ракометна федерација на македонија – Kurir.mk

РФМ ги исплати премиите за сениорите и младинците

Бошко Тасиќ — Fri, 01 Sep 2023 17:14:15 +0000

Ракометната Федерација на Македонија ги исплати премиите на сениорите и младинците за остварените успеси во изминатиов период. Најдобрата машка ракометна репрезентација обезбеди место на Европското првенство во 2024 година, резултат за кој тимот ќе добие 2.000.000,00 денари. Да потсетиме избраниците на Лазаров завршија второ во квалификациската група зад Португалија, а пред Луксембург и Турција. Кадетската селекција пак го освои 9. место на Светското првенство и наградата за тоа изнесува 1.000.000,00 денари. Машката кадетска ракометна репрезентација по прикажаните одлични настапи на СП 2023, веќе следната година ги очекува учество на Европското првенство 2024 за ракометари до 20 години.

РФМ поведе дисциплинска постапка против двата клуба

Бошко Тасиќ — Thu, 30 Mar 2023 08:27:16 +0000

Ракометната федерација на Македонија (РФМ) поднесе дисциплинска постапка против двата клуба, актери во хаотичното дерби од плеј-офот во неделата. Постапка е поведена и против домаќинот Вардар 1961 и против гостинот Еурофарм Пелистер..Двата клуба имаат седум дена писмено да се произнесат, па дури потоа Дисциплинската комисија при Ракометната федерација на Македонија ќе пресече. Во текот на вчерашниот ден Еурофарм Пелистер јавно го објави својот став по заклучувањето на записникот и наведе многу новини, недостапни за јавноста. Вардар 1961 молчи и не откри што напиша во своето дополнување на официјалниот протокол кој го натпреварот го впишаа делегатите. Битолскиот клуб доставил видеа и фотографии, на кои базира голем дел од својот напад за организациони пропусти, а откриени се и нови детали, меѓу кои највпечатлив е делот во кој тврдат дека дошло во физички контакт меѓу навивачите кои влетаа на терен и службено лице. Седум дена ќе работат клупските адвокати за да ги подготват нападот и одбраната за двата клуба, кои сигурно ќе донесат санкции и за скопјани и за битолчани. Разликата во казните ќе биде одлучена врз основа на кои членови од ракометните акти ќе се „вагаат“ гревовите на двата клуба. Клучниот член е членот 19, за кој теоретски може да одговараат и двата клуба. Во овој член се вели: Одземање на бодови може да се изрече на клуб за сторени престапи во врска со натпреварувањето, ако тие се од големо значење или ако настапиле потешки последици по регуларноста на натпреварувањето или ако тоа е предвидено со друг акт на федерацијата. Теоретски гледано двата клуба ризикуваат секако вид на казна, со далеку поголема одговорност на домаќинот и организатор на натпреварот, Вардар 1961. Веќе еднаш Вардар 1961 и Еурофарм Пелистер платија обострани парични казни по финалниот натпревар од Купот на Македонија во Кавадарци во мај минатата година. Низ историјата немало иденатичен случај како овој, па загоа дисциплинската комисија ќе има тешка задача за дефинитивните санкции. Во минатото биле драконски санкционирани клубови со одговорност за инциденти, па дури и со одземање на бодови. Сепак, тоа најчесто биле натпреварите кои не го дочекале својот крај или имало физички напад врз судии. Ваков случај, со толку дебело досие на официјалниот записник немало во мак-ракометот. Одлуката на Ракометната федерација на Македонија (РФМ) нема да биде брза, па најран термин за објавување на казната е следниот петок, ако не и по десетина дена. Тоа остава дамка на натпреварувањето, бидејќи веќе ќе минат три кола по спорниот натпревар.

Македонија ќе игра на ЕП во ракомет на плажа во Португалија

Бошко Тасиќ — Sat, 25 Mar 2023 05:55:39 +0000

Ракометната федерација на Македонија (РФМ) ја прифати понудата од ЕХФ за учество на женската репрезентација на претстојното Европско првенство во ракомет на плажа, кое ќе се одржи во Португалија. РФМ на поканата на европската ракометна куќа одговори позитивно и нашата репрезентација по пауза од речиси четири години повторно ќе се појави на ова натпреварување. Македонија ќе игра во група заедно со репрезентациите на Холандија, Украина и домашната селекција.

