расадник – Kurir.mk

Без вода кулите Расадник и дел од Карпош

Ивана Ефремовски — Wed, 09 Aug 2023 05:18:51 +0000

ЈП „Водовод и канализација“ - Скопје известува дека денеска, од 09:00 часот, без вода ќе бидат корисниците од кулите Расадник во Кисела Вода и неколку улици во Карпош. Водоснабдувањето ќе биде прекинато поради изведување на водоводен приклучок ф-150мм на ул.1511/12б, во кули Расадник, Кисела Вода. Поради дефект на приклучна цевка и дефект во шахта на улица „Даскал Камчев“ бр.3 во Карпош, прекинато водоснабдување ќе имаат и корисниците од улиците: „Даскал Камчев“, „Гиго Михајловски“, „Иван Аговски“ и дел од „Руѓер Бошковиќ“. Водоснабдувањето ќе биде прекинато до санирање на дефектот.

Ѓорѓиевски: Со ребалaнсот создаваме можност за реконструкција на салата “Расадник”

Ивана Ефремовски — Mon, 10 Apr 2023 13:13:29 +0000

Општина Кисела Вода издвои средства од својот Буџет кои нудат шанса за отпочнување на процес за темелна реконструкција на салата “Расадник”. Едногласно, на денешната Седница на Советот на Општина Кисела Вода, беше поддржана иницијативата на градоначалникот Ѓорѓиевски за создавање на финасиска конструкција која ќе овозможи реконструкција на ова, некогаш култно место за спортските вљубеници и нејзино преземање од управувањето од страна на централните власти. -Еднакво важно со градењето е и одржувањето на спортскaта инфраструктура. Жално и недозволиво е спортски објект кој, не само за Кисела Вода, туку и за Скопје, е симбол на едни убави спортски времиња да биде жртва на децениска запоставеност. Во салата Расадник се калеле спортските легенди на “Вардар”, се уште се свежи сеќавањата на полните трибини од кои публиката имала можност да гледа врвна кошарка, одбојка, ракомет. На овој начин, сакаме да го започнеме процесот за враќање во живот на овој храм на спортот. Се надевам дека не само советниците кои денес едногласно ја поддржаа идејата, туку и сите наши жители се согласни дека сериозно треба да се зафатиме со реконструкција, но и со менаџирање на салата “Расадник”, која треба повторно да биде дом на спортот и расадник на идните спортски легенди-изјави градоначалникот Орце Ѓорѓиевски. Инаку салата “Расадник” се’ уште е во надлежност на Јавното Претпијатие за стопанисување со спортски објекти. Истото, во моментов, е под директни ингеренции на Владата и има задача да стопанисува со државни спортски објекти, како и да инвестира во нови спортски комплекси.

ФОТО: Се решава горлив проблем за жителите, Расадник добива нов паркинг за стотина возила

Ивона Петрова — Fri, 21 Oct 2022 11:55:42 +0000

Се решава горливиот проблем во Расадник, жителите добиваат нов паркинг за стотина возила. Градоначалникот на Општина Кисела Вода, Орце Ѓорѓиевски вели дека големо е задоволството да се знае дека жителите поддржуваат сѐ она што во изминатиов период го направат за Кисела Вода и затоа, мотивирано продолжуваат со уште посилно темпо. -Денес се завршува изградбата на уште еден нов паркинг наспроти салата во Расадник, кој беше повеќе од потребен во овој дел на Кисела Вода. Со ова, проблемот со сообраќајниот метеж и нарушување на мирот на нашите сограѓани од Расадник, полека се решава и заминува во историјата. Обезбедување на паркинг места со цел растеретување на гужвата во Кисела Вода беше и мое ветување пред граѓаните, вели Ѓорѓиевски. Посочува дека на местата на некогашните диви депонии изградиле нови паркови и паркинзи. - Ќе ги напоменам новиот паркинг кој го изградивме кај Мечкаров, потоа во Драчево, спроти Домот за слепи лица, на ,,Христо Татарчев, кај градинката ,,Весели цветови” и уште еден кај салата Расадник, наспроти овој денес. Кисела Вода го губи оној стар епитет на несредена општина. Посветено градиме нов, модерен и урбан лик, а сето тоа го заслужуваат моите сограѓани, вели градоначалникот.

