расизам – Kurir.mk

Севиља исфрли навивач поради расизам

Тале Кристо — Sun, 22 Oct 2023 17:42:21 +0000

Шпанскиот фудбалски прволигаш Севиља исфрли навивач од својот стадион и против него поднесе пријава во полицијата поради наводно „ксенофобично и расистичко однесување“ за време на саботниот прволигашки дуел против Реал Мадрид (1-1). Севиља во соопштението не прецизираше повеќе детали, ниту кој бил цел на расистички напад. „Го осудуваме секое ксенофобично и расистичко однесување, дури и во изолирани случаи, каков што беше овој, и изразуваме подготвеност да соработуваме со властите на искоренување на таквото однесување“, соопшти Севиља. Фудбалерот на Реал, Винисиус, во минатото повеќе пати беше цел на расистички навреди од противнички навивачи.

Анчелоти: Ла Лига има проблеми со расизмот

Дарко Андоновски — Mon, 22 May 2023 14:38:04 +0000

Шпанската Ла Лига има проблеми со расизмот, рече тренерот на Реал, Карло Анчелоти, по немилите сцени кои го одбележаа вчерашното дерби меѓу Валенсија и клубот од Мадрид. Валенсија победи со 1-0, а во финишот на тензичниот натпревар фудбалерот на Винисиус беше исклучен поради удирање противнички играч. Бразилскиот фудбалер во текот на целиот натпревар се жалеше на расистички навреди од трибините на стадионот „Месталја“, а во еден момент на телевизиските камери можеше да види како се обраќа кон својата клупа дека веќе не сака да игра. „Тоа што се случи во неделата, веќе ни се случуваше, но, не на овој начин. Шпанската лига има проблеми со расизмот. Винисиус не е проблем, Винисиус е жртва“, рече Анчелоти на прес – конференцијата по натпреварот. „ Кога Винисиус доби црвен картон, целиот стадион почна да пее „мајмуне, мајмуне“. Многу сум тажен“, порача тренерот на Реал.

Англиски тренер суспендиран три години поради дискриминација и расизам

Ивона Петрова — Thu, 20 Apr 2023 14:23:47 +0000

Англискиот фудбалски тренер Џон Јемс (63) е суспендиран во траење од три години поради дискриминација и расизам, објави Англиската фудбалска федерација (ФА). Сега веќе поранешниот тренер на Кроули Таун во јануари беше суспендиран на 17 месеци поради „дискриминаторски речник“ и „расистички шеги“ кон своите играчи. Меѓутоа, ФА ја обжали одлуката наведувајќи дека изречената казна е недоволна. Во обновената постапка, Независниот жалбен совет го суспендираше Јемс од сите активности поврзани со фудбалот до јануари 2026 година. Поздравувајќи ја одлуката на Независниот совет, ФА објави дека станува збор за најдолга забрана изречена кога и да е во англискиот фудбал поради дискриминација. „Ова беше длабоко вознемирувачки случај за вклучените жртви и се надеваме дека исходот од оваа жалба ќе помогне да се донесе некаков заклучок. Исто така, се надеваме дека ова ќе го поттикне секого кој доживеал или посведочил на дискриминација во фудбалот тоа и да го пријави“, соопшти ФА. Англиските медиуми објавија дека црномурестите фудбалери кои ги тренирал Јемс ги нарекувал „Зулу војници“, а муслимански играчи „терористи“.

На Англичаните може да им биде забрането да присуствуваат на фудбалски натпревари

Ивона Петрова — Sun, 26 Dec 2021 18:38:13 +0000

Британската министерка за внатрешни работи Прити Пател предложи закон според кој за расистички навреди на Интернет на лице може да му биде забрането да присуствува на фудбалски натпревари до 10 години. – Ова лето видовме одличен натпревар кој беше нарушен со расистички говор на Интернет. Овие луѓе се криеја зад нивните тастатури и ги навредуваа играчите на Англија. Фудбалот предолго е извалкан со расизам. Луѓето треба да одговараат за своите постапки на Интернет. Предложените измени во законот ќе воведат забрана за присуство на фудбалски натпревари за прекршителите, рече Пател за „Sky Sports“. Претходно, Фудбалската асоцијација на Англија (ФА) се пожали на расистички навреди кон англиските фудбалери по финалниот натпревар на Евро 2020 против репрезентацијата на Италија (1:1, 2:3 пенали). По натпреварот, навивачите ги навредуваа Маркус Рашфорд, Џејдон Санчо и Букајо Сака, кои промашија пенали.

