Рафаел Гроси – Kurir.mk

Директорот на МААЕ пристигна во Запорожје

Ивона Петрова — Thu, 15 Jun 2023 11:42:03 +0000

Генералниот директор на Меѓународната агенција за атомска енергија (МААЕ) Рафаел Гроси денеска пристигна на територијата на регионот Запорожје, кој е под контрола на Русија, каде што треба да ја посети нуклеарната централа во Енергодар. Руски медиуми цитираат локален руски функционер кој рекол дека Гроси денеска ќе ја посети нуклеарната централа.

Гроси: Иран не ги исполни доволно своите обврски за поголема транспарентност во однос на нуклеарната програма

Ивана Ефремовски — Mon, 05 Jun 2023 19:34:51 +0000

Иран досега не ги исполни доволно своите обврски за поголема транспарентност во однос на неговата нуклеарна програма, изјави денеска во Виена шефот на Меѓународната агенција за атомска енергија (МААЕ) Рафаел Гроси. Во март, Гроси и властите во Техеран постигнаа договор за зајакнување на мониторингот на нуклеарните постројки, како и истрагите на претходно тајните нуклеарни локации во Иран. Оттогаш е исполнет само „мал дел од она што го предвидовме“, рече Гроси за време на денешниот состанок на управниот одбор на МААЕ. Шефот на нуклеарната агенција призна дека се поставени голем број камери и уреди за надзор. - Постигнат е одреден напредок, но не толку колку што се надевав … Она што треба сега да се случи е одржлив и континуиран процес што ќе доведе до спроведување на сите обврски без понатамошно одлагање“, додаде тој. Гроси повторно истакна дека, спротивно на нуклеарниот договор од 2015 година, Иран веќе има складирано повеќе од 100 килограми високо збогатен ураниум со чистота до 60 проценти. Според експертите, 50 килограми се доволни за да се создаде нуклеарно оружје доколку ураниумот се збогати уште малку повеќе. (МИА)

Гроси утре во Москва на разговори за безбедноста на нуклеарната централа Запорожје

Ивана Ефремовски — Mon, 03 Apr 2023 16:08:58 +0000

Генералниот директор на Меѓународната агенција за атомска енергија (МААЕ), Рафаел Гроси, утре ќе ја посети Русија, потврди Михаил Улјанов, постојан претставник на Москва во меѓународните организации во Виена, каде што е седиштето на МААЕ. Улјанов кажа дека Гроси ќе се сретне со руската меѓуресорска делегација во Москва, пренесоа руските медиуми. Гроси пред седум дена се сретна со украинскиот претседател Володимир Зеленски, а потоа најави дека најверојатно ќе отпатува за Русија во следните неколку дена. Шефот на МААЕ ја посети и нуклеарната централа во Запорожје - најголемата во Европа, од каде соопшти дека е „блиску“ до договор за нејзината заштита бидејќи таа е загрозена од руската инвазија врз Украина. „Мислам дека постигнувањето договор е блиску. Иако двете страни меѓусебно не се согласуваат, тие се согласуваат со МААЕ дека е потребна нуклеарна безбедност. Тоа е многу важен елемент што верувам дека треба да се земе предвид“, рече Гроси, пренесоа американските медиуми. Гроси потоа додаде дека, бидејќи има се повеќе и повеќе борби околу централата, тој преговара со руските и украинските претставници само за мерките неопходни за да се спречи катастрофа во централата, што би била „голема нуклеарна катастрофа за цела Европа“. (МИА)