Ѓорѓиевски: Го објавивме Меѓународниот конкурс за Расадник, прв во Македонија после 1965 година

Тале Кристо — Wed, 13 Jul 2022 12:22:01 +0000

Општина Кисела Вода го објави Меѓународниот конурс за идејно решение за Расадник, прв Меѓународен конкурс во Македонија после 1965 година. Градоначалникот Орце Ѓорѓиевски денес на прес конференција ги соопшти сите детали околу конкурсот кој ќе биде отворен во наредните четири месеци. На настанот говореа и претставниците од трите стручни столба кои заедно со Општина Кисела Вода ја подготвуваа конкурсната документација, д-р Огнен Марина, декан на Архитектонскиот факултет; претседателот на Асоцијацијата на архитекти на Македонија, Мишко Ралев, како и Михаел Димитровски, раководител на одделение за урбанизам и член на УО при Комората на овластени архитекти и инженери. -Денес финализираме едно големо ветување за одговорно, стручно и хумано планирање на ликот на оваа урбана заедница која во минатото беше поврзувана искучиво со нерационалноста, алчноста и непочитувањето на елементарните урбанистички правила за хумано живеење при планирањето, како и немањето слух за барањата на најзасегнатите-граѓаните кои тука живеат. Ја спречивме намерата на претходното раководство за изградба на 99 згради во Расадник, спречивме катастрофа, а после неколкумесечна сеопфатна подготовка, со големо задоволство сакам да ве известам дека го објавивме Меѓународниот конкурс за Расадник, истакна градоначалникот Ѓорѓиевски на почетокот од своето обраќање, давајќи осврт на целиот неколкумесечен процес за стручна подготовка на конкурсната документација. Потенцираше дека покрај експертите, во процесот беа вклучени и граѓаните кои даваа свои забелешки и сугестии и кои имаат свои претставници и во Партиципативното тело. Истите се вклучени во финалниот документ кој беше креиран заедно со Архитектонскиот факултет во Скопје, Комората на овластени архитекти и инженери и Асоцијацијата на архитекти на Македонија. - Без да навлегувам детално во содржината, би сакал да издвојам дека нашите програмски насоки за овој дел од Кисела Вода предвидуваат постоење на детска градинка, основно училиште, верски објект, урбана парк – шума од минимум 100.000 м2, спортско-рекреативни содржини, високо образование со ботаничка градина… Од учесниците ќе побараме квалитетно, современо архитектонско-урбанистичко решение коешто ќе ги задоволи потребите на различните групи корисници и воедно оптимално ќе го искористи капацитетот на локацијата. Се надеваме дека овој меѓународен конкурс ќе биде предизвик и можност за професионална надградба за стручњаците од оваа област, а обезбедената парична награда, како достоинствена валоризација на инженерскиот труд од страна на Општина Кисела Вода ќе биде само дополнителен поттик. За наградите во износ од 15000, 8000 и 3 000 евра за прво, второ и треторангираниот, како и за двата откупа во износ од по 2000 евра, ќе одлучува 9-члена жири комисија. Во неа има и врвен меѓународен експерт од областа на архитектурата и урбанистичкото планирање, како и претставници од домашната стручна јавност, но вклучени се и граѓаните преку Партиципативното тело за урбанизам на Општина Кисела Вода, кое беше формирано како дел од целкоупниот процес за кој денес говориме. Како што многупати досега кажав, јас, како градоначалник, нема да се мешам во одлуките и ќе ги почитувам решенијата кои ќе бидат одбрани, на тој начин обезбедувајќи целосна независност и валдност на процесот-наведе Ѓорѓиевски. Конкурсот трае до 11 ноември, кога ќе се знае бројот на пријавени трудови и ќе започне процесот на евалуација кој треба да заврши заклучно со крајот на декември оваа година. После речиси 60 години, Кисела Вода е првата општина која се осмели да направи сериозен чекор напред и да ги следи меѓународните стандарди за урбанистичкото планирање, транспарентното работење и водење сметка за јавниот интерес. Градоначалникот Ѓорѓиевски упати повик за учество за учество до целата домашна и меѓународна експертска заедница. -На крајот, уште еднаш упатувам повик за учество на конкурсот до домашната и меѓународната експертска заедница, до сите оние кои знаат дека кога уредувате јавен простор, вие дизајнирате нечиј дом, нечие соседство, го креирате правецот на развој на тој дел од градот. До сите кои верувате дека луѓето се важни и дека не може да уредуваме градење без да уредуваме живеење-изјави Ѓорѓиевски. Задоволство од транспарентното работење на новото раководство на Општина Кисела Вода и изборот преку натпревар на идеи да се обликува јавниот простор, изразија и останатите учесници на денешната прес конференција, претставниците на стручната јавност од областа на архитектурата и урбанизмот. Истакнаа дека ова е насока која ќе треба да ја следат и другите општини, градот и целата држава. П.С. Во прилог ви го испраќаме и составот на жири комисијата 1. Проф. др. Огнен Марина, Декан на Архитектонски Факултет Скопје -Претседател 2. Prof. Massimo Crotti, Department of Architecture and Design, Politecnico di Torino, Italy - Член 3. Проф. Др. Мишко Ралев, Декан на Факултетот за архитектура и дизајн при УАКС – Член 4. Д.и.а Наташа Влчевска Савиќ, Комора на овластени архитекти и инженери-Член 5. Д.и.а Драган Стојанов, Граѓанско партиципативно Тело -Член 6. Д.и.а Голубина Арсовска-Општина Кисела Вода - Член. 7. Д.и.а Кирил Димески член на комисија за урбанизам – Член 8. М-р по просторно планирање Ирена Маренчева Митревски –Член, и 9. Дипл. правник Славче Трпески – Член