Рома условно казнета за дискриминација и расизам

Ивона Петрова — Wed, 03 Nov 2021 13:16:12 +0000

Италијанската Серија А условно ја казни екипата на Рома со затворање на дел од стадионот „Олимпико“ на еден натпревар поради дискриминаторски и расистички повици, кои можеа да се слушнат од трибините за време на дербито одиграно во неделата против Милан. Станува збор за дел од стадионот на кој се собираат најрадикалните навивачи на Рома, Ултраси, кои на дуелот против Милан ги навредуваа Златан Ибрахимовиќ и Франк Кеси. Рома тврди дека клубот со години се бори против расизмот и дискриминацијата. – Во Рома владее нулта толеранција кон расизмот во која било форма и правиме сè што е во наша моќ да се видат тие позитивни промени, соопшти римскиот прволигаш.

УЕФА не ја обнови соработката со анти-расистичката организација ФАРЕ

Ивона Петрова — Tue, 05 Oct 2021 08:41:06 +0000

На фудбалските натпревари оваа сезона нема да има транспаренти „Фудбалот против расизмот во Европа“. ФАРЕ нема да испрати претставници на натпреварите спонзорирани од УЕФА оваа сезона. Двете страни не успеаја да се договорат за продолжување на договорот. Како што е наведено од„ ITV News“, вработените во ФАРЕ биле присутни на натпревари со зголемен ризик од инциденти врз основа на дискриминација од 2013 година, а потоа, доколку е потребно, подготвувале информации за инциденти. Оваа сезона, околу 80 натпревари, разгледани во овој контекст, останаа без нивното внимание. УЕФА сега се потпира на извештаи од сопствените вработени и видеа пренесени или објавени од навивачите. Во исто време, се шпекулира дека сè уште постојат шанси за потпишување на нов договор на УЕФА со ФАРЕ.

Играчите на Шкотска нема да клекнат против расизам пред почетокот на натпреварите

Ивона Петрова — Fri, 11 Jun 2021 08:46:17 +0000

Шкотските репрезентативци најавија дека нема да клекнат пред натпреварите на Европското фудбалско првенство 2020. Наместо тоа, играчите ќе застанат пред почетниот свиреж. Шкотскиот капитен Ендру Робертсон рече дека посветеноста на тимот за ставање крај на дискриминацијата не е намалена. – Важно е да продолжиме да го решаваме прашањето на расизмот и да разговараме за потребата од промена на размислувањето и однесувањето на луѓето, изјави играчот на Ливерпул. Шкотска игра во групата Ц со Англија, чии фудбалери ќе продолжат да клекнуваат во знак на поддршка за движењето „Животите на црномурестите се важни“.

Познато е кој член од кралското семејство е “расистот“ за кого зборуваа Меган и Хари

Ивана Ефремовски — Sun, 04 Apr 2021 15:45:02 +0000

Обвинувањата за расизам во британското кралско семејство кои Меган Маркл и принцот Хари ги изнесоа во шокантното интервју со Опра Винфри го вознемирија целиот свет. Бидејќи двајцата одбија да откријат кој бил толку загрижен за бојата на кожата на нивниот син Арчи, шпекулациите и претпоставките не стивнуваат. Контроверзната британска авторка Лејди Колин Кемпбел тврди дека станува збор за принцезата Ана, ќерката на кралицата Елизабета Втора. Кемпбел инсистира на тоа дека коментарот на Ана бил разбран погрешно. „Хари, заради споменувањето на културата, сфати дека станува збор за бојата на кожата. Ана изрази загриженост за последиците некој од толку различна култура да се приклучи на кралското семејство и рече дека тоа ќе предизвика проблеми не само за семејството, туку и за децата кои ќе излезат од таа врска. Хари веднаш побрза да ѝ го пренесе ова на Меган, која коментарот го поврза со бојата на кожата. Ова е личност која едвај чека да најде проблем таму каде што не постои“, тврди Лејди Колин. Кралското семејство, како и Меган и Хари, сè уште не ги коментираа овие тврдења. За потсетување, Меган во интервјуто со Винфри истакна дека кралското семејство не сакало да му ја даде титулата принц на Арчи поради загриженост за бојата на кожата. Кемпбел во својот подкаст „Chatting with Lady C“ рече дека дошло до недоразбирање затоа што, како што тврди, коментарот на принцезата Ана се однесувал на културните разлики меѓу Британците и Американците. Таа тврди дека тоа го дознала од извор од палатата.

