раст на цени – Kurir.mk

Раст на цените на дериватите и на јавниот превоз во Германија по истекувањето на субвенциите

Магдалена Андонова — Thu, 01 Sep 2022 17:14:56 +0000

Цените на бензините и на јавниот превоз во Германија денеска пораснаа со истекувањето на владините субвенции, што уште повеќе ги оптеретува потрошувачите кои веќе се борат со високите трошоци за енергија. Според најголемиот германски автомобилски клуб „ADAC“, просечната цена на литар бензин утрово е повисока за околу 0,25 евра споредбено со претходниот ден, додека дизел-горивото поскапело за околу десет центи. Во Германија денеска заврши привременото намалување на данокот на бензин и специјалните месечни билети за јавен превоз по цена од девет евра што Владата ги воведе во мај за да ги намали несаканите ефекти од инфлацијата. Намалената церна на билетот за јавен превоз беше поздравена како посебен успех бидејќи им овозможи на милиони луѓе да патуваат евтино низ земјата, намалувајќи ја емисијата јаглероден диоксид во атмосферата за околу 1,8 милиони метрички тони. Екологистите повикаа на изнајдување начин да се продолжи попустот на билетите за јавен превоз, на што министерот за транспорт одговори дека идејата е во фаза на разгледување. Владата се обидува да ги охрабри потрошувачите и компаниите да штедат енергија на кој било начин за да го спречат недостигот во зимските месеци, откако Русија драстично ја намали испораката природен гас за Германија. Неодамна беше најавено дека зимава ќе се намалува загревањето на јавните објекти, како и оти ќе се исклучуваат рекламните паноа и осветлувањето во текот на ноќта. (МИА)

Евростат: Раст на цените на производителите на индустриски производи во ЕУ

Магдалена Андонова — Wed, 03 Aug 2022 13:37:51 +0000

Во јуни продажните цени на производителите на индустриски производи во ЕУ и еврозоната се зголемија за повеќе од еден процент во однос на мај, а на годишно ниво се повисоки за над 35 отсто, најмногу под влијание на растот на цените на енергијата, покажа извештајот на Евростат. На ниво на ЕУ, продажните цени на производителите на индустриски производи во јуни се зголемени за 1,3 отсто во однос на мај, кога според ревидираните податоци се зголемени за 0,7 отсто, се вели во извештајот на Евростат. Во еврозоната цените се зголемија за 1,1 отсто, по растот од 0,5 отсто во мај, покажуваат ревидираните податоци. Производните цени на енергијата најмногу пораснаа на домашниот пазар, за 3,2 отсто на ниво на ЕУ и за 2,7 отсто во еврозоната.

Славески за растот на цените: Во договор со производителите во 2008 година не дозволивме раст на цените, само така се штити стандардот на граѓаните

Магдалена Андонова — Wed, 06 Oct 2021 12:05:33 +0000

Носителот на листа за советници на Град Скопје од ВМРО-ДПМНЕ, Трајко Славески на митингот во општина Центар истакна дека ВМРО-ДПМНЕ нема да дозволи да се покачат цените на прехрамбените производи и во дијалог со производителите ќе го заштитат стандардот на граѓаните. - Слушаме деновиве а тоа и го чувствуваме по нашите буџети и по нашите џебови се најавува зголемување на цените на храната до крајот на годината за 50 проценти. Невешто се негира ова. Слушаме од министерот за економија дека ќе замрзнувале цени на некои производи, каде живееме, ние повозрасните знаеме дека ако на пекарот му ја ограничите цената на лебот на 20 денари а трошоците кои што растат му се 30 денари за леб ќе нема леб. Ќе има редици пред продавниците за леб, за млеко. ние не сакаме и нема тоа да го дозволиме а знаеме како. Јас се сеќавам иста или слична ситуација имавме далечната 2007/ 2008 година, кога имаше пораст на цените на храната и енергијата на светските берзи но што се случи, имавме само мали турболенции но цените не се покачија затоа што знаевме како во дијалог со производителите да го заштитиме стандардот на грашаните, истакна Славевски.