Гроси: Бараме решение за ефикасна заштита на нуклеарната централа Запорожје

Катерина Бојаџиева — Tue, 28 Mar 2023 18:00:45 +0000

Директорот на Меѓународната агенција за атомска енергија (МААЕ) Рафаел Гроси денеска изјави дека се обидува да постигне договор за заштитните мерки за украинската нуклеарна централа Запорожје, окупирана од Русија, истакнувајќи дека ги адаптирал своите предлози во обид да постигне „пробив во преговори“. Гроси додаде дека претходно се залагал за создавање безбедносна зона околу нуклеарката Запорожје, за да се спречи евентуална нуклеарна катастрофа што може да биде предизвикана од меѓусебно гранатирање од руска и украинска страна. Сепак, правиме одредени промени и ги приспособуваме предлозите што ги ставаме на преговарачка маса, истакна Гроси и изрази уверување дека е можно да се воспостави „некаква заштита“. Тој додаде дека не се работи за концептот на територијална заштита, туку за идејата за воведување правила за тоа што треба да прави секој поединец во таа област за да се избегне нуклеарна катастрофа.

МААЕ: Силни експлозии во близина на најголемата нуклеарна централа во Европа

Ивана Ефремовски — Fri, 27 Jan 2023 07:07:59 +0000

Во близина на украинската нуклеарна централа Запорожјe, која е под руска окупација, вчера одекнаа силни експлозии, соопшти агенцијата за нуклеарна енергија на ОН, МААЕ. Претседателот на МААЕ, Рафаел Гроси, кој ја посети Украина минатата недела, изјави дека вчера Агенцијата регистрирала силни експлозии во близина на најголемата нуклеарна централа во светот и уште еднаш повика околу нуклеарката да се воспостави „безбедна зона“. Руските сили вчера извршија масовен ракетен напад врз Украина, при што беа истрелани повеќе од 50 проектили кон цели низ целата земја. Украинската војска соопшти дека соборила повеќе од 40 руски проектили, додавајќи дека Русите во нападот користеле хиперсонични ракети од типот Кинжал. Руските напади беа извршени еден ден откако САД и Германија најавија испорака на модерни тенкови Леопард 2 и Абрамс во Украина. (МИА)

Гроси: Нема воена опрема во украинските нуклеарни централи

Ивона Петрова — Tue, 24 Jan 2023 17:49:51 +0000

Директорот на Меѓународната агенција за атомска енергија (МААЕ), Рафаел Гроси, денеска во Европскиот парламент кажа дека нивните инспекции низ украинските нуклеарни централи покажале дека во нив нема воена опрема. Гроси денеска ја даде изјавата само еден ден откако руската разузнавачка агенција ја обвини Украина дека крие западно оружје во нуклеарни постројки низ земјата, тврдење кое прво го демантираше висок украински функционер. Гроси, пренесуваат британските медиуми, денеска кажа дека МААЕ воспоставила постојано присуство во нуклеарните постројки во Украина и наредила инспекции за да се утврди дали има воена опрема. -Резултатите од тие проверки се негативни. Ова е втор пат МААЕ да ги отфрли обвинувањата за нелегални и многу опасни предмети што се чуваат во тие објекти, рече Гроси.

Гроси: Нуклеарната централа во Запорожје се уште е во опасност

Тале Кристо — Fri, 20 Jan 2023 11:20:10 +0000

Нуклеарната централа во Запорожје се уште е во опасна ситуација, изјави шефот на Меѓународната агенција за атомска енергија (МААЕ), Рафаел Гроси. Гроси за Би-Би-Си изјави дека се обидува да преговара за безбедна зона околу централата, но нагласи дека ризикот останува. – Ние сме под огромна опасност. Постои нешто што можеме да направиме во врска со тоа. Тоа би бил голем чекор напред бидејќи е потребно високо ниво на политичка посветеност за да не се напаѓа електраната, рече Гроси, додавајќи дека е многу важно електраната да не се користи како „платформа за војската“. Гроси неодамна најави план за постојано присуство на МААЕ во сите украински нуклеарни централи. Шефот на МААЕ вчера во Киев се сретна со украинскиот претседател Володимир Зеленски. – Му потврдив на претседателот Зеленски воспоставување на наши мисии за поддршка и помош во сите нуклеарни централи на Украина. Исто така, ги продолживме нашите дискусии за безбедносна и сигурна заштитна зона за Запорожје. Работата продолжува. Зоната е од суштинско значење за да се спречи нуклеарна несреќа, напиша Гроси на Твитер по средбата. ј