“ПРЕСИНГ”: Меѓународниот конкурс за Расадник е шанса за Кисела Вода од вонредно значење!

Магдалена Андонова — Tue, 17 May 2022 09:27:00 +0000

По повеќе од пет години борба на дел од стручната јавност, граѓанските здруженија и новите медиуми за просторот на Расадникот во Општина Кисела Вода, конечно борбата вроди со плод. Повикот во повеќе наврати да се организира меѓународен архитектонско-урбанистички конкурс наиде на отворена врата кај новото раководство. Ова е извадок од текстот кој го третира меѓународниот конкурс за Расадник во афирмираното списание на комората на овластени архитекти и овластени инженери “Пресинг”. - Во него низ призмата на стручната јавност, се говори за полезноста од јавните повици, како демократски чин, во кој ѝ се овозможува на професијата подеднакво да учествува во процесот на обликување и дефинирање на просторите од јавен карактер. Тие значат „културен натпревар“ преку кој во зададен временски период се добиваат повеќе решенија за една иста задача, вели авторот, м-р Филип Конески. Преку споделување на меѓународните искуства, низ текстот тој укажува и на потребата од организирањето на меѓународни архитектонски и архитектонско-урбанистички повици, што за младите архитекти е дел од процесот на професионално зреење, за поискусните предизвик за професионална надоградба, а за општините студија за одреден објект и простор во кој низ паралелата се согледуваат можностите и потенцијалот. Конкурсот треба да значи висок стандард во она што го бираме за себе, потенцира авторот во “Пресинг”. Посебно го поздравува значењето на одлуката на новото раководство на Општина Кисела Вода во целокупниот процес на планирање на меѓународниот конкурс за ДУП-от за идниот лик на Расадник да ја вклучи целокупната стручна јавност од оваа област, Комората на овластени архитекти и овластени инженери, Асоцијацијата на архитекти на Македонија и Архитектонскиот факултет – Скопје при УКИМ. - Оваа шанса за Кисела Вода и Скопје е од вонредно значење. Со вистински пристап ќе се придонесе кон подигнувањето на општата свест како се обликува јавниот простор, воедно подобрувајќи ги стандардите за живеење на целокупната околина. Она за кое најмногу треба да се надеваме е едукативното влијание врз населението, кое оттука натаму поинаку ќе ги следи постапките во создавањето на урбанистичките планови, не прифаќајќи ја просечноста и потпросечноста на која се навикнавме, потенцира Конески. Инаку, Меѓународниот конкурс за Расадник е во финална фаза на подготовка. Работната група сочинета од претставници од Архитектонскиот факултет, Комората на властени архитекти и инженери, Асоцијацијата на архитекти на Македонија веќе 30 дена интензивно работи на неговото дооформување, по што во текот на следниот месец истиот ќе биде објавен за домашната и за меѓународната јавност.

