека сите партии номинирале свои претставници, како и поважните институции и претставници на меѓународната заедница. – На овој начин отвораме процес којшто ќе трае неколку месеци и во коишто ќе се дискутираат и прашањата поврзани со изборниот модел, но и други прашања поврзани со изборниот процес, а пред се се однесуваат на препораките од ОБСЕ/ОДИХР, изјави Маричиќ. Имаше повеќе идеи, рече тој, вклучувајќи ја и едната изборна единица кои беа промовирани уште пред парламентарните избори, меѓутоа сега откако е формирана работната група за Изборниот законик ќе се влезе во сериозни разговори. – Дали ќе успееме да постигнеме согласност на партиите за една изборна единица ќе видиме од процесот. Мислам дека е вредно да се разговара за сите идеи и вредно е да видиме што е тоа што ќе ја унапреди демократијата, изјави Маричиќ. Основна цел, продолжи тој, е да се унапреди демократијата, граѓаните да го чувствуваат изборниот процес поблизок и на тој начин да ги мотивираме повеќе и почесто и поангажирано да учествуваат и во политичкиот живот и во изборниот процес. Во однос на измените на Кривичниот законик, најави дека има два процеси – донесување на релативно брзи измени коишто би предвиделе имплементација на одредени стандарди поврзани со Истанбулската конвенција и поврзани со Законот за насилство врз жените, како брзи измени и стандардите поврзани со поголема и повисока заштита на новинарите и евентуално други поситни измени коишто се однесуваат на спроведување на пресуди од Судот за човекови права. – Овие прашања на конфискација на имот по системски промени или зајакнување на правилата за конфискација би нашле свое место во оној долгорочен процес којшто би требало да трае во текот на наредната година или до средина на наредната година или до крајот на 2021 зависно од динамиката да го донесеме новиот кривичен законик во којшто ќе ги вградиме сите овие прашања, изјави Маричиќ.

Пентагон формира работна група за анализа на појави на НЛО

Тале Кристо — Sat, 15 Aug 2020 08:20:03 +0000

Министерството за одбрана на САД одлучи да формира работна група за испитување на појава на неидентификувани летачки објекти (НЛО), се вели во соопштението на Пентагон. Целта е да се подобрат перцепциите за тој проблем и за природата и потеклото на НЛО. Мисијата на работната група е да ги откријат, анализираат оние НЛО што можат потенцијално да претставуваат закана за националната безбедност на САД, се вели во документот. Телевизијата Си-Ен-Ен, повикувајќи се на официјални претставници на министерството, објави дека Пентагон е во процес на формирање таква работна група, при што проектот го предводи првиот заменик секретар за одбрана Дејвид Норкист. Во јуни, Доналд Трамп вети дека ќе размисли за отстранување на тајноста од материјалите за НЛО и особено за т.н. „Инцидент од Розвел“ што се случи на 4 јули 1947 година. На крајот на април годинава Пентагон објави видеа од морнарицата на САД, кои според извештаите на медиумите се снимени „воздушни феномени“ што се карактеризираат како неидентификувани. Тие снимки направени се од американски воени авиони во ноември 2004 и јануари 2015 година. Одамна се криени од министерството, иако нивната автентичност подоцна беше потврдена од морнарицата на САД. Кон крајот на 2017 година, се дозна дека Пентагон има тајна програма за собирање и анализа на податоци за „воздушно-вселенски закани“, за што биле потрошени десетици милиони долари. Првично, таа програма била во одделот за разузнавање на Министерството.