раселување – Kurir.mk

Абас во разговор со Блинекн го отфрли присилното раселување на Палестинциите во Газа

Тале Кристо — Fri, 13 Oct 2023 15:34:01 +0000

Палестинскиот претседател Махмуд Абас денеска во разговор со американскиот државен секретар Ентони Блинкен изјави дека „го отфрла принудното раселување“ на Палестинците во Газа, јави палестинската новинска агенција ВАФА. Двајцата се состанаа во јорданската престолнина и притоа Абас кажа дека присилното раселување на Палестинците во Газа ќе претставува „втора Накба“, мислејќи на масовното раселување на Палестинците во 1948 година за време на војната што следеше по создавањето на Израел. Накба или „катастрофа“ се однесува на раселувањето на околу 760.000 Палестинци, кои побегнале или биле протерани од своите домови за време на војната во 1948 година што се совпадна со создавањето на Израел. Абас нагласи дека хуманитарните коридори во блокираната крајбрежна енклава мора веднаш да се отворат за да се спречи хуманитарна катастрофа, пренесоа британските медиуми. Израел најави дека сака да ги намали цивилните жртви на минимум и затоа нареди евакуација на Палестинците од северниот кон јужниот дел на Појасот Газа. Израелската армија повика целото население на северот на Газа да биде евакуирано на југ од областа во рок од 24 часа. Блинкен вчера беше во посета на Израел во знак на поддршка од каде јасно порача дека се додека постојат САД Израел никогаш нема да мора да се брани. Како што е најавено, Блинкен денеска ќе отпатува и за Доха на средби со катарските претставници, кои имаат блиски контакти со раководството на Хамас и кои се обидуваат да разменат палестински затвореници во Израел за ослободување на десетици Израелци и странци кои Хамас ги зеде како заложници. Блинкен потоа ќе застане накратко во Бахреин и ќе го заврши денот со посета на Саудиска Арабија. Како што е најавено, Блинкен за време на викендот ќе отпатува и во Обединетите Арапски Емирати и Египет.

Природните непогоди раселуваат по 20 милиони луѓе годишно

Ивона Петрова — Mon, 02 Dec 2019 07:04:04 +0000

Природните непогоди како резултат од климатските промени принудуваат по 20 милиони луѓе годишно да ги напуштат своите домови во последната деценија, што е еквивалентно на едно лице на секои две секунди. Тоа се наведува во нов извештај на Оксфам. Тоа ја прави климата најголем фактор за внатрешно раселување во период, кога сиромашните земји ширум светот имаат најголем ризик, иако во нив има далеку помалку емисии на јаглерод отколку во побогатите земји. Луѓето имаат седум пати поголема веројатност да бидат внатрешно раселени од поплави, циклони и пожари од вулкански ерупции и земјотреси, а трипати поголема веројатност од конфликти, истакнува Оксфам. Тоа е една од многуте теми за климата што ќе се дискутира на конференцијата на ОН за климатски промени, што почнува денеска во Мадрид. Оксфам ја повикува меѓународната заедница да направи повеќе за финансирање на програми за да им помогне на посиромашните земји погодени од климатските промени. Земјите со ниски приходи, како Индија, имаат четирипати поголема веројатност да бидат погодени од раселување заради климатските промени од земјите како што се Шпанија и САД. Географијата исто така игра улога – 80 отсто од погодените живеат во Азија. Малите островски држави како Куба, Доминика и Тувалу се особено ранливи, што ги прави 7 од првите 10 земји со најголема стапка на раселување заради природни катастрофи помеѓу 2008 и 2018 година. Луѓето кои живеат во тие мали островски земји имаат 150 пати поголема веројатност да бидат раселени како резултат на природни непогоди отколку оние кои живеат во Европа, се вели во извештајот на организацијата што ги анализирала податоците за раселените лица од 2008 до 2018 година.

ОН: Поради турската офанзива во Сирија би можеле да се раселат до 400.000 луѓе

Тале Кристо — Sun, 13 Oct 2019 16:35:38 +0000

Турската офанзива против курдските борци во североисточна Сирија веќе принуди 130.000 луѓе да ги напуштат своите домови, соопштија денеска ОН, додавајќи дека тој број може да се зголеми на 400.000. – Сметаме дека до 400.000 луѓе ќе бидат раселени во погодените области и ќе имаат потреба од помош и заштита, рече портпаролот на ОН Јенс Лерке во Женева. ОН во петокот соопштија дека 100.000 луѓе ги напуштиле своите домови од средата, кога почна турската воена офанзива во Сирија. ОН, исто така, изразија загриженост за безбедноста на 113 нејзини членови и припадници на други организации кои даваат меѓународна помош во тој сектор.