Костовски: Завршен е новиот парк во Расадник на над 3000 метри квадратни

Магдалена Андонова — Mon, 16 May 2022 11:26:47 +0000

ЗАВРШЕН Е НОВИОТ ПАРК НА НАД 3000 м2 ВО НАСЕЛЕНОТО МЕСТО РАСАДНИК Денес заедно со градоначалникот на Град Скопје Данела Арсовска го пуштивме во употреба целосно урбанизираниот нов парк во населеното место Расадник кој беше изведен од страна ЈП Паркови и зеленило, стои во Фејсбук статусот на градоначалникот на општина Бутел, Дарко Костовски. Тој појасни дека граѓаните на општина Бутел добиле нова зелена површина, нова зелена вегетација, дека е нанесена висококвалитетна почва, формиран тревник со посебен систем за полевање капка по капка, а поставени биле и хидранти и прскалки со што ќе се овозможи континуирано одржување на паркот. - Она што до пред само некој месец беше запуштено место, денес е нова урбано уредена површина. Наскоро и фудбалското игралиште ќе биде пуштено во употреба кое ќе биде со специјална подлога за фудбал. Со тоа целиот овој потег ќе добие сосема нов лик, додава Костовски во својата објава.

Зголемена транспарентност- формирано Партиципативното тело за ДУП-от за Расадник во општина Кисела Вода

Магдалена Андонова — Fri, 25 Feb 2022 13:06:24 +0000

Оформено e партиципативно тело од граѓани за идејното решение за ДУП-от за Расадник, кое го иницираше Општина Кисела Вода со цел да се зголеми транспарентноста на целиот процес. На вчерашната седница на Советот на Општината, со 16 гласа ЗА и 7 воздржани, оваа одлука беше изгласана, со што од денес, ова тело започнува со учество во изготвувањето на меѓународниот конкурс за Расадник. 24 лица, меѓу кои и стручњаци од областа на урбанизмот, новинари, претставници на Здруженија на граѓани, но најмногу од се, жители од овој дел на градот ќе ги застапуваат ставовите на сите различни интереси и интересни групи во локалната заедница. Партиципативното тело е составено од следните лица: Антони Пешев, Дарко Чекеровски, Искра Димитрова, Горан Гугулевски, Зоран Николовски, Иле Темелкоски, Добрила Петровска, Ладо Димишковски, Звонимир Стеванов, Драган Стојанов, Даниела М. Јованоска, Александар Жупаноски, Јово Крстевски, Благоја Ниотис, Горан Фиданоски, Зоран Поповиќ, Бојан Николовски, како и седум претставници од комисијата за урбанизам на Општина Кисела Вода. Преку пренесување на ставовите, мислењата и потребите на граѓаните и правните лица, преку давање на иницијативи, насоки и сугестии за изготвување на плански решенија на урбанистичките планови во нивната работна верзија, партиципативното тело ќе обезбеди инклузивност, партиципативност и јавност во процесот на урбанистичкото планирање. На ова тело, во постапката за креирање на идејниот лик на Расадник и сите планирани чекори кои до тоа ќе водат, ќе му се приклучат и научните авторитети од оваа област од Архитектонскиот факултет во Скопје, од Комората на овластени архитекти и инженери и од Асоцијацијата на архитекти на Македонија, кои се одзваа на повикот на Општина Кисела Вода и на располагање го ставија својот целокупен стручен потенцијал. Нацрт предлогот на меѓународниот конкурс е ставен на увид на граѓаните на веб страницата на општина Кисела Вода и се уште се прибираат забелешките и сугестиите кои пристигнуваат на [email protected]. Следниот чекор е негово објавување, по што ќе се добие и решение за идејниот лик на Расадник.