РФМ ја најави ждрепката за плеј-оф и плеј-аут фазата во Суперлигата

Бошко Тасиќ — Wed, 21 Dec 2022 19:28:38 +0000

Ракометната федерација на Македонија ја извести јавноста дека ждрепката за одредување на натпреварувачките броеви за плеј-оф и плеј-аутот во Суперлигата ќе се одржи в четврток. Во плеј-офот со по три бода влегуваат Вардар 1961 и Еурофарм Пелистер, по два пренесоа Алкалоид и Пролет 62, по еден Бутел и Еурофарм Пелистер 2, додека без бодови се Охрид и Тиквеш 2014. По извлекувањето, на програмата се 14 кола (дома-гости), во кои екипите ќе собираат бодови во битката за трофејот кој го бранат вардарци, а го напаѓаат пелистерци. Сè е исто и во плеј-аут сегментот. Струга и Голден Арт пренесоа по три бода, Прилеп и Скопје 2020 имаат по два, Куманово и Радовиш, додека на нула се Вардар Неготино и Јуниор Кисела Вода. Осумте екипи ќе се борат за петте места кои носат сигурен опстанок во лигата, шестопласираниот оди во баражот, додека последните две екипи се исфрлаат во Првата лига. Ждрепката за натпреварувачките броеви со кои ќе се утврди распоредот е на програмата в четврток од 12:00 часот, а Суперлигата се враќа на програмите дури по Светското првенство.

Мукаетов останува на чело на РФМ

Дарко Андоновски — Tue, 19 Apr 2022 12:17:15 +0000

Актуелниот претседател на Ракометната федерација на Македонија, Живко Мукаетов ќе продолжи да ја извршува функцијата и покрај неодамнешните најави за негово повлекување. Мукаетов на денешната седница на Управниот одбор на РФМ ги информира присутните дека последните случувањата во македонскиот ракомет го премислиле и дека останува со посветена работа да се постигнат нови успеси. – Пред неколку месеци најавив повлекување од претседателското место во РФМ и оставање простор за нови луѓе кои ќе ја предводат федерацијата. Сепак, по последните настани, по сета оваа енергија која ја имаме во ракометот. Мислам дека периодов не е најповолен за повлекување. Ни следуваат обврски како организација на Европско првенство кое се намачивме да го добиеме, имаме кадетско светско првенство. Стојам на мојот став дека во овој Управен одбор има капацитет. Знаеме дека од надвор има мераклии за да ја водат федерацијата, но тоа не е лесно. Политиката треба да се држи надвор од спортот и од ракометот. Сакам да потврдам дека продолжуваме заедно да го водиме ракометот кон нови успеси, порача меѓу другото Мукаетов. Познатиот македонски бизнисмен претседател на РФМ стана во 2013 година. Под негово водство сите македонски селекции имаат беспрекорни услови за работа, а федерацијата е една од најуспешните во државата. Пофални зборови за Мукаетов доаѓаат од сите репрезентативци, а капитенот и селектор на А-репрезентацијата, Кирил Лазаров, по пласманот на Светското првенство 2023 обезбеден во неделата, рече дека тешко ќе се најде друг претседател на РФМ како Жувко Мукаетов.

ЕХФ ШАМПИОНАТ У18: Македонија со пет победи од пет меча ја заврши групната фаза

Предраг Кукиќ — Thu, 16 Aug 2018 11:14:59 +0000

Македонската ракометна репрезентација со максимални пет победи ја заврши групната фаза на Европското првенство за играчи до 18 години што се одржува во Грузија. „Црвено-жолтите“ попладнево ја совладаа Естонија со 26:22 за потврда на 1.место во А-групата. Македонската селекција како првопласирана од групата се пласира во полуфиналето. Противник на избраниците на селекторот Данило Брестовац во полуфиналната фаза ќе биде второпласираниот од Б-групата, а ќе се знае вечерва по одигрување на натпреварот меѓу Белорусија и Италија. (МИА)

Дополнителна награда за ракометарите ако двапати ја победат Романија- Еве колкав бонус ќе добијат доколку изборат пласман на СП

Дарко Андоновски — Wed, 11 Apr 2018 15:56:50 +0000

На денешната седница на Управниот одбор на Ракометната федерација на Македонија (РФМ), беше одлучено ракометарите да бидат наградени со 30.000 евра, доколку изборат пласман на Светското првенство во 2019 година, што ќе се одржи во Германија и Данска. Новост е дополнителниот бонус од десет илјади евра, ако Македонија ја совлада Романија на двата бараж натпревари. Средбите со Романија се играат на 10 јуни во Скопје, односно на 13 јуни на гостински терен. Директорот на репрезентацијата Милчо Чакарески го поднесе извештајот за оствареното на Европското првенство во Хрватска и настапот го оцени како успешен, меѓутоа не и како максимум што можевме да направиме.