Бакингемската палата се огласи по шокантното интервју на Меган и Хари

Ивона Петрова — Wed, 10 Mar 2021 08:00:54 +0000

Прашањето за расата, кое го покренаа принцот Хари и Меган Маркл во интервјуто со Опра Винфри, е загрижувачко и семејството ќе го решава приватно, соопшти вчера Бакингемската палата. Парот во интервјуто истакна дека членови на кралското семејство биле загрижени колку ќе биде темна бојата на кожата на Арчи, пред тој да се роди, па поради тоа е одлучено тој да не ја добие титулата принц. Палатата објави дека „сеќавањата може да се разликуваат“, но дека изнесените тврдења во нивното интервју се „земаат многу сериозно“. Во соопштението е наведено и дека кралското семејство е тажно откако дознао колку последните години биле предизвикувачки за парот. -Хари, Меган и Арчи секогаш ќе бидат многу сакани членови на семејството, се наведува во официјалното соопштението. Притисокот на Бакингемската палата беше исклучително голем по изјавата на Меган, дека најниската точка во семејните односи била кога неименуван член на кралското семејство го прашал Хари „колку е темна“ кожата на нивниот син Хари. Принцот Хари подоцна појасни дека таков коментар не стигнал ниту од кралицата Елизабета Втора, ниту од нејзиниот сопруг принцот Чарлс.

Обвинувањата за расизам – удар за британското кралско семејство

Тале Кристо — Tue, 09 Mar 2021 09:27:54 +0000

Изјавите на војвотката од Сасекс, Меган Маркл, која прилично недвосмислено го обвини британското кралско семејство за расизам, предизвикаа шок кај британското општество. И онака, долго време се пишуваше за заплетканите врски на принцот Хари и неговата сопруга со други членови на семејството, но од, наводно, вистинската причина зошто Хари и Меган побегнале од Велика Британија пред повеќе од една година, се чини, многумина се непријатно изненадени. Така, со своја реакција се јави и Кејт Грин, министер за образование на „владата во сенка“. – Сигурна сум дека (Бакингемската) палата ќе биде многу внимателна околу тоа што се случи и, се разбира, поданиците очекуваат што ќе се каже како одговор. Но, во никој случај не може да има изговори за расизам. Мислам дека е потребно да се открие што ќе се случува по овие изјави, вели Грин. Не помалку сериозни обвинувања од Хари и Меган беа упатени до британските таблоиди. Тие и помладиот син на принцезата Дијана имаат стари сметки. Значи, за британските теми, целата приказна стана само позаплеткана. Ајдара Сури, агент за недвижнини вели дека не е многу јасно што точно се случило завчера. – Обвинувањата се силни, но не можете да пресудите без да ги слушнете двете страни!, рече таа. Познавачите велат дека слични изјави, не само за расизам – се најлошото сценарио за кралското семејство. Но, по интервјуто, Опра Винфри истакна дека обвинувањата не се однесуваат ниту на кралицата, ниту на нејзиниот сопруг. И Емили Неш, новинарка во списанието „Хело“, смета дека ова е силен удар врз институцијата што го води Британскиот Комонвелт, домаќин на шефови на држави од целиот свет, и којашто придонесува многу за бројни добротворни цели. – Земете го, на пример, принцот од Велс (Чарлс, првиот престолонаследник) – и неговата прилично нова фондација. И тој ќе биде апсолутно уништен од ваквите обвинувања, вели таа. Британскиот премиер Борис Џонсон изјави дека сѐ ова е грижа на самото кралско семејство. Бакингемската палата засега сѐ уште не се јавила со официјално соопштение.