Општина Кисела Вода започна со изградба на паркинг простор во населбата Расадник

Тале Кристо — Wed, 16 Feb 2022 15:42:44 +0000

Општина Кисела Вода денес започна со изградба на паркинг простор за преку 60 возила во населбата Расадник. На место на кое до денес постоеше дива депонија, во близина на бензиската пумпа кај “Мечкаров”, жителите на оваа урбана заедница ќе добијат простор на површина од околу 400 квадратни метри, на кој ќе можат да ги паркираат своите возила. Градоначалникот Орце Ѓорѓиевски заедно со директорот на ЈП”Градски Паркинг”, Бојан Христовски присуствуваше на почетокот на градежните активности кои треба да финишираат за околу 2 седмици. -Како градоначалник, но и како жител на општина Кисела Вода, свесен сум за недостигот од простор за паркирање и за потребата од изнаоѓање на нови локации каде нашите жители ќе можат да ги оставаат своите возила, без да пречат едни на други. Покрај тоа што сериозно се зафативме сo претворање на дивите депонии во зелени паркови, еден дел од нив, ќе ги уредиме и како паркинзи. Ова беше и главната тема на која денес разговаравме со директорот на ЈП “Градски Паркинг”, Христовски, истакна градоначалникот Ѓорѓиевски. Директорот Христовски посочи дека на работниот состанок со градоначалникот ги разгледувале сите можности околу изнаоѓање на нови локации за изградба на паркиралишта во општина Кисела Вода, како урбана заедница која постојано се модернизира и расте. -Денес со градоначалникот Ѓорѓиевски имавме успешна средба на која се отворија многу теми околу подобрувањето на услугите што ги дава нашето градско претпријатие. Организацијата на сообраќајот во мирување има голема улога во квалитетот на одвивањето на сообраќајот во градот, посебно во урбани средини како што е Кисела Вода. Со денешниот прв заеднички проект, се надевам дека почнуваме со изнаоѓање на квалитетни и трајни решенија за жителите на оваа општина, изјави директорот на ЈП “Градски Паркинг”, Христовски. Пред два месеци, Општина Кисела Вода изгради паркинг простор за 60 возила и на улицата “Бранко Заревски” во населбата Драчево.

Архитектонските научни авторитети со поддршка за Меѓународниот конкурс за квартот Расадник