Гроси се надева на договор за нуклеарната централа Запорожје до крајот на годинава

Тале Кристо — Fri, 02 Dec 2022 10:23:32 +0000

Меѓународната агенција за атомска енергија (МААЕ) се надева дека ќе постигне договор со Русија и Украина за создавање на безбедносна зона околу нуклеарната централа Запорожје до крајот на годината. – Мојата заложба е што поскоро да се постигне решение. Се надевам до крајот на годината, изјави генералниот директор на МААЕ Рафаел Гроси за италијанскиот весник „Република“. Гроси не ја исклучи можноста да оствари средби со претседателите на Русија и Украина, Владимир Путин и Володимир Зеленски. – Нашата цел е да избегнеме нуклеарна катастрофа, а не да создадеме воена ситуација од која ќе има корист едната или другата страна, додаде генералниот директор на МААЕ. Најголемата нуклеарна централа во Европа произведуваше околу една петина од електричната енергија во Украина пред руската инвазија, а по почетокот на војната беше окупирана од Русија и неколкупати беше принудена да работи на резервни генератори. Бројните гранатирања во областа ги зголемија стравувањата за потенцијален голем инцидент на само 500 километри од Чернобил – местото на најтешката нуклеарна несреќа во историјата.

Гроси: Нападите врз нуклеарната централа „Запорожје“ се апсолутно намерни и насочени

Ивона Петрова — Mon, 21 Nov 2022 06:48:08 +0000

Генералниот директор на Меѓународната агенција за атомска енергија (МААЕ) Рафаел Гроси ги оцени вчерашните напади врз украинската нуклеарна централа во Запорожје како „апсолутно намерни и насочени“ и додаде дека ситуацијата е „сериозна“. -Повеќе од десет напади беа насочени директно кон разводната табла, рече Гроси во интервју за француската онлајн телевизија BFMTV. Гроси не им ја препиша одговорноста на руските или украинските сили, туку додаде дека е неверојатно некој да ја смета нуклеарната централа за легитимна воена цел. -Кој и да е, ова лудило треба да се престане. Луѓето кои го прават ова знаат каде удираат. Тоа е апсолутно намерно и насочено, рече првиот човек на МААЕ. Русија и Украина вчера меѓусебно се обвинија за воздушните напади врз централата лоцирана на југот на Украина под контрола на руската армија. -Централата е на првата линија на фронтот, а постојат воени активности што е многу тешко да се идентификуваат, рече Гроси, додавајќи дека двајца инспектори на МААЕ се на терен и ја проценуваат ситуацијата во централата. Според него, оштетувања имало на чувствителните области. -Не беа погодени реакторите, туку зоната каде што има и свежо и употребено гориво, рече Гроси.

Гроси бара Украина и Русија да формираат безбедносна зона околу нуклеарната централа Запорожје

Ивана Ефремовски — Wed, 16 Nov 2022 15:11:21 +0000

Шефот на Меѓународната агенција за атомска енергија (МААЕ), Рафаел Гроси, денеска изјави дека оваа и следната недела ќе има повеќе консултации околу неговите повици Украина и Русија да се согласат за формирање безбедносна зона околу украинската нуклеарна централа Запорожје, што со месеци е под контрола на Русија. Договорот за ваква безбедносна зона Гроси го бара повеќе од два месеци. Повеќекратните гранатирања околу најголемата нуклеарна централа во Европа во неколку наврати придонесоа за нејзино исклучување од мрежата и ги поттикнаа стравувањата од потенцијална катастрофа. Гроси денеска кажа дека главните прашања за кои се разговарало биле воената опрема и радиусот на зоната. Во Виена тој кажа дека предлогот на МААЕ е „спроведлив“ и дека „тоа што го предлага е многу едноставно: не пукајте во централата, не пукајте од неа“. Грози смета дека таквиот договор ќе ја одрази „многу сериозната политичка посветеност на двете страни да престанат да прават нешто што сè уште се случува“. (МИА)