Ивана Ефремовски — Fri, 11 Feb 2022 11:23:55 +0000

Се отвора соработката меѓу општина Кисела Вода и научните авторитети од областа на архитектурата во насока на поддршка за изградба на Расадник како кварт за хумано живеење. -Откако Општина Кисела Вода го постави на општинската веб страница меѓународниот конкурс за идејно урбанистичко - архитектонско решение за градската четврт Ј14 или, попознат кај нашите граѓани како ДУП Расадник и го достави до стручната јавност- до Архитектонскиот факултет во Скопје, Комората на овластени архитекти и инженери и Асоцијацијата на архитекти на Македонија, со цел истиот да биде стручно издржан, градоначалникот Ѓорѓиевски оствари работен состанок со деканот на Архитектонскиот факултет во Скопје, проф. д-р Огнен Марина, информираат од општината. Професорот Марина посочи дека ќе го вложи целокупниот интелектуален и научен потенцијал во активностите поврзани со меѓународниот конкурс за креирање на ликот на оваа урбана заедница. Ја потенцираше транспарентноста на општината, како една од клучните алатки во процесот кои треба да безбедат хумано и здраво живеење на жителите на Расадник, но и на целиот главен град, имајќи ја во предвид неговата географска поставеност. -Ги афирмираше и критериумите зададени во нацрт-текстот, со оглед на тоа што по 57 години, Општина Кисела Вода е првата која распишува меѓународен конкурс за изработка на урбанистички план и тоа за конечниот изглед на населбата Расадник. Имено, во градот Скопје досега имало вкупно два меѓународни конкурси за изработка на урбанистички планови. Првиот е во далечната 1914 година, распишан од Министерството за градежништво на тогашното Кралство Србија. Вториот, пак, е распишан во 1965 година, по катастрофалниот земјотрес, во кој прва награда добил Кензо Танге и двајца хрватски архитекти. Иако правењето на идејни решенија за уредување на градски четврти и за градови, во Западна Европа е стандардна процедура, во Македонија не постојат дури ни правила за објавување на меѓународен конкурс за урбанистичко планирање и уредување, велат од општина Кисела Вода. Градоначалникот Орце Ѓорѓиевски оттука ја нагласи потребата за вклучување на целокупната, а особено стручната јавност при изработката на меѓународниот конкурс за Расадник. Целта е, истакна тој, да се создаде квалитетен, урбан простор за живеење според сите стандарди и критериуми за хумано живеење. -Тоа ќе биде во интерес на целокупната заедница-граѓаните, жителите на Расадник и општина Кисела Вода, бизнис заедницата, потенцијалните инвеститори и сите оние кои можеби својата иднина ја гледаат во оваа населба, додаде Ѓорѓиевски. На средбата беше договорено и потпишување на Меморандум за соработка помеѓу Општина Кисела Вода и Архитектонскиот факултет во Скопје. Предложениот нацрт за Меѓународниот Конкурс за идејно урбанистичко - архитектонско решение за градската четврт Ј14 или, попознат како ДУП Расадник, е ставен на увид на граѓаните на општинската веб страница. Забелешките, сугестиите и идеите, со цел истиот да биде што поквалитетно изработен и стручно издржан, можат да се достават на емаил адресата [email protected]. До крајот на февруари, конкурсот ќе биде меѓународно објавен, а по неговото завршување, ликот на Расадник ќе го бираат неговите жители.

Ѓорѓиевски на барање на граѓаните го стопираше планот за изградба на 99 згради во Расадник, градоначалникот најави борба против урбаната мафија

Магдалена Андонова — Thu, 30 Dec 2021 18:19:25 +0000

Градоначалникот на Кисела Вода Орце Ѓорѓиевски на барање на граѓаните го стопираше планот на претходната локална самоуправа за изградба на 99 згради во Расадник.Општината ќе објави меѓународен конкурс на кој архитекти ќе може да достават предлог идејни решенија, по што Комисијата за урбанизам ќе ги разгледа и ќе го изработи новиот детален урбанистички план. - Стопиран е и планот за Расадник. Во истиот Комисијата констатира дека има 99 нови згради, па согласно барањата на граѓаните, заклучно со февруари, ќе биде објавен меѓународен конкурс за изработка на идејно решение за ДУП Расадник, по што најдоброто решение ќе го изберат граѓаните на Расадник. По изборот на идејното решение, ќе се пристапи кон изработка на новиот Детален Урбанистички План за Расадник, изјави градоначалникот на Општина Кисела Вода Орце Ѓорѓиевски. Ѓеорѓиевски најави борба против урбаната мафија со формирање на Партиципативно тело каде може да се пријават граѓани, невладини организации и стручна јавност. Рокот за пријавување истекува на 15 јануари а целта е сите транспарентно да бидат вклучени во понатамошниот развој на општината. - За да ја запреме урбаната мафија, потребна ми е и вашата помош. Ве повикувам сите да направите увид во Урбанистички планови и сите ваши забелешки, сугестии и предлози за измени, дополнувања или укинувања на цели или делови од плановите да ни ги доставите во рок од 30 дена – вели Ѓорѓиевски. Општината направила ревизија на 34 плана меѓу кои и планот за Црниче каде во зелениот појас биле предвидени изградба на станбени куќи, планот за Припор каде биле предвидени станбени згради, а ќе се разгледува и планот за населбата